Go long ol haf insaed long hem

Go long lis blong ol haf

 LAEF STORI

Mitufala i Faenem “Perel We i Sas We i Sas”

Mitufala i Faenem “Perel We i Sas We i Sas”

WINSTON mo Pamela (Pam) tufala i wok long branj ofis blong Ostrelia. Tufala i gat wan gudfala laef, nating se i olsem, tufala i gat sam hadtaem tu. Tufala i mas lan long wan niufala laef, mo tufala i mas stanap strong taem Pam i lusum wan bebi long bel. Nating se i olsem, tufala i gohed blong lavem Jehova mo ol man blong hem, mo tu tufala i glad long wok blong prij. Long intaviu ya, tufala i tokbaot sam long ol ekspiriens blong tufala.

Winston, ?yu yu mekem wanem blong lukaot God?

Mi gruap long wan fam long Kwinslan Ostrelia, mo ol perens blong mi oli no bilif long God. From we mifala i stap longwe long taon, mi no stap toktok tumas wetem ol narafala man. Be taem mi gat 12 yia, mi stat blong lukaot God. Mi prea mo mi askem hem blong i halpem mi blong save trutok long saed blong hem. Biaen mi aot long fam blong faenem wan wok long Adelaide, long saot Ostrelia. Taem mi gat 21 yia, mi go spel long Sydney, mo mi faenem Pam. Hem i tokbaot skul ya the British-Israel we oli talem se ol man Inglan oli ol laen ya blong Isrel we i bin lus. Mo tu oli talem se olgeta nao oli ol ten laen blong kingdom blong not we oli bin go kalabus long narafala kantri long ol yia 700 Bifo Kraes. Ale, taem mi gobak long Adelaide, mi tokbaot topik ya wetem wan fren long wok we i stat blong stadi Baebol wetem Ol Witnes Blong Jehova. Afta we mitufala i storian blong sam aoa, mitufala i stat blong tokbaot bilif blong Ol Witnes Blong Jehova. Mi kasem save se God i stat blong ansarem prea we mi mekem long fam taem mi smol. !Mi lanem trutok long saed blong God mo Kingdom blong hem! Mi mi faenem wan “perel we i sas we i sas.”—Mat. 13:45, 46.

Pam, yu tu yu lukaotem perel ya taem yu yang nomo. ?Olsem wanem nao yu faenem?

Mi gruap long wan famle we i strong long jos, mo mifala i stap long taon blong Coffs Harbour, long New South Wels. Ol perens blong mi mo ol abu blong mi oli bilif long ol tijing blong skul ya the British-Israel. Mi mo smol brata, mo bigfala sista wetem ol kasen blong mi, mifala i gruap wetem bilif ya se God i laekem moa ol olfala blong mifala long Inglan. Be, mi no rili sua long samting  ya, mo mi harem se mi no kam klosap long God. Taem mi gat 14 yia, mi go long plante jos, olsem Anglikan, Baptis, mo Seven Dei Adventis. Be oli no givhan long mi nating blong save God.

Biaen famle blong mi i muv i go long Sydney mo long ples ya, mi faenem Winston taem hem i kam blong spel. Olsem we Winston i talem finis, storian blong mitufala long taem ya i mekem se hem i stat blong stadi Baebol wetem ol Witnes. Afta long taem ya, hem i stap sanem ol leta long mi we i fulap wetem ol vas blong Baebol. Blong talem stret, fastaem mi wari mo mi Kros tu. Be sloslo mi luksave se hemia nao trutok long saed blong God.

Long 1962, mi muv i go klosap long Winston long Adelaide. Hem i mekem rod blong mi save stap wetem Thomas mo Janice, wan kapol we i bin mekem wok blong misinari long Papua Niugini. Tufala i kaen tumas mo tufala i halpem mi blong kasem save moa long Jehova. Ale, mi tu mi stat blong stadi Baebol, mo mi bilif strong se mi faenem trutok. Biaen, mi mo Winston i mared mo mitufala i stat blong mekem wok blong Jehova. Nating se i gat ol hadtaem, be hemia i halpem mitufala blong tinghae moa long gudfala perel we mitufala i faenem.

Winston, traem tokbaot taem ya we yu stat blong mekem wok blong Jehova.

A. Wan map blong ol travel we mitufala i mekem long wok blong eria elda

B. Ol stam blong sam aelan. Kiribati mo Tuvalu we bifo oli singaotem se Gilbet mo Elis Aelan

C. Naesfala aelan blong Funafuti long Tuvalu. Wan long ol aelan we mitufala i visitim, bifo we oli sanem ol misinari

Smoltaem afta we mitufala i mared, Jehova i stat blong yusum mitufala blong mekem moa long wok blong hem. (1 Kor. 16:9) Brata Jack Porter we i eria elda long smol kongregesen blong mifala, i halpem mitufala blong kasem faswan mak long wok blong Jehova. (Naoia hem i wok wetem mi olsem wan memba blong Branj Komiti Blong Ostrelia.) Jack mo waef blong hem Roslyn, i leftemap tingting blong mitufala blong mekem wok blong fultaem paenia, mo mitufala i glad blong mekem wok ya blong faef yia. Taem mi gat 29 yia, oli askem mi blong mekem wok blong eria elda long ol aelan blong Pasifik, we branj blong Fiji i lukaot long olgeta. Ol aelan ya i gat Amerikan Samoa, Samoa, Kiribati, Nauru, Niue, Tokelau, Tonga, Tuvalu, mo Vanuatu.

Long taem ya, ol man long ol aelan ya oli fraet long Ol Witnes Blong Jehova. Taswe mitufala i mas lukaot gud long ol toktok mo fasin blong mitufala. (Mat. 10:16) From we ol kongregesen oli smol nomo, sam brata oli no naf blong givim ples blong slip long mitufala. Taswe mitufala i mas askem wan ples blong slip long ol man long vilej, mo ol man oli kaen tumas long mitufala.

Winston, yu yu intres bigwan long wok blong translesen. ?Wanem nao i pulum yu?

Long Samoa, lidim wan skul blong ol elda

Taem mitufala i stat blong mekem wok long aelan blong Tonga, ol brata long ples ya oli gat sam traket mo buklet nomo long lanwis blong olgeta—we i wan Polynesian lanwis. Mo taem ol brata oli prij, oli yusum buk ya Trutok Blong Soemaot Rod Blong Itenel Laef long Inglis blong stadi wetem ol man. Taswe long ol fo wik blong skul blong ol elda, tri lokol elda we oli save toktok smol Inglis, oli agri blong tanem buk ya Trutok i go long lanwis blong Tonga. Pam i taepem ol toktok, nao mifala i sanem i go long branj ofis blong Yunaeted Stet blong oli printim. Wok ya i tekem samples 8 wik. Nating se translesen ya i no beswan, be buk ya i givhan long plante man we oli toktok lanwis Tonga blong oli save trutok. Mitufala i no ol transleta, be ekspiriens ya i pulum intres blong mitufala blong mekem wok ya.

Pam, ?olsem wanem laef long ol aelan i defren long Ostrelia?

Wan long ol haos we mitufala i stap long hem taem mi mekem wok blong eria elda

!I defren tumas! I dipen long ples we mitufala i stap long hem. Sam ples i gat swam mo i gat plante moskito, ples i hot we i hot, i gat ol rat, mitufala i sik, mo samtaem mitufala i no gat inaf kakae. Be samting we i gud se, long evri aftenun, mitufala i laekem tumas blong sidaon long fale blong mitufala mo lukluk i go daon long solwota—fale i wan haos natanggura blong ol man Polinesia we i no gat wol. Long sam naet taem mun i saen strong, yu save luk ol pamtri mo laet blong mun long solwota. Mitufala i tekem ol gudfala janis ya blong tingting dip, prea mo tingbaot ol gudfala samting, be i no ol nogud samting we i hapen.

 Mitufala i laekem ol pikinini. Oltaem oli mekem mitufala i laf from we oli wantem save evri smosmol samting taem oli luk se mitufala i waetman. Taem mitufala i go long Niue, wan smol boe i kam holem ol hea long han blong Winston mo i se: “Mi laekem ol papa blong yu.” !Hemia from we hem i neva luk han blong man we i gat fulap hea mo hem i no save olsem wanem blong eksplenem!

Mitufala i harem nogud blong luk se ol man oli pua mo laef blong olgeta i had. Oli laef long wan naesfala ples, be i had blong oli kasem meresin mo gudfala wota blong dring. Nating se i olsem, ol brata oli no wari from we hemia i fasin blong laef blong olgeta. Oli glad nomo se oli stap wetem ol famle blong olgeta, mo se oli gat wan ples blong presem Jehova. Eksampol blong olgeta i halpem mitufala blong putum tingting blong mitufala i stap long samting we i moa impoten, mo blong gat wan laef we i no fasfas.

Pam, i luk olsem se yu lanem blong go tekem wota mo kakae blong yutufala. ?Yu yu mekem samting ya olsem wanem?

Long Tonga, Pam i wasem ol klos blong mitufala

Mi mi glad tumas se papa i bin trenem mi. Hem i tijim mi blong mekem plante samting, olsem blong mekem faea mo kuk long hem, mo olsem wanem blong laef wetem smol samting nomo. Taem mitufala i go mekem visit long Kiribati, mitufala i stap long wan smol haos natanggura we oli putum korel nomo long floa mo wol blong hem oli wokem long bambu. Blong kukum kakae, mi digim wan hol mo mi putum skin blong kokonas blong statem faea. Mo blong go kasem wota, mi go laen wetem ol woman blong kasem wota long wan wel. Be blong kasem wota, oli yusum wan stik we i longfala olsem 2 meta mo oli fasem wan rop we i olsem string blong hukum fis long en blong hem. Mo long narafala en blong string ya, oli fasem wan tin long hem. Wanwan woman i go long wel mo i sakem rop we tin hang long hem long wan spesel fasin, nao oli kasem wota blong olgeta. Taem mi luk, mi ting se hemia i isi nomo, be naoia taem blong mi nao. !Mi sakem rop ya plante taem, be tin ya i flot nomo antap long wota! Evriwan oli laf, ale taem mifala i finis blong laf, wan long olgeta i kam halpem mi. Ol woman ya oli kaen tumas mo oli rere blong givhan.

Yutufala tugeta i laekem wok we yutufala i mekem long ol aelan. ?Yutufala i save serem sam spesel memori wetem mifala?

Winston: I tektaem blong mitufala i lanem sam fasin blong olgeta. Eksampol, taem ol brata mo sista oli givim kakae, oli givim evri kakae we oli gat long mitufala. Long stat, mitufala i no luksave se mitufala i mas lego sam kakae blong olgeta. !Taswe mitufala i kakae evri samting we oli givim long mitufala! Biaen, taem mitufala i kasemsave, mitufala i lego sam kakae i stap blong olgeta. Nating se long stat mitufala i no luksave, be ol brata oli kasemsave. Mo oli glad tumas blong luk mitufala evri sikis manis, taem mitufala i go blong visitim olgeta o long taem blong spesel wik. Long taem ya, ol brata mo sista long ol aelan ya oli neva mitim ol narafala Witnes we oli blong defren ples.

Long Niue, lidim wan grup blong go prij

Ol visit we mitufala i stap mekem, oli wan gudfala rod blong prij long ol man long komuniti. Plante man long vilej oli ting se ol brata nomo oli mekemap skul ya. Taswe, taem oli luk se mitufala i blong narafala ples mo mitufala i kam blong visitim ol lokol brata, oli jes luksave se hemia i no wan skul we ol lokol brata oli mekemap, be i wan trufala ogenaesesen mo oli sapraes tu.

Pam: Long Kiribati, i gat wan samting we i hapen we bambae mi neva save fogetem. Long taem ya, i gat wan kongregesen nomo, mo i no gat tumas brata mo sista. I gat wan elda nomo, hemia brata Itinikai Matera, we hem nao i stap lukaot long mitufala. Wan dei, hem i karem wan basket we i gat wan eg nomo insaed mo i talem se: “Hemia blong yutufala.” I no oltaem we wan man i givim wan eg blong faol long mitufala. Nating se hemia i wan smol samting nomo, be i tajem hat blong mitufala.

 Pam, sam yia biaen yu lusum wan bebi long bel. ?Wanem i halpem yu blong stanap strong?

Long 1973, mi gat bel taem mitufala i stap long Saot Pasifik. Mitufala i gobak long Ostrelia mo fo manis biaen, mi lusum bebi blong mitufala. Long taem ya, Winston tu i harem nogud tumas. Soa we i stap long hat blong mi i no godaon fulwan, go kasem taem we yumi kasem Wajtaoa blong 15 Eprel 2009. Haf ya “Wan Kwestin” i askem se “Ol Bebi We Oli Ded Long Bel Blong Mama Oli Gat Hop?” Haf ya i mekem mitufala i bilif strong se Jehova bambae i jusum wanem samting blong mekem, mo se oltaem hem i stap mekem samting we i stret nomo. Bambae hem i tekemaot ol harem nogud we yumi stap kasem long wol ya, mo wetem lav bambae hem i yusum pikinini blong hem blong “brekemdaon paoa blong Setan.” (1 Jon 3:8) !Mo tu, haf ya i halpem mitufala blong tinghae moa long sas perel we mitufala i kasem blong stap olsem ol man blong Jehova! Nating se mitufala i kasem trabol, be hop we mitufala i gat i mekem se mitufala i save stanap strong.

Afta we mitufala i lusum bebi blong mitufala, mitufala i gohed bakegen long fultaem wok. Mitufala i wok sam manis long Betel mo biaen, mitufala i gohed bakegen long wok blong eria elda. Afta long ol fo yia we mitufala i mekem seket wok long ol eria blong New South Wales mo Sydney, oli singaotem mitufala blong go wok long branj blong Ostrelia long 1981, mo mitufala i stap kasem tede.

Winston, ?ekspiriens blong yu long ol aelan blong Saot Pasifik, i givhan long yu long wok blong yu olsem wan memba blong Branj Komiti Blong Ostrelia?

Yes, i givhan long mi long plante rod. Fastaem, Ostrelia i lukaot long Amerikan Samoa mo Samoa. Biaen, branj blong Niusilan i kam joen wetem Ostrelia. Mekem se naoia, branj blong Ostrelia i lukaot long Ostrelia, Amerikan Samoa mo Samoa, Kuk Aelan, Niusilan, Niue, Estimo, Tokelau, mo Tonga. Mi bin visitim plante long ol aelan ya, blong representem brata we i kam long branj ofis. Ekspiriens we mi kasem from ol wok we mi bin mekem wetem ol brata mo sista long ol aelan ya, i givhan bigwan long mi mo wok we mi stap mekem naoia long branj ofis.

Winston mo Pam long branj blong Ostrelia

Folem ekspiriens blong mi mo Pam, mitufala i luksave se i no ol bigman nomo we oli stap lukaotem God. Ol yangfala tu oli wantem faenem “perel ya we i sas we i sas”, nating se ol narafala long famle oli no intres. (2 King 5:2, 3; 2 Kron. 34:1-3) !Blong talem stret, Jehova i wan God we i wantem se evri man, ol yangfala mo ol olfala, oli kasem laef!

Taem mi mo Pam i stat blong lukaotem Jehova long ol 50 yia we oli pas, mitufala i no rili save se samting ya bambae i lidim mitufala i go wea. !I tru nomo se trutok blong Kingdom i olsem wan sas perel! !Mo mitufala i gat strong tingting blong holemtaet sas perel ya!