1-2. ?Yumi save mekem wanem blong rere from ol problem we yumi save fesem afta we yumi baptaes? Talem wan eksampol.

 YUMI save se long wol ya blong Setan bambae yumi fesem ol problem. Jisas i talem long ol disaepol blong hem se: “I tru we bambae i gat ol ston we oli mekem man i stambol.” (Mat. 18:7) Taswe yumi mas rere blong fesem ol problem, we i minim tu ol problem we yumi save gat wetem ol brata mo sista long kongregesen.

² Traem tingbaot, yumi ol man blong Jehova, oltaem yumi kasem advaes se yumi mas rere from ol disasta. ?Yumi mekem wanem blong rere? Fastaem, yumi mas save wanem kaen disasta we i save hapen long ples we yumi stap long hem. Hemia i impoten moa sipos yumi jes muv i go long wan niufala ples. Biaen, yumi mas mekem wan plan blong rere from ol disasta ya. (Prov. 21:5) Long sem fasin, yumi mas save ol problem we yumi save fesem afta we yumi baptaes, olsem nao yumi save rere from olgeta. Hemia bambae i mekem se yumi naf blong stanap strong mo gohed blong fren gud wetem Jehova. (Sam 17:5) Taswe, naoia i gud yumi tokbaot tri problem we yumi save fesem, mo samting we yumi save mekem blong rere from olgeta. a

WAN BRATA O SISTA I MEKEM YU HAREM NOGUD

3. ?Wanem problem we yumi save fesem insaed long kongregesen?

³ ?Yu yu tingbaot filing we yu gat long faswan taem we yu kam  long miting mo yu luk we ol man blong Jehova oli lavlavem olgeta? Ating long taem ya yu luksave se yu faenem trutok. (Jon 13:35; Kol. 3:12) Hemia nao filing we Blanca b i gat. Be afta we hem i baptaes, hem i fesem wan problem we hem i neva ting se bambae i hapen. Hem i talem se: “Wan sista i no kaen long mi. Mi makem tu se hem i stap tokbaot nogud ol narafala. Mi neva ting se samting ya i save hapen, from mi lanem se ol Witnes blong Jehova oli traehad blong lavlavem olgeta mo oli gat pis.” I tru, ol man blong Jehova oli stap traehad blong kam gud moa long ol Kristin fasin, be oli sinman yet. (Efes. 4:​23, 24; 1 Jon 1:8) Taswe samtaem oli save talem o mekem wan samting we yumi save harem nogud from. (Jem. 3:8) Sore tumas, ol problem olsem oli mekem se samfala oli stop blong wosipim Jehova.

4. ?Yumi save mekem wanem naoia blong rere sipos wan brata o sista i mekem yumi harem nogud? (Efesas 4:32)

⁴ ?Yu save mekem wanem naoia blong rere sipos we wan brata o sista i mekem yu harem nogud? I gud yu lanem naoia blong folem advaes we i stap long Efesas 4:32. (Ridim.) Sipos yu traehad blong kaen mo sore long narafala, bambae yu blokem plante problem we yu save gat wetem ol narafala. Mo tu, i gud yu rere nomo blong fogivim ol narafala taem oli mekem yu harem nogud. ?Wanem i save halpem yu blong mekem olsem? I gud yu tingbaot se evri taem we yu askem Jehova blong i fogivim yu, hem i glad nomo blong mekem olsem. (Mat. 6:12) Sipos yu tingbaot samting ya, bambae i isi moa blong yu fogivim ol narafala.

5. ?Wanem advaes blong Baebol we i save givhan long yumi taem narafala i mekem yumi harem nogud? (Ol Proveb 19:11) (Mo tu, yu luk ol pija.)

⁵ Ridim Ol Proveb 19:11. Baebol i talem se sipos yumi gat hed, c bambae yumi no hariap blong kros taem narafala i mekem yumi harem nogud. Advaes ya i givhan long Rima, we i baptaes sam yia i pas. Hem i talem se: “Taem ol brata mo sista oli mekem o talem wan samting we i mekem mi harem nogud, mi tingbaot Ol Proveb 19:11. Mi tingbaot laef blong olgeta bifo, mo mi traem blong kasemsave from wanem nao oli mekem olsem. Mo tu, mi mekem plan blong prij wetem olgeta. Long rod ya, mi save gud olgeta.” Yes, i gud we naoia yu traehad blong save gud ol brata mo sista. Olsem nao, bambae i isi moa blong yu fogivim olgeta sipos oli talem o mekem wan samting we i mekem yu harem nogud.

6. ?Wanem i save givhan long yumi blong fren gud wetem ol brata mo sista long kongregesen?

 ⁶ ?Wanem i save givhan long yu blong fren gud wetem ol brata mo sista long kongregesen? Taem yu save gud ol brata mo sista, i gud yu meksua se yu tingbaot nomo ol gudfala fasin blong olgeta. (Skelem wetem Ol Proveb 10:12; Rom 12:10; Fil. 2:​2, 3) Traem luk olsem wanem hemia i givhan long wan brata we nem blong hem Mark, we i jes baptaes i no longtaem i pas. Taem hem i spenem moa taem wetem ol brata mo sista long kongregesen, hem i stat blong luk ol slak fasin blong olgeta. ?Wanem i givhan long hem blong i no letem tingting blong hem i foldaon? Hem i talem se: “Mi tingbaot se ol mastik blong olgeta i smol nomo taem mi skelem wetem ol nogud samting we ol man long wol tede oli stap mekem. Taswe mi jusum blong no tingbaot ol smosmol mastik blong ol brata mo sista, be mi tingbaot ol gudfala fasin blong olgeta.” Sipos yu mekem sem mak, bambae yu fren gud wetem ol brata mo sista long kongregesen.

YU STAT BLONG TINGBAOT OL SAMTING WE YU LEGO

7. ?Wanem i save mekem se yumi stat blong tingbaot ol samting we yumi lego?

⁷ Taem yu jes lanem trutok, i sua se yu glad blong lego ol samting long wol blong Setan. Maet yu tingting se: ‘Bambae mi neva wantem gobak long ol samting ya.’ Be taem yu fesem ol hadtaem, maet yu stat blong tingbaot mo wantem bakegen ol samting ya we yu bin lego blong yu save wosipim Jehova. (Skelem wetem Namba 11:​4-6.) Eksampol, sam brata oli jusum blong lego wan gudfala wok we i kakae tumas taem blong olgeta. Sam narafala, taem oli stat blong stadi Baebol, ol fren blong olgeta oli lego olgeta. Sam narafala bakegen, oli lego ol samting we oli save harem gud long hem we Jehova i no laekem. Jehova bambae i harem nogud tumas sipos yumi gobak long ol samting ya we yumi lego mo yumi no moa fren gud wetem hem. Taswe, ?yu save mekem wanem blong yu no moa tingbaot ol samting ya we yu lego, nating se yu fesem sam hadtaem?

8. ?Yumi lanem wanem long eksampol blong Ebraham mo Sera?

⁸ I gat plante eksampol blong ol man blong Jehova long Baebol we sipos oli no lukaot gud, oli save stat blong tingbaot bakegen ol samting we oli lego. Eksampol, Ebraham mo Sera i obei long Jehova, nao tufala i lego gudfala taon ya Uru blong go stap long ol tent. (Hib. 11:​8, 9) I sua se samtaem tufala i tingbaot ol gudfala samting we tufala i bin gat long Uru. Be sipos tufala i “gohed blong tingbaot” ol samting ya o wantem tumas ol samting ya, maet bambae tufala i wantem gobak long Uru. Be tufala i no mekem olsem, tufala i lukluk i go nomo long fiuja.—Hib. 11:​15, 16.

9. ?Aposol Pol i gat wanem tingting long ol samting we hem i lego? (Filipae 3:​7, 8, 13)

⁹ Aposol Pol i lego plante samting blong i save wosipim Jehova. Bifo we hem i kam wan Kristin, hem i stadi gud long Loa blong ol man Jiu, mo tija blong hem hemia Gamaliel we plante man oli respektem hem. (Wok 22:3) Pol i save kam wan lida blong skul blong ol man Jiu. (Gal. 1:​13, 14) Be taem hem i harem gud nius, hem i lego olgeta samting ya. Afta we hem i kam wan Kristin, ?laef blong hem i isi? Nogat. Ol man Jiu oli kilim hem, oli putum hem long kalabus, mo oli no laekem hem nating. (2 Kor. 11:​23-26) Sipos hem i tingbaot nomo ol trabol ya mo i skelem wetem laef blong hem bifo, maet hem i save gat tingting ya se laef blong hem bifo i gud moa. Be Pol i tingbaot nomo nambawan blesing ya blong mekem wok blong Kraes Jisas, mo ol blesing we bambae hem i kasem long fiuja. !Pol i sua fulwan se ol blesing ya oli gud  moa i bitim ol samting we hem i lego!—Ridim Filipae 3:​7, 8, 13.

10. ?I gud we oltaem yu tingting dip long wanem? (Mak 10:​29, 30) (Mo tu, yu luk ol pija.)

¹⁰ ?Yumi lanem wanem? Sipos yumi stat blong tingbaot ol samting we yumi lego blong yumi save kam wan Kristin, i gud yumi tingbaot tu from wanem yumi lego ol samting ya. (Pri. 7:10) I gud yumi skelem ol samting we yumi lego wetem ol blesing we yumi kasem naoia from we yumi kam long trutok. Naoia yumi fren gud wetem Hae Masta blong heven mo wol. (Prov. 3:32) Yumi joen long wan bigfala famle long fulwol we oli lavlavem olgeta. (Ridim Mak 10:​29, 30.) !Mo Jehova i promes blong givim wan nambawan fiuja long yu! (Aes. 65:​21-23) Sipos oltaem yu tingting dip long ol blesing we yu kasem from we yu wosipim Jehova, bambae yu no tingbaot ol samting we yu lego.

11. ?Yu lanem wanem long stori blong Rosemary?

¹¹ Wan sista we nem blong hem Rosemary i baptaes taem hem i gat samwe 50 yia, mo hem i mas lego sam samting we hem i laekem. ?Wanem filing blong hem? Hem i talem se: “Fastaem, mi harem nogud we mi no moa save selebretem Krismas, from we hemia wan taem we mi save harem gud wetem ol famle blong mi. Mi glad blong givim presen long ol famle blong mi, mo mi laekem luk ol pikinini oli sidaon raon long Krismas tri mo oli glad tumas blong openem ol presen blong olgeta.” ?Wanem i givhan long Rosemary blong i no moa harem nogud? Hem i talem se: “Evri yia, mi traem blong mekem wan narafala samting blong spenem taem wetem famle blong mi. Mi jusum wan defren dei, nao mi singaot ol famle blong mi i kam, mi givim presen long olgeta, mo mi talem from wanem mi lavem olgeta.” Rosemary i fesem wan narafala problem tu. Hem i talem se: “Taem mi lanem trutok, ol fren blong mi oli lego mi. Samtaem, mi misim olgeta mo mi harem se mi stap mi wan nomo.” d ?Wanem i givhan long hem? Hem i stat blong mekem plan wetem ol defdefren sista blong go prij. Hem i talem se: “Taem mi mekem olsem, mi gat plante niufala fren we mi lavem olgeta mo tinghae long olgeta.” ?Yu lanem wanem long eksampol blong hem? Maet yu tu yu harem nogud from we yu lego wan samting we yu laekem blong mekem, be maet yu save mekem wan narafala samting we i gud moa blong tekem ples blong samting ya. (Fil. 4:​8, 9) Mo tingbaot se Jehova i save givim plante moa samting long yu i bitim wanem we yu lego.

 WAN BRATA O SISTA I LEGO JEHOVA

12. ?Wanem problem insaed long kongregesen we yu save fesem we i had moa?

¹² Taem yu kam wan Witnes, yu glad se yu kamaot long ol man we oli stap mekem ol nogud fasin, mo yu kam joen wetem ol man we oli gat ol gudfala fasin. (Aes. 65:14) Be samtaem, maet yu harem se wan long kongregesen i mekem wan bigfala sin. Mo taem hem i no tanem tingting blong hem, oli putumaot hem. (1 Kor. 5:13) Traem luk filing blong wan sista, hemia Samar, taem hem i harem wan nius olsem. Hem i se: “Smoltaem afta we mi baptaes, wan elda i mekem wan bigfala sin, mo oli putumaot hem long kongregesen. Klosap mi lego kongregesen, from mi neva ting se wan elda bambae i save mekem sin agens long Jehova mo kongregesen.” I tru, oltaem yumi mas trastem se ol brata mo sista oli lavem Jehova mo oli wantem holemstrong long hem. (1 Kor. 13:​4, 7) Be sore tumas, evri yia kongregesen i mas putumaot samfala. Mo bambae yu harem nogud moa sipos wan we kongregesen i putumaot hem i wan gudfala fren blong yu o wan we yu respektem hem.

13. ?Yumi save mekem wanem naoia blong yumi no lego bilif sipos wan we yumi lavem hem i lego Jehova?

¹³ ?Yu save mekem wanem naoia blong yu no lego bilif sipos wan we yu lavem hem i lego Jehova? Yu mas gohed blong mekem ol samting we bambae i mekem se yu fren gud moa wetem Jehova. (Jem. 4:8) Yu no mas wosipim Jehova nomo from we yu luk se ol narafala oli mekem olsem. Eksampol, nating se yumi joen wetem famle blong yumi o kongregesen blong wosipim Jehova, be yumi wanwan i mas gat wan gudfala program blong prea mo ridim Baebol.—Sam 1:2; 62:8.

14. ?Yumi lanem wanem long eksampol blong aposol Pita? (Jon 6:​66-68)

¹⁴ Eksampol blong aposol Pita tu i save halpem yumi. I gat wan taem we plante disaepol oli stop blong folem Jisas from we hem i talem wan samting we oli no kasemsave long hem. Maet Pita tu i no kasemsave long samting we Jisas i talem, be hem i gohed blong holemstrong long Jisas. (Ridim Jon 6:​66-68.) Pita i no tingbaot samting we ol narafala oli mekem, be hem i tingbaot moa ol trutok we hem i harem long Jisas. Taswe hem i gohed nomo blong folem Jisas. Hemia i sem mak tu tede. Nomata se samfala oli lego trutok, be yu mas tingbaot se oganaesesen blong Jehova nomo i tijim trutok long yu. !Taswe yu no mas lego! Samar we yumi tokbaot hem finis i talem se: “Oltaem mi tingbaot se taem wan man i mekem wan bigfala sin, hemia i no min se evriwan long kongregesen o oganaesesen bambae i mekem sem mak. Mo nomata wanem fasin we ol man oli gat, ol gudfala fasin blong Jehova oli neva jenis.”

15. ?Yu lanem wanem long ekspiriens blong Emily?

¹⁵ Traem tingbaot eksampol blong Emily. Wan wik afta we hem i baptaes, mama blong hem i lego famle mo kongregesen i putumaot hem. Emily i talem se: “Mi neva ting se samting  ya bambae i hapen. Hemia i rili had long mi, from mi misim mama blong mi bigwan.” ?Wanem i givhan long Emily? Hem i talem se: “Mi no stap mi wan. Papa blong mi i givhan bigwan long mi, mo olgeta long kongregesen tu oli givhan long mi. Olgeta oli olsem famle blong mi. Yumi evriwan i stap fesem ol problem, taswe i impoten we yumi fren gud wetem ol brata mo sista, mo yumi lefleftemap tingting blong yumi.” (1 Pita 5:9) Yu no mas wet se yu fesem wan trabol, ale yu go fren gud wetem ol brata mo sista. Be yu mas gohed blong mekem samting ya naoia, olsem nao nomata wanem samting i hapen long yu, bambae yu no harem se yu stap yu wan.

16. ?Yumi mas tingbaot wanem? (Mo tu, yu luk pija.)

¹⁶ I gud yu tingbaot tu se Jehova i stretem olgeta we hem i lavem olgeta. (Hib. 12:6) Hem i wantem se olgeta we kongregesen i putumaot olgeta, oli kambak. (2 Pita 3:9) Taswe sipos kongregesen i putumaot wan we yu lavem hem, yu save sua se ol elda bambae oli traehad blong givhan long hem blong i kambak long Jehova.—2 Tim. 2:​24, 25.

17. ?Yumi save sua long wanem?

¹⁷ Yumi tokbaot sam nomo long ol problem we yu save fesem afta we yu baptaes. I tru, sam long ol problem ya i had, be yu save holemstrong long Jehova. I gat plante samting we yu save mekem naoia blong rere from ol problem ya. Mo yu mas tingbaot se Jehova i stap blong givhan long yu. Hem i mekem plante samting finis blong halpem yu, mo hem i wantem givhan long yu olwe. (1 Pita 5:10) Oltaem bambae hem i givim paoa long yu blong yu save stanap strong long eni problem we yu fesem. Sipos yu gohed blong letem Jehova i halpem yu, !bambae i no gat wan samting we i save pulum yu yu gowe long hem!—Sam 119:165; Rom 8:​38, 39.