Obadaea i wan man we i stap lukaot long haos blong King Ehab, wan rabis king ya we i letem rabis wosip blong Bal i kam fulap long kantri blong hem. Nating se i olsem, ‘stat taem Obadaea i yangfala nomo’ hem i lanem blong ona o fraet gud long Jehova. (1 King 18:​1-13) Taswe taem Kwin Jesebel i givim oda blong oli kilim i ded olgeta profet blong Jehova, Obadaea i save se hem i mas mekem wan samting blong givhan long ol profet ya. Sipos hem i haedem wan profet, hem i save ded from. Be Obadaea i no fraet, hem i haedem 100 profet mo hem i karem kakae i go long olgeta, nating se long taem ya i gat hadtaem blong kasem kakae. Traem tingbaot, bambae i had blong haedem wan samting olsem long plante handred giaman profet we oli stap wok blong king mo kwin.—1 King 18:19.

?Yumi save lanem wanem long fasin blong Obadaea? Nating se Obadaea i fraet long Ehab, be hem i fraet moa long Jehova. Hemia i mekem se hem i gat strong tingting blong putum laef blong hem long denja, blong i save protektem ol brata blong hem. Sipos yumi laef long wan kantri we oli putum tabu long wok blong Jehova, yumi tu yumi mas fraet long Jehova, from we fasin ya nao bambae i mekem tingting blong yumi i strong blong givhan long ol brata mo sista we oli fesem ol trabol.