1. (1) ?Wanem sam gudfala samting we i kamaot taem yumi baptaes? (2) ?Bambae yumi tokbaot wanem long stadi ya?

 ?YU YU givim laef blong yu finis i go long Jehova mo yu baptaes? Sipos yes, hemia i min se yu askem long God blong tingting blong yu we i save stikim yu, i klin. (1 Pita 3:21) Taem yu baptaes, yu soemaot wan gudfala eksampol long olgeta long kongregesen we oli no baptaes yet. !Desisen ya we yu mekem blong baptaes i wan nambawan desisen! ?Be olsem wanem sipos yu no baptaes yet? I sua se yu lavem Jehova mo yu wantem mekem samting we hem i wantem. Yu save se yu mas baptaes blong hem i save fogivim ol sin blong yu mo glad long yu. (Wok 2:​38-40) Be maet i gat wan samting we i stap blokem yu blong yu baptaes. ?Wanem i save givhan long yu? Long stadi ya, bambae yumi tokbaot (1) from wanem samfala oli no baptaes yet, (2) from wanem i waes blong tingbaot se en i klosap, mo (3) from wanem i impoten we yu kasem mak ya blong baptaes kwiktaem.

?FROM WANEM SAMFALA OLI NO BAPTAES YET?

2. ?From wanem samfala oli no baptaes yet?

² Samfala oli no baptaes yet from we oli fraet. Eksampol, maet oli wantem mekem wok blong Jehova, be oli fraet se oli no naf blong mekem hem i glad. Sipos yu harem olsem, i gud yu tingting dip long ol vas blong Baebol we oli mekem yu trastem se Jehova i no askem yu blong mekem samting we yu no naf blong mekem, mo hem i glad taem yu mekem bes blong yu. (Sam 103:​13, 14; Kol. 3:23) Mo sipos yu fraet se ol man bambae oli agensem yu, i gud yu askem Jehova blong i givim  strong tingting long yu olsem man blong raetem sam, we i talem se: “Jehova i stap long saed blong mi. Bambae mi no fraet. ?Man i save mekem wanem long mi?”—Sam 118:6.

3. ?Samfala oli gat wanem tingting we i blokem olgeta blong baptaes? (Mo tu, yu luk pija.)

³ Samfala oli lavem Jehova, be oli no baptaes yet from we oli ting se save blong olgeta i no naf. ?Be i tru se yu mas save evri samting bifo we yu baptaes? Nogat. Traem tingbaot wan stori long Baebol. Long taem we aposol Pol mo Saelas i stap long kalabus, Jehova i mekem graon i seksek blong mekem se tufala i kamfri, mo tufala i gat janis blong talemaot trutok long gad blong kalabus mo famle blong hem. Man ya mo famle blong hem oli luksave se God nao i mekem graon i seksek. Mo tu, oli lanem plante samting long naet ya. Taswe long naet ya nomo, “oli baptaes.” (Wok 16:​25-33) Sipos yu save Jehova, yu lavem hem long fulhat blong yu, yu kasemsave long ol stamba tijing blong Baebol, yu tanem tingting from ol sin blong yu, mo yu gat strong tingting blong folem ol rul blong Jehova long laef blong yu, yu rere blong baptaes.—Mak 12:30.

4. ?Samfala oli wari long wanem we i blokem olgeta blong baptaes? (Mo tu, yu luk pija.)

⁴ Samfala oli wantem mekem God i glad, be oli ting se i had tumas blong mekem olsem. I tru se i waes blong tingting gud fastaem bifo we yumi mekem wan desisen. (Luk 14:​27-30) Be samfala oli wari tumas long ol samting we bambae oli mas lego blong oli save mekem wok blong God. Candace, we i gruap long trutok, i gat tingting ya taem hem i stat blong stadi Baebol bakegen long taem we hem i kam bigman finis. Hem i talem se: “Mi save finis ol samting we mi mas mekem blong Jehova i glad, be mi laekem ol samting blong wol we mi stap mekem. Mi save se bambae i had blong mi lego ol samting ya.” Sam narafala oli ting se ol samting we Jehova i askem long olgeta we oli baptaes i had tumas. Oli wari se afta we oli baptaes, maet bambae oli mekem wan bigfala sin mo kongregesen bambae i putumaot olgeta. Sipos yu tu yu gat sam wari olsem, ?yu save mekem wanem?

5. ?Yumi mas tingbaot wanem taem yumi stap tingting se bambae yumi baptaes o nogat? (Matiu 13:​44-46)

⁵ Taem yumi wantem pem wan samting, bambae yumi no tingbaot praes blong hem nomo, be bambae yumi tingbaot tu se samting ya i gud o nogat. Sipos yu rili nidim wan samting mo yu luk se i gud, bambae yu glad nomo blong pem kwiktaem, nating se i sas.  Long sem fasin, taem yumi stap tingting se bambae yumi baptaes o nogat, i gud yumi no tingbaot nomo ol samting we bambae yumi mas lego, be yumi mas tingbaot tu ol gudfala samting we bambae yumi kasem sipos yumi baptaes. Eksampol, bambae yumi fren gud moa wetem Jehova. Jisas i yusum tu parabol blong tokbaot poen ya. (Ridim Matiu 13:​44-46.) Long tugeta parabol ya, wan man i glad nomo blong salemaot evri samting we hem i gat, blong hem i save pem wan gudfala samting we hem i faenem. Yu tu yu faenem wan gudfala samting, hemia trutok blong Kingdom. Taswe sipos yu no baptaes yet from yu stap tingbaot ol samting we yu mas lego, i gud yu tingting gud long ol parabol ya blong Jisas. Maet yu save tingting long ol kwestin ya se: ‘?Mi mi luksave se trutok we mi faenem i gud tumas? ?Mi mi tinghae long frensip we mi gat wetem Jehova, hop ya blong laef olwe we hem i givim long mi, mo bigfala famle blong hem raon long fulwol?’ Ol ansa blong yu i save givhan long yu blong luksave sipos yu mas tinghae moa long trutok, mo luksave samting we i stap blokem yu blong baptaes.

6. ?Olsem wanem yumi save gat wan hat we i gud?

⁶ Long parabol blong man we i saksakem sid, Jisas i tokbaot olsem wanem hat blong yumi i save blokem yumi blong folem ol samting we yumi lanem. Be Jisas i tokbaot tu se samfala we “hat blong olgeta i stret mo i gud” bambae oli folem ol samting we oli lanem. (Luk 8:​5-15) Sipos yu luksave se yu gat tu tingting long hat blong yu, yu no mas givap. Jehova i save givhan long yu blong yu “kasem wan niufala hat,” nao bambae yu glad blong obei long hem. Taswe i gud yu askem long Jehova tru long prea blong i mekem hat blong yu i sofsof, blong sid blong trutok i save gru long hem.—Esik. 18:31; 36:26.

7-8. ?From wanem sam yangfala oli no kasem mak ya blong baptaes? (Mo tu, yu luk pija.)

⁷ Sam yangfala oli lavem Jehova, be oli no baptaes yet from we oli letem samting we ol narafala oli mekem i gat paoa long olgeta. Eksampol, maet sam tija long skul oli pulum ol studen blong agri nomo long ol fasin we Jehova i no laekem. Be hemia i save mekem se ol yangfala oli kasem trabol. (Sam 1:​1, 2; Prov. 7:​1-5) Yu save blokem plante problem sipos yu folem eksampol blong man blong raetem sam, we i talem long Jehova se: “Mi mi gat hed moa i winim evri tija blong mi, from we mi tingting oltaem long ol rimaenda blong yu.”—Sam 119:99.

⁸ Samtaem sam perens we oli Witnes oli no givhan long ol pikinini blong olgeta blong oli kasem mak ya blong baptaes. Maet ol perens ya oli tingbaot moa se ol pikinini blong olgeta oli mas skul gud mo faenem wan gudfala wok, i bitim we oli givhan long olgeta blong kasem ol mak long saed blong spirit. Sipos yu wan yangfala, ?yu harem se perens blong yu i save givhan moa long yu blong kasem mak ya blong baptaes? Sipos yes, i gud yu tokbaot samting ya wetem tufala. Mo tingbaot se yu save kam klosap moa long Jehova, nomata se yu gat hamas yia.—Prov. 20:11.

9. ?From wanem samfala we oli naf blong baptaes oli wet?

⁹ Samfala oli naf blong baptaes, be oli wet from we oli wantem baptaes semtaem wetem wan gudfala fren o wan famle blong olgeta. I tru se i no rong blong yu baptaes long semtaem wetem wan fren o famle blong yu. ?Be yu ting se hemia i wan gudfala risen blong wet? Tingbaot se yu wan nomo yu mekem promes ya blong givim laef blong yu i go long Jehova. Taswe desisen blong yu blong baptaes i no mas dipen long samting we ol narafala oli mekem.—Rom 14:12.

 ?FROM WANEM YUMI MAS TINGBAOT SE EN I KLOSAP?

10. ?Wanem narafala risen i mekem se samfala oli no baptaes yet?

¹⁰ I gat wan narafala risen bakegen we i mekem se samfala oli no baptaes yet, hemia se oli ting se i gat plante taem yet bifo we en i kam. ?Be tingting ya i stret? Jisas i givim woning long ol disaepol blong hem se: “Yufala i mas rere oltaem, from we Pikinini blong man bambae i kam long taem we yufala i no tingbaot.”—Luk 12:40.

11. Taem yumi kasemsave moa long Jehova, ?bambae yumi wantem mekem wanem, mo from wanem? (Ol Sam 119:60)

¹¹ Lav nao i mas pulum yumi blong givim laef blong yumi i go long Jehova. Taem yumi kasemsave moa long Jehova, bambae yumi luksave se hem i lavem yumi, nao bambae yumi wantem folem ol loa blong hem kwiktaem. (Ridim Ol Sam 119:60.) Disaepol Jemes i tokbaot wan narafala risen from wanem yumi mas kwik blong obei long ol loa blong Jehova, hemia se yumi no save se laef blong yumi bambae i olsem wanem tumoro. Taswe i gud we evri dei yumi traehad blong mekem “samting [we] i stret,” mo yumi tekem aksen naoia blong folem samting we yumi lanem.—Jem. 4:​13-17.

12. ?Yumi lanem wanem long parabol blong Jisas we i tokbaot plantesen blong grep?

¹² Traem tingbaot parabol blong Jisas we i tokbaot plantesen blong grep. Long parabol ya, sam man we oli wok wan aoa nomo, oli kasem sem pei olsem olgeta we oli wok fuldei. ?Be from wanem ol man ya we oli wok wan aoa nomo oli no bin stat eli moa? Oli talem se: “From we i no gat man i givim wok long mifala.” Yes, ol man ya oli let blong go wok, i no from we oli les, be from we i no gat man i singaot olgeta. Be taem we masta i singaot olgeta, kwiktaem nomo oli go. (Mat. 20:​1-16) Tede, Jisas i singaot yumi finis blong yumi kam ol disaepol blong hem mo yumi joen long wok blong prij. Taem yumi kasemsave long samting ya, yumi mas kwik blong mekem samting we hem i talem.

13. ?Yumi lanem wanem long stori blong waef blong Lot?

¹³ Maet samfala oli ting se bambae oli save mekem ol jenis mo baptaes jes bifo we en i kam. Be sipos yu wet longtaem, bambae i kam had moa blong mekem ol jenis. Jisas i save samting ya, taswe hem i givim woning long ol disaepol blong hem se: “Yufala i mas tingbaot  waef blong Lot.” (Luk 17:​31-35) Waef blong Lot i save se i no longtaem, bambae God i spolem tufala taon ya Sodom mo Gomora. Be i luk olsem se hem i no rere blong lego ol samting we hem i gat long ples ya. (Jen. 19:​23-26) Stori blong hem i soemaot se Jehova i givim taem long ol man blong mekem ol jenis mo wosipim hem, be taem ya bambae i gat en blong hem. I no longtaem, bambae i let tumas blong yumi mekem ol jenis.—Luk 13:​24, 25.

14. ?From wanem i gud blong luksave se ol profet tok blong Baebol i stap kamtru?

¹⁴ Ol samting we oli stap hapen long wol tede i stap mekem ol profet tok blong Baebol i kamtru, mo i soemaot se yumi stap laef klosap long en. Nating sipos ol samting ya i no stap hapen long ples blong yu, be taem yu luk we i stap hapen long ol narafala ples, hemia i sud pulum yu blong yu mekem ol jenis mo baptaes kwiktaem. Long wan leta we aposol Pita i raetem long ol fas Kristin, hem i talem se oli mas “rere,” o “wekap,” from we “en blong evri samting i kam klosap.” (1 Pita 4:7; fut.) Taem Pita i tokbaot “en,” hem i stap minim taem ya we Jerusalem mo tempol bambae i lus. (1 Pita 1:1) Ol Kristin we Pita i raetem leta ya long olgeta oli laef longwe long Jerusalem, taswe ol samting ya bambae i no hapen long ples blong olgeta. Be taem oli luk we profet tok ya i kamtru, bambae oli trastem moa ol narafala promes blong Jehova. Long sem fasin, taem yumi luk we ol profet tok long saed blong en oli stap kamtru, hemia bambae i pulum yumi blong mekem ol jenis mo baptaes, blong yumi rere from.

15. ?Yumi mas mekem wanem blong rere from dei blong Jehova? (2 Pita 3:​10-13)

¹⁵ Long seken leta we Pita i raetem, hem i tokbaot samting we yumi mas mekem blong rere from dei ya we Jehova bambae i finisim rabis sistem blong wol ya. Long taem ya we Pita i raetem leta ya, en i stap longwe yet. Nating se i olsem, hem i talem long ol Kristin long taem ya se oli mas “tingbaot dei ya oltaem,” o “wantem tumas se dei ya i kam.” (Ridim 2 Pita 3:​10-13; fut.) Yumi soemaot se yumi stap tingbaot dei ya oltaem, taem yumi tingbaot se dei ya i klosap nomo. Mo yumi  save rere from dei ya, taem yumi mekem se ‘fasin blong laef blong yumi i tabu, mo yumi soemaot long ol wok blong yumi se yumi stap fasgud long God.’ !Jehova i glad tumas taem yu ‘soemaot long ol wok blong yu se yu stap fasgud long hem’! Taswe i sua se sipos yu givim laef blong yu i go long hem mo yu baptaes, bambae hem i glad tumas long yu.

YU NO MAS WET BLONG BAPTAES

16. ?Wetaem i beswan taem blong kasem mak ya blong baptaes? (2 Korin 6:​1, 2) (Mo tu, yu luk ol pija.)

¹⁶ Beswan taem blong yu kasem mak ya blong baptaes, hem i naoia. (Ridim 2 Korin 6:​1, 2.) Man Itiopia ya we Filip i prij long hem, i luksave se hem i mas baptaes kwiktaem. Taem hem i kasemsave long gud nius mo i luk wan ples we hem i save baptaes long hem, hem i no gat tingting ya se: ‘Fastaem, bambae mi kasemsave moa long gud nius. Mi sua se bambae i gat wan narafala ples bakegen we mi save baptaes long hem.’ Be hem i askem long Filip se: “?Wanem nao i blokem mi blong mi no save baptaes?” (Wok 8:​26, 27, 35-39) !Man Itiopia ya i soemaot wan gudfala eksampol long yumi! Mo afta we hem i baptaes, hem i “gohed long rod blong hem, we i glad tumas.”

17. ?Jehova bambae i givhan long yu blong mekem wanem?

¹⁷ Sipos yu no baptaes yet, yu save sua se Jehova i wantem givhan long yu blong yu fren gud moa wetem hem. (Rom 2:4) Hem i save givhan long yu blong yu no letem fraet, ol wari, o samting we ol narafala i mekem, i blokem yu blong yu kasem mak ya blong baptaes. Afta we yu baptaes mo tingting blong yu we i save stikim yu i klin, bambae yu no moa tingbaot “ol samting we oli stap biaen,” hemia ol samting we yu lego. (Fil. 3:​8, 13) Be bambae yu tingbaot nomo “ol samting we oli stap long fored,” hemia ol nambawan promes we Jehova i mekem long olgeta we oli givim laef blong olgeta i go long hem mo oli baptaes.—Wok 3:19.