Go long ol haf insaed long hem

Go long lis blong ol haf

 STADI 12

Soem Se Yu Kasem Save Long Filing Blong Narafala

Soem Se Yu Kasem Save Long Filing Blong Narafala

“Yufala evriwan . . . i mas safa wetem olgeta we oli safa.” —1 PITA 3:8.

SINGSING 90 Yumi Leftemap Tingting Blong Yumi

BIGFALA TINGTING *

1. Folem 1 Pita 3:8, ?from wanem yumi glad blong joen wetem olgeta we oli kasem save filing blong yumi?

YUMI harem gud taem yumi stap wetem ol man we oli kasem save long filing blong yumi mo oli mekem yumi glad. Oli traem blong kasem save long tingting mo filing blong yumi taem yumi kasem trabol. Mo tu, oli save se yumi nidim help mo oli givhan, nating se yumi no askem. Yumi glad mo yumi talem tangkiu from we oli stap ‘safa wetem yumi,’ * nating se ol trabol ya oli blong yumi.—Ridim 1 Pita 3:8.

2. ?From wanem yumi mas traehad blong kasem save filing blong narafala?

2 Yumi wantem soemaot se yumi kasem save filing blong narafala. Be samtaem i no isi. ?From wanem? Wan risen hemia from we yumi sin man. (Rom 3:23) Taswe, yumi mas faet agensem fasin ya blong tingbaot yumi wan, mo wok had blong kasem save filing blong ol narafala. Nambatu risen se, sam long yumi oli stap harem nogud yet from samting we oli bin mekem bifo. Mo namba tri risen se, fasin blong ol man raonabaot long yumi i save pulum yumi. Long ol lasdei ya, plante man bambae “oli tingbaot olgeta nomo.” (2 Tim. 3:1, 2) ?Wanem i save givhan long yumi blong winim ol samting we i mekem se i had blong tingbaot filing blong narafala?

3. (1) ?Olsem wanem yumi save kamgud moa long fasin ya blong kasem save long filing blong narafala? (2) ?Bambae yumi tokbaot wanem long stadi ya?

3 Blong kamgud moa long fasin blong kasem save long filing  blong narafala, yumi mas folem fasin blong Jehova mo Jisas. Jehova i stamba blong lav mo hem i soem gudfala eksampol long saed ya. (1 Jon 4:8) Jisas i folem gud fasin blong Papa blong hem. (Jon 14:9) Taem hem i stap long wol, hem i soem olsem wanem blong gat sori long man. Long stadi ya, bambae yumi tokbaot olsem wanem Jehova mo Jisas i soemaot fasin ya. Mo, bambae yumi tokbaot olsem wanem yumi save folem fasin blong tufala.

JEHOVA I KASEM SAVE FILING BLONG OL NARAFALA

4. ?Olsem wanem Aesea 63:7-9 i soemaot se Jehova i tingbaot filing blong ol man blong hem?

4 Baebol i talem se Jehova i tingbaot filing blong ol man blong hem. Eksampol, traem tingbaot ol man Isrel bifo, taem oli gotru long plante trabol. Baebol i talem se: “Taem olgeta oli kasem trabol, samting ya i mekem hem i harem nogud.” (Ridim Aesea 63:7-9.) * Mo tu, Jehova i talem long profet Sekaraea se taem ol man oli spolem ol man blong hem, i olsem we oli mekem long hem stret. Jehova i talem long ol man blong hem se: “Taem wan man i kilim yufala, i olsem we man ya i kilim ae blong mi stret.” (Sek. 2:8) !Hemia i soemaot olsem wanem Jehova i tingbaot ol man blong hem!

Jehova i tekemaot ol man Isrel long Ijip from we hem i sore long olgeta (Haf 5)

5. ?Jehova i mekem wanem taem ol man blong hem oli safa?

5 Jehova i no sore nomo long ol man blong hem we oli safa, be hem i tekem aksen blong halpem olgeta. Taem ol man Isrel oli safa from we oli wok slef long Ijip, Jehova i kasem save se oli harem nogud tumas, nao samting ya i pusum hem blong i tekem aksen. Jehova i talem long Moses se: “Mi mi luk finis ol rabis fasin ya we ol man Ijip oli stap mekem long yufala. Mi harem krae blong olgeta . . . Mi mi save finis we oli harem nogud tumas, mo oltaem mi stap tingting long olgeta. Mo from samting ya, mi mi kamdaon blong tekemaot olgeta long han blong ol man Ijip.” (Eks. 3:7, 8) Jehova i sore tumas olgeta, taswe hem i tekemaot olgeta long Ijip. Plante handred yia biaen, taem oli stap long Promes Lan, ol  enemi oli kam mekem faet long olgeta. ?Jehova i mekem wanem long taem ya? Hem i “tekemaot olgeta long han blong ol enemi blong olgeta we oli stap spolem olgeta. Hem i stap sevem olgeta, from we hem i gat sore long olgeta.” Yes, Jehova i sore long olgeta, mo i givhan long olgeta. Hem i sanem ol jaj blong tekemaot olgeta long ol enemi blong olgeta.—Jaj. 2:16, 18.

6. Tokbaot olsem wanem Jehova i tingbaot filing blong wan man we tingting blong hem i no stret.

6 Jehova i soem se hem i tingbaot filing blong ol man blong hem, nating se samtaem tingting blong olgeta i no stret. Tingbaot stori blong Jona. God i sanem hem blong i go talemaot mesej blong jajmen long ol man Nineve. Taem oli tanem tingting blong olgeta, God i no spolem olgeta. Be Jona i no glad, hem i “kros tumas” from we profet tok we hem i talemaot i no kamtru. Nating se i olsem, Jehova i gat longfala tingting, mo i halpem Jona blong i stretem tingting blong hem. (Jona 3:10–4:11) Biaen, Jona i kasem save lesen we Jehova i wantem tijim long hem, mo Jehova i yusum hem blong i raetemdaon stori ya blong tijim yumi.—Rom 15:4. *

7. ?Fasin we Jehova i soem long ol man blong hem i mekem yumi sua long wanem?

7 Fasin we Jehova i mekem long ol man blong hem, i soem se hem i gat sore. Hem i savegud ol trabol blong yumi wanwan. Jehova i “save tingting [hat]” blong ol man. (2 Kron. 6:30) Hem i kasem save long ol filing mo ol tingting blong yumi we i had blong yumi talemaot long narafala, mo ol samting we yumi no naf blong mekem. Mo tu, bambae “hem i no save letem wan samting i traem [yumi] we i strong tumas blong [yumi] winim.” (1 Kor. 10:13) !Promes ya i rili leftemap tingting blong yumi!

JISAS I KASEM SAVE FILING BLONG OL NARAFALA

8-10. ?Wanem i halpem Jisas blong i kasem save long filing blong ol narafala?

8 Taem Jisas i stap long wol, hem i kasem save long filing blong ol narafala. I gat tri samting we i halpem Jisas blong i soemaot fasin ya. Faswan, Jisas i folem gud ol fasin blong Papa blong hem long heven. Hem i lavem ol man olsem Jehova. Nating se Jisas i glad long evri samting we hem mo Papa blong hem oli wokem, be hem i talem se: “Mi hapi tumas blong luk ol man.” (Prov. 8:31) Lav nao i pusum Jisas blong i tingbaot filing blong ol narafala.

9 Nambatu, Jisas i save samting we i stap long hat blong ol man, olsem Jehova. Hem i naf blong save samting we i pusum ol man blong mekem wan samting, mo ol filing blong olgeta. (Mat. 9:4; Jon 13:10, 11) Taswe, taem Jisas i luk se ol man oli harem nogud tumas, hem i stap tingbaot olgeta mo i wantem givhan long olgeta.—Aes. 61:1, 2; Luk 4:17-21.

10 Nambatri, Jisas i fesem ol hadtaem we ol man oli fesem. Eksampol, Jisas i gruap long wan famle we i pua. Taem hem i wok wetem papa blong hem Josef, hem i lanem blong mekem ol strong wok. (Mat. 13:55; Mak 6:3) I luk olsem se Josef i ded bifo we Jisas i finisim minista wok blong hem. Taswe Jisas i kasem save se man i harem olsem wanem taem wan famle blong hem i ded. Mo tu, Jisas i kasem save long filing ya blong gruap long wan famle we oli nogat sem bilif. (Jon 7:5) Hemia sam samting we oli halpem Jisas blong i kasem save long filing mo hadtaem blong ol man long wol.

Jisas i sori long man we sora blong hem i fas nao i tekem hem i gowe long ol man, mo i mekem hem i kam gud bakegen (Haf 11)

11. ?Olsem wanem Jisas i soem se hem i tingbaot filing blong ol narafala? Yu eksplenem. (Yu luk pija long fran pej.)

 11 Taem Jisas i mekem ol merikel, hemia i soemaot klia se hem i tingbaot filing blong ol narafala. Jisas i no jes mekem ol merikel from we hem i mas mekem. Nogat. Hem i “sore tumas” long ol man we oli stap safa. (Mat. 20:29-34; Mak 1:40-42) Traem tingbaot filing blong Jisas taem hem i tekem man ya we sora blong hem i fas, i gowe long ol hip man blong i hilim hem, o taem hem i mekem boe blong wan wido i laef bakegen. (Mak 7:32-35; Luk 7:12-15) Jisas i sore tumas long ol man ya mo i wantem halpem olgeta.

12. ?Olsem wanem Jon 11:32-35 i soem se Jisas i kasem save long filing blong Mata mo Meri?

12 Jisas i kasem save filing blong Mata mo Meri. Taem hem i luk we tufala i krae from brata blong tufala, Lasaros, hem tu “i krae.” (Ridim Jon 11:32-35.) Hem i save se bambae hem i mekem Lasaros i laef bakegen. Taswe hem i no krae from we hem i lusum wan gudfala fren, be hem i krae from we hem i kasem save filing blong Mata mo Meri.

13. From we Jisas i kasem save filing blong ol man, ?olsem wanem samting ya i leftemap tingting blong yumi?

13 Taem yumi kasem save filing we Jisas i gat long ol man, hemia i rili leftemap tingting blong yumi. I tru, yumi no stret gud olgeta olsem Jisas. Be, yumi lavem hem from fasin blong hem blong kasem save long filing blong ol narafala. (1 Pita 1:8) Yumi haremgud tumas blong save se naoia, hem i rul olsem King long Kingdom blong God. Mo i no longtaem, bambae hem i finisim olgeta fasin safa. Jisas nao i beswan man we i save halpem yumi blong yumi no moa harem nogud, from we hem tu i bin laef long wol bifo. Yes, i wan blesing blong gat wan Rula we ‘i savegud we yumi no gat paoa, nao i sore long yumi.’—Hib. 2:17, 18; 4:15, 16.

FOLEM FASIN BLONG JEHOVA MO JISAS

14. Folem Efesas 5:1, 2, ?yumi wantem mekem wanem?

14 Taem yumi tingbaot eksampol blong Jehova mo Jisas, hemia i givhan long yumi blong tingbaot ol narafala. (Ridim Efesas 5:1, 2.) Yumi no save luk samting we i stap long hat blong ol man. Be, yumi save traehad blong kasem save long ol filing mo nid blong olgeta. (2 Kor. 11:29) Yumi no olsem ol man blong wol we oli tingbaot olgeta nomo. Yumi traehad blong folem advaes blong Baebol we i se: “Yufala i no mas tingbaot yufala nomo, be yufala i mas tingbaot ol narafala man tu.”—Fil. 2:4.

(Haf 15-19) *

15. ?Hu olgeta we oli mas soem se oli kasem save long filing blong ol narafala?

15 Ol elda long kongregesen oli mas kasem save long filing blong ol narafala. Mo Jehova i wantem se oli lukaot gud long ol sipsip blong hem. (Hib. 13:17) Ol elda oli mas gat sore long ol brata mo sista, blong oli save halpem olgeta. ?Olsem wanem ol elda oli save soemaot se oli kasem save long filing blong ol narafala?

16. ?Wan elda we i gat sore i mekem wanem, mo from wanem samting ya i impoten?

16 Wan elda we i gat sore long ol brata mo sista, i spenem taem wetem olgeta. Hem i askem ol kwestin mo i lesin gud long olgeta mo i gat longfala tingting. Hemia i impoten moa taem wan sipsip i wantem tokbaot ol tingting mo filing blong hem, we i had blong hem i talemaot long ol narafala. (Prov. 20:5) Taem wan elda i glad blong spenem taem wetem ol brata mo sista, hemia i mekem se oli gat tras, oli frengud, mo oli lavlavem olgeta.—Wok 20:37.

17. ?Plante brata mo sista oli talem wanem? Talem wan stori.

17 Plante brata mo sista oli talem se samting we oli laekem moa, hemia taem ol elda oli soemaot se oli tingbaot filing blong ol narafala. ?From wanem? Adelaide i talem se: “I  moa isi blong toktok long olgeta from we yu save se bambae oli kasem save long tingting blong yu. Mo yu luksave long ol toktok blong olgeta se oli tingbaot yu.” Wan brata we i glad long fasin blong wan elda i talem se: “Mi luk wota i fulap long ae blong wan elda, taem mi talemaot samting we i hapen long mi. Bambae mi neva fogetem samting ya.”—Rom 12:15.

18. ?Olsem wanem blong soemaot se yumi kasem save long filing blong ol narafala?

18 I tru, i no ol elda nomo we oli mas soemaot se oli tingbaot filing blong ol narafala. Yumi evriwan i save soemaot fasin ya. ?Olsem wanem blong mekem? Yu traem kasem save long ol samting we famle blong yu mo ol brata mo sista oli stap fesem. Yu soem se yu tingbaot ol yangfala long kongregesen, olgeta we oli sik, ol olfala, mo olgeta we oli lusum wan famle long ded. Askem sipos oli oraet. Nao yu lesin gud taem oli stap talemaot tingting blong olgeta. Yu mas soemaot se yu rili kasem save long samting we oli stap go tru long hem. Yu talem long olgeta se yu yu rere blong givhan. Taem yumi mekem olsem, yumi soemaot se yumi lavem olgeta.—1 Jon 3:18.

19. ?From wanem yumi mas rere blong jenisim tingting taem yumi givhan long narafala?

19 Yumi mas rere blong jenisim tingting blong yumi, taem yumi stap givhan long ol narafala. ?From wanem? From we wanwan man i gat defren fasin. Samfala, taem oli kasem trabol oli wantem tokbaot, be samfala nogat. Yumi wantem givhan, be yumi no mas askem ol kwestin we i save mekem oli sem. (1 Tes. 4:11) Nating se ol narafala oli talemaot tingting blong olgeta, samtaem bambae yumi no agri wetem wanem we oli talem. Be, yumi mas luksave se hemia nao tingting blong olgeta. Taswe, yumi mas rere blong lesin mo yumi no mas hareap blong toktok.—Mat. 7:1; Jem. 1:19.

20. ?Bambae yumi tokbaot wanem long nekis stadi?

20 Yumi wantem soem se yumi tingbaot filing blong ol narafala long kongregesen, be yumi wantem soemaot fasin ya tu long wok blong prij. ?Olsem wanem blong soemaot fasin ya taem yumi prij? Long nekis stadi bambae yumi tokbaot samting ya.

SINGSING 130 Yumi Fogivim Ol Man

^ par. 5 Jehova mo Jisas i tingbaot filing blong ol narafala. Long stadi ya bambae yumi lanem olsem wanem blong folem eksampol blong tufala. Mo tu, bambae yumi tokbaot from wanem yumi mas soem se yumi kasem save long filing blong narafala, mo olsem wanem blong givhan long olgeta.

^ par. 1 MINING BLONG TOKTOK: “Safa wetem olgeta we oli safa” i minim se yumi traem blong kasem save long filing blong olgeta mo yumi traem putum yumi long ples blong olgeta. (Rom 12:15) Long stadi ya, “kasem save filing blong narafala” mo “tingbaot narafala” i minim sem samting.

^ par. 4 Aesea 63:9 (NW): “Taem olgeta oli kasem trabol, samting ya i mekem hem i harem nogud. Mo hem i sanem man blong karem tok blong hem blong i sevem olgeta. From lav mo sore blong hem, hem wan i pemaot olgeta. Hem i leftemap olgeta mo i karem olgeta, long olgeta dei blong bifo.”

^ par. 6 Jehova i soem sore tu long ol man blong hem we tingting blong olgeta i foldaon o we oli fraet. Traem tingbaot stori blong Hana (1 Saml. 1:10-20), Elaeja (1 King 19:1-18), mo Ebedmelek (Jer. 38:7-13; 39:15-18).

^ par. 66 PIJA: Ol miting oli givim janis blong yumi tingbaot ol narafala long plante defren rod. Yumi luk (1) wan elda i stap toktok kaen long wan yangfala pablisa mo mama blong hem, (2) wan papa mo gel blong hem i stap givhan long wan olfala sista blong go long trak, mo (3) tu elda i stap lesin long wan sista we i nidim advaes.