Go long ol haf insaed long hem

Go long lis blong ol haf

 YUMI FOLEM FASIN BLONG BILIF BLONG OLGETA | DEVED

Jehova i Gat Paoa Blong Win Long Faet

Jehova i Gat Paoa Blong Win Long Faet

DEVED i stap traehad blong gotru long bigfala hip blong ol soldia we oli fasfas raon long hem. Oli stap ronwe long ples blong faet. Ae blong olgeta i bigbigwan from we oli fraet tumas. ?From wanem oli fraet? Deved i harem olgeta oli stap talem bakegen mo bakegen, nem blong wan man. Man ya i stap stanap long bigfala level ples long medel blong ol hil, mo i flas we i flas. Deved i neva luk wan bigfala man olsem.

!Hemia Golaeat! Deved i luksave from wanem ol soldia oli fraet long hem. !Man ya i bigwan we i bigwan bitim mak! Taem hem i no werem ol klos blong faet, hem i hevi olsem tu bigbigfala man. Ol tul blong faet we hem i karem oli hevi. Be hem i strong we i strong, mo i mekem plante faet finis. Ale Golaeat i singaot strong, blong pulum ol man blong faet. Yu traem tingbaot bigfala voes blong hem mo olsem wanem noes blong hem i fas long ol hil i kambak, taem hem i singaot blong jikim ol ami blong Isrel mo King Sol. !Hem i singaot eni man blong i kam faetem hem!​—1 Samuel 17:4-10.

Ol soldia blong Isrel oli fraet, mo King Sol tu i fraet. Deved i faenemaot se faet ya i stap olsem, blong wan manis finis. Golaeat i gohed evridei blong tok jik, be ol soldia blong Filistia mo Isrel oli no mekem wan samting. Deved i harem nogud. Hem i sem, taem hem i luk we King blong Isrel mo ol soldia, wetem tri bigfala brata blong hem tu, oli fraet. Long tingting blong Deved, hiten man ya Golaeat i no stap jikim ol ami blong Isrel nomo, be hem i jikim God blong Isrel tu, Jehova. ?Be wan yangfala olsem Deved i save mekem wanem? ?Yumi lanem wanem from bilif blong Deved?​—1 Samuel 17:11-14.

“!YU GIRAP, YU MAKEMAOT HEM!”

Yumi traem tingting bak long samting we i hapen plante manis bifo. Wan dei, taem san i stap godaon, Deved i stap lukaot long ol sipsip blong papa blong hem long saed blong ol hil klosap long Betlehem. Deved i wan yangfala yet, bodi blong hem i naes, hem i strong, ae blong hem i saen mo i soemaot se hem i save samting. Taem ples i kwaet, hem i plei long hap blong hem. Hem i laekem tumas ol samting we God i wokem, mo samting ya i pulum hem blong wokem ol naesfala singsing. Hem i save plei gud, from we hem i spenem plante taem blong lanem. Be long naet ya, papa blong hem i singaot hem. Hem i wantem luk Deved naoia nomo.​—1 Samuel 16:12.

Taem hem i kamtru long haos, hem i luk wan olfala man i stap storian wetem papa blong hem. Hemia profet Samuel. Jehova i sanem hem, blong i makemaot wan pikinini blong Jese blong i kam king blong Isrel. Samuel i luk finis ol seven bigfala brata blong Deved, be Jehova i no jusumaot wan long olgeta. Taem Deved i kamtru, Jehova i talem long Samuel se: “!Hemia nao! !Yu girap, yu makemaot hem se bambae i kam king!” Long fored blong ol brata blong Deved, Samuel i karemaot samting we i blokem maot blong hon blong anamol we oli fulumap spesel oel long hem, mo i kafsaedem oel i go long hed blong Deved. Stat long taem ya, laef blong Deved i jenis. Baebol i talem se: “Spirit blong Hae God i kam long Deved, i holem hem, mo i stat long dei ya, Spirit ya i stap oltaem long hem.”​—1 Samuel 16:1, 5-11, 13.

Deved i leftemap Jehova taem hem i winim ol wael anamol

?Olsem wanem? ?Deved i stap tingbaot nomo blong kasem haenem olsem king? Nogat. Hem i wet long Jehova. Bambae Jehova i yusum spirit blong hem  blong mekem Deved i save wetaem i stret blong hem i kam king. Go kasem taem ya, Deved i gohed nomo blong lukaot long ol sipsip. Hem i tinghevi long wok ya, mo i no fraet blong blokem wael anamol we i kam blong kakae ol sipsip. Tu taem samting ya i hapen, fastaem wan laeon afta wan bea. Deved i no stanap longwe mo i traem blong ronemaot wael anamol ya, be hem i jam kwiktaem long hem mo i faetem hem. !Long tufala taem ya, hem wan nomo i kilim wael anamol ya i ded!​—1 Samuel 17:34-36; Aesea 31:4.

I no longtaem, King Sol i harem nius blong Deved mo i singaot hem i kam. Sol i wan strong man blong faet, be hem i no obei long God. Nao Jehova i no moa glad long hem, mo i karemaot tabu spirit long hem. Ale, taem rabis tingting i kasem Sol, hem i kros we i kros, i no trastem narafala, mo i traem blong kilim man i ded. Long taem olsem, i gat wan samting nomo we i save mekem hem i kam kwaet, hem i mas lesin long miusik. Sam man blong Sol oli tokbaot Deved, se hem i nambawan man blong faet, mo hem i save plei gudfala miusik. Taswe, Sol i singaot Deved blong i plei miusik mo i karem ol tul blong faet blong hem.​—1 Samuel 15:26-29; 16:14-23.

Ol yangfala oli save lanem plante samting from bilif blong Deved. Hem i yusum taem blong spel blong mekem ol wok we oli pulum hem blong i kam klosap long Jehova. Mo tu, sloslo hem i lanem blong gat gudhan long sam wok, we i mekem se ol narafala oli glad blong tekem hem i kam man blong wok blong olgeta. Antap long ol samting ya, hem i letem tabu spirit i lidim hem. !Hemia ol nambawan lesen blong yumi evriwan!​—Prija 12:1.

“I NOGUD YUMI FRAET”

Taem Deved i stap wok blong Sol, plante taem hem i gobak long ples blong hem, blong lukaot long ol sipsip. Long wan taem olsem, papa blong hem i sanem hem i go blong jekem trifala brata blong hem we oli joen long ami blong Sol. Deved i obei, mo i karem plante samting i go long ol brata blong hem long bigfala level ples ya Elaha. Taem hem i kasem ples ya, hem i harem nogud blong luk we tufala ami i no mekem wan samting, olsem we yumi tokbaot finis. Tufala i stanap fesem tufala, wan long saed blong hil longwe, narawan long saed blong hil long ples ya, mo i gat bigfala level ples long medel.​—1 Samuel 17:1-3, 15-19.

Deved i luk se i no stret nating we oli stap olsem. ?Olsem wanem ol ami blong Jehova, God ya we i laef, oli save fraet mo ronwe long wan man nomo, antap moa wan hiten man? Long tingting blong Deved, taem Golaeat i jikim ol soldia blong Isrel, hem i tok nogud long Jehova stret. Taswe Deved i talem long ol soldia, se oli mas go faetem mo winim Golaeat. I no longtaem, fasbon brata blong Deved, Eliab, i harem tok blong Deved. Hem i kros, nao i tok strong long smol brata blong hem, se hem i kam nomo blong lukluk blad i ron long faet. Be Deved i talem se: “?Wanem nao mi mekem we i no stret? ?Weswe? ?Mi mi no gat raet blong askem kwestin?” Hem i gohed nomo blong talem wetem strong tingting se oli mas winim Golaeat, nao wan man i talemaot tok blong hem long King Sol. Ale king i talem se oli mas tekem Deved i kam.—1 Samuel 17:23-31.

Deved i toktok gud long king se: “!King, i nogud yumi fraet long man Filistia ya!” !Tru ya, Sol mo ol man blong hem oli fraet gud long Golaeat! Maet oli stap skelem olgeta wetem bigfala man ya from we oli smol nomo, oli no save kasem jes blong hem nating. Oli stap tingbaot se sipos hem i yusum ol tul blong faet blong hem, bambae i isi nomo blong i kilim olgeta i ded. Be Deved i no tingting olsem. Bambae yumi luk se tingting we hem i gat i defren  olgeta. Ale hem i girap, i talem se hem wan nomo bambae i go faetem Golaeat.​—1 Samuel 17:32.

Sol i no glad, i talem se: “!No, Deved! !Yu yu no naf nating! ?Bambae yu faet long hem olsem wanem? Man ya i soldia oltaem long laef blong hem, be yu yu wan yang boe nomo.” ?Olsem wanem? ?Deved i wan yang boe nomo? Nogat. I tru se hem i yang blong joen long ami, mo ating hem i luk olsem wan yang boe. Be maet Deved i gat klosap 20 yia finis, mo ol man oli save hem olsem wan man blong faet we i no fraet.​—1 Samuel 16:18; 17:33.

Deved i mekem tingting blong Sol i kwaet taem hem i tokbaot olsem wanem hem i kilim wan laeon mo bea. ?Hem i stap tokflas? Nogat. Deved i save hu i mekem hem i win. Hem i talem se: “Hae God i stap blokemgud mi, blong ol laeon mo bea oli no spolem mi. Hem i sevem mi plante taem finis, mo bambae hem i blokemgud mi bakegen blong man ya bambae i no spolem mi. !Bambae hem i sevem mi yet ya!” Sol i agri, mo hem i talem se: “Oraet, yu go. Prea blong mi we Hae God bambae i stap wetem yu.”​—1 Samuel 17:37.

?Yu yu wantem gat bilif olsem Deved? Bilif blong Deved i no wan tingting nomo, no wan samting we hem i wantem nomo se i kamtru. Hem i bilif long God from we hem i gat save, mo i luk finis olsem wanem Jehova i givhan long hem. Hem i save se Jehova i lavem hem, i stap lukaot gud long hem, mo i holem ol promes blong hem. Sipos yumi wantem gat bilif olsem, yumi mas gohed blong kasem save long God ya we Baebol i tokbaot. Taem yumi folem ol save ya, yumi luk gudfala frut we i kamaot long laef blong yumi, nao bilif blong yumi i kam strong.​—Hibrus 11:1.

JEHOVA “BAMBAE I PUTUM YU LONG HAN BLONG MI”

Fastaem, Sol i putum ol klos blong faet blong hem long Deved. Oli klosap sem mak long klos blong Golaeat, mo oli wokem long bras. I gat wan bigfala kot we oli kavremap wetem ol samting olsem ol skel blong fis we oli wokem long bras. Deved i traem blong wokbaot wetem ol klos ya, be hem i luk se oli bigwan tumas mo oli hevi. Hem i no kasem trening olsem wan soldia, taswe hem i no lan long ol klos olsem, speseli klos blong Sol we hem i wan longfala man i bitim ol narafala man Isrel. (1 Samuel 9:2) Hem i karemaot ol klos ya, mo i putum olgeta we hem i stap putum oltaem, taem hem i stap lukaot long ol sipsip.​—1 Samuel 17:38-40.

Deved i karem wokingstik blong man we i lukaot long sipsip, i hangem basket long solda blong hem, mo i holem sling blong hem. Maet yu ting se sling i no naf, be hem i wan gudfala tul blong faet. Ol man blong lukaot long sipsip oli yusum sling oltaem. Hemia tu strap we i longfala, oli wokem long skin blong buluk, mo long en blong tufala strap ya i gat wan smol poket. Man i putum ston long poket ya, i tantanem strap i goraon antap long hed blong hem kwiktaem, i lego wan long tufala strap ya, nao i slingim ston i go stret long mak blong hem. Taem ston i kasem stret mak blong hem, hem i save kilim man no anamol i ded. Taswe, i gat ol grup blong ami we oli tren blong yusum sling.

Deved i rere nao, ale hem i hareap blong go fesem enemi blong hem. Taem hem i godaon long reva we i stap long level ples long medel blong ol hil, hem i pikimap faef smol ston we oli raon gud. Yu traem tingbaot olsem wanem Deved i stap prea wetem fulhat blong hem long taem ya. Nao hem i go long ples blong faet. !Hem i no wokbaot nomo, be hem i ron!

Taem Golaeat i luk Deved, ?wanem tingting blong hem? “Hem i stap lukluk rabis long hem, from we hem i wan yang boe nomo we bodi blong hem i naes, be i no naf nating blong faet.” Golaeat i singaot strong se: “?Wanem stik ya we yu stap holem? ?Yu ting se mi mi dog?” Hem i tokbaot wokingstik blong Deved be i no tokbaot sling. Nao hem i singaot long ol god blong ol man Filistia blong oli spolem Deved. Mo hem i talem se bambae hem i givim bodi blong hem i go long ol pijin mo long ol wael anamol blong oli kakae.​—1 Samuel 17:41-44.

Tede, yumi sapraes yet long strong bilif we yangfala Deved i soemaot long ansa blong hem. Hem i talem long Golaeat se: “Yu yu kam blong faet long mi long tufala spia mo naef blong faet blong yu, be mi mi kam blong faet long yu long nem blong Hae God. Hem i God blong mifala, mo hem i gat olgeta paoa, be yu yu stap jikim . . . hem.” Deved i save se ol tul blong faet mo paoa we Golaeat i gat i no impoten. Golaeat i daonem Jehova God, mo Jehova bambae i panisim hem. Olsem Deved i talem, Jehova “i gat paoa blong win long faet.”​—1 Samuel 17:45-47.

 Deved i luk klia nomo se Golaeat i bigfala man mo i gat ol tul blong faet. Be Deved i no letem samting ya i mekem hem i fraet. Hem i no mekem olsem Sol mo ol ami blong hem we oli skelem olgeta wetem Golaeat. Be hem i skelem Golaeat wetem Jehova. Golaeat i longfala, klosap tri meta. Hem i longfala moa i bitim ol narafala man, be taem Deved i skelem hem wetem King blong heven mo wol, Jehova, hem i nating nomo. !Golaeat mo ol narafala man tu oli olsem smol bebet nomo! !Mo Jehova i rere blong spolem gud hem!

Deved i resis i go blong kasem enemi blong hem. Hem i pusum han blong hem i go long basket, i pulumaot wan ston, i putum long sling, mo i tantanem i goraon antap long hed blong hem gogo noes blong hem i strong we i strong. Ating Golaeat i stap folem gud man we i karem sil blong hem, mo hem i kam klosap moa long Deved. Sore tumas we Golaeat i longfala olsem, from we man blong karem sil i no save leftemap i go antap blong blokem hed blong Golaeat. Mo hemia nao ples we Deved i makem.​—1 Samuel 17:41.

Deved i save se bigfala man ya Golaeat i nating nomo taem i skelem hem wetem Jehova God

Deved i slingim ston i go. Yu traem tingbaot olsem wanem ol man oli stap kwaet taem ston i stap flae. Jehova i meksua se Deved bambae i no nidim wan narafala ston. Ston ya i kasem stret mak blong hem, mo i draon long fored blong hed blong Golaeat. Bigfala man ya i kafsaed, i foldaon long fes blong hem. Ating man we i stap karem sil blong hem i ronwe from we i fraet tumas. Nao Deved i resis i kam, i pulumaot naef blong faet blong Golaeat, mo i katemaot hed blong hem.​—1 Samuel 17:48-51.

Naoia, tingting blong Sol mo ol soldia blong hem i jes kam strong blong faet. Ale, oli singaot strong, mo oli resis i go blong faetem ol man Filistia. Long en blong faet ya, i olsem we Deved i talem long Golaeat finis, se Jehova “bambae i putum yufala evriwan long han blong mifala.”​—1 Samuel 17:47, 52, 53.

Tede ol man blong God oli no moa mekem faet, taem ya i pas finis. (Matiu 26:52) Nating se i olsem, yumi mas folem bilif blong Deved. Olsem Deved, yumi mas bilif se Jehova i laef i stap, mo hem nomo i God ya we yumi mas wosipim mo fraet long hem. Samtaem yumi harem se ol problem blong yumi oli bigwan tumas, mo yumi smol nomo. Be ol problem oli nating nomo taem yumi skelem wetem bigfala paoa blong Jehova. Sipos yumi jusum Jehova se i God blong yumi, mo yumi bilif long hem olsem Deved i mekem, i no gat wan hadtaem, no wan problem we i bigwan tumas. !I no gat wan samting we paoa blong Jehova i no save winim!