1-2. ?Wanem i save mekem se yumi no joen gud wetem ol famle blong yumi?

 JISAS i toktok long wan man we i wantem kam disaepol blong hem, i se: “Yu gobak long ol famle blong yu, . . . mo yu talemaot olgeta samting we [Jehova] i mekem long yu.” (Mak 5:19) Jisas i talem olsem from we hem i save se plante man, taem oli harem wan gudfala nius, bambae oli wantem talemaot long ol famle blong olgeta.

² ?Yu tingbaot filing we yu gat taem yu jes harem gud nius? !Ating yu wantem tumas blong talemaot long ol famle blong yu! Be maet oli no glad. O maet fasin blong yu blong talemaot trutok long olgeta i mekem se oli kros long yu. Sipos i olsem, ?olsem wanem yu save joen gud wetem ol famle blong yu mo long semtaem yu holemstrong long Jehova?

3. ?Bambae yumi tokbaot wanem long stadi ya?

³ Long stadi ya, bambae yumi luk (1) olsem wanem fasin ya blong gat sore i save pulum yumi blong wantem halpem ol famle blong yumi we oli no bilif, a nating se oli no lesin long gud nius, (2) samting we yumi save mekem taem oli talem o mekem wan samting we i no kaen, (3) olsem wanem fasin blong yumi blong gat longfala tingting mo stret tingting i save givhan long olgeta blong kam long trutok, mo (4) olsem wanem yumi save soemaot se yumi lavem olgeta.

 GAT SORE LONG OLGETA

4. ?Jisas i mekem wanem taem ol man oli no wantem lesin long mesej blong hem?

⁴ Jisas i gohed nomo blong traem givhan long ol man, nating se oli no wantem lesin long mesej blong hem. Hem i talem se hem i olsem wan man blong wok long plantesen blong grep we i traem evri rod blong mekem se wan figtri we i no stap karem frut, i karem frut. (Luk 13:​6-9) Taem Jisas i talem parabol ya, hem i traehad tri yia finis blong givhan long ol man Jiu blong oli bilif long hem. ?From wanem hem i gohed blong traem givhan long olgeta? Jisas i gat sore long ol man, mo hemia i givhan long hem blong i gat longfala tingting long olgeta.

5. ?From wanem Jisas i sore long ol man Jiu?

⁵ Jisas i sore long ol man Jiu from we ol lida blong skul blong olgeta, oli no givhan long olgeta blong save trutok long saed blong Jehova. Taswe Jisas i luk ol man ya se oli “olsem ol sipsip we i no gat man blong lukaot long olgeta.” (Mak 6:34) Smoltaem bifo we Jisas i ded, hem i krae taem we hem i tingbaot se plante man long Jerusalem bambae oli ded from we oli no gat strong bilif. (Luk 19:​41-44) Taem yumi tu yumi sore long ol famle blong yumi, bambae yumi wantem tumas blong givhan long olgeta.

6. ?From wanem yumi mas gat longfala tingting long ol famle blong yumi we oli no bilif? (Galesia 6:9)

⁶ Ridim Galesia 6:9. Nating se ol famle blong yumi oli no wantem lesin long trutok, be yumi mas gat longfala tingting long olgeta mo no givap blong “mekem ol gudfala wok.” Yumi save se i tekem taem blong wan man i jenisim tingting blong hem mo bilif long Jehova. Bifo, ating yu tu yu olsem olgeta, we yu “no gat hop long wol ya mo [yu] no gat God.” (Efes. 2:12) Be wan man i gat longfala tingting blong givhan long yu. Taswe sipos yu tu yu gat longfala tingting long ol famle blong yu, maet bambae yu save givhan long olgeta blong oli bilif long Jehova.

TRAEM KASEMSAVE LONG OLGETA

7. ?From wanem maet ol haf brata blong Jisas oli no bilif long hem?

⁷ I sua se ol haf brata blong Jisas oli harem nius blong ol merikel we hem i mekem. (Luk 4:​14, 22-24) Be fastaem, oli no bilif long hem. (Jon 7:5) ?From wanem? Baebol i no talem. Be Baebol i tokbaot tu samting we i blokem sam man Jiu blong oli no kam ol disaepol blong Jisas. Samfala oli fraet se ol man long komuniti bambae oli agensem olgeta. (Jon 9:​18-22) Sam narafala oli save Jisas taem we hem i pikinini, taswe i had blong oli bilivim se hem i Mesaea. (Mak 6:​1-4) Maet ol haf brata blong Jisas oli gat ol sem tingting olsem. ?Yu ting se maet ol famle blong yu tu oli gat ol tingting olsem?

8. ?Wanem i save mekem se ol famle blong yumi we oli no bilif oli talem o mekem samting we i no kaen?

⁸ Tingbaot from wanem oli talem o mekem samting we i no kaen. Baebol i talem se ol famle blong Jisas, we maet hemia i minim ol brata blong hem tu, oli ting se “hed blong hem i krangke.” (Mak 3:21) ?From wanem oli gat tingting ya? Ol vas raonabaot oli soemaot se Jisas i bisi tumas long wok blong prij mo blong hilim ol man, nao hem i no gat taem tu blong kakae. (Mak 3:20) Taswe maet ol famle blong hem oli ting se hem i go bitim mak. Long sem fasin, maet ol famle blong yumi tu oli ting se yumi bitim mak long wosip blong yumi. Sipos i olsem, i gud yumi tingbaot olsem wanem yumi save soemaot long olgeta se yumi stap skelem gud ol samting we yumi mekem.

9. ?Wanem i save givhan long ol famle blong yumi blong jenisim tingting we oli gat long ol Witnes? (1 Pita 3:​1, 2) (Mo tu, yu luk ol pija.)

⁹ Gohed blong soemaot gudfala fasin. Sipos oltaem yumi toktok kaen mo soemaot gudfala fasin long ol famle blong yumi, maet bambae  oli jenisim tingting we oli gat long ol Witnes. (Ridim 1 Pita 3:​1, 2.) Eksampol, wan hasban we i no bilif, maet i harem se hem i stap hem wan nomo o i harem nogud taem waef blong hem we i wan sista, i aot long haos blong go long ol miting o joen long wok blong prij. Sipos sista ya i no wantem se hasban blong hem i harem olsem, hem i save jenisim program blong hem blong i save spenem moa taem wetem hem. Maet hem i save joen long wok blong prij long taem we hasban blong hem i bisi o i no stap long haos. Taem wan Kristin waef i soemaot se hem i rere blong jenisim program blong hem, hemia i save mekem hasban blong hem i glad mo i gat gudfala tingting long ol Witnes.

10. ?Olsem wanem yumi save folem fasin blong Jisas taem ol famle oli talem ol nogud tok agensem yumi?

¹⁰ Samtaem yu no nid blong ansa long olgeta. Taem ol man oli tokbaot nogud Jisas se hem i stap kakae mo dring bitim mak, hem i no kwik blong talem se oli rong. Be hem i pulum ol man blong oli luk ol gudfala wok blong hem. (Mat. 11:19) Hem i soemaot se hem i no stap mekem i strong tumas long hem wan, mo hem i stap mekem sam samting tu blong harem gud. (Skelem wetem Jon 2:​2, 6-10.) Long sem fasin, yu no nid blong ansa long evri nogud tok we ol famle oli talem agensem yu. Be yu save soemaot long ol aksen blong yu se yu no stap mekem i strong tumas long yu wan, mo se yu glad long laef blong yu. Nao olgeta nomo bambae oli luksave se ol nogud samting we oli harem long saed blong ol Witnes i no tru.

GAT LONGFALA TINGTING MO STRET TINGTING

11. ?Jisas i soemaot wanem fasin long ol brata blong hem we oli no bilif?

¹¹ Ol stori long Gospel i soemaot se Jisas i gat longfala tingting long ol brata blong hem. Eksampol, i luk olsem se olgeta tu oli stap long Kena taem Jisas i mekem faswan merikel blong hem. (Jon 2:​11, 12) Be olsem we yumi tokbaot finis, oli no bilif long hem. Nating se i olsem, Jisas i no stop blong joen wetem olgeta. Baebol i soemaot se samwe tri yia afta we Jisas i mekem faswan merikel blong hem long Kena, hem i toktok gud long ol brata blong hem.—Jon 7:​5-8.

12. ?Wanem i save givhan long yumi blong gat stret tingting long ol famle blong yumi?

¹² Taem yumi tingbaot se Jehova i gat bigfala sore, hemia i save givhan long yumi blong gat stret tingting se wan dei ol famle blong yumi oli save kam long trutok. Long taem ya we bambae ol giaman skul oli lus, maet ol famle blong yumi bambae oli tingbaot se yumi bin talemaot se samting ya bambae i hapen. b (Rev. 17:16) Mo maet bambae oli joen wetem yumi blong wosipim Jehova afta we bigfala trabol i stat. Be sipos  ol famle blong yumi oli stap fesem ol hadtaem naoia, i gud yumi mekem bes blong yumi blong givhan long olgeta. Sipos oli luksave se yumi rili lavem olgeta, hemia i save pulum olgeta blong lesin long ol trutok blong Baebol.

SOEMAOT SE YU LAVEM OLGETA

13. Nating se yumi bisi long wok blong Jehova, ?be yumi mas lukaot gud blong no mekem wanem?

¹³ Nating se yumi bisi long wok blong Jehova, be yumi no wantem we ol famle blong yumi oli harem se yumi no moa wantem spenem taem wetem olgeta, o yumi no moa lavem olgeta. (Mat. 7:12) ?Olsem wanem yumi save soemaot se yumi lavem olgeta? Traem luk sam samting we yumi save mekem.

14-15. ?Yumi save mekem wanem blong soemaot se yumi lavem ol famle blong yumi we oli no bilif? Talem wan eksampol.

¹⁴ Toktok long olgeta mo soemaot se yu lavem olgeta. Yumi soemaot se yumi lavem ol famle blong yumi, taem yumi toktok long olgeta mo tokbaot ol samting we yumi stap mekem. Eksampol, sipos yumi go spel samples, yumi travel, o yumi joen wetem sam fren, maet yumi save sanem wan teks mesej long ol famle blong yumi mo sanem sam foto. Mo tu, sipos yumi givim wan smol presen o leta long ol famle blong yumi, bambae yumi fren gud moa wetem olgeta. Taem yumi mekem ol smol samting olsem, yumi soemaot long olgeta se yumi lavem olgeta.

¹⁵ Traem tingbaot eksampol blong Anna, wan sista long Amenia. Famle blong hem i stap spenem plante taem tugeta, speseli long taem blong ol betde mo ol holide. Taem Anna i kasem trutok, ol famle blong hem oli wari se bambae hem i no moa joen wetem olgeta. Mo tu, oli wari se desisen blong hem bambae i spolem fiuja blong hem. ?Anna i mekem wanem blong oli no moa wari long hem? Hem i talem se: “Taem mi go visitim ol famle blong mi, mi stap tokbaot laef blong mi mo ol samting we mi stap mekem. Mo tu, mi stap singaot olgeta i kam long haos blong mi mo oli mitim ol fren blong mi. From samting ya, ol famle blong mi oli save gud olgeta we mi stap joen wetem oltaem.” Hem i gohed i se: “Plante long ol famle blong mi oli talem se oli luksave se mi glad tumas, mo oli no moa wari long mi.”

16. ?Olsem wanem Jisas i soemaot se hem i stap tingbaot haf brata blong hem Jemes? (Mo tu, yu luk futnot.)

¹⁶ Soemaot se yu stap tingbaot olgeta. Afta we Jisas i laef bakegen, hem i soemaot se hem i stap tingbaot brata blong hem Jemes, taem hem i kamtru long hem mo i toktok long hem. (1 Kor. 15:7) !Traem tingbaot filing we Jemes i gat taem hem i luk se Jisas i stap tingbaot hem yet! I luk olsem se long taem ya nao, Jemes i luksave se Jisas i Mesaea. Afta we Jisas i kamtru long hem, maet Jemes i givhan long ol  narafala famle blong hem tu blong oli luksave se Jisas i Mesaea. c—Wok 1:14.

17. ?Olsem wanem yumi save folem advaes ya long Rom 12:15? (Mo tu, yu luk pija.)

¹⁷ Ridim Rom 12:15. Sipos yumi soemaot se yumi tingbaot ol famle blong yumi long ol gudtaem mo long ol hadtaem tu, maet bambae oli jenisim tingting we oli gat long yumi. d Eksampol, sipos wan famle blong yumi i gat wan niufala bebi, maet yumi save sanem wan presen o talem ol gudfala toktok long hem blong soemaot se yumi glad wetem hem. O sipos wan famle blong yumi i lusum wan famle o fren blong olgeta long ded, maet yumi save talem ol gudfala toktok blong leftemap tingting blong hem, mekem wan samting blong givhan long hem, o sanem wan mesej o kad blong soemaot se yumi stap tingbaot hem. Mo i gud yumi jekem ol famle blong yumi oltaem, sipos oli stap fesem wan trabol.

18. ?Olsem wanem yumi save folem eksampol blong disaepol Andru?

¹⁸ Mekem olgeta oli mitim ol narafala Witnes. Taem disaepol Andru i luksave se Jisas i Mesaea, hem i tekem brata blong hem Pita i kam blong i mitim Jisas. (Jon 1:​40-42) ?Yumi tu yumi save mekem wan samting olsem? Eksampol, ?wanwan taem yumi save singaot wan famle blong yumi i kam long wan miting o long wan kakae we yumi mekem wetem ol fren blong yumi? Taem hem i mitim ol brata mo sista long kongregesen, bambae hem i luksave se ol Witnes oli sem mak nomo olsem ol narafala man.

19. ?Yumi mas soemaot wanem fasin long ol famle blong yumi, nating se oli no kasemsave fulwan long ol bilif blong yumi? (1 Pita 3:15)

¹⁹ Ridim 1 Pita 3:15. Maet ol famle blong  yumi oli no kasemsave fulwan from wanem yumi no mekem sam samting, be sipos oltaem yumi toktok kaen mo yumi respektem olgeta, bambae oli no save fogetem samting ya. Mo tu, bambae oli glad sipos yumi spenem sam taem wetem olgeta. Eksampol, nating se yumi no save joen wetem olgeta long sam lafet mo kastom, be yumi save visitim olgeta, kakae wetem olgeta, mo givim presen long olgeta long ol narafala taem.

YU NO MAS GIVAP

20. ?From wanem eksampol blong Jemes i leftemap tingting blong yumi?

²⁰ Jemes i mestem janis ya blong folem Jisas taem i stap long wol, be biaen hem i kam wan disaepol. (Gal. 1:​18, 19; 2:9) Mo i luk olsem se Jemes i save gud ol tijing blong Jisas. Eksampol, sam long ol toktok we hem i talem long wan leta we hem i raetem i go long ol Kristin, i klosap sem mak long ol tok we Jisas i talem long Bigfala Toktok Antap Long Hil. e

21. ?From wanem yumi no mas givap?

²¹ Nating se yumi traehad blong kaen oltaem long ol famle blong yumi mo soemaot se yumi lavem olgeta, be maet oli gohed blong mekem i strong long yumi mo oli no intres long trutok. Be yumi no mas givap, from we taem yumi gohed blong kaen long olgeta, yumi stap folem fasin blong God blong yumi Jehova we i gat sore, mo Boe blong hem Jisas. (Luk 6:​33, 36) Mo sloslo, gudfala fasin blong yumi i save pulum ol famle blong yumi blong jenisim tingting we oli gat long yumi. Mo long fiuja, maet bambae oli tingbaot sam long ol samting we yumi bin talem long olgeta bifo. Sipos yumi no givap, maet bambae yumi glad tumas blong luk we sam long ol famle blong yumi oli joen wetem yumi blong wosipim Jehova.