Go long ol haf insaed long hem

Go long lis blong ol haf

 STADI 1

“Yu No Wari, Mi Mi God Blong Yu”

“Yu No Wari, Mi Mi God Blong Yu”

“!Yu no fraet, mi mi stap wetem yu! !Yu no wari, mi mi God blong yu! !Mi bambae mi mekem yu yu strong! !Bambae mi givhan long yu!”—AES. 41:10, NW.

SINGSING 7 Jehova i Givim Paoa Long Yumi

BIGFALA TINGTING *

1-2. (1) ?Olsem wanem ol tok blong Aesea 41:10 i givhan long Yoshiko? (2) ?Jehova i meksua se ol tok ya i stap blong givhan long hu?

WAN gudfala Kristin sista we nem blong hem Yoshiko, i kasem wan rabis nius. Dokta i talem se hem i gat wan bigfala sik, mo long sam manis nomo bambae hem i ded. ?Yoshiko i mekem wanem? Hem i tingbaot wan vas blong Baebol we hem i laekem tumas, hemia Aesea 41:10, NW. * (Ridim) Long kwaet fasin, hem i talem long dokta se hem i no fraet, from we Jehova i stap holem han blong hem. * Gudfala toktok long vas ya i givhan long sista ya blong i trastem Jehova fulwan. Vas ya i save givhan long yumi tu blong yumi no wari tumas taem yumi kasem ol bigfala trabol. Blong kasem save moa, fastaem bambae yumi tokbaot from wanem God i givim ol tok ya long Aesea.

2 Jehova i yusum Aesea blong raetemdaon ol gudfala tok ya blong leftemap tingting blong ol man Jiu, we biaen oli go kalabus long Babilon. Be Jehova i meksua se ol tok ya i stap kasem tede, blong givhan long yumi tu. (Aes. 40:8; Rom 15:4) Tede, ‘laef i strong tumas mo i had blong winim ol trabol.’ Taswe yumi nidim tumas ol tok long buk blong Aesea, blong leftemap tingting blong yumi.—2 Tim. 3:1.

3. (1) ?Wanem ol promes long Aesea 41:10, we i stamba vas blong yia 2019? (2) ?From wanem yumi nidim ol promes ya?

3 Long stadi ya, bambae yumi tokbaot tri promes blong  Jehova long Aesea 41:10, we oli mekem bilif blong yumi i strong: (1) Jehova i stap wetem yumi, (2) hem i God blong yumi, mo (3) bambae hem i givhan long yumi. Yumi nidim ol promes ya * from we yumi stap fesem ol bigfala trabol long laef, olsem Yoshiko. Mo tu, yumi kasem plante problem from ol nogud samting we oli stap hapen long wol. Long sam kantri, ol brata mo sista oli stanap strong, nating se gavman i stap spolem olgeta. Naoia bambae yumi tokbaot trifala promes ya.

“MI MI STAP WETEM YU”

4. (1) ?Wanem promes we bambae yumi tokbaot fastaem? (Yu luk futnot tu.) (2) ?Olsem wanem Jehova i soemaot filing blong hem? (3) ?Ol tok blong God i mekem yu yu harem olsem wanem?

4 Fas samting we Jehova i talem blong leftemap tingting blong yumi, se: “!Yu no fraet, mi mi stap wetem yu!” * Jehova i tingbaot yumi oltaem mo i lavem yumi. Hemia i soemaot se hem i stap wetem yumi. Makem olsem wanem hem i soemaot filing blong hem, i se: “Mi mi tinghevi tumas long yufala, mi lavem yufala, mo mi wantem leftemap nem blong yufala.” (Aes. 43:4) I no gat wan samting long heven mo wol we i save mekem se Jehova i no moa lavem ol man blong hem. Hem i no save lego yumi. (Aes. 54:10) From we hem i lavem yumi mo hem i fren blong yumi, yumi no fraet. Hem bambae i protektem yumi, olsem we hem i protektem fren blong hem Ebram (o Ebraham). Hem i talem se: “Ebram, yu no fraet. Bambae mi mi stap blokemgud yu.”—Jen. 15:1.

Taem Jehova i givhan long yumi, yumi naf blong gotru long enikaen trabol, nating se i olsem bigfala wota we i ron o faea (Haf 5 mo 6) *

5-6. (1) ?Olsem wanem yumi save se Jehova i glad blong givhan long yumi? (2) ?Fasin blong Yoshiko i tijim yumi long wanem?

5 Yumi save se Jehova i glad blong givhan long yumi taem yumi kasem trabol, from we hem i promes long ol man blong hem se: “Sipos yufala i gotru long dip solwota, mi bambae mi stap wetem yufala, mo sipos yufala i gotru long wota we i ron bigwan, trabol bambae i no save kasem yufala, mo sipos yufala i pastru long faea, faea bambae i no save kakae yufala. Ol strong samting olsem oli save traem yufala, be bambae oli no save spolem yufala.” (Aes. 43:2) ?Ol tok ya i minim wanem?

 6 Jehova i no promes blong tekemaot ol trabol we i mekem laef i had. Be bambae hem i no letem ol trabol ya we oli olsem “wota we i ron bigwan” mo “faea,” oli spolem yumi blong olwe. Hem i promes se bambae i stap wetem yumi, mo i givhan long yumi blong yumi “gotru” long ol trabol ya. ?Bambae hem i givhan olsem wanem? Bambae hem i mekem se yumi no fraet, nao yumi save holemstrong long hem go kasem ded. (Aes. 41:13) Yoshiko, we yumi tokbaot finis, i luk se promes ya i tru. Gel blong hem i talem se: “Mifala i sapraes se Mama i no wari tumas. Mifala i luksave se Jehova i mekem tingting blong hem i kwaet. Go kasem dei we hem i ded, hem i storian wetem ol nes mo ol narafala sikman long saed blong Jehova mo ol promes blong hem.” ?Fasin blong Yoshiko i tijim yumi long wanem? Sipos yumi trastem promes blong God se ‘mi mi stap wetem yu,’ bambae yumi tu yumi save stanap strong mo no fraet taem bigfala trabol i kasem yumi.

“MI MI GOD BLONG YU”

7-8. (1) ?Wanem seken promes we bambae yumi tokbaot, mo wanem mining blong hem? (2) ?From wanem Jehova i talem long ol man Jiu se: “Yu no wari”? (3) ?Wanem ol tok long Aesea 46:3, 4 we i mekem tingting blong ol man blong God i kwaet?

7 Makem gud seken promes blong God we Aesea i raetemdaon, i se: “!Yu no wari, mi mi God blong yu!” ?Ol tok ya i minim wanem? Long lanwis we oli raetem Baebol long hem, tok ya “wari” i givim tingting se man i “lukluk biaen oltaem from i fraet se wan trabol bambae i kasem hem,” o “i lukluk olbaot olsem we i stap long denja.”

8 ?From wanem Jehova i talem long ol man Jiu we oli stap kalabus long Babilon, blong oli no “wari”? From we hem i save se ol man Babilon bambae oli fraet. ?Bambae oli fraet long wanem? Klosap long en blong ol 70 yia we ol man Jiu oli kalabus, ol ami blong Media mo Pesia oli agensem Babilon. Jehova i yusum ol ami ya blong mekem ol man blong hem oli fri. (Aes. 41:2-4) Taem ol man Babilon mo ol narafala kantri oli harem se ol enemi oli stap kam, oli traem blong “leftemap tingting” blong olgeta blong oli no fraet. Mo tu, oli wokem plante moa aedol, we oli hop se bambae oli protektem olgeta. (Aes. 41:5-7) Be Jehova i mekem tingting blong ol man blong hem i kwaet, taem hem i talem se: “Isrel, [yu no olsem ol narafala neson] yu yu man blong wok blong mi . . . !Yu no wari, mi mi God blong yu!” (Aes. 41:8-10, NW) Makem ol tok ya se: “Mi mi God blong yu.” Ol tok ya i mekem ol man blong Jehova oli sua se hem i no lego olgeta, mo olgeta oli man blong hem yet. Hem i talem se: ‘Mi bambae mi holem yufala i stap gud, mo mi sevem yufala.’ Ol tok ya i mas leftemap tingting blong ol man Jiu we oli stap kalabus, mo mekem olgeta oli strong.—Ridim Aesea 46:3, 4.

9-10. ?From wanem yumi no nid blong fraet? Talem wan pijatok.

9 Tede plante man oli wari from we ol samting long wol oli stap kam moa nogud. Yumi tu yumi save wari long ol trabol ya. Be i no nid blong fraet. Jehova i talem se: “Mi mi God blong yu.” ?Olsem wanem tok ya i save mekem tingting blong yumi i stap kwaet?

10 Tingbaot wan pijatok: Jim mo Ben i stap long wan plen we strong win i stap mufmuvum olbaot. Nao wantaem nomo, oli harem wan voes i se: “Fasem gud strap blong yufala. Bambae yumi flae i gotru long wan strong win blong longtaem lelebet.” Jim i wari tumas. Nao voes i gohed se: “Hemia paelot blong yufala. Yufala i no fraet.” Be Jim i no trastem hem, i se: “!Hemia i no minim wan samting!” Nao hem i luk se Ben i no wari nating, ale hem  i askem se: “?From wanem yu no wari?” Ben i smael mo i talem se: “From we mi mi save gud paelot ya. !Hem i papa blong mi!” Hem i gohed i se: “Yu traem harem. Bae mi tokbaot papa blong mi long yu. Taem yu save hem mo ekspiriens we hem i gat olsem paelot, mi sua se yu tu bae yu no wari.”

11. ?Pijatok ya i tijim yumi long wanem?

11 ?Pijatok ya i tijim yumi long wanem? Olsem Ben, yumi no wari from we yumi save gud Papa blong yumi long heven, Jehova. Yumi save se hem bambae i lidim gud yumi taem yumi stap gotru long ol trabol blong ol las dei, we oli olsem bigfala hariken. (Aes. 35:4) Yumi trastem Jehova, taswe tingting blong yumi i stap kwaet taem ol narafala man oli fraet tumas. (Aes. 30:15) Mo tu, olsem Ben, yumi talem long ol narafala from wanem yumi trastem God. Nao olgeta tu oli save gat strong tingting se nomata wanem trabol oli fesem, Jehova bambae i givhan long olgeta.

‘BAMBAE MI MEKEM YU YU STRONG MO GIVHAN LONG YU’

12. (1) ?Wanem namba tri promes we bambae yumi tokbaot? (2) ?Aesea 40:10 i mekem yumi tingbaot wanem?

12 Tingbaot namba tri promes we Aesea i raetemdaon, i se: “!Mi bambae mi mekem yu yu strong! !Bambae mi givhan long yu!” Aesea i tokbaot finis olsem wanem Jehova bambae i givim paoa long ol man blong hem, mo mekem olgeta oli strong, i se: ‘Jehova bambae i kam olsem wan strong man, wetem paoa blong rul.’ (Aes. 40:10) Tok ya i mekem yumi tingbaot se Jehova i wan King we i gat bigfala paoa. Hem i yusum paoa ya blong sapotem mo protektem ol man blong hem bifo, mo tede, hem i stap gohed blong protektem mo givim paoa long ol man we oli trastem hem.—Dut. 1:30, 31; Aes. 43:10.

I no gat wan tul blong faet i save winim strong paoa blong Jehova we i protektem yumi (Haf 12-16) *

13. (1) ?Wetaem bakegen Jehova i holem promes blong hem blong mekem yumi strong? (2) ?Wanem promes i mekem yumi strong mo yumi no fraet?

13 Long taem ya tu we ol enemi bambae oli  spolem yumi, Jehova i holem promes blong hem se: “Mi bambae mi mekem yu yu strong.” Long sam ples long wol, ol enemi oli stap traehad blong stopem wok blong prij mo putum tabu long ogenaesesen blong yumi. Nating se i olsem, yumi no wari bitim mak. Promes we Jehova i givim i mekem yumi strong mo yumi no fraet. Hem i se: “Eni tul blong faet we bambae ol man oli stanemap agensem yu bambae oli no save win.” (Aes. 54:17, NW) Ol tok ya i mekem yumi tingbaot tri impoten samting.

14. ?From wanem yumi no sapraes se ol enemi blong God oli agensem yumi?

14 Fas samting: Yumi ol man blong Kraes, yumi save se bambae ol man oli agensem yumi. (Mat. 10:22) Jisas i talem long ol disaepol blong hem se long ol las dei, ol man bambae oli mekem bigfala trabol long olgeta. (Mat. 24:9; Jon 15:20) Seken samting: Profet tok blong Aesea i givim woning se bambae ol enemi oli go moa i bitim we oli no laekem yumi. Bambae oli yusum ol tul blong faet agensem yumi. Sam long ol tul ya, hemia se oli giaman, oli talem ol tok we i saon olsem se i tru be i giaman nomo, mo oli kilim mo ronem yumi. (Mat. 5:11) Jehova bambae i no blokem ol enemi blong oli no yusum ol tul blong faet ya agensem yumi. (Efes. 6:12; Rev. 12:17) Be yumi no nid blong fraet. ?From wanem?

15-16. (1) ?Wanem namba tri samting we yumi mas tingbaot, mo olsem wanem i joen wetem Aesea 25:4, 5? (2) ?Aesea 41:11, 12 i talem se wanem bambae i hapen long ol enemi we oli faet agensem yumi?

15 Namba tri samting we yumi mas tingbaot: Jehova i talem se “eni tul blong faet” we oli yusum agensem yumi, ‘bambae i no save win.’ Olsem wan stonwol we i protektem yumi long bigfala win mo ren, Jehova i save protektem yumi long ‘ol enemi we oli no gat sore.’ (Ridim Aesea 25:4, 5.) Bambae oli no save mekem wan samting blong spolem yumi blong olwe.—Aes. 65:17.

16 Jehova i mekem se yumi trastem hem moa, taem hem i talemaot klia ol samting we bambae i hapen long olgeta we oli ‘kros long yumi.’ (Ridim Aesea 41:11, 12.) Nomata se ol  enemi oli faet strong agensem yumi mo faet i kam bigwan olsem wanem, be en blong hem bambae i sem mak: Olgeta enemi blong ol man blong God “bambae oli ded evriwan.”

?OLSEM WANEM BLONG TRASTEM JEHOVA MOA?

Bambae yumi trastem Jehova moa sipos yumi ridim Baebol oltaem (Haf 17 mo 18) *

17-18. (1) ?Olsem wanem Baebol riding i save mekem se yumi trastem God moa? Talem wan pijatok. (2) Sipos yumi tingting dip long stamba vas blong yia 2019, ?olsem wanem hem i save givhan long yumi?

17 Yumi trastem Jehova moa taem yumi save gud hem. Rod blong save gud hem, hemia blong ridim Baebol mo tingting dip long tok blong hem. Baebol i tokbaot ol tru stori blong ol man blong Jehova bifo, mo olsem wanem Jehova i protektem olgeta. Ol stori ya oli mekem tingting blong yumi i strong se Jehova bambae i lukaot gud long yumi tede.

18 Tingbaot gudfala pijatok we Aesea i talem blong soemaot olsem wanem Jehova i stap protektem yumi. Hem i tokbaot Jehova olsem wan man blong lukaot long sipsip, mo ol man blong hem olsem ol smol sipsip. Hem i se: “Wetem han blong hem, hem i hivimap ol smol sipsip blong hem, mo hem i holem olgeta klosap long hem.” (Aes. 40:11, NW) Taem yumi haremsave se Jehova i holemtaet yumi long han blong hem, tingting blong yumi i kwaet mo yumi harem se yumi sef. Blong mekem se yumi no wari tumas long ol problem we yumi fesem, gudfala slef ya we i waes i jusum Aesea 41:10 olsem stamba vas blong yia 2019: “!Yu no wari, mi mi God blong yu!” I gud yu tingting dip long ol gudfala tok ya. Bambae oli mekem yu yu strong blong fesem ol trabol we i stap kam.

SINGSING 38 Hem Bambae i Mekem Yu Yu Strong

^ par. 5 Stamba vas blong yia 2019 i soemaot tri risen blong no wari tumas taem i gat trabol long wol o long laef blong yumi. Stadi ya i tokbaot ol risen ya mo i givhan long yumi blong yumi no wari tumas mo blong trastem Jehova moa. Tingting dip long stamba vas blong 2019 mo traem lanem baehat. Vas ya bambae i mekem yu yu strong blong fesem ol trabol we i stap kam.

^ par. 1 Aesea 41:10, NW: “!Yu no fraet, mi mi stap wetem yu! !Yu no wari, mi mi God blong yu! !Mi bambae mi mekem yu yu strong! !Bambae mi givhan long yu! !Bambae mi holemtaet yu, mo mi yusum raet han blong mi blong lidim yu long stret fasin!”

^ par. 3 MINING BLONG TOKTOK: Promes blong Jehova, hemia ol tok blong hem we bambae i mas kamtru. Ol promes ya oli mekem se yumi no wari tumas from ol trabol long laef.

^ par. 4 FUTNOT: Aesea 41:10, 13, 14 i talem tri taem se yumi no mas fraet. Mo plante taem ol vas ya oli talem tok ya “mi” (hemia Jehova). ?From wanem Jehova i pulum Aesea blong yusum tok ya “mi” plante taem? Hem i wantem makem wan impoten poen: Wan rod nomo blong winim fraet, hemia blong trastem Jehova.

^ par. 53 PIJA: Ol memba blong wan famle oli kasem trabol long wok, long saed blong helt, long wok blong prij, mo long skul.

^ par. 55 PIJA: Polis i kam insaed long haos we ol Witnes oli stap mekem miting long hem, be ol brata mo sista oli no fraet.

^ par. 57 PIJA: Sipos yumi mekem Famle Wosip oltaem, bambae yumi kasem paoa blong stanap strong.