Go long ol haf insaed long hem

Go long lis blong ol haf

!Folem Gudfala Fasin Blong Tekem Narafala i Kam Long Haos!

!Folem Gudfala Fasin Blong Tekem Narafala i Kam Long Haos!

“Yufala i mas welkamem yufala we yufala i no toktok smosmol from.” —1 PITA 4:9.

SINGSING: 100, 87

1. ?Wanem ol hadtaem we ol fas Kristin oli fesem?

SAMWE long ol yia 62 kasem 64, aposol Pita i raet i go long ol brata mo sista olbaot long “Pontas, Galesia, Kapadosia, Esia, mo Bitinia.” (1 Pita 1:1) Olgeta ya oli gat ol defdefren kalja mo fasin blong laef. Oli stap fesem ol “hadtaem we oli olsem faea,” ol fasin agens, mo oli nidim we narafala i leftemap tingting mo givhan long olgeta. Mo tu, oli laef long wan taem we i strong tumas. Pita i talem se: “En blong evri samting i kam klosap.” Smoltaem biaen, i no 10 yia nating, Jerusalem i lus. ?Wanem bambae i givhan long ol Kristin ya blong oli winim had taem ya?—1 Pita 4:4, 7, 12.

2, 3. ?From wanem Pita i pulum ol brata mo sista blong oli welkamem olgeta? (Yu luk pija long stat blong stadi.)

2 Pita i pulum ol brata mo sista blong oli ‘welkamem olgeta.’ (1 Pita 4:9) Grik tok ya “welkamem” i min se man i “laekem mo i kaen long ol strenja.” Be Pita i pulum ol brata mo sista we oli save olgeta finis mo oli stap joen wanples blong mekem plante samting, blong oli ‘welkamem olgeta.’  ?Olsem wanem fasin ya i save givhan long olgeta?

3 Fasin ya bambae i mekem se oli laeklaekem olgeta moa. Maet yu save tingbaot wan gudfala taem we yu yu gat, taem narafala i singaot yu i go long haos blong hem. O maet yu tingbaot wan taem we yu yu singaot narafala i kam long haos blong yu, nao yu kasem save moa long hem mo yu laekem hem. Gudfala rod blong save gud ol brata mo sista, hemia blong welkamem olgeta. Ol Kristin long taem blong Pita oli mas laeklaekem olgeta moa, from we laef i stap kam strong moa. Long “ol las dei” ya, yumi mas mekem sem mak.—2 Timoti 3:1.

4. ?Wanem ol kwestin we bambae yumi tokbaot long stadi ya?

4 ?Olsem wanem yumi save welkamem ol brata mo sista? ?Wanem i save blokem yumi blong yumi no welkamem olgeta, mo olsem wanem yumi save kam gud moa? ?Wanem fasin we yumi mas mekem taem narafala i singaot yumi?

OL JANIS WE YUMI GAT

5. ?Olsem wanem yu save welkamem narafala long ol miting?

5 Long ol miting: Jehova mo ogenaesesen blong hem i singaotem yumi i kam long ol miting. Yumi wantem se evriwan we oli kam oli harem gud, speseli ol niuwan. (Rom 15:7) Jehova i singaot olgeta tu, taswe yumi mas welkamem gud olgeta, nating se oli wanem kaen man mo oli jenis olsem wanem. (Jemes 2:1-4) Sipos yu luk se wan niuwan i sidaon hem wan, i gud yu sidaon wetem hem. Maet bambae hem i glad we yu givhan long hem blong i kasem save long miting, o blong faenem ol vas long Baebol. Hemia nao gudfala fasin blong welkamem narafala.—Rom 12:13.

6. ?Hu olgeta we yumi mas singaot moa?

6 Smol kakae mo dring: Oltaem ol man long Baebol oli soemaot se oli glad blong tekem ol narafala oli kam kakae long haos blong olgeta. Hemia i soemaot se oli wantem fren gud wetem olgeta mo gat pis. (Jenesis 18:1-8; Jajes 13:15; Luk 24:28-30) ?Hu olgeta we yumi mas singaot moa? Ol brata mo sista long kongregesen. Taem wol i stap kam moa nogud, yumi mas dipen moa long ol brata mo sista, mo frengud wetem olgeta. Long Betel long Amerika, fastaem oli mekem Wajtaoa Stadi long 6:45 long sapa. Be long 2011, Hed Kampani i jenisim i go long 6:15. ?From wanem? Oli talem se, hemia bambae i givim moa taem long ol Betelaet, blong oli welkamem olgeta long rum blong olgeta. Ol narafala Betel tu oli mekem sem mak. Hemia wan gudfala janis blong ol Betelaet oli save gud olgeta.

?Yu save singaot olgeta oli kam kakae long haos, o yu save go wokbaot wetem olgeta?

7, 8. ?Olsem wanem yumi save welkamem ol brata we oli kam givim tok long kongregesen?

7 Samtaem wan brata blong narafala kongregesen, wan eria elda, o wan brata we i kam long branj ofis, i givim tok long kongregesen blong yumi. ?Long taem olsem, yumi save welkamem olgeta? (Ridim 3 Jon 5-8.) Wan rod, hemia blong singaot olgeta oli kam long haos blong kakae smol.

8 Wan sista long Amerika i talem se: “Long ol yia we i pas, mi mo man blong mi i gat janis blong tekem plante brata we oli givim tok, wetem waef blong olgeta, i kam long haos.” Hem i talem se  evritaem we tufala i mekem olsem, bilif blong tufala i kam strong, mo oli gat gudtaem. Hem i gohed se: “Mitufala i no sore nating se mitufala i mekem olsem.”

9, 10. (1) ?Hu i save stap longtaem lelebet wetem yumi? (2) ?Yumi save givhan nating se haos i smol? Talem wan stori.

9 Olgeta we oli stap longtaem moa: Ol man long Baebol, oli glad blong givim ples blong slip long man we i visitim olgeta. (Job 31:32; Filimon 22) Tede, yumi mekem sem mak. Plante taem, eria elda i nidim ples blong slip taem hem i visitim kongregesen. Mo tu, olgeta we oli kam blong joen long ol Baebol skul, mo blong bildim ol haos wosip, oli nidim ples blong slip.?Olsem wanem long olgeta we oli lusum haos blong olgeta long taem blong disasta? Olgeta tu oli nidim ples blong slip, go kasem taem we oli wokem haos blong olgeta bakegen. Yumi no mas ting se olgeta we oli gat bigfala haos nomo oli save givhan. Maet oli givhan plante taem finis. ?Olsem wanem? ?Yu save givim ples blong slip long olgeta, nating se haos blong yu i smol?

10 Wan brata long Saot Koria i tingbaot taem ya we sam brata we oli joen long wan Baebol skul, oli kam stap long haos blong hem, i se: “Mi fraet smol from we mitufala i jes mared, mo haos i smol nomo. Be taem oli stap wetem mitufala, mifala evriwan i glad. Mitufala i luksave se taem hasban mo waef i mekem wok blong Jehova tugeta, tufala i glad tumas.”

11. ?From wanem yumi mas welkamaem olgeta we oli muv i kam long kongregesen?

11 Olgeta we oli muv i kam: Maet sam brata mo sista o wan famle i muv i kam long kongregesen blong yu. Ating oli kam from we kongregesen i nidim moa man blong prij, o maet oli kam blong paenia long kongregesen. Hemia wan bigfala jenis long laef blong olgeta. Oli mas lan long niufala ples mo kongregesen, mo maet wan niu lanwis o kalja. ?Olsem wanem? ?Yu save singaot olgeta oli kam kakae long haos, o yu save go wokbaot wetem olgeta? Hemia bambae i givhan long olgeta blong oli faenem ol niufala fren mo lan long niufala ples.

12. Talem wan stori we i soemaot se i no nid blong mekem plante samting blong welkamem narafala.

12 Yu no nid blong mekem plante samting blong welkamem narafala. (Ridim Luk 10:41, 42.) Wan brata i tingbaot samting we i hapen taem hem mo waef blong hem i jes kam misinari. Hem i se: “Mitufala i yang nomo, mitufala i no gat plante ekspiriens, mo mitufala i harem nogud from we mitufala i stap longwe long ples blong mitufala. Wan naet, waef blong mi i stap harem nogud tumas, mo mi traehad blong givhan long hem, be nogat nomo. Samwe long 7:30 long sapa, wan man i noknok long doa. Hemia wan Baebol stadi, we i karem tri aranis i kam blong welkamem mitufala. Ale mitufala i singaot hem i kam dring wan  glas wota, mo afta, mifala i dring ti mo hot joklet. Mitufala i no save toktok lanwis Swahili yet, mo hem tu i no toktok Inglis.” Misinari ya i talem se afta long taem ya, tufala i stat blong frengud wetem ol brata mo sista, nao tufala i glad.

GOHED NOMO BLONG WELKAMEM OL NARAFALA

13. Taem yu welkamem narafala, ?olsem wanem samting ya i givhan long yu?

13 ?Samtaem yu harem se yu fraet blong welkamem narafala? Sipos yes, yu stap mestem janis blong harem gud mo faenem ol fren we bambae oli stap olwe. Taem yu welkamem narafala, hemia i save blokem filing ya se yu stap yu wan. Taswe, ?from wanem samfala oli fraet blong welkamem narafala? Hemia sam risen.

14. ?Yu save mekem wanem sipos yu no gat taem mo paoa blong welkamem narafala?

14 Taem mo paoa: Ol man blong Jehova oli bisi tumas, mo oli gat plante wok blong mekem. Maet yu harem se yu no gat taem mo paoa blong welkamem narafala. Sipos i olsem, yu mas jenisim program blong yu nao yu save tekem narafala i kam long haos. I impoten blong mekem olsem from we Baebol i pulum yumi blong soemaot fasin ya. (Hibrus 13:2) I stret nomo blong yu welkamem narafala. Be maet yu mas lego sam samting we oli no impoten tumas, blong yu save gat taem blong welkamem narafala.

15. ?From wanem yu save harem se yu no naf blong welkamem narafala?

15 Yu ting se yu no naf: ?Olsem wanem? ?Samtaem yu wantem welkamem narafala be yu harem se yu no save mekem? Maet yu sem mo yu wari se taem ol man oli kam long haos blong yu, bambae oli harem se ples i ded we. Maet yu no gat mane mo yu wari se bambae yu no save givim samting we ol narafala brata oli givim. Be yu mas tingbaot se i no nid blong yu gat wan flas haos. Ol man we yu singaotem olgeta, bambae oli glad sipos haos i klin nomo, mo yu kaen.

16, 17. ?Yu save mekem wanem sipos yu fraet blong singaot narafala i kam long haos?

16 I no yu nomo we i fraet blong singaot narafala i kam long haos. Wan elda long Inglan i talem se: “I gat plante samting we i save mekem yumi fraet blong singaot narafala. Be gudfala frut mo glad we yumi kasem i save winim fraet ya, olsem long ol narafala wok blong Jehova. Mi harem gud blong dring kofe, sidaon, mo storian wetem olgeta.” I gud yu soemaot oltaem se yu intres long man we yu singaot hem. (Filipae 2:4) Plante man oli laekem blong tokbaot laef blong olgeta. Maet wan janis nomo we yu gat blong harem stori blong olgeta, hemia taem yumi joen wanples. Wan narafala elda i talem se: “Taem mi singaot ol narafala oli kam long haos, mi kasem save moa long olgeta, speseli olsem wanem oli kam long trutok.” Sipos yu soemaot intres long olgeta wanwan, bambae yufala evriwan i save harem gud blong storian.

17 Oltaem wan paenia sista i glad blong tekem olgeta we oli mekem ol Baebol skul, oli kam stap long haos. Hem i talem se: “Fastaem mi fraet from we rum blong mi i smol mo i no gat ol niu tebol mo jea. Be waef blong tija i mekem tingting blong mi i kwaet. Hem i talem se taem hem mo man blong hem i mekem  wok blong eria elda, tufala i harem gud moa blong stap wetem olgeta we oli no gat plante samting. Hemia from we laef blong olgeta i no fasfas, oli fren gud wetem Jehova, mo oli putum tingting blong olgeta long wok blong hem nomo. Samting ya i mekem mi mi tingbaot toktok we Mama i talem long mifala oltaem, i se: ‘Sipos man i stap kakae drae nomo wetem ol man we oli lavem hem, hemia i moa gud.’” (Ol Proveb 15:17) Samting we i moa impoten, se yumi soemaot lav long man we yumi tekem i kam long haos.

18, 19. Taem yu welkamem narafala, ?olsem wanem samting ya i save winim nogud filing we yu gat long hem?

18 Yu tingting nogud long narafala: ?Olsem wanem? ?Wan long kongregesen i gat sam fasin we yu yu no laekem? Sipos yu no traehad blong winim nogud filing ya, bambae yu save harem nogud longtaem. Maet i had blong yu singaot man we yu no laekem fasin blong hem, i kam long haos. Sem mak sipos narafala i spolem yu, mo yu no save fogetem.

19 Be Baebol i talem se yu save fren moa wetem ol narafala taem yu welkamem olgeta, nating se oli enemi blong yu. (Ridim Ol Proveb 25:21, 22.) Sipos yu singaot narafala i kam long haos, yu save winim ol nogud filing blong yu, mo mekem pis wetem hem. Yu save luk ol gudfala fasin blong hem we Jehova i luk, taem hem i pulum hem i kam long trutok. (Jon 6:44) Sipos lav i pulum yu blong singaotem hem, hemia i save mekem se yutufala i fren gud bakegen.  ?Olsem wanem blong save sipos lav nao i pulum yu blong mekem samting ya? Sipos yu gat lav, bambae yu mekem olsem Filipae 2:3 i talem, se: ‘Yu mekem tingting blong yu i stap daon mo yu luk narafala se hem i hae moa long yu.’ Yumi mas luksave olsem wanem ol brata mo sista oli hae moa long yumi. Maet yumi save lanem samting from bilif, fasin blong stanap strong, o sam nara gudfala fasin we oli gat. Taem yumi tingbaot ol gudfala fasin ya, bambae yumi lavem olgeta moa, nao i isi blong welkamem olgeta.

TAEM NARAFALA I SINGAOTEM YU

Man we i singaot narafala i wok had blong rerem ol gudfala kakae (Haf 20)

20. ?Yumi soemaot olsem wanem se yumi holem promes? ?From wanem yumi mekem olsem?

20 Deved i askem long Jehova se: “?Hu man we i stret blong go long Haos Tapolen blong yu?” (Ol Sam 15:1) Biaen, Deved i tokbaot ol fasin we Jehova i wantem se ol man we oli kam long haos blong hem oli gat. Wan long ol fasin ya, hemia blong holem promes. Deved i talem se: “Oltaem hem i stap mekem ol samting we hem i promes blong mekem, nating we i had tumas long hem.” (Ol Sam 15:4) Sipos yu promes blong go long haos blong wan brata, yu no mas kanselem blong nating nomo. Maet hem i rerem plante samting finis. Sipos yu kanselem, hadwok blong hem i blong nating. (Matiu 5:37) Sam man oli kanselem wan plan blong oli save talem yes long wan narafala plan we oli ting se i moa gud. ?Olsem wanem? ?Fasin ya i soemaot lav mo respek? Nogat. Yumi mas glad nomo long samting we yumi kasem. (Luk 10:7) Taem yumi mas kanselem wan plan, yumi mas talemaot kwiktaem long hemia we i singaot yumi. Taem yumi mekem olsem, yumi soemaot se yumi lavem hem mo yumi tingbaot hem.

21. ?Olsem wanem yumi save mekem man we i singaot yumi i glad?

21 I impoten tu blong respektem kastom blong ol man ples. Long sam ples, i oraet nomo blong go long haos blong narafala enitaem nomo, nating se oli no singaot yumi. Be long sam narafala ples, i moa gud yumi askem fastaem. Long sam ples bakegen, man i givim kakae fastaem long olgeta we hem i singaot olgeta, mo biaen long ol famle blong hem. Be long sam narafala ples, evriwan oli joen wantaem blong kakae. Long sam ples, hemia we i kam i karem sam kakae. Be long sam narafala ples, hemia we i singaot ol narafala i no wantem se oli karem kakae i kam. Long sam kalja, i stret blong talem ‘no’ wetem kaen fasin, long fastaem mo seken taem we narafala i singaot yu. Be long sam narafala ples, i no stret blong mekem olsem. Yumi mas mekem man we i singaot yumi i glad.

22. ?From wanem i impoten tumas we ‘yumi welkamem yumi’?

22 Pita i talem se: “En blong evri samting i kam klosap.” (1 Pita 4:7) Tede, yumi stap klosap long wan bigfala trabol we i neva kamaot bifo long wol, mo i no save kamaot bakegen. Taem wol i stap kam moa nogud, yumi mas lavem tumas ol brata mo sista blong yumi. Naoia i impoten moa blong folem advaes blong Pita se: “Yufala i welkamem yufala.” (1 Pita 4:9) Yes, yumi mas glad blong tekem narafala i kam long haos. Mo yumi mas gohed blong mekem gudfala fasin ya naoia mo blong olwe.