1. ?Wanem i soemaot se tijing ya blong baptaes i wan stamba tijing blong Baebol?

 YUMI glad tumas taem i gat ol niuwan we oli tekem baptaes. ?Yu yu save se hemia sem filing we ol fas Kristin oli gat long dei blong Pentekos long yia 33 K.T.? Long taem ya, i gat wan tok we i eksplenem mining blong baptaes mo plante man oli tekem baptaes. (Wok 2:​38, 40, 41) Aposol Pol i raetem se “ol stamba tijing we oli tokbaot Kraes” i minim tu “ol tijing we i tokbaot baptaes.” (Hib. 6:​1, 2) Taswe tijing ya blong baptaes i wan stamba tijing blong Baebol we yumi mas kasemsave gud long hem. ?From wanem?

2. ?From wanem yumi mas kasemsave gud long mining blong baptaes?

² Sipos yumi wantem se wan haos i stanap strong, fandesen blong hem i mas strong gud. Long sem fasin, sipos yumi wantem gat strong bilif, yumi mas kasemsave gud long mining blong baptaes. Nating se yumi stap traehad blong kasem mak ya blong baptaes o yumi baptaes plante yia finis, be yumi mas kasemsave gud long tijing ya. Taswe long stadi ya, bambae yumi ansa long ol kwestin ya: ?Baptaes i minim wanem? ?Oli mekem baptaes olsem wanem? ?Mo from wanem yumi baptaes long nem blong Papa, long nem blong Pikinini, mo long nem blong tabu spirit?

?BAPTAES I MINIM WANEM?

3. Taem yu baptaes, ?yu soemaot wanem?

³ Taem yu baptaes, yu soemaot long ol man se yu bilif long ol trutok we yu lanem long saed blong Jehova God mo Jisas Kraes, yu tanem tingting from ol sin blong yu, yu jenisim laef blong yu blong mekem wok blong Jehova, yu luksave se Jisas  nao i rod ya we God i yusum blong sevem ol man, mo yu talemaot long God tru long prea se yu wantem joen wetem oganaesesen blong hem blong mekem wil blong Hem. Taem yu mekem promes ya, o yu givim laef blong yu long Jehova, mo yu baptaes, yu stat blong wokbaot long rod ya we i lidim man blong kasem laef olwe.

4. Taem yu draon fulwan long wota mo yu kamaot bakegen, ?hemia i minim wanem? (Mo tu, yu luk pija.)

⁴ Taem yu baptaes, yu draon fulwan long wota mo biaen yu kamaot bakegen. a Hemia i olsem we oli berem yu mo biaen yu laef bakegen. (Skelem wetem Kolosi 2:12.) Baptaes i olsem wan saen blong soemaot se yu mekem sam bigfala jenis long laef blong yu. ?From wanem yumi talem olsem? Taem yu draon i go aninit long wota, yu soemaot se yu stopem ol nogud samting we yu stap mekem bifo. Mo taem yu kamaot long wota, hemia i olsem we yu statem wan niufala laef blong mekem wil blong God.

5. ?From wanem yumi talem se ol samting we yumi mas mekem blong yumi save baptaes, oli olsem bigfala wok we Noa i mekem blong bildim bigfala sip? (1 Pita 3:​18-21)

⁵ Ridim 1 Pita 3:​18-21. Yumi save talem se ol samting we yu mekem blong yu save baptaes, oli olsem wok we Noa i mekem blong bildim bigfala sip. Sipos yu jes stat blong lanem trutok long saed blong Jehova, maet yu harem se ol samting we yu mas mekem blong yu save baptaes oli had tumas. Maet yu luk ol samting ya olsem bigfala wok we Noa i mekem blong bildim bigfala sip. ?Be i impoten blong mekem ol samting ya? Yes. ?From wanem yumi talem olsem? Traem tingbaot Noa. God i mekem plan blong bigfala sip ya mo i talem long Noa blong i folem gud plan ya, blong  i save sef taem Bigfala Wota i ron. Noa i naf blong bildim bigfala sip ya from we hem i bilif long Jehova, i obei, mo Jehova i halpem hem. Yu tu yu naf blong mekem “olgeta samting we God i talem,” olsem Noa.—Jen. 6:22.

6. ?Olsem wanem baptaes i save sevem yu?

⁶ Long vas 21, aposol Pita i talem se baptaes i “stap sevem yufala.” Be hemia i no min se taem yu baptaes, naoia yu sef, o se yu no moa gat sin, from blad blong Jisas nomo i save tekemaot ol sin. (1 Jon 1:7) Be baptaes i wan impoten mak we yu mas kasem blong yu save mekem ol samting we God i wantem, mo blong yu save ‘askem long God blong tingting blong yu we i save stikim yu, i klin.’ Jehova bambae i glad blong givim samting we yu askem. Long rod ya, baptaes i “stap sevem” yu, o i lidim yu blong kasem laef olwe.

?OLI MEKEM BAPTAES OLSEM WANEM?

7. ?Oli mekem baptaes olsem wanem?

⁷ Baebol i soemaot se taem wan man i baptaes, hem i mas draon fulwan aninit long wota, be i no talem plante narafala samting long saed ya. Be i gat sam vas blong Baebol we i givhan long yumi blong save samting we i stret blong mekem long taem ya. Eksampol, i gat sam stamba trutok blong Baebol we i givhan long olgeta we bambae oli baptaes blong save wanem klos oli mas werem mo fasin we oli mas gat long taem ya. (1 Kor. 14:40; 1 Tim. 2:9) Tede, plante taem ol elda nao oli mekem baptaes, mo yumi no mas leftemap olgeta from wok ya. (1 Kor. 1:​14, 15) Mo tu, oli save mekem baptaes nating se i gat plante man i stap blong luk o smol man nomo.—Wok 8:36.

8. ?Wanem tufala kwestin we oli askem long olgeta we bambae oli baptaes, mo from wanem? (Ol Wok 2:​38-42) (Mo tu, yu luk pija.)

⁸ Baebol i soemaot se “blong God i sevem” yumi, yumi mas “talemaot [bilif blong yumi] long fes blong ol man.” (Rom 10:​9, 10) Yumi mas mekem olsem tu long dei we yumi baptaes. From samting ya, olgeta we bambae oli baptaes oli mas ansa long tu kwestin. Faswan, hemia se: “?Yu yu tanem tingting blong yu from ol sin blong yu, givim laef blong yu i go long Jehova, mo bilif long rod we hem i yusum blong sevem ol man tru long Jisas Kraes?” Kwestin ya i mekem yumi tingbaot bakegen ol samting we yumi mekem blong yumi save baptaes, mo hemia i klosap sem mak long samting we Pita i talem long bigfala hip blong ol man long dei blong Pentekos. Seken kwestin, hemia se: “?Yu yu kasemsave se taem yu baptaes, yu kam wan Witnes blong Jehova mo yu stap insaed long oganaesesen blong hem?” Kwestin ya i pulum yumi blong tingbaot promes we yumi mekem blong folem gud ol daereksen we i kam long oganaesesen blong Jehova mo wok gud wetem ol brata mo sista, sem mak olsem we ol fas Kristin oli mekem. (Ridim Ol Wok 2:​38-42.) Olgeta we oli ansa yes long tufala kwestin ya, oli save baptaes.

9. ?Yumi evriwan i mas mekem wanem blong God i save glad long yumi?

⁹ Bifo we yumi lanem trutok, maet yumi gat wan gudfala laef mo yumi neva mekem wan bigfala sin. O maet yumi gruap long wan famle we perens blong yumi i givhan long yumi blong lavem Jehova. Sipos i olsem, ?yumi nidim yet blong tanem tingting blong yumi mo baptaes blong God i save glad long yumi? Yes. Nomata se laef blong yumi i olsem wanem bifo, yumi evriwan i mas luksave se yumi bon wetem sin mo yumi stap longwe long God. (Sam 51:5) Be taem yumi save moa Jehova, yumi jusum blong mekem ol samting we hem i wantem. Biaen, yumi tanem tingting blong yumi mo yumi tanraon, o yumi stat blong mekem  ol fasin we Papa blong yumi long heven i glad long hem. Sipos yumi mekem ol samting ya, naoia yumi save baptaes.—Wok 3:19.

10. ?Yu mas mekem wanem sipos yu baptaes finis long wan narafala jej?

¹⁰ Sipos yu baptaes finis long wan narafala jej, yu mas baptaes blong kam wan Witnes blong Jehova. ?From wanem? Hemia from we bifo, yu no kasemsave gud long saed blong Jehova mo Jisas. Mo nating sipos yu prea finis long God blong givim laef blong yu i go long hem, be yu no kasemsave long ol samting we God i wantem yu blong mekem. Taem aposol Pol i mitim ol man long Efesas we oli baptaes be oli no kasemsave gud long ol trutok long saed blong Jisas, hem i mekem plan blong oli baptaes bakegen. b (Wok 19:​1-5) Long sem fasin, tede Jehova i glad nomo long ol man we oli baptaes from we oli kasemsave gud long ol samting we hem i wantem olgeta blong mekem.

?I MINIM WANEM BLONG BAPTAES ‘LONG NEM BLONG PAPA, PIKININI, MO TABU SPIRIT’?

11. ?I minim wanem blong baptaes ‘long nem blong Papa, Pikinini, mo tabu spirit’? (Matiu 28:​18-20)

¹¹ Jisas i talem se ol man we oli wantem baptaes, oli mas baptaes “long nem blong Papa, mo long nem blong Pikinini, mo long nem blong tabu spirit.” (Ridim Matiu 28:​18-20.) ?Hemia i minim wanem? Long Baebol, plante taem tok ya “nem” i minim gudnem we wan man i gat. Mo tu, i save minim wok mo posisen blong man we i karem nem ya. Taswe taem yumi mekem wan samting “long nem blong” wan man o wan samting, hemia i min se yumi luksave wok mo posisen blong man we i karem nem ya. (Skelem wetem Matiu 10:41.) Naoia i gud yumi luk olsem wanem blong luksave wok mo posisen blong Papa, Pikinini, mo tabu spirit.

12. ?Olsem wanem yumi baptaes long nem blong Papa? (Revelesen 4:11) (Mo tu, yu luk pija.)

 ¹² Long nem blong Papa. Yumi luksave se Jehova i Papa blong yumi long heven we i givim laef long yumi. Hem i God ya we i gat olgeta paoa mo i wokem olgeta samting. (Ridim Revelesen 4:11.) Yumi luksave se hem i Man blong harem ol prea, mo yumi yusum nem blong hem taem yumi prea mo taem yumi tokbaot hem long ol narafala. (Sam 65:2) Be i no naf nomo we yumi baptaes long nem blong Papa. Ol man ya we Pita i toktok long olgeta long dei blong Pentekos oli save Jehova finis, be hem i wantem pulum olgeta blong luksave se Jehova i yusum Jisas Kraes nao blong mekem se yumi save kasem laef we i no save finis.—Rom 5:8.

13. ?Olsem wanem yumi baptaes long nem blong Pikinini? (Mo tu, yu luk pija.)

¹³ Long nem blong Pikinini. Yumi luksave se Jisas nao hem i stret Pikinini blong God, wan nomo we hem i gat. Jisas nomo hem i “rod ya” we Jehova i yusum blong yumi save fren gud wetem Hem. (Jon 14:6) Mo tu, Jisas i Man ya we i pemaot yumi, taem i ded from yumi blong yumi save kasem laef. From samting ya, evri dei yumi wantem folem eksampol blong hem long laef blong yumi, be i no long taem ya nomo we yumi baptaes. (1 Jon 2:6) Taswe yumi gat strong tingting blong prij olsem Jisas, we yumi no letem wan samting i blokem yumi. (Luk 4:43) Yumi rere blong holemstrong long Jehova nating se ol man oli mekem i nogud long yumi. (2 Tim. 3:12) Mo yumi respektem Jisas we i “hed blong kongregesen,” taswe yumi glad nomo blong obei long olgeta we hem i putumap blong lidim yumi mo lukaot gud long yumi.—Efes. 4:​8, 11, 12; 5:23.

14. (1) ?Olsem wanem yumi baptaes long nem blong tabu spirit? (Mo tu, yu luk pija.) (2) ?Ol tabu Kristin oli baptaes long wanem moa? (Mo tu, yu luk bokis ya “ Baptaes Blong Ol Tabu Kristin.”)

¹⁴ Long nem blong tabu spirit. Yumi bilif long trutok long saed blong tabu spirit, se hem i no  wan man o wan haf blong Triniti, be hem i paoa blong God. Yumi luksave se Jehova i yusum tabu spirit blong lidim ol profet mo ol man we oli raetem Baebol, taswe yumi wantem ridim Baebol oltaem mo folem ol tijing blong hem. (2 Pita 1:​20, 21) Mo yumi no wantem mekem ol bigfala sin, from we hemia i save blokem yumi mo kongregesen blong kasem tabu spirit.—Efes. 4:30.

15. ?Yumi mas traehad blong mekem wanem?

¹⁵ Sipos yu baptaes finis, i gud yu traehad blong kasemsave gud long “ol tijing we i tokbaot baptaes,” c mo yu holem promes we yu mekem long Jehova taem yu givim laef blong yu i go long hem mo baptaes. ?Be olsem wanem sipos yu no baptaes yet? ?I gat sam samting i blokem yu? Long nekis stadi, bambae yumi tokbaot samting we yu mas mekem blong yu save kasem mak ya blong baptaes.