Go long ol haf insaed long hem

Go long lis blong ol haf

 LAEF STORI

Gudfala Trening We Mi Kasem i Givhan Long Ful Laef Blong Mi

Gudfala Trening We Mi Kasem i Givhan Long Ful Laef Blong Mi

LONG medel naet, mifala i stap stanap long saed blong reva Niger, we i bigwan bitim wan kilometa haf mo i ron strong. Faet i stap gohed long Naejeria, taswe i wan bigfala denja blong krosem reva ya. Be mifala i mas mekem, i no wan taem nomo be plante taem. ?From wanem mi stap long ples ya? Fastaem yumi tokbaot samting we i hapen bifo we mi mi bon.

Long yia 1913, taem papa blong mi, John Mills, i gat 25 yia, hem i baptaes long New York. Brata Russell i givim tok ya blong baptaes. Smoltaem afta, Papa i go long Trinidad, mo i maredem wan Baebol Studen we i gat strong tingting, nem blong hem Constance Farmer. Mo tu, Papa i givhan long fren blong hem, William Brown, blong i go long ol defren ples blong soemaot “Photo-Drama of Creation.” Tufala i gohed blong mekem wok ya go kasem we branj i sanem Brata mo Sista Brown i go long Wes Afrika long 1923. Papa mo Mama, we tufala i gat hop blong laef long heven, tufala i gohed nomo long Trinidad.

PAPA MO MAMA I LAVEM MIFALA

Papa mo Mama i gat naen pikinini. Tufala i putum nem blong fasbon se Rutherford, olsem presiden blong Watch Tower Bible and Tract Society long taem ya. Mi mi bon long 30 Disemba 1922, mo tufala i putum nem blong mi se Woodworth, olsem Brata Woodworth we i rerem ol stori blong The Golden Age (naoia hem i Wekap!). Papa mo Mama i sanem mifala i go long skul, be tufala i wantem moa we mifala i fren gud wetem Jehova. Mama i gat gudhan blong pulum ol man blong oli tingting gud long Baebol. Papa i laekem blong tokbaot ol Baebol stori. Hem i yusum evri haf blong bodi blong hem blong aktem ol stori ya.

Hadwok blong tufala i karem gudfala frut. Mifala i faef boe long famle, mo tri long mifala i go long Skul blong Gilead. Trifala sista blong mifala i mekem wok blong paenia plante yia long Trinidad mo Tobago. Trening mo gudfala eksampol blong Papa mo Mama, i mekem se mifala i olsem ol tri we tufala i planem long ‘haos blong God.’ Gudfala tijing blong tufala i givhan long mifala blong stap long ples ya, mo gohed blong kam strong moa.—Sam 92:13.

Oltaem ol brata mo sista oli joen long haos blong mifala bifo we oli go prij. Ol paenia tu oli joen long ples ya blong tokbaot ol gudfala stori  blong wan misinari blong Kanada we i bin kam long Trinidad, nem blong hem George Young. Papa mo Mama i glad blong tokbaot olgeta we oli bin prij wetem olgeta bifo, olsem Brata mo Sista Brown we tufala i go long Wes Afrika finis. Olgeta samting ya i pulum mi blong mi stat long wok blong prij taem mi gat ten yia.

TAEM MI STAT BLONG PRIJ

Ol magasin blong yumi long taem ya oli tok strong blong soemaot fasin blong ol giaman skul, ol griri bisnesman, mo ol rabis wok blong politik. From samting ya, long 1936 ol lida blong skul oli pulum hedgavman blong Trinidad blong putum tabu long ol buk blong Wajtaoa Sosaeti. Be mifala i haedem ol buk, mo mifala i gohed blong yusum gogo evriwan oli finis. Mo tu, mifala i hangem ol saen long mifala mo wokbaot long rod, mo mifala i ron long baskel blong givimaot ol smosmol pepa. Mifala i joenem grup blong taon ya Tunapuna we oli yusum wan trak we i gat laodspika long hem, blong prij i go long ol ples afsaed long ol taon long Trinidad. !Mifala i glad we i glad! Ol gudfala wok ya i pulum mi blong mi baptaes taem mi gat 16 yia.

Grup blong Tunapuna we i stap prij wetem trak we i gat laodspika long hem

Gudfala trening we mi kasem long famle mo ol wok we mi mekem taem mi yangfala, oli pulum mi blong mi wantem kam wan misinari. Tingting ya i stap yet long 1944, taem mi go long Aruba blong joen wetem Brata Edmund Cummings. Long 1945, mitufala i glad tumas blong luk se i gat ten man oli joen long Memoriol. Long 1946, fas kongregesen i stanap long aelan ya.

Mi kasem niufala glad taem mi maredem Oris

Smoltaem afta, mi tekem janis blong prij long wan woman we i wok wetem mi, Oris Williams. Oris i strong long bilif blong hem, be taem hem i stadi Baebol, hem i kasem save long ol trufala tijing, nao hem i baptaes long 5 Jenuware 1947. Sloslo, mitufala i lavlavem mitufala mo mitufala i mared. Hem i stat long wok blong paenia long Novemba 1950. Mi kasem niufala glad taem mi maredem Oris.

OL GUDFALA WOK LONG NAEJERIA

Long 1955, mitufala i kasem wan leta blong invaetem mitufala blong go long Skul blong Gilead. Blong rere gud from janis ya, mitufala i lego wok, salem haos mo olting blong mitufala, mo talem tata long Aruba. Long 29 Julae 1956, mitufala i finisim kos blong Gilead wetem namba 27 klas, mo oli sanem mitufala i go long Naejeria.

Mitufala wetem ol brata mo sista blong Betel long Lagos, Naejeria, long 1957

Oris i tingting bak nao i talem se: “Spirit blong Jehova i save givhan long man blong i winim ol problem we i fesem long wok blong misinari. Mi mi defren long hasban blong mi, mi no bin wantem blong kam wan misinari. Mi laekem moa blong gat wan haos mo ol pikinini. Be mi jenisim tingting blong mi taem mi kasem save se wok blong prij i impoten tumas. Taem mitufala i finisim Skul blong Gilead, mi rere fulwan blong kam wan misinari. Taem mitufala i klaem long sip ya Queen Mary, Brata Worth Thornton, we i wok long ofis blong Brata Knorr, i talem ‘!Bon Voyage!’ long mitufala. Hem i talem se bambae mitufala i go wok long Betel. Mi talem se ‘!O, no!’ from we mi mi no glad. Be kwiktaem nomo mi laekem Betel, mo mi mekem plante defdefren wok. Mi laekem moa taem mi wok long ofis we ol visita oli kam long hem. Mi mi laekem ol man, mo long wok ya mi mitim plante brata mo sista blong Naejeria. Taem oli kamtru, plante taem oli taed, tosta, hanggri, mo doti. Mi glad tumas blong givim ol samting we oli nidim blong harem gud bakegen. Hemia ol tabu wok blong Jehova mo samting ya i mekem mi mi glad tumas.” Evri wok we mitufala i mekem, i givim moa glad long mitufala.

Long 1961, famle i joen wanples long Trinidad mo Brata Brown i talemaot sam gudfala stori blong Afrika. Afta, mi mi tokbaot olsem wanem wok long Naejeria i stap kam bigwan. Brata Brown i putum han blong hem i goraon long mi, mo i talem long Papa se: “!Joni, yu yu neva go long Afrika, be boe blong yu i go!” Papa i ansa se: “!Gohed gud, Worth! !Gohed gud!” Ol gudfala toktok blong tufala brata ya we tufala i stap longtaem long trutok, i pulum mi blong mi gohed strong long wok blong prij.

William Brown mo waef blong hem Antonia, tufala i leftemap tingting blong mitufala bigwan

Long 1962, mi mi gat janis blong go long namba 37 klas blong Gilead, blong kasem moa trening blong ten manis. Biaen, Brata Wilfred Gooch  we i lukaot long branj ofis blong Naejeria i go long namba 38 klas blong Gilead, nao oli sanem hem i go long Inglan. Ale mi nao mi mekem wok ya blong lukaot long branj ofis. Olsem Brata Brown, mi go long plante ples, mo mi mitim ol gudfala brata mo sista long Naejeria. Nating se oli no gat plante samting olsem ol rij kantri, be oli glad. Hemia i soemaot se yumi no nidim plante samting o plante mane blong harem gud. Mi sapraes blong luk olsem wanem oli klin mo klos blong olgeta i stret taem oli kam long ol miting. Plante taem oli kam long asembli long ol bigfala trak mo bas * (bolekajas). Samtaem oli raetem smol toktok long ol bas ya, olsem hemia: “Ol smosmol drop blong wota, oli mekem wan bigfala solwota.”

!Tok ya i tru nomo! Taem we evri man i traehad blong mekem wan samting, gudfala frut i kamaot. Long 1974, Naejeria i fas kantri aotsaed long Yunaeted Stet blong kasem 100,000 pablisa. !Wok blong prij i kam antap bigwan!

Stat long 1967 go kasem 1970, taem namba blong ol pablisa i stap kam antap, i gat Bigfala Faet long Naejeria. Blong plante manis, ol brata we oli stap long narasaed blong Niger Reva oli no save kasem branj ofis. Taswe, mifala i mas karem ol buk i go long olgeta. Olsem we yumi tokbaot finis, mifala i prea mo trastem Jehova nao mifala i krosem reva ya.

Mi tingbaot gud ol taem ya we mifala i krosem Niger Reva mo laef blong mifala i stap long denja. I gat ol soldia we oli glad blong sutum eni man nomo, ol sik, mo ol narafala denja tu. I had blong pastru long ol laen blong ami blong kantri ya we oli no trastem mifala, be i mowas taem mifala i go long saed blong Biafra, we oli stap blokem ol man blong oli no kam insaed o goaot. Long wan naet, taem taed i strong, mi krosem Niger Reva long wan smol kenu. Mi aot long Asaba blong go long Onitsha mo Enugu, blong leftemap tingting blong ol elda. Long wan narafala taem, mifala i go givhan long ol elda long taon ya Aba, we gavman i blokem ol man blong oli no laetem tumas laet, from hemia i save pulum enemi i kam. Long Port Harcourt, mifala i prea kwiktaem blong finisim miting, from we klosap long mifala, ol ami blong kantri ya oli jes winim ol ami blong Biafra we oli blokem taon ya.

Ol miting ya oli impoten blong givhan long ol brata blong tingbaot se Jehova i lavem olgeta, mo blong givim advaes we oli nidim, se oli no mas joen long faet, mo oli mas gohed blong joen gud. Ol brata mo sista long Naejeria oli stanap strong tru long rabis faet ya. Oli soemaot lav ya we i save winim ol filing blong wantem agensem narafala laen, mo oli joen gud olsem ol Kristin. !I wan blesing blong stap wetem olgeta long hadtaem ya!

Long 1969, Brata Henschel i jeaman blong Intenasnal Asembli long Yankee stadium long Niu Yok, we stamba tok blong hem se “Pis Long Wol.” Mi mi wok wetem hem, mo mi lanem plante samting. Trening ya i givhan long mi long 1970, taem mi joen blong rerem Intenasnal Asembli long Lagos, Naejeria, we stamba tok blong hem se, “Ol Man We God i Glad Long Olgeta.” Jehova i blesem ol plan blong asembli ya we i kamaot smoltaem nomo afta long faet. Asembli ya i stap long 17 defren lanwis, mo 121,128 man oli joen long hem. I neva gat wan namba olsem bifo. Brata Knorr, Brata Henschel, mo ol visita blong Yunaeted Stet mo Inglan, oli kam long plen blong joen long asembli ya, mo blong luk ol 3,775 niufala disaepol oli baptaes. !I olsem taem blong Pentekos bakegen! !Hemia wan taem long laef blong mi we mi bisi gud. !I olsem we namba blong ol pablisa i no kam bigwan nomo, be i bosta wantaem!

I gat 121,128 man long Intenasnal Asembli ya “Ol Man We God i Glad Long Olgeta.” Program i kamaot long 17 defren lanwis wetem lanwis Ibo tu

Long ol 30 yia we mi stap long Naejeria, mi harem gud blong mekem wok blong eria elda, mo tu, blong visitim Wes Afrika olsem son elda. !Ol misinari oli glad we mifala i spenem taem wetem olgeta wanwan mo leftemap tingting blong olgeta! !Mi glad tumas blong talem long olgeta se Jehova i no fogetem olgeta! Wok ya i tijim mi se sipos mi wantem givhan long ol brata mo sista, mi mas soemaot intres long olgeta wanwan, olsemia oli save gohed strong blong joen gud mo sapotem ogenaesesen blong Jehova.

Jehova nomo i givhan blong winim ol trabol we  i kamaot from faet mo sik. Oltaem mitufala i luksave ol blesing blong Jehova. Oris i talem se:

“Plante taem mitufala i kasem sik ya malaria. Wan taem, Worth i sik tumas nao i foldaon mo i go slip long hospital long Lagos. !Mi ting se bambae mi lusum hem, be mi glad tumas we hem i kam gud bakegen! Taem hem i wekap bakegen long hospital, hem i tokbaot Kingdom blong God long nes we i stap lukaot long hem, we nem blong hem Nwambiwe. From we hem i wantem save moa long Baebol, mitufala i gobak visitim hem. Hem i glad long samting we hem i lanem, mo biaen hem i baptaes, mo i kam wan elda long Aba. Mi tu mi givhan long plante man blong oli wosipim Jehova, we sam long olgeta oli Muslim. Narafala samting we i mekem mitufala i glad tumas, hemia blong save gud ol man Naejeria, kalja blong olgeta, wetem kastom mo lanwis blong olgeta tu.”

Hemia wan narafala lesen we mi lanem: Blong yumi karem gudfala frut long wok blong prij long wan narafala kantri, yumi mas lanem blong lavem ol brata mo sista, nating se oli gat defren kalja.

OL NIUFALA WOK

Long 1987, oli sanem mitufala olsem misinari long naesfala aelan ya Sen Lusia long Karibin. Mitufala i glad tumas long ples ya, be mitufala i fesem sam samting we i defren. Long Afrika, ol man oli mared long plante woman, be long Sen Lusia ol man mo woman oli stap tugeta nomo we oli no mared. Tok blong God we i gat paoa i givhan long plante Baebol stadi blong oli mekem ol jenis long laef blong olgeta.

Mi lavem Oris tumas long ol 68 yia we mitufala i mared

From we mitufala i stap kam olfala, long 2005, Hed Kampani i sanem mitufala i go long hedkwota long Brooklyn, New York. Evri dei mi talem tangkiu long Jehova from Oris. Long 2015, enemi ya ded i winim hem, mo mi misim hem bitim mak. Hem i wan nambawan fren, we i soemaot lav oltaem. Mi lavem Oris tumas long ol 68 yia we mitufala i mared. Mitufala i faenemaot se blong stap glad long mared mo long kongregesen, yumi mas respektem olgeta we oli hed blong yumi, fofogivim yumi, mo gat tingting daon wetem ol gudfala fasin we oli kamaot from tabu spirit.

Taem tingting i foldaon, mitufala i prea blong mitufala i no mekem wan samting we i save spolem ol sakrefaes we mitufala i givim long Jehova. I luk olsem se taem mitufala i gohed blong stretem tingting blong mitufala, evri samting i ron gud. !Mo bambae i stap kam gud moa yet!—Aes. 60:17; 2 Kor. 13:11.

Jehova i blesem wok blong Papa mo Mama wetem ol narafala long Trinidad mo Tobago. Mifala i harem nius se naoia i gat 9,892 man oli joen long tru wosip. Long Aruba, plante oli wok had blong givhan long kongregesen we mi bin stap long hem bifo. Naoia i gat 14 kongregesen we oli gohed gud long aelan ya. Long Naejeria, namba blong ol pablisa i kasem 381,398. Mo long smol aelan blong Sen Lusia, i gat 783 pablisa we oli stap wok strong blong sapotem Kingdom blong Jehova.

Naoia mi gat bitim 90 yia. Ol Sam 92:14 i tokbaot ol olfala we oli olsem ol tri long haos blong Jehova, i se: “Olgeta oli strong olsem olfala tri we lif blong hem i stap grin oltaem mo i stap karem plante frut yet.” Mi mi glad tumas we mi yusum laef blong mi blong mekem wok blong Jehova. Gudfala trening we mi kasem i givhan long mi blong mi wok strong blong Jehova. Lav blong Jehova i pulum mi blong mi “kam strong moa, olsem ol tri we man i planem long gudfala graon, mo oli stap gru gud oltaem.”—Sam 92:13.

^ par. 18 Yu luk Wekap! (Inglis) blong 8 Maj 1972, pej 24-26.