Go long ol haf insaed long hem

Go long lis blong ol haf

 LAEF STORI

Long Stat Mi Pua Be Long En Mi Rij

Long Stat Mi Pua Be Long En Mi Rij

Mi mi bon long wan smol haos we oli wokem long wud, long smol taon ya Liberty, long Indiana, Amerika. Papa mo mama blong mi i gat wan boe mo tu gel finis. Afta we mi mi bon, mama i bonem tu boe mo wan gel bakegen.

Smol haos we mi bon long hem

LONG ol yia we mi skul, laef i no jenis tumas. Ol yangfala we mi skul wetem olgeta long klas wan, mi gohed blong skul wetem olgeta go kasem we mi finisim skul. Mi save nem blong bighaf blong ol man long taon, mo olgeta oli save nem blong mi.

Mi gat sikis brata mo sista, mo taem mi smol, mi wok long fam

Raonabaot long taon ya Liberty, i gat ol smosmol fam we oli planem kon long olgeta. Taem mi mi bon, papa blong mi i wok long wan fam. Taem mi kam yangfala, mi lan blong draevem trakta mo mekem ol wok long fam.

Mi no save papa blong mi taem hem i yang, from we taem mi mi bon, hem i gat 56 yia mo Mama i gat 35 yia. Nating se i olsem, Papa i strong mo i helti. Hem i laekem blong wok had, mo i tijim ol pikinini blong hem tu blong oli laekem had wok. Hem i no winim plante mane, be mifala i gat kakae, klos, mo ples blong slip. Mo hem i spenem plante taem wetem mifala. Hem i ded taem hem i gat 93 yia, mo Mama i ded taem hem i gat 86 yia. Tufala i no wosipim Jehova. Wan brata blong mi nomo i stap long trutok, mo stat long 1972 kasem naoia, hem i mekem wok blong elda.

 YANGTAEM BLONG MI

Mama i tekem mifala i go long Baptis jos evri Sande. Hem i strong long skul blong hem. Taem mi gat 12 yia, mi harem oli tokbaot Triniti. Ale mi askem long Mama se: “?Olsem wanem Jisas i Pikinini mo Papa semtaem?” Mi tingbaot yet ansa blong hem se: “Boe, hemia wan had kwestin. Yumi no naf blong kasem save long samting ya.” Tingting blong mi i fasfas. Nating se i olsem, taem mi gat 14 yia, mi baptaes long wan krik. !Oli draonem mi tri taem, wan taem blong Papa, wan taem blong Pikinini, mo wan taem blong tabu spirit!

1952—Taem mi gat 17 yia, mi joenem ami

Taem mi stap go long hae skul, wan fren blong mi we i mekem spot ya boksing, i pulum mi blong joenem hem. Ale, mi tren, mo mi kam memba blong wan klab. Be mi mi nogud long spot ya, taswe afta we mi mekem sam faet, mi lego. Biaen, oli singaot mi blong mi joen long ami, mo oli sanem mi mi go long Jemani. Ol lida blong ami oli sanem mi mi go long wan skul blong ami, from we oli talem se mi save kam wan gudfala lida. Oli wantem se mi wok long ami ful laef blong mi. Be mi no wantem, taswe, long 1956, afta we mi stap tu yia long ami, mi lego. Be smoltaem biaen, mi joen long wan defren ami.

1954-1956—Mi spenem tu yia long ami

LAEF BLONG MI I JENIS

Bifo we mi save trutok, mi folem tingting blong ol man raonabaot mo ol muvi long saed blong fasin blong wan man. Mi ting se ol woman nomo oli tokbaot Baebol, be i no ol man. Biaen mi lanem sam samting we oli jenisim laef blong mi. Wan dei, mi draevem naesfala red trak blong mi i go long taon, nao tu yangfala woman we tufala i Witnes blong Jehova oli sakem han mo singaot mi. Tufala i smol sista blong man we i maredem bigfala sista blong mi. Tufala i bin givim Wajtaoa mo Wekap! long mi, be mi luk se i had blong kasem save long Wajtaoa. Ale, tufala i singaot mi mi go long wan smol miting blong stadi Baebol, hemia Buk Stadi blong kongregesen we oli mekem long haos blong olgeta. Mi talem long tufala se bae mi luk. Tufala i smael mo askem se: “?Yu promes?” Mi ansa se: “Yes, mi promes.”

Afta, mi sore we mi bin talem samting ya, be mi no save brekem promes blong mi, ale long naet ya mi go long miting. !Mi sapraes long ol pikinini we oli save gud Baebol! Evri Sande mi go long jos wetem mama blong mi, be mi no save Baebol. Mi wantem lanem moa, ale mi agri blong stadi Baebol. Kwiktaem nomo mi lanem nem blong God ya we i gat olgeta paoa, hemia Jehova. Plante yia bifo, mi askem kwestin long Mama long saed blong ol Witnes blong Jehova, be hem i talem se: “O, olgeta oli wosipim wan olfala man we nem blong hem Jehova.” !Be taem mi stadi, mi luksave trutok!

Mi gohed gud, from we mi save se hemia trutok. Long Maj 1957, naen manis nomo afta we mi go long fas miting ya, mi mi baptaes. Tingting blong mi i jenis fulwan. Mi glad tumas long ol save blong Baebol long saed blong ol fasin we wan man i mas gat. Jisas i wan man we i stret gud olgeta, mo hem i gat moa paoa i bitim eni narafala man. Be hem i no joen long ol faet. Ol man “oli mekem i strong tumas long hem, be hem i mekem tingting blong hem i stap daon, nao i karem ol samting ya,” olsem profet tok i talem. (Aesea 53:2, 7) Mi kasem save  se wan man blong Jisas i “mas kaen long evriwan.”—2 Timoti 2:24.

Long nekis yia, 1958, mi stat blong mekem wok blong paenia. Be biaen, mi stop blong smoltaem. ?From wanem? Mi mared long Gloria, wan long tufala gel ya we oli singaot mi mi go long buk stadi. Mi neva sore long desisen ya. !Gloria i olsem wan sas ston long taem ya, mo i sem mak yet! !Long tingting blong mi, hem i sas moa i bitim wan gudfala daemon, mo mi glad se mi maredem hem! Naoia bae hem i talem stori blong hem:

“Mi mi gat 16 brata mo sista. Mama blong mi we i wan Witnes, hem i ded taem mi gat 14 yia nomo. Afta, papa blong mi i stadi Baebol. From we Mama i no moa stap, Papa i mekem plan se, bigfala sista blong mi we i stap long las yia blong hae skul bambae i go long skul wan dei, mo mi bae mi go long nekis dei. Sipos mitufala i gohed olsem, bambae wan i stap long haos oltaem blong lukaot long ol smol brata mo sista blong mifala. Mo tu, mitufala i rerem kakae blong ful famle bifo we Papa i kambak long wok. Hed tija blong skul i agri long plan ya, mo mitufala i gohed blong mekem olsem go kasem we sista blong mi i finisim skul. Tu defren famle we oli Witnes oli stadi wetem mifala, mo 11 long mifala i kam Witnes blong Jehova. Mi mi laekem wok blong prij, nating se mi mi woman blong sem. Long ol yia we i pas, man blong mi Sam, i givhan long mi bigwan blong mi winim sem ya.”

Mi mo Gloria i mared long Februari 1959. Mitufala i glad blong mekem wok blong paenia tugeta. Long sem yia, long Julae, mitufala i fulumap pepa blong wok long Betel. Mitufala i wantem tumas blong wok long wol hedkwota. Brata Simon Kraker i storian wetem mitufala mo i talem se Betel i no stap singaot olgeta we oli mared. Mitufala i wantem tumas blong wok long Betel, be mitufala i mas wet plante yia.

Mitufala i raetem leta i go long hedkwota blong askem ol ples we oli nidim moa pablisa. Oli talem wan ples nomo, hemia Pine Bluff, Arkansas. Long taem ya i gat tu kongregesen nomo long Pine Bluff, wan blong ol blakman mo narawan blong ol waetman. Oli sanem mitufala i go long kongregesen blong ol blakman, we i gat 14 pablisa nomo.

MIFALA I FESEM HADTAEM

Maet yu wantem save from wanem ol Witnes blong Jehova oli seraot long ol blakman mo waetman. Long taem ya i olsem nao, from we oli mekem wan loa se blakman mo waetman i no save joen wanples. Mo tu, samting ya i save mekem faet i kamaot. Long plante ples, ol brata oli fraet se bambae ol man oli save spolem Haos Kingdom sipos blakman mo waetman i joen blong mekem wosip. Samtaem i stap hapen olsem. Sipos ol blak Witnes oli prij long ples we ol waetman oli stap long hem, polis bae i holem olgeta mo maet oli kilim olgeta tu. Taswe, blong gohed blong prij, mifala i mas obei long loa mo hop se ol samting bambae i jenis.

I no isi blong prij. Taem mifala i prij long eria we i gat ol blakman, wanwan taem mifala i noknok long doa blong wan waetman. Mifala i mas kwik blong mekem desisen se: ?Bambae mifala i storian smol long Baebol, o bambae mifala i talem sore mo aot? Long taem ya i olsem nao.

Mifala ol paenia i mas winim naf mane blong pem ol samting we mifala i nidim. Klosap oltaem mifala i winim 3 dola long wan dei. Gloria i klinim haos blong samfala. Long wan haos, oli letem mi mi givhan long Gloria, blong hem i save finisim kwik. Mo oli givim kakae long mitufala long medel dei. Evri wik, Gloria i aeanem ol klos blong wan famle. Mi mi klinim yad, wasem ol windo blong haos, mo mekem sam narafala smosmol wok raonabaot long haos. Mitufala i wasem windo blong haos blong wan waet famle. Gloria i wasem windo long insaed, mo mi mi wasem afsaed long semtaem. Oli givim kakae long medel dei from we hemia i tekem fuldei. Gloria i kakae insaed long haos, be hem i mas stap longwe long famle. Mi mi kakae afsaed, be mi no wari, kakae i gud tumas. Famle ya i kaen, be ol man raonabaot oli spolem tingting blong olgeta. Mi tingbaot wan taem we mitufala i go long stesen blong bensin. Afta we mi fulumap  bensin long trak, mi askem long wan waetman we i wok long ples ya sipos Gloria i save yusum toelet. Man ya i kros, i lukluk nogud long mi, mo i talem se: “Mifala i lokem doa.”

MI NO SAVE FOGETEM KAEN FASIN BLONG OL BRATA

!Mitufala i laekem tumas blong joen wetem ol brata mo sista, mo blong go long wok blong prij! Taem mitufala i jes kam long Pine Bluff, mitufala i stap long haos blong brata we i lukaot long kongregesen. Woman blong hem i no stap long trutok, be Gloria i stat blong stadi Baebol wetem hem. Mi statem wan stadi wetem gel blong tufala mo man blong hem. Woman ya mo gel blong hem, tufala tugeta i mekem desisen blong baptaes.

Mitufala i gat ol gudfala fren long kongregesen we ol waetman oli stap long hem. Oli singaot mitufala i go kakae long haos blong olgeta, be mitufala i mas wet blong ples i tudak, olsem nao bae i no gat man i luk we ol blakman mo waetman oli joen wanples. Wan grup, nem blong hem Ku Klux Klan (KKK), i stap wok had mo faet tu blong seraotem ol waetman mo blakman. Mi tingbaot wan naet long taem blong Halowin, mi luk wan man i stap sidaon long vranda blong haos blong hem, i mekem flas blong hem blong soemaot waet klos mo hat we hem i werem, olsem ol memba blong KKK. Be ol trabol ya i no blokem ol brata blong oli soemaot kaen fasin. Wan yia, long hot taem, mitufala i no gat naf mane blong go long asembli, ale wan brata i pem trak blong mitufala, hemia wan Ford trak we oli wokem long 1950. Wan manis biaen, long wan dei we i hot, mitufala i stap wokbaot nomo blong prij long ol haos wanwan, mo go long ol Baebol stadi. Be taem mitufala i kamhom, mitufala i sapraes blong luk se trak blong mitufala i stap long fored blong haos! Mitufala i luk wan smol leta we i stap long glas blong hem, i se: “Mi givimbak trak blong yutufala olsem wan presen. Brata blong yu.”

Long 1962, i gat wan narafala samting we i tajem hat blong mi. Oli singaot mi blong go long Kingdom Ministri Skul long South Lansing, New York, hemia trening blong wan manis blong olgeta we oli lukaot long ol kongregesen, ol eria, mo ol distrik. Long taem ya mi no gat wok, taswe mitufala i gat smol mane nomo. Be wan kampani blong telefon i bin singaot mi blong askem sam kwestin long mi. Sipos oli givim wok long mi, hemia bambae i fastaem we oli tekem wan blakman blong wok long kampani ya. Ale, oli talem se oli wantem givim wok ya long mi. ?Bambae mi mekem wanem? From we mi no gat mane blong go long New York, mi tingbaot se maet i moagud mi tekem wok ya. Mi rere blong raetem leta i go long Betel, nao wan samting i hapen we mi no save fogetem.

Long eli moning, wan sista we man blong hem i no stap long trutok, i noknok long doa mo i givim wan envlop long mi, we i fulap long mane. Hem wetem sam pikinini blong hem, oli stap girap eli evri moning blong go pikimap koten long ol plantesen,  mo klinim koten ya. Oli winim naf mane blong pem rod blong mi blong go long New York. Sista ya i talem se: “!Go long skul mo lanem plante samting! !Biaen yu kambak mo tijim mifala!” Mi askem long kampani blong telefon sipos mi save stat wok afta faef wik. Oli talem stret se: “!Nogat!” Be i oraet nomo. Mi mekem desisen finis. !Mi glad tumas se mi no tekem wok ya!

Hemia tingting blong Gloria long Pine Bluff: “!Mi laekem tumas teritori ya! Mi gat 15 kasem 20 Baebol stadi. Long moning mitufala i prij long ol haos wanwan, mo long aftenun mitufala i mekem ol Baebol stadi. Samtaem mitufala i gohed go kasem 11 klok long naet. !Wok blong prij i givim bigfala glad! Mi wantem gohed nomo long ples ya. Blong talem stret, taem oli askem long man blong mi blong i mekem wok blong eria elda, mi no wantem lego ples ya. Be Jehova i gat defren tingting.”

WOK BLONG ERIA ELDA

Taem mitufala i stap long Pine Bluff, mitufala i fulumap pepa blong askem blong kam spesel paenia. Mitufala i ting se hemia nao samting we bambae i hapen. ?From wanem? From we Distrik elda i wantem se mitufala i givhan long wan kongregesen long Texas, mo mitufala i glad. Ale mitufala i wet blong kasem ansa, be i no gat wan leta i kam. Longtaem biaen, mitufala i kasem wan leta we i talem se bae mi mekem wok blong eria elda. Hemia long Jenuware 1965. Brata Leon Weaver, we naoia hem i kodineta blong Branj Komiti blong Yunaeted Stet, hem tu i kam eria elda long semtaem.

Mi mi fraet long wok blong eria elda. Wan yia bifo we mi stat, distrik elda ya James A. Thompson, i storian wetem mi blong tokbaot ol fasin we wan gudfala eria elda i nidim, mo olsem wanem mi save kamgud moa. Taem mi stat mekem wok ya, advaes blong hem i givhan gud long mi. Brata Thompson i fas distrik elda we i wok wetem mi taem mi mekem wok blong eria elda. Mi lanem plante samting long gudfala brata ya.

Mi glad long help blong ol brata we oli stap longtaem long trutok

Long taem bifo, oli no givim plante trening long ol eria elda. Mi wajem wan eria elda blong wan wik taem hem i visitim kongregesen. Biaen, hem i wajem mi blong wan wik taem mi visitim narafala kongregesen. Hem i givim sam advaes, be afta long hemia, mi mo Gloria nomo. Mi tingbaot tok we mi talem long Gloria se: “?From wanem hem i mas lego yumitu?” Be sloslo, mi kasem save wan samting we i impoten. Oltaem i gat ol gudfala brata we oli save givhan long yumi, sipos yumi letem olgeta oli givhan. Mi tingbaot yet ol nambawan advaes we mi kasem long ol brata we oli stap longtaem long trutok, olsem J. R. Brown we hem i wan eria elda long taem ya, mo Fred Rusk we i wok long Betel.

 Long taem ya, ol man long evri ples oli agensem narafala from kala blong skin. Wan taem, KKK i maj long taon ya we mitufala i stap visitim long Tennessee. Mi tingbaot wan narafala taem tu, we mitufala i go long wan restoron blong kakae smol, nao mi askem sipos mi save yusum toelet. Wan man we i kros tumas mo i gat ol tatu olbaot long hem blong soemaot se hem i no laekem ol blakman, i folem mi taem mi go long toelet. Be biaen, wan waet brata we i bigman i bitim mitufala i kam insaed, mo i singaot se: “?Evri samting i oraet Brata Herd?” Kwiktaem nomo, narafala man ya i aot we i no yusum toelet nating. Long ol yia we oli pas, mi luksave se i no kala blong skin we i mekem se wan man i agensem narafala, be sin we i stap long yumi evriwan. Mo mi luksave tu se wan trufala brata i rere blong ded from yu, nomata wanem kala blong skin blong yu.

LONG EN MI RIJ

Mitufala i spenem 12 yia long wok blong eria elda mo 21 yia long wok blong distrik elda. Ol yia ya oli gud tumas, mitufala i glad, mo i gat ol gudfala samting i hapen blong leftemap tingting blong mitufala. Long Ogis 1997, mitufala i kasem wan blesing we mitufala i drim long hem plante yia. Oli singaot mitufala blong wok long Betel long Yunaeted Stet. Hemia 38 yia afta we mitufala i fulumap pepa fastaem. Wan manis biaen, mitufala i go long Betel. Mi bin ting se ol brata long Betel oli singaot mi blong givhan long olgeta blong smoltaem, be i no olsem.

Gloria i olsem wan sas ston taem mi maredem hem, mo i sem mak yet

Fastaem mi wok long Seves Dipatmen. !Mi lanem fulap samting! Long ofis ya, ol brata oli kasem plante had kwestin long ol elda mo eria elda. Mi glad tumas long fasin blong ol brata we oli trenem mi wetem kaen fasin mo longfala tingting. Sipos mi wok bakegen long dipatmen ya, bambae mi lanem plante moa samting bakegen.

Mi mo Gloria i laekem Betel tumas. Long ful laef blong mi, mi girap eli long moning, mo hemia i givhan bigwan taem yu wok long Betel. Afta we wan yia i pas, mi stat blong givhan long Seves Komiti blong Hed Kampani. Mo long 1999, mi kam wan memba blong Hed Kampani. Wok ya i tijim mi long plante samting. Ating bigfala lesen we mi lanem, hemia se i no wan man we i hed blong Kristin kongregesen, be Jisas Kraes nomo.

Long 1999, mi kasem bigfala blesing blong kam memba blong Hed Kampani

Taem mi tingting bak long laef blong mi, samtaem mi harem olsem profet Amos. Hem i lukaot long ol sipsip mo i wok long plantesen blong fig, wan kakae blong ol puaman. Be God i yusum Amos olsem wan profet mo i givim ol bigfala blesing long hem. (Amos 7:14, 15) !Long sem fasin, Jehova i yusum mi we mi pikinini blong wan pua fama long Liberty, Indiana, mo i givim ol blesing we oli plante tumas blong talem! (Ol Proveb 10:22) !Long stat mi pua, be mi harem se long en mi rij moa i bitim samting we mi save tingbaot!