Go long ol haf insaed long hem

Go long lis blong ol haf

 STADI 2

Givhan Long Narafala Blong i Harem Gud

Givhan Long Narafala Blong i Harem Gud

Oli joen wetem mi blong mekem wok blong Kingdom blong God, mo oli givhan bigwan long mi.KOL. 4:11.

SINGSING 90 Yumi Leftemap Tingting Blong Yumi

BIGFALA TINGTING *

1. ?Wanem trabol we plante man blong Jehova oli fesem?

LONG olgeta ples long wol, plante man blong Jehova oli stap fesem trabol we i mekem olgeta oli wari mo harem nogud. ?Yu luk samting ya long kongregesen blong yu? Samfala oli gat wan strong sik o oli harem nogud from we wan famle i jes ded. Sam narafala oli harem nogud bitim mak from we wan famle o wan gudfala fren i lego Jehova. Sam narafala bakegen, disasta i spolem olgeta. Ol brata mo sista ya oli nidim narafala blong mekem olgeta oli harem gud. ?Olsem wanem yumi save halpem olgeta?

2. ?From wanem samtaem aposol Pol i nidim narafala blong mekem hem i harem gud?

2 Plante taem, laef blong aposol Pol i stap long denja. (2 Kor. 11:23-28) Mo tu, hem i gat wan samting olsem ‘nil blong aranis we i stap stikim hem,’ maet hemia wan problem blong helt. (2 Kor. 12:7) Mo hem i harem nogud taem Demas, wan brata we i wok wetem hem, i lego hem from we “i laekem tumas ol samting blong wol ya.” (2 Tim. 4:10) Pol i wan tabu Kristin we i no tingbaot hem wan mo i gat strong tingting blong halpem ol narafala, be samtaem tingting blong hem tu i foldaon.—Rom 9:1, 2.

3. ?Hu i mekem Pol i harem gud bakegen?

3 Pol i nidim help blong i harem gud bakegen. ?Olsem wanem hem i kasem help ya? Jehova i yusum tabu spirit blong mekem hem i harem gud. (2 Kor. 4:7; Fil. 4:13) Mo tu, Jehova i yusum ol Kristin brata mo sista. Pol i talem se samfala we oli wok wetem hem oli ‘givhan bigwan long hem.’ (Kol. 4:11)  Hem i talem nem blong Aristakas, Tikikas, mo Mak. Trifala i mekem Pol i harem gud, mo givhan long hem blong i stanap strong. ?Olsem wanem trifala i mekem samting ya? ?Olsem wanem yumi save folem eksampol blong trifala, blong leftemap tingting blong ol narafala mo mekem oli harem gud?

ARISTAKAS I NO LEGO POL

Olsem Aristakas, yumi no lego ol brata mo sista long “taem blong trabol” (Haf 4-5) *

4. ?Olsem wanem Aristakas i wan gudfala fren we i no save lego Pol?

4 Aristakas, wan Kristin we i stap long Tesalonaeka long Masedonia, i wan gudfala fren blong Pol we i no save lego hem. Yumi luk nem blong Aristakas fastaem, long stori blong Pol taem hem i visitim Efesas long namba tri misinari trip blong hem. Wan grup blong ol stronghed i holemtaet Aristakas taem hem i stap wetem Pol. (Wok 19:29) Be hem i no ronwe blong go haed taem oli lego hem, hem i stap nomo wetem Pol. Sam manis biaen, long Gris, Aristakas i stap yet wetem Pol, nating se ol enemi blong Pol oli stap gohed nomo blong traem kilim hem i ded. (Wok 20:2-4) Long yia 58, Pol i go kalabus long Rom, mo Aristakas i folem hem. Long trip ya, sip we tufala i stap long hem i rek. (Wok 27:1, 2, 41) Taem tufala i kasem Rom, i luk olsem se Aristakas tu i go kalabus smoltaem wetem Pol. (Kol. 4:10) !Yumi kasem save se wan gudfala fren olsem, we i no lego Pol, i mas mekem hem i harem gud!

5. Folem Ol Proveb 17:17, ?olsem wanem yumi soemaot se yumi wan gudfala fren?

5 Yumi tu yumi save gat fasin olsem Aristakas, taem yumi no lego ol brata mo sista, be yumi stap wetem olgeta long gudtaem mo long “taem blong trabol” tu. (Ridim Ol Proveb 17:17.) Mo taem trabol i finis, oli nidim yumi yet blong mekem olgeta i harem gud. Wan sista, nem blong hem Fransis, * we papa blong hem i ded from kansa, mo tri manis biaen, mama tu i ded from semfala sik ya, i talem se: “Ol bigfala trabol oli save mekem yumi harem nogud longtaem. Mo mi glad tumas long ol gudfala fren we oli no lego mi, be oli tingbaot se mi harem nogud yet, nating se papa mo mama i ded longtaem finis.”

6. Sipos yumi gat fasin ya blong no lego ol brata mo sista, ?bambae yumi rere blong mekem wanem?

 6 Ol gudfala fren oli givim taem mo paoa blong olgeta blong halpem ol brata mo sista. Wan brata we nem blong hem Pita, i kasem wan strong sik we bambae hem i ded from. Waef blong hem, Katrin, i talem se: “Wan brata long kongregesen mo waef blong hem, tufala i tekem mitufala i go long dokta long dei we oli talemaot rabis nius ya long Pita. Stret long taem ya, tufala i mekem desisen se bambae tufala i no lego mitufala, mo tufala i stap oltaem wetem mitufala blong mekem mitufala i harem gud.” !I gud tumas blong gat ol gudfala fren olsem, we oli givhan long yumi blong stanap strong long taem blong trabol!

POL I SAVE TRASTEM TIKIKAS

Olsem Tikikas, yumi wan fren we narafala i save trastem taem hem i kasem trabol (Haf 7-9) *

7-8. ?Olsem wanem Kolosi 4:7-9 i soemaot se Pol i trastem Tikikas?

7 Tikikas, we i stap long wan ples long Esia we Rom i rul long hem, i wan gudfala fren we Pol i save trastem. (Wok 20:4) Samwe long yia 55, Pol i mekem kleksin blong givhan long ol Kristin long Judia, mo maet hem i letem Tikikas i halpem hem long impoten wok ya. (2 Kor. 8:18-20) Mo taem Pol i go kalabus long Rom, Tikikas i karem ol leta mo mesej we Pol i raetem oli go long ol kongregesen long Esia, blong leftemap tingting blong olgeta.—Kol. 4:7-9.

8 Tikikas i gohed blong stap olsem wan gudfala fren we Pol i save trastem. (Tae. 3:12) I no evri Kristin long taem ya we Pol i save trastem. Samwe long yia 65, taem Pol i go kalabus bakegen, hem i raetem se plante Kristin long Esia oli no moa wantem joen wetem hem, maet from we oli fraet long ol enemi blong hem. (2 Tim. 1:15) Be Tikikas i no olsem. Pol i save trastem hem, taswe hem i givim wan narafala wok long hem. (2 Tim. 4:12) Yumi sua se Pol i glad tumas blong gat wan gudfala fren olsem Tikikas.

9. ?Olsem wanem yumi save folem fasin blong Tikikas?

9 Yumi save folem fasin blong Tikikas taem yumi wan fren we narafala i save trastem. Taswe, yumi no promes nomo blong halpem ol brata mo sista, be yumi mekem samting  we yumi promes blong mekem. (Mat. 5:37; Luk 16:10) Taem oli save trastem yumi, hemia i mekem olgeta oli harem gud. Wan sista i talem se: “Tingting blong mi i stap kwaet from we mi save se brata o sista we i promes blong givhan long mi bambae i kam long stret taem mo i mekem samting we i promes.”

10. Olsem Ol Proveb 18:24 i talem, ?hu i save mekem olgeta we oli fesem wan problem oli harem gud?

10 Plante taem olgeta we oli fesem wan problem, oli harem gud taem oli toktok long wan fren we oli save trastem. (Ridim Ol Proveb 18:24.) Wan brata, nem blong hem Bijai, i harem nogud taem kongregesen i putumaot boe blong hem, hem i se: “Mi harem se mi mas talemaot filing blong mi long wan man we mi trastem.” Wan narafala brata, nem blong hem Kalos, i mekem wan mastik nao i lusum wok blong hem long kongregesen. Hem i se: “Mi nidim wan fren we i save kam olsem wan ‘sefples’ long mi, i min se mi save talemaot evri samting long hem be mi no fraet se bambae hem i jajem mi.” Kalos i luk se ol elda nao oli olsem sefples ya, taem oli halpem hem blong winim problem ya. Hem i harem gud blong save tu se hem i save trastem ol elda blong oli no talemaot ol trabol blong hem long ol narafala.

11. ?Olsem wanem blong kam wan fren we narafala i save trastem?

11 Blong kam wan fren we narafala i save trastem, yumi mas gat longfala tingting. Taem hasban blong Sana i lego hem, Sana i talemaot ol filing blong hem long ol gudfala fren, mo samting ya i mekem hem i harem gud. Hem i se: “Oli lesin gud long mi, nating se ating mi talem sem samting bakegen mo bakegen.” Yu tu yu soemaot se yu wan gudfala fren taem yu lesin gud.

MAK I WOK HAD BLONG HALPEM OL BRATA

Ol wok we Mak i mekem long kaen fasin oli givhan long Pol blong i stanap strong. Yumi tu yumi save givhan long ol brata mo sista taem oli kasem trabol (Haf 12-14) *

12. ?Hu ya Mak, mo olsem wanem hem i wok had blong halpem ol brata?

12 Mak i wan Kristin we i stap long Jerusalem. Kasen brata blong hem, Banabas, i wan misinari we ol brata oli save gud hem. (Kol. 4:10) I luk olsem se Mak i kamaot long wan famle we i rij. Nating se i olsem, hem i no mekem mane mo olting oli kam impoten samting long laef blong hem. Be hem i wok had blong halpem ol brata. Hem i givhan long aposol Pol mo aposol Pita long ol wok we tufala i mekem. Maet hem i lukaot long kakae blong tufala, ples blong slip, mo ol narafala samting olsem. (Wok 13:2-5; 1 Pita 5:13) Pol i talem se Mak i ‘joen wetem hem blong mekem wok blong Kingdom blong God,’ mo ‘i givhan bigwan long hem.’—Kol. 4:10, 11.

13. ?Olsem wanem 2 Timoti 4:11 i soemaot se Pol i glad long wok we Mak i mekem blong halpem hem?

13 Mak i kam wan gudfala fren blong Pol. Taswe, taem Pol i stap kalabus long Rom samwe long yia 65, hem i raetem seken leta i go Timoti, mo i askem long Timoti blong i kam long Rom mo i tekem Mak tu i kam. (2 Tim. 4:11) I klia se Pol i glad long gudfala wok we Mak i mekem bifo, taswe hem i wantem se Mak i stap wetem hem long impoten taem ya long laef blong hem. Mak i wok blong halpem Pol, maet hem i lukaot long kakae blong hem, mo i meksua se hem i gat ol samting we hem i nidim blong raetem ol leta. Ating ol samting we Mak i mekem blong halpem Pol mo leftemap tingting blong hem, i givhan long Pol blong i stanap strong long ol dei bifo we oli kilim hem i ded.

14-15. Long saed blong halpem ol narafala, ?Matiu 7:12 i tijim yumi long wanem?

14 Ridim Matiu 7:12. !Taem yumi stap gotru long wan hadtaem, yumi harem gud tumas  long olgeta we oli mekem samting blong halpem yumi! Raean, we papa blong hem i ded long wan aksiden, i talem se: “Plante samting we yumi mekem evri dei, yumi no moa save mekem taem yumi harem nogud tumas. Yumi glad tumas taem narafala i halpem yumi, nating se hem i mekem wan smol samting nomo.”

15 Sipos yumi tekem taem blong intres long ol narafala mo luksave ol trabol blong olgeta, bambae yumi faenem plante rod blong halpem olgeta. Sista ya we hem mo hasban blong hem i tekem Pita mo Katrin i go long dokta, i mekem wan program blong eniwan long kongregesen we i wantem, i givhan blong tekem tufala i go long ol ples we tufala i mas go long hem, from we tufala i no moa save draevem trak. ?Olsem wanem? ?Program ya i givhan? Katrin i talem se: “Mitufala i harem se oli tekemaot wan hevi samting long solda blong mitufala.” Yumi no mas fogetem se ol smosmol samting we yumi mekem wetem kaen fasin, oli save mekem narafala i harem gud.

16. ?Eksampol blong Mak i tijim yumi long wanem impoten lesen?

16 Disaepol Mak we i laef long taem blong Jisas, i wan Kristin we i bisi oltaem. Hem i mekem plante impoten wok blong Jehova, olsem raetem Gospel blong Mak. Be hem i meksua se i gat taem blong leftemap tingting blong Pol, mo Pol i no fraet blong askem help blong hem. Wan sista, nem blong hem Anjela, hem tu i glad long olgeta we oli leftemap tingting blong hem, taem wan man i kilim bubu woman blong hem i ded. Hem i talem se: “Taem ol fren oli soemaot se oli wantem givhan, i isi blong toktok long olgeta. Mi luksave se oli rili wantem givhan, oli no fraet.” I gud yumi wanwan yumi askem se: ‘?Mi mi wok had blong givhan long ol brata mo sista mo mekem olgeta oli harem gud?’

GAT STRONG TINGTING BLONG MEKEM NARAFALA I HAREM GUD

17. ?Olsem wanem 2 Korin 1:3, 4, i pulum yumi blong mekem narafala i harem gud?

17 I no had blong luksave ol brata mo sista we oli nidim narafala blong leftemap tingting  blong olgeta. Maet yumi save serem sem tingting wetem olgeta we narafala i serem wetem yumi blong mekem yumi harem gud. Nino, wan sista we bubu woman blong hem i ded, i talem se: “Jehova i save yusum yumi blong mekem narafala i harem gud, sipos yumi letem hem.” (Ridim 2 Korin 1:3, 4.) Fransis, we yumi tokbaot finis, i talem se: “Ol tok blong 2 Korin 1:4 i tru we i tru. Yumi save yusum ol tok we narafala i talem long yumi, blong leftemap tingting blong wan brata o sista.”

18. (1) ?From wanem samfala oli fraet blong leftemap tingting blong narafala? (2) ?Olsem wanem yumi save leftemap tingting blong narafala? Talem wan eksampol.

18 Nating se yumi fraet smol, yumi mas lukaot rod blong givhan long narafala blong i harem gud. Maet yumi fraet from we yumi no save wanem blong talem o mekem. Wan elda we nem blong hem Pol, i tingbaot ol samting we ol brata mo sista oli mekem blong givhan long hem taem papa blong hem i ded. Hem i se: “Mi luksave se oli fraet blong kam luk mi. I no isi blong oli toktok long mi. Be mi mi glad nomo se oli wantem leftemap tingting blong mi mo givhan long mi.” Sem mak long wan brata, nem blong hem Tajon, we graon i seksek bigwan long ples blong hem. Hem i se: “Mi no save tingbaot evri tok long ol mesej we mi kasem, be mi tingbaot we oli kea long mi mo oli wantem save sipos mi oraet.” Yumi tu yumi save mekem ol brata mo sista oli harem gud, sipos yumi soemaot se yumi kea.

19. ?From wanem yu yu gat strong tingting blong ‘givhan bigwan long ol narafala’?

19 Taem yumi kam klosap moa long en blong rabis wol ya, bambae evri samting i kam moa nogud mo laef bambae i had moa. (2 Tim. 3:13) Mo tu, yumi sinman mo yumi mekem plante mastik, taswe yumi nidim narafala blong givhan long yumi blong harem gud bakegen. Wan samting we i mekem se aposol Pol i save stanap strong go kasem en blong laef blong hem, hemia help we ol narafala Kristin oli givim. I gud yumi tu yumi olsem Aristakas we i no lego Pol, Tikikas we Pol i save trastem hem, mo Mak we i mekem plante wok blong givhan long Pol. Sipos yumi olsem, yumi save halpem ol brata mo sista blong oli stanap strong long bilif go kasem en.—1 Tes. 3:2, 3.

^ par. 5 Aposol Pol i fesem plante hadtaem long laef blong hem. Long taem olsem, i gat sam brata we oli givhan long hem blong i harem gud. Bambae yumi tokbaot tri fasin blong ol brata ya, we oli gat gudhan blong mekem narafala i harem gud. Mo bambae yumi tokbaot ol samting we yumi save mekem blong folem eksampol blong olgeta.

^ par. 5 Mifala i jenisim sam nem.

SINGSING 111 Ol Samting We Oli Mekem Yumi Glad

^ par. 56 OL PIJA: Aristakas mo Pol i stap long sip we i rek.

^ par. 58 OL PIJA: Tikikas i karem ol leta blong Pol i go long ol kongregesen.

^ par. 60 OL PIJA: Mak i mekem plante wok blong givhan long Pol.