TAEM yu harem tok ya “ol gudfala samting,” ?yu tingbaot wanem? Maet yu tingbaot mane, wan pis graon, o wan sas samting we wan famle blong yu i givim long yu. Nomata wanem gudfala samting we narafala i givim long yu, i sua se yu tinghae long hem mo yu wantem lukaot gud long hem.

Baebol i talem se ol pikinini oli “ol gudfala samting we Jehova i givim.” (Sam 127:3) Ol Kristin perens oli luk ol pikinini blong olgeta olsem ol sas presen we i kam long Papa blong yumi long heven. Taswe oli traehad blong lukaot gud long ol pikinini blong olgeta mo givim samting we oli nidim blong oli stap helti, oli glad, mo oli fren gud wetem Jehova.

Be sore tumas, tede sam perens oli no luk ol pikinini blong olgeta olsem ol presen we i kam long God. (Aes. 49:15; 2 Tim. 3:​1-3) Mo sam narafala perens oli wantem lukaot gud long ol pikinini blong olgeta, be i gat sam problem we i mekem se i had. ?Wanem sam long ol problem ya? ?Jehova i askem ol perens blong oli mekem wanem? ?Mo olsem wanem ol Kristin perens oli save lukaot gud long ol pikinini blong olgeta?

OL PROBLEM

• Tingting blong ol man long komuniti mo ol famle. Long sam ples, ol man long komuniti oli respektem moa ol perens we oli gat plante pikinini. Taswe maet ol kapol oli harem se oli mas gat plante pikinini blong mekem ol famle blong olgeta o ol narafala man oli glad, nating se oli no naf blong lukaot gud long olgeta.

• Wari long saed blong fiuja. Long sam kantri, plante pikinini oli stap ded from we oli no gat naf kakae, oli sik, mo i no gat ol gudfala hospital. Taswe sam kapol oli gat plante pikinini blong meksua se sam long ol pikinini blong olgeta bambae oli laef. Sam narafala kapol, maet oli jusum blong gat plante pikinini blong mekem se taem oli kam olfala, bambae ol pikinini ya oli save lukaot long olgeta, antap moa sipos long kantri blong olgeta gavman i no stap givhan long ol olfala.

• Famle planing. Long sam ples, i no gat plante rod we ol kapol oli save folem blong mekem se oli no gat pikinini. Sam narafala kapol oli fraet blong tekem o yusum ol samting blong blokem pikinini, from we i save spolem olgeta. Mo sam narafala bakegen oli no gat naf mane blong pem ol samting ya from we i sas tumas. a

?JEHOVA I ASKEM OL PERENS BLONG OLI MEKEM WANEM?

Givim ol samting we ol pikinini blong yu oli nidim. Jehova i givim wok ya long ol perens blong oli givim ol samting we ol pikinini blong olgeta oli nidim long saed blong bodi. Hem i wantem se ol perens oli  wok had blong givim kakae, klos, mo wan ples blong slip long evri pikinini blong olgeta. Mo tu, Jehova i wantem se ol perens oli tijim ol pikinini blong olgeta. Taswe ol Kristin perens oli no sanem ol pikinini blong olgeta i go long wan skul we i stap longwe. Be oli meksua se ol pikinini blong olgeta oli laef wetem olgeta long haos, blong oli save tijim olgeta mo spenem taem wetem olgeta wanwan. Hemia bambae i mekem se pikinini i harem se papa mo mama i lavem hem, hem i sef, mo i glad. Be hemia i no minim se ol perens oli mas gat plante mane. Traem tingbaot: Jehova i jusum wan famle we i wok had blong lukaot long Boe blong hem, nating se oli pua.—Mat. 13:​55, 56; Luk 2:24.

Stamba trutok blong Baebol: “Man we i no wantem givim samting we olgeta we hem i mas lukaot long olgeta, oli nidim, speseli long olgeta we oli memba blong famle blong hem, hem i soemaot we hem i no moa holem bilif, mo hem i mowas long man we i no bilif nating.”—1 Tim. 5:8.

Jehova i save se taem ol perens oli kam olfala, maet bambae oli nidim help blong ol pikinini blong olgeta. Taswe wan rod we ol pikinini oli save ona long ol papa mo mama blong olgeta, hemia taem oli lukaot long olgeta. (Eks. 20:12; 1 Tim. 5:4) Nating se i olsem, Jehova i glad taem ol perens oli tingbaot moa olsem wanem bambae oli lukaot long ol pikinini blong olgeta, i bitim we oli tingbaot olsem wanem ol pikinini bambae oli lukaot long olgeta taem oli kam olfala.—2 Kor. 12:14.

Givhan long ol pikinini blong oli fren gud wetem Jehova. Ol Kristin perens oli gat wok ya tu blong tijim ol pikinini blong olgeta blong oli lavem Jehova mo wosipim hem. Hemia nao samting we i moa impoten long tingting blong Jehova.—Dut. 6:​6, 7.

Stamba trutok blong Baebol: “Yufala i mas gohed blong lukaot gud long [ol pikinini blong yufala], we yufala i stretem mo givim woning long olgeta folem tingting blong Jehova.”—Efes. 6:4.

JEHOVA I WANTEM GIVHAN LONG YU BLONG LUKAOT GUD LONG OL PIKININI BLONG YU

Plan gud fastaem. Sipos yu wantem gat pikinini, i gud yu tingting gud fastaem. Eksampol, ?bambae yu gat naf mane blong pem kakae, klos, mo skul fi blong plante pikinini? Sipos nogat, i gud yu mo hasban o waef blong yu i tokbaot hamas pikinini we yutufala i wantem gat, olsem nao bambae yutufala i save lukaot gud long olgeta olsem we Jehova i wantem. I tru, samtaem sam samting i save hapen we yumi no plan from, mo Jehova i kasemsave long samting ya. (Pri. 9:11) Be bambae hem i blesem yu sipos yu traehad blong lukaot gud long ol pikinini blong yu.

 Ol stamba trutok blong Baebol: “Man we i stap wok had, i sua se ol plan blong hem bambae oli go gud, be ol man we oli stap wok hariap, i sua se bambae oli kam pua nomo.”—Prov. 21:5.

“?Hu long yufala we i wantem wokem wan taoa, be i no sidaon fastaem blong kaontem praes blong ol samting we hem i nidim, blong luk sipos mane blong hem i naf?”—Luk 14:28.

Putum Jehova fasples. I gud yu meksua se samting we i moa impoten long famle blong yu, hemia blong wosipim Jehova. Sipos yu gat ol pikinini, i gud yu traehad blong tijim olgeta wanwan blong oli lavem Jehova. Givhan long olgeta blong oli lesin gud mo lanem samting long ol miting. Mekem Famle Wosip evri wik. Tijim ol pikinini blong yu blong oli save prij. Yu nao yu gat wok ya blong lukaot long ol pikinini blong yu, taswe yu no mas givim wok ya long ol narafala pikinini blong yu we oli bigwan moa, o long ol narafala famle. I tru se i tekem taem mo yu mas traehad blong tijim ol pikinini blong yu blong oli lavem Jehova. Be sipos yu mekem olsem, bambae yu glad.

Stamba trutok blong Baebol: “Taem mi harem se ol pikinini blong mi oli stap gohed blong wokbaot long trutok, hemia i mekem mi mi glad moa.”—3 Jon 4. b

Trastem Jehova. Nating se yu stap tingting blong gat pikinini o yu gat pikinini finis, i gud yu tingbaot se ol advaes blong Jehova i moa impoten i bitim kalja o kastom long ples blong yu.

Sipos yu jusum se bambae yu no gat plante pikinini, i gud yu trastem se Jehova bambae i lukaot gud long yu taem yu kam olfala. Nating se ol man long ples blong yu oli ting se yu mas gat pikinini blong i lukaot long yu taem yu kam olfala, be yu no mas letem tingting blong olgeta i gat paoa long yu. Yu no nid blong wari se bambae i no gat man blong lukaot long yu. Jehova i promes se bambae hem i lukaot long yu, mo oltaem hem i holem ol promes blong hem.—Jos. 23:14.

Ol stamba trutok blong Baebol: “Yu mas trastem Jehova long fulhat blong yu, mo yu no mas dipen long prapa save blong yu. Long olgeta samting we yu mekem, yu mas tingbaot hem, nao hem bambae i mekem ol rod blong yu oli stret.”—Prov. 3:​5, 6.

“Bifo mi mi wan yangfala mo naoia mi mi olfala, be mi neva luk wan stret man we God i lego hem, no ol pikinini blong hem oli stap lukaotem kakae.”—Sam 37:25.

“Yufala i mas gohed blong lukaot Kingdom mo stret fasin blong hem fastaem, nao biaen hem i save givim ol narafala samting ya tu long yufala.”—Mat. 6:33.

Ol pikinini oli ol sas presen we Jehova i givim long ol papa mo mama. Taswe Jehova i glad tumas taem hem i luk we ol Kristin perens oli lukaot gud long ol pikinini blong olgeta. Oli givim ol samting we ol pikinini blong olgeta oli nidim blong oli stap helti, oli glad, mo oli fren gud wetem Jehova. Oli plan gud fastaem se bambae oli gat hamas pikinini. Mo oli folem advaes blong God i bitim kalja o kastom long ples blong olgeta. Taem oli mekem olsem, oli soemaot se oli tinghae long ol pikinini blong olgeta we oli “ol gudfala samting we Jehova i givim.”