Go long ol haf insaed long hem

Go long lis blong ol haf

 STADI 30

Kasem Hat Blong Olgeta We Oli No Intres Long Jos

Kasem Hat Blong Olgeta We Oli No Intres Long Jos

“Mi mi mekem evri samting we mi naf blong mekem blong givhan long enikaen man, blong mi save sevem sam long olgeta.” —1 KOR. 9:22

SINGSING 82 ‘Yu Letem Laet Blong Yu i Saenaot’

BIGFALA TINGTING *

1. ?Wanem sam jenis we i kamaot long ol yia we i pas?

BLONG plante taosen yia, bighaf blong ol man oli joen long wan jos. Be long ol yia we oli jes pas, i gat wan bigfala jenis. Plante man oli no moa joen long wan jos. Mo long sam kantri, bighaf blong ol man oli ting se oli nogat wan jos. *Mat. 24:12.

2. ?From wanem plante man oli no moa intres long ol jos?

2 ?From wanem namba blong ol man we oli no intres long jos, * i stap kam antap? Maet samfala oli laekem tumas blong gat gudtaem o maet from we oli gat ol wari. (Luk 8:14) Samfala oli no moa bilif se i gat wan God. Sam narafala oli ting se jos i blong ol man bifo nomo mo i no laenap wetem sayens. Maet oli harem ol fren, ol tija o oli luk long TV o long intenet se laef i stat long evolusen, taswe oli no bilif long God. Mo tu samfala oli agensem ol lida blong jos from we oli laekem mane tumas, mo oli wantem paoa. Long sam ples gavman i putum tabu long ol jos.

3. ?Stadi ya bambae i givhan long yumi olsem wanem?

3 Jisas i talem se yumi ‘mas go long ol man blong olgeta neson, yumi pulum olgeta oli kam disaepol blong hem.’ (Mat. 28:19) ?Olsem wanem yumi save halpem ol man we oli no intres long jos, blong oli lavem God mo kam disaepol blong Kraes? Yumi mas luksave se tingting we wan man i gat long  mesej blong yumi, i dipen long ples we man ya i gruap long hem. Eksampol, fasin blong wan man Yurop blong lesin long gud nius, i no sem mak long wan man Esia. ?From wanem? Ol man Yurop oli gat sam save long saed blong Baebol, mo se God i wokem olgeta samting. Be long Esia, bighaf blong ol man oli gat smol save o oli no gat save nating long Baebol, mo maet oli no bilif se i gat wan man we i wokem olgeta samting. Taswe, stadi ya bambae i givhan long yumi blong kasem hat blong olgeta man, nomata se oli laef wea o oli gat wanem bilif.

GAT STRET TINGTING

4. ?From wanem yumi mas gat stret tingting?

4 Stret tingting. Evri yia, i gat sam man we oli no intres long jos oli kam ol Witnes Blong Jehova. Plante oli gat ol gudfala fasin mo oli agensem ol fasin blong ol man blong jos we oli gat tu fes. Samfala oli stap lanem yet blong gat ol gudfala fasin, mo lego ol fasin we i no stret. Be wetem help blong Jehova, yumi save sua se bambae yumi faenem ol man we oli “stret blong kasem laef we i no save finis.”—Wok 13:48; 1 Tim. 2:3, 4.

Rere blong jenisim fasin blong yu blong prij long ol man we oli no bilif long Baebol (Haf 5-6) *

5. ?Wanem i mekem se ol man oli glad blong lesin long yumi?

5 Kaen mo toktok long waes fasin. Plante taem ol man oli glad blong lesin, i no from wanem we yumi talem, be from fasin blong yumi blong toktok. Oli laekem taem yumi kaen, yumi toktok long waes fasin, mo yumi soem intres long olgeta. Yumi no wantem fosem olgeta blong oli lesin long yumi. Be yumi traehad blong kasemsave tingting blong olgeta long saed blong jos. Eksampol, samfala oli no wantem tokbaot jos wetem narafala. Sam narafala oli ting se i no stret blong askem tingting blong man long saed blong God. Mo sam narafala oli sem taem ol man oli luk se oli stap ridim Baebol wetem wan Witnes blong Jehova. Nating se i olsem, yumi mas traehad blong kasemsave long filing blong olgeta.—2 Tim. 2:24.

6. ?Olsem wanem yumi save folem eksampol blong Pol blong jenisim fasin blong yumi blong prij?

6 ?Bambae yumi mekem wanem sipos wan man i no laekem we yumi yusum ol tok olsem “Baebol,” “man we i wokem olgeta samting,” “God,” o “jos”? Yumi save folem eksampol blong Pol mo jenisim fasin blong yumi blong toktok. Taem Pol i toktok long ol man Jiu, hem i yusum ol tok blong Baebol. Be taem hem i toktok long ol waes man blong Gris, hem i no yusum ol stret tok we i kamaot long Baebol. (Wok 17:2, 3, 22-31) ?Olsem wanem yumi save folem fasin blong Pol? Sipos yu mitim wan man we i no gat bilif, maet i moa gud we yu no yusum ol tok we oli kamaot stret long Baebol. Sipos man i no wantem se ol narafala oli luk we hem i stap ridim Baebol, i gud yu yusum fon o tablet.

7. Folem 1 Korin 9:20-23, ?yumi mas mekem wanem blong folem fasin blong Pol?

7 Kasemsave mo lesin. Yumi mas traem blong kasemsave tingting blong ol man we yumi mitim olgeta. (Pro. 20:5) Traem luk bakegen eksampol blong Pol. Hem i gruap wetem ol man Jiu. Taswe, hem i mas jenisim fasin blong hem blong prij long olgeta we oli no laen blong Isrel, we oli gat smol save o oli no save Jehova nating mo Baebol. Maet yumi save mekem sam risej o yumi askem advaes long olgeta we oli prij plante yia, blong oli halpem yumi blong kasemsave tingting blong ol man long teritori blong yumi.—Ridim 1 Korin 9:20-23.

8. ?Olsem wanem blong statem wan storian long saed blong Baebol?

8 Mak blong yumi i blong faenem “man we i glad blong lesin.” (Mat. 10:11) Blong mekem  gud wok ya, yumi mas pulum ol man blong oli talemaot tingting blong olgeta mo yumi lesingud long olgeta. Wan brata long Inglan i stap askem tingting blong ol man long saed blong, olsem wanem blong gat wan hapi mared, olsem wanem blong tijim pikinini, o olsem wanem blong stanap strong taem narafala i mekem i no stret long yu. Afta we hem i lesin long olgeta, hem i talem se, “?Wanem tingting blong yu long advaes ya we oli raetem klosap 2,000 yia bifo?” Biaen, hem i soem wan vas long fon blong hem, be hem i no talem tok ya “Baebol.”

KASEM HAT BLONG OL MAN

9. ?Olsem wanem blong halpem ol man we oli no wantem tokbaot God?

9 Yumi save kasem hat blong ol man we oli no wantem tokbaot God, taem yumi tokbaot ol samting we oli laekem. Plante man oli laekem tumas blong luk ol samting we oli stap raon long yumi. Taswe, maet yumi save talem wan samting olsem: “Plante taem, ol saentis oli wokem ol niufala samting folem wanem we i stap raonabaot long yumi. Eksampol, ol man we oli wokem maekrofon mo kamera oli stadi long sora mo ae blong ol bebet. ?Wanem tingting blong yu taem yu luk ol samting raonabaot long yumi? ?Yu ting se ol samting ya oli kamaot olsem nomo, i gat wan man we i wokem, o yu ting se i gat wan narafala samting?” Afta we yumi lesingud long ansa blong hem, yumi save talem se: “Taem ol enjinia ya oli stadi long sora mo ae blong ol bebet, ?yu no ting se oli stap lanem samting long man ya we i wokem ae mo sora? Mi mi sapraes long olfala tok ya we i se: ‘?Yufala i ting se God i no save harem samting? !Hem nao i mekem sora blong yumi! ?Yufala i ting se hem i no save lukluk? !Hem nao i mekem ae blong yumi! . . . ?Yufala i ting se hem i no gat save? !Hem nao i tija blong olgeta man!’ Sam saentis tu oli agri long tingting ya.” (Sam. 94:9, 10) Biaen, yumi save soem wan video long jw.org® long “Ol Intaviu Mo Ekspiriens” aninit long haf ya Viewpoints on the Origin of Life.” (yu go long OL BUK > OL VIDEO.) No maet yu save givim buklet ya Was Life Created? o The Origin of Life—Five Questions Worth Asking.

10. ?Wanem wan narafala rod we yumi save yusum blong storian wetem man we i no wantem tokbaot God?

10 Bighaf blong ol man oli wantem gat wan gudfala fiuja. Be plante man oli fraet se wol ya bambae i lus o bambae i kam wan ples we man i no save laef long hem. Wan eria elda long Nowei i talem se ol man we oli no wantem tokbaot  God, oli glad moa blong tokbaot ol samting we oli stap hapen long wol. Afta we hem i talem halo long man, hem i se: “?Yu ting se yumi save trastem ol man blong politik mo ol saentis blong oli mekem yumi gat wan gudfala fiuja, o yu ting se i gat wan narafala samting?” Afta we man ya ansa, hem i ridim o i tokbaot wan vas we i soemaot gudfala laef long fiuja. Samfala oli sapraes long promes blong Baebol we i se wol ya bambae i stap olwe, mo ol gudfala man bambae oli laef long hem gogo i no save finis.—Sam. 37:29; Pri. 1:4.

11. ?From wanem yumi mas traem defdefren rod blong storian? ?Olsem wanem yumi save folem eksampol blong Pol long Rom 1:14-16?

11 Yumi mas traem defdefren rod blong storian wetem ol man. ?From wanem? From we wanwan man i defren. Samting we yumi tokbaot long wan man, i save pulum intres blong hem be wetem narafala, nogat. Sam man oli glad blong tokbaot God mo Baebol, be samfala oli laekem moa blong tokbaot sam narafala samting fastaem. Nating se i olsem, yumi mas tekem janis blong prij long enikaen man. (Ridim Rom 1:14-16.) Yes, yumi mas tingbaot se Jehova nao i stap mekem trutok i gru long hat blong olgeta we laekem samting we i stret.—1 Kor. 3:6, 7.

TALEMAOT TRUTOK LONG OL MAN ESIA

Plante pablisa oli soem intres long ol man long ol kantri we ol man oli no bilif long God, taem oli tokbaot ol gudfala advaes blong Baebol long olgeta (haf 12-13)

12. ?Yumi save mekem wanem blong prij long ol man Esia we oli gruap wetem bilif ya se i no gat God?

12 Raon long wol, ol pablisa oli stap mitim ol man we oli kamaot long ol defren ples long Esia, we samfala long ol kantri ya, gavman i putum tabu long ol jos. Long Esia, bighaf blong ol man oli neva tingbaot sipos i gat wan man we i wokem olgeta samting o nogat. Samfala oli wantem tumas blong save moa, nao oli glad blong stadi Baebol, be sam narafala oli jes no wantem lanem ol niufala save. ?Yumi save mekem wanem blong halpem olgeta? Sam pablisa oli faenemaot se wan gudfala rod hemia blong frengud wetem man fastaem, soem intres long hem, mo taem oli luk se i stret, oli tokbaot olsem wanem ol advaes blong Baebol i givhan long laef blong olgeta.

13. ?Wanem i save pulum intres blong man i go long Baebol? (Yu luk pija long fran pej.)

13 Plante man oli stat blong soem intres taem oli ridim wan advaes blong Baebol we i stret long laef blong olgeta. (Pri. 7:12) Wan sista we i stap visitim ol man we oli toktok Jaenis long Niu Yok, i talem se: “Mi traehad blong soem intres mo mi lesin long olgeta. Sipos mi faenemaot se oli jes kam laef long Niu Yok, bambae mi askem se: ‘?Laef blong yu long ples ya i oraet? ?Yu yu faenem wan wok? ?Ol man ples oli mekem i gud long yu?’” Samtaem hemia i wan gudfala rod blong hem i pulum ol man i go long Baebol. Mo sipos i stret, sista ya i save talem se: “?Yu ting se wanem i save halpem yumi blong frengud wetem ol narafala? ?I oraet mi soem wan waes tok blong Baebol? I se: ‘Stat blong rao i olsem wan smol hol long bigfala tang, we wota i stap lik smosmol long hem. Yu mas blokem kwik. Sipos no, bambae i kam nogud olgeta.’ ?Yu ting se advaes ya i save halpem yumi blong frengud wetem ol narafala?” (Pro. 17:14) Wan storian olsem i save halpem yumi blong luk sipos man i wantem save moa long saed blong Baebol.

14. ?Olsem wanem wan brata long Esia i halpem ol man we oli no bilif long God?

14 ?Yumi save talem wanem long olgeta we oli talem se oli no bilif long God? Wan brata we i stap prij long ol man Esia we oli no intres long ol jos i talem se: “Taem wan man i talem se, ‘Mi no bilif long God,’ hem min se hem i no bilif long wosip blong ol god we plante man long eria ya oli stap mekem. So plante taem, mi agri se ol man nomo oli wokem ol god ya.  Taswe mi ridim Jeremaea 16:20: ‘Plante man oli ting se oli save wokem ol god blong olgeta, be ol god ya we ol man oli mekem oli no prapa god, oli blong nating nomo.’ Mo mi askem long man se: ‘?Olsem wanem blong luksave God ya we i tru mo hemia we ol man nomo oli wokem?’ Mi lesingud long ansa blong hem mo biaen mi ridim Aesea 41:23: ‘Yufala i kam talemaot ol samting we bambae oli kamtru long fiuja, nao bambae mifala i save luksave se i tru, yufala i god tru.’ Mo mi soem wan eksampol blong samting we Jehova i talemaot se bambae i kamtru long fiuja.”

15. ?Yumi lanem wanem long stori blong wan brata long Is Esia?

15 Wan brata long Is Esia i yusum save ya taem hem i gobak blong visitim ol man. Hem i se: “Mi soem ol waes tok blong Baebol, ol profet tok we oli kamtru, mo ol loa we oli kontrolem yunives. Biaen, mi eksplenem olsem wanem ol samting ya oli pruvum se i gat wan man we i laef mo i waes we i wokem olgeta samting. Taem man i agri se i gat wan God, mi stat blong soem samting we Baebol i talem long saed blong Jehova.”

16. Folem Hibrus 11:6, ?from wanem ol Baebol stadi oli mas gat bilif long God mo Baebol, mo olsem wanem yumi save givhan long olgeta?

16 Taem yumi stadi wetem ol man we oli no intres long jos, yumi mas gohed blong halpem olgeta blong oli bilif se i gat wan God. (Ridim Hibrus 11:6.) Mo yumi mas halpem olgeta blong oli trastem Baebol. Hemia i min se yumi mas ripitim bakegen ol samting we yumi bin tijim long olgeta. Evri taem we yumi stadi wetem olgeta, yumi mas tokbaot ol pruf we i soem se Baebol i tok blong God. Olsem taem yumi tokbaot ol profet tok blong Baebol we oli kamtru, ol save blong sayens, mo histri, o ol advaes blong Baebol we oli save halpem yumi long laef.

17. ?Olsem wanem lav we yumi soem long ol man i save gat paoa long olgeta?

17 Yumi stap halpem ol man blong oli kam disaepol blong Kraes, taem yumi soem lav long olgeta, nating se oli intres long jos o nogat. (1 Kor. 13:1) Taem yumi tijim olgeta, mak blong yumi i blong soem long olgeta se God i lavem yumi mo hem i wantem se yumi tu yumi lavem hem. Evri yia, plante man we bifo oli no intres long jos, oli tekem baptaes from we oli lanem blong lavem God. Taswe, yumi mas gat stret tingting, yumi soem se yumi lavem mo yumi intres long olgeta kaen man. Yumi mas lesin long olgeta mo yumi traehad blong kasemsave tingting blong olgeta. Eksampol blong yu bambae i tijim olgeta blong oli kam ol disaepol blong Kraes.

SINGSING 76 ?Wanem Tingting Blong Yu?

^ par. 5 Maet tede yumi faenem plante moa man we oli no intres long jos i bitim bifo. Stadi ya bambae i tokbaot olsem wanem yumi save talemaot trutok long olgeta, mo halpem olgeta blong oli trastem Baebol mo bilif long God.

^ par. 1 Wan ripot i soem se sam long ol kantri ya hemia: Albania, Ostrelia, Ostria, Asebaejan, Kanada, Jaena, Jek Ripablik, Denmak, Franis, Jemani, Hong Kong, Aealan, Isrel, Japan, Netalan, Nowei, Saot Koria, Spen, Swiden, Swiselan, Yunaeted Kingdom, mo Vietnam.

^ par. 2 MINING BLONG TOKTOK: Long stadi ya, tok ya no intres long jos i blong tokbaot ol man we oli no joen long wan jos o oli no bilif long God.

^ par. 54 PIJA: Wan brata i prij long wan fren blong hem long wok long hospital, mo biaen man ya i go long intenet blong lukluk haf ya Online Bible Study Lessons.