Go long ol haf insaed long hem

Go long lis blong ol haf

 STADI 51

?Yu Yu Save Gud Jehova?

?Yu Yu Save Gud Jehova?

“!Olgeta we oli save nem blong yu, bambae oli trastem yu, from we yu no save lego olgeta we oli stap lukaot yu, O Jehova!” —SAM. 9:10, NW.

SINGSING 56 Yu Folem Trutok

BIGFALA TINGTING *

1-2. ?Stori blong Angelito i tijim yumi blong mekem wanem?

?PAPA mo mama blong yu oli Witnes Blong Jehova? Sipos yes, yu mas tingbaot se yu no save kam fren blong Jehova nating se tufala i fren blong hem. Nomata se ol papa mo mama blong yumi oli wosipim God o nogat, yumi wanwan i mas bildimap fasin fren blong yumi wetem Jehova.

2 Traem tingbaot stori blong Angelito. Hem i gruap long wan famle we oli Witnes. Be taem hem i yangfala, hem i harem se hem i no frengud wetem God. Hem i talem se, “Mi stap mekem wok blong Jehova jes from we mi wantem mekem samting we famle blong mi i stap mekem.” Nating se i olsem, Angelito i traehad blong spenem moa taem blong ridim Tok blong God mo tingting dip long hem, mo i stat blong prea oltaem long Jehova. ?Olsem wanem samting ya i givhan long hem? Hem i talem se, “Mi lanem se i gat wan rod nomo blong kam klosap long gudfala papa blong mi, Jehova, hemia se mi wan mi mas lanem blong save gud hem.” Stori blong Angelito i stanemap sam impoten kwestin: ?Olsem wanem fasin ya blong save Jehova i defren long fasin ya blong save gud hem? ?Mo yumi save mekem wanem blong save gud Jehova?

3. ?Olsem wanem fasin ya blong save Jehova i defren long fasin ya blong save gud hem?

3 Maet yumi ting se yumi save Jehova, from yumi save nem blong hem o samting we hem i talem o mekem. Be blong save gud Jehova, yumi mas mekem sam moa samting. Yumi mas spenem taem blong lanem ol samting long saed blong Jehova  mo ol gudfala fasin blong hem. Olsem nao, bambae yumi kasemsave samting we i pulum hem blong talem mo mekem wan samting. Hemia i halpem yumi blong luksave sipos hem i glad long ol tingting, ol desisen, mo ol aksen blong yumi. Taem yumi luksave samting we Jehova i wantem yumi blong mekem, yumi mas wok folem ol samting we yumi lanem.

4. ?Olsem wanem ol eksampol long Baebol oli save halpem yumi?

4 Sam man oli save tok nogud long yumi from we yumi wantem mekem wok blong Jehova, mo oli save agensem yumi moa taem yumi stat blong go long ol miting. Be sipos yumi trastem Jehova, bambae hem i neva lego yumi. Bambae yumi stat blong wokem fandesen blong fasin fren blong yumi wetem God, we i save stap olwe. ?Olsem wanem? ?Yumi naf blong save gud Jehova? !Yes! Eksampol blong ol gudfala man olsem Moses mo King Deved, i pruvum samting ya. Taem yumi stadi moa long ol samting we oli mekem, bambae yumi faenem ansa blong tufala kwestin ya: ?Olsem wanem oli naf blong save gud Jehova? ?Mo yumi save lanem wanem long eksampol blong tufala?

MOSES I LUK “GOD YA WE MAN I NO SAVE LUK”

5. ?Moses i jusum blong mekem wanem?

5 Moses i jusum blong mekem wok blong God. Taem Moses i gat samwe long 40 yia, hem i jusum blong joen wetem ol man blong God, i bitim we ol man oli save hem olsem “boe blong gel blong Fero.” (Hib. 11:24) Moses i no wantem kasem hae posisen. Mo hem i save se Fero bambae i kros tumas sipos hem i sapotem ol man Isrel. Fero i wan king we i gat bigfala paoa, mo ol man Ijip oli luk hem olsem wan god. !Yes, Moses i gat strong bilif! Hem i trastem Jehova. Mo tras ya nao i fandesen blong fasin fren blong hem wetem Jehova, long ful laef blong hem.—Prov. 3:5.

6. ?Yumi lanem wanem long eksampol blong Moses?

6 ?Yumi lanem wanem? Olsem Moses, yumi evriwan i gat wan desisen blong mekem: ?Bambae yumi jusum blong mekem wok blong God mo joen wetem ol man blong hem? Maet yumi mas lego sam samting blong mekem wok blong God, mo maet samfala we oli no save Jehova, oli agensem yumi. !Be sipos yumi trastem Papa blong yumi long heven, yumi sua se bambae hem i sapotem yumi!

7-8. ?Moses i gohed blong lanem wanem?

7 Moses i gohed blong lanem moa long saed blong Jehova mo i mekem wil blong hem. Eksampol, taem Jehova i askem Moses blong i lidim ol man Isrel oli aot long Ijip, Moses i fraet mo i talem plante taem long Jehova se hem i no naf blong mekem samting ya. Fasin blong God blong toktok long Moses, i soem se hem i gat sore, i kasem save filing blong Moses mo i wantem halpem hem. (Eks. 4:10-16) Biaen, Moses i naf blong talemaot ol strong mesej blong jajmen long Fero. Hem i luk we Jehova i yusum paoa blong hem blong sevem ol man Isrel mo i spolem Fero wetem ol ami blong hem long Red Si.—Eks. 14:26-31; Sam. 136:15.

8 Afta we Moses i lidim ol man Isrel oli go aot long Ijip, oli stap komplen oltaem. Nating se i olsem, Moses i luk we Jehova i gat longfala tingting long ol man ya we bifo oli slef. (Sam. 78:40-43) Mo tu, hem i luk olsem wanem Jehova i gat tingting daon, taem i no spolem ol man blong hem.—Eks. 32:9-14.

9. Folem Hibrus 11:27, ?fasin fren blong Moses wetem Jehova i olsem wanem?

9 Afta we ol man Isrel oli aot long Ijip, fasin fren blong Moses wetem Jehova i kam strong moa, i olsem we hem i luk Papa blong hem long heven. (Ridim Hibrus 11:27.) Baebol i  soemaot olsem wanem tufala i frengud, taem i se: “Hae God i stap toktok wetem Moses olsem we man i stap toktok wetem fren blong hem nomo.”—Eks. 33:11.

10. ?Yumi mas mekem wanem blong save gud Jehova?

10 ?Yumi lanem wanem? Blong save gud Jehova, i no naf we yumi lanem nomo ol fasin blong hem, be yumi mas mekem samting we hem i wantem tu. Tede, samting we Jehova i wantem, hemia se ‘olgeta man oli mas kasem laef, mo oli kasem stret save long trutok.’ (1 Tim. 2:3, 4) Wan rod blong mekem samting we God i wantem, hemia blong tijim ol narafala long saed blong Jehova.

11. ?Olsem wanem yumi save gud Jehova taem yumi tijim ol narafala?

11 Taem yumi tijim ol narafala long saed blong Jehova, hemia i halpem yumi blong save gud hem moa. Eksampol, yumi luksave se Jehova i gat sore, taem hem i halpem yumi blong faenem ol man we hat blong olgeta i stret. (Jon 6:44; Ol Wok 13:48) Yumi luk we Tok blong God i gat paoa, from we i halpem ol Baebol stadi blong yumi, blong oli lego ol nogud fasin blong olgeta mo oli wokem ol niufala fasin. (Kol. 3:9, 10) Mo yumi luk klia longfala tingting we God i gat, taem hem i givim janis long plante man blong oli lanem moa long saed blong hem mo blong oli sef.—Rom 10:13-15.

12. Folem Eksodas 33:13, ?Moses i askem wanem, mo from wanem?

12 Moses i tinghae long fasin fren we hem i gat wetem Jehova. Nating se Moses i bin luk we Jehova i givhan long hem blong mekem plante bigfala wok, be yet hem i askem long Jehova blong i halpem hem blong i save gud Hem moa. (Ridim Eksodas 33:13.) Moses i gat bitim 80 yia taem hem i askem samting ya long Jehova. Hem i save se i gat plante samting yet we hem i mas lanem long saed blong Papa blong hem long heven.

13. ?Olsem wanem blong pruvum se yumi tinghae long fasin fren blong yumi wetem God?

13 ?Yumi lanem wanem? Nomata se yumi mekem wok blong Jehova plante yia finis, yumi no mas ting nating long fasin fren we yumi gat wetem hem. Wan rod blong pruvum se yumi tinghae long fasin fren blong yumi wetem God, hemia blong toktok long hem tru long prea.

14. ?From wanem prea i wan impoten rod blong lanem moa long saed blong God?

14 Sipos yu wantem frengud wetem wan man, yu mas toktok oltaem wetem hem. Long sem fasin, yu save kam klosap moa long God taem yu prea oltaem, mo yu no mas fraet blong talemaot ol tingting mo filing blong yu long hem. (Efes. 6:18) Sista Krista, we i laef long Teki, i talem se: “Lav mo tras blong mi long Jehova i kam strong moa taem mi prea mo mi talemaot ol tingting blong mi long hem, mo taem mi luk we hem i halpem mi. Taem mi luk olsem wanem Jehova i ansarem ol prea blong mi, hemia i halpem mi blong luk Jehova olsem wan Papa mo wan Fren.”

WAN STRET MAN LONG TINGTING BLONG JEHOVA

15. ?Jehova i talem wanem long saed blong King Deved?

15 King Deved i bon long wan nesen we evri man oli wosipim Jehova God. Be Deved i mekem sam moa samting i bitim we hem i jes folem kastom blong skul blong famle blong hem. Hem wan i traehad blong frengud wetem God, mo Jehova i lavem hem tumas. From samting ya, Jehova i tokbaot Deved se hem i wan man we “fasin blong hem i stret long tingting blong [Hem].” (Ol Wok 13:22) ?Wanem i mekem se Deved i frengud wetem Jehova?

16. ?Deved i lanem wanem taem hem i tingting dip long ol samting we Jehova i wokem?

16 Deved i lanem blong save Jehova tru long ol samting we Hem i wokem. Taem Deved  i yang, hem i spenem plante taem blong lukaot long ol sipsip blong papa blong hem. Ating hemia nao taem we hem i stat blong tingting dip long ol samting we Jehova i wokem. Eksampol, taem Deved i lukluk i go antap long skae long naet, hem i no jes luk plante sta, be hem i luk tu, ol fasin blong Man ya we i wokem ol sta ya. Hemia i pulum Deved blong raetem se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem.” (Sam. 19:1, 2) Taem Deved i tingbaot olsem wanem Jehova i wokem ol man, hem i luksave se Jehova i waes we i waes. (Sam. 139:14) Mo taem hem i tingting dip long ol narafala samting we Jehova i wokem, hem i luksave se hem i smol nomo long fored blong Jehova.—Sam. 139:6.

17. ?Yumi save lanem wanem taem yumi tingting dip long ol samting we God i wokem?

17 ?Yumi lanem wanem? Yumi mas tekem taem blong lukluk ol samting we oli stap raonabaot long yumi. !Long rod ya, bambae yumi sapraes blong luk se i gat plante naesfala samting we Jehova i wokem long wol ya! I gud evridei yu tingting dip long ol samting we yu luk, olsem ol plant, ol animol, ol man, mo traem tingbaot olsem wanem ol samting ya oli tijim yu long saed blong Jehova. Nao bambae yu lanem plante moa samting long saed blong gudfala Papa ya blong yu. (Rom 1:20) Mo evridei bambae yu lavem hem moa.

18. Folem Ol Sam 18, ?Deved i luksave wanem?

18 Deved i luksave se Jehova i stap halpem hem. Eksampol, taem Deved i kilim wan laeon mo bea we oli wantem kakae sipsip blong papa blong hem, Deved i luksave se Jehova i halpem hem blong kilim tufala wael animol ya. Taem hem i kilim bigfala man ya Golaeat, hem i luksave se Jehova nao i halpem hem. (1 Saml. 17:37) Mo taem hem i ronwe long jalus King ya Sol, hem i luksave bakegen se Jehova nao i sevem hem. (Sam. 18, smol toktok long stat) Sipos Deved i wan flas man, maet hem i save ting se hem nomo i mekem olgeta samting ya. Be Deved i no mekem olsem, hem i gat tingting daon, taswe hem i naf blong luksave se Jehova nomo i stap halpem hem.—Sam. 138:6.

19. ?Yumi lanem wanem long eksampol blong Deved?

19 ?Yumi lanem wanem? Yumi mas mekem sam moa samting, i bitim we yumi jes askem help blong Jehova. Mo tu, yumi mas luksave wetaem mo olsem wanem Jehova i stap halpem yumi. Sipos yumi gat tingting daon, bambae yumi luksave se yumi no naf blong mekem evri samting yumi wan, mo yumi nidim Jehova blong i givhan long yumi. Mo taem yumi luksave se Jehova i halpem yumi, fasin fren blong yumi wetem hem bambae i kam strong moa. Aesak, wan brata long Fiji we i mekem wok blong Jehova plante yia, i luksave se samting ya i tru. Hem i se: “Taem mi tingtingbak long laef blong mi, mi luksave se Jehova i stap halpem mi, stat taem we mi stadi, kam kasem tede. From samting ya, mi luk Jehova olsem wan trufala man.”

20. ?Yumi lanem wanem long fasin fren blong Deved wetem Jehova?

20 Deved i folem ol fasin blong Jehova. Jehova i wokem yumi blong yumi folem ol fasin blong hem. (Jen. 1:26) Moa we yumi lanem ol fasin blong Jehova, moa we bambae yumi naf blong folem ol fasin blong hem. Deved i lanem blong save gud Papa blong hem long heven, taswe hem i naf blong soemaot ol fasin blong Jehova long ol narafala. Traem tingbaot eksampol ya. Deved i mekem sin agensem Jehova taem hem i slip wetem Batseba mo biaen i kilim hasban blong hem i ded. (2 Saml. 11:1-4, 15) Be Jehova i jusum blong soem sore long Deved, we i wan man blong  soem sore long ol narafala man. From we Deved i frengud wetem Jehova, hem i wan long ol beswan king we ol man Isrel oli laekem hem tumas, mo Jehova i yusum hem olsem wan gudfala eksampol long ol narafala king blong Isrel.—1 King 15:11; 2 King 14:1-3.

21. Folem Efesas 4:24 mo 5:1, ?wanem frut i kamaot taem yumi “folem fasin blong God”?

21 ?Yumi lanem wanem? Yumi mas “folem fasin blong God.” Taem yumi mekem olsem, yumi stap givhan long yumi wan mo yumi lanem blong save gud hem moa. Mo tu, taem yumi folem ol fasin blong God, yumi pruvum se yumi ol pikinini blong hem.—Ridim Efesas 4:24; 5:1.

LANEM MOA LONG SAED BLONG JEHOVA

22-23. ?Wanem bambae i hapen sipos yumi folem samting we yumi lanem long saed blong Jehova?

22 Olsem we yumi bin luk, yumi save lanem moa long saed blong Jehova tru long ol samting we hem i wokem mo tru long Tok blong hem, Baebol. Spesel buk ya Baebol, i fulap wetem eksampol blong ol gudfala man blong wok blong God we yumi save folem fasin blong olgeta, olsem Moses mo Deved. Jehova i mekem evri samting blong yumi finis. Naoia i taem blong yumi blong mekem bes blong yumi blong lanem moa long saed blong hem.

23 Bambae yumi neva stop blong lanem moa long saed blong Jehova. (Pri. 3:11, NW) Nating se i olsem, samting we i impoten hemia se yumi folem wanem we yumi lanem, be i no hamas save we yumi gat long saed blong Jehova. Sipos yumi wok folem samting we yumi lanem mo yumi traehad blong folem ol fasin blong gudfala Papa blong yumi, bambae hem i gohed blong kam klosap long yumi. (Jem. 4:8) Tru long tok blong hem Baebol, hem i promes se bambae hem i neva lego ol man we oli traehad blong save gud hem.

SINGSING 80 God i Gud Tumas, Yu Traem Trastem Hem

^ par. 5 Plante man oli bilif se i gat wan God, be oli no rili save gud hem. ?I minim wanem blong save gud Jehova? ?Mo olsem wanem eksampol blong Moses mo King Deved i save givhan long yumi blong frengud wetem Jehova? Long stadi ya, bambae yumi faenem ansa blong ol kwestin ya.