?Wetaem ol nesen bambae oli talemaot se i gat “pis mo seftaem”?

Long wan “Kwestin” long wan Wajtaoa a we i kamaot i no longtaem, yumi luk se Jehova bambae i putum “tingting” blong hem long hat blong “ol ten hon” (hemia olgeta politik paoa), we i min se bambae oli givim paoa mo raet blong olgeta i go long “wael animol we kala blong hem i laet red,” hemia Yunaeted Nesen. Animol ya, oli singaot hem tu se “pija blong wael animol.” (Rev. 13:​14, 15; 17:​3, 16, 17) Biaen, “ol ten hon” ya mo wael animol ya we i jes kasem paoa, bambae tufala i finisim olgeta giaman skul long wol. Be, ?wetaem ol nesen bambae oli talemaot se i gat “pis mo seftaem”? b ?Hemia bifo o afta we olgeta giaman skul oli lus?—1 Tes. 5:3.

Blong talem stret, yumi no save stret wetaem bambae oli talemaot se i gat “pis mo seftaem.” Sipos yumi gat evri save long saed ya, maet bambae yumi no moa nid blong stap rere mo lukaot gud. Be Jisas i talem plante taem long ol man blong hem se oli mas “gohed blong lukaot gud oltaem.” (Mat. 24:42; 25:13; 26:41) Naoia i gud yumi lukluk gud profet tok ya we aposol Pol i tokbaot long leta ya we hem i raetem long olgeta long Tesalonaeka.

Pol i talem se: “Long taem we ol man oli stap talem se: “!I gat pis mo seftaem!” bambae oli sek we bigfala trabol i kam wantaem nomo blong spolem olgeta.” (1 Tes. 5:​2, 3) Plante taem, ol  buk blong yumi oli eksplenem ol tok ya blong Pol olsem se: Ol nesen bambae oli talemaot se i gat “pis mo seftaem” jes bifo long bigfala trabol, we bambae i stat taem Bigfala Babilon, hemia olgeta giaman skul long wol, oli lus. Mo tu, taem yumi harem mesej ya, bambae yumi save se i no longtaem bigfala trabol bambae i stat.

Be afta we ol brata oli mekem plante risej, oli luksave se maet i gat narafala rod blong eksplenem ol tok ya. Maet ol nesen bambae oli talem se i gat “pis mo seftaem” afta we olgeta giaman skul oli lus. Bambae yumi luk sam risen from wanem yumi talem olsem.

?Olsem wanem ol giaman skul oli joen long ol faet blong wol ya? Baebol i talem se: “Long ples blong hem [“bigfala prostitut,” hemia Bigfala Babilon], oli faenem blad blong . . . olgeta man we ol man oli kilim olgeta i ded long wol.” (Rev. 17:​1, 5; 18:24) Bifo finis i kam, bigfala prostitut ya i stap pulum ol nesen blong faet mo kilim plante milian man i ded. Yes, hem nao i stamba blong plante faet mo raf fasin, be hem i no mekem ol man oli harem se oli gat pis mo oli sef. Taswe, maet ol nesen bambae oli talemaot se i gat “pis mo seftaem” afta we Bigfala Babilon i lus, be yumi no save talem stret se i olsem.

?Wanem bambae i hapen afta we oli talemaot se i gat “pis mo seftaem”? Pol i se: “Bambae oli sek we bigfala trabol i kam wantaem nomo blong spolem olgeta.” (1 Tes. 5:3) Sipos ol nesen oli talemaot se i gat “pis mo seftaem” bifo we oli spolem ol giaman skul, hemia i min se bambae i gat sam taem i pas bifo we God i spolem ol nesen. Be from we Pol i talem se bambae ol nesen “oli sek” mo trabol ya bambae i kasem olgeta “wantaem nomo,” hemia i min se maet ol nesen bambae oli talemaot se i gat “pis mo seftaem” afta we oli spolem ol giaman skul.

?Ol man blong Jehova bambae oli mekem wanem taem ol samting ya oli hapen? Pol i talem se: “Ol brata, yufala i no stap long tudak, blong bambae yufala i sek nogud long dei ya, olsem we man we i stap stil i sek nogud taem delaet i kam.” (1 Tes. 5:4) Traem tingbaot: Sipos ol nesen oli talemaot “pis mo seftaem” afta we ol giaman skul oli lus, ol man blong Jehova bambae oli save se i no longtaem ol nesen tu bambae oli lus. Be long tingting blong ol man we oli talemaot mesej ya, bambae oli ting se naoia oli sef, be bambae oli sek we trabol i kasem olgeta wantaem nomo olsem wan stilman we i kam long naet.

Be i gat wan samting we yumi sua gud long hem. Long fiuja, “ol ten hon” mo wael animol ya we i kasem bigfala paoa, bambae tufala i spolem gud olgeta giaman skul. Mo hemia nao stat blong bigfala trabol. Mo tu, yumi save se i gat wan taem we ol nesen bambae oli talemaot se i gat “pis mo seftaem.” ?Hemia bambae i hapen wetaem? I gat tu defren tingting we yumi bin tokbaot. Faswan: Maet bambae oli talemaot mesej ya blong “pis mo seftaem” bifo we ol giaman skul oli lus. Nambatu: Maet bambae oli talemaot mesej ya afta we ol politik paoa oli spolem fulwan olgeta giaman skul. Bambae yumi mas wet mo luk ol samting we bambae i hapen. Plante taem, yumi naf blong kasemsave fulwan long ol profet tok blong Baebol taem oli stap kamtru o afta we oli kamtru.—Skelem wetem Jon 12:16.

Be go kasem taem we profet ya i kamtru, samting we i moa impoten hemia se yumi holemstrong long Jehova, be i no blong save wetaem bambae ol nesen oli talemaot se i gat “pis mo seftaem.” Yumi mas “stap wekap mo yumi yusum gud tingting blong yumi,” olsem nao yumi save stap rere nomata wanem taem ol samting ya bambae oli hapen.—1 Tes. 5:6.