Go long ol haf insaed long hem

Go long lis blong ol haf

Hasban o Waef i Slip Wetem Narafala

Hasban o Waef i Slip Wetem Narafala

Maria blong Spen i talem se: “Taem hasban blong mi i talem se bambae hem i lego mi blong go stap wetem wan woman we i yang moa, mi mi wantem ded nomo. Mi harem se i no stret nating, antap moa, mi tingbaot hamas taem mi lego samting we mi mi wantem blong mekem i gud long hem.”

Bil we i blong Spen, i talem se: “Taem waef blong mi i lego mi, i olsem we wan haf blong bodi blong mi i ded. Ol plan, ol drim, mo ol hop blong mitufala oli no moa save kamtru. Samtaem mi ting se mi stap kam gud, be biaen, tingting blong mi i foldaon bakegen.”

TAEM man o woman i go slip wetem narafala, hem i spolem gud hasban o waef blong hem. Samfala oli fogivim hasban o waef we i tanem tingting, mo oli traehad blong fren gud bakegen. * Nating se i olsem, oli harem nogud bitim mak from samting we i hapen. ?Olsem wanem blong harem gud bakegen?

ADVAES BLONG BAEBOL

Plante man mo woman we hasban o waef blong olgeta i lego olgeta, oli luk se Baebol i givhan bigwan, nating se oli harem nogud bitim mak. Baebol i soemaot se God i kasem save filing blong olgeta, mo i sore long olgeta taem i luk we oli krae. —Malakae 2:13-16.

‘Taem we mi mi wari, yu mekem tingting blong mi i kam gud bakegen, yu mekem mi mi glad.’ Ol Sam 94:19.

Bil i talem se: “Taem mi ridim vas ya, mi tingbaot Jehova olsem wan papa we i sore long pikinini blong hem, mo i kaen long hem blong mekem hem i harem gud bakegen.”

“!Hae God! Olgeta we oli stap obei long yu, oltaem, yu yu stap mekem i gud tumas long olgeta.” Ol Sam 18:25.

Kamen, we hasban blong hem i slip wetem narafala woman blong plante manis, i talem se: “Hasban blong mi i no stap tru long mi. Be mi save trastem Jehova. Bambae hem i neva spolem mi.”

‘Yufala i no mas letem tingting blong yufala i trabol, be yufala i mas askem olgeta samting we yufala i wantem long God. Yufala i mas prea, yufala i mas krae i go long hem blong hem i givhan long yufala, nao pis ya blong God we i bigwan tumas i bitim olgeta save blong yumi, bambae i lukaot gud long hat mo tingting blong yufala.’Filipae 4:6, 7.

Sasa i talem se: “Mi ridim vas ya bakegen mo bakegen. Mi prea oltaem, nao God i putum pis long tingting blong mi.”

Olgeta we yumi tokbaot antap, plante taem oli harem nogud tumas. Be oli trastem Jehova God, mo oli ridim Baebol blong kasem paoa blong gohed. Bil i talem se: “Taem mi harem se mi lusum evri samting, bilif blong mi nomo i mekem se mi gat wan risen blong laef. Smoltaem ya, i olsem we mi wokbaot long ‘ples we i tudak olgeta,’ be God i stap wetem mi.”—Ol Sam 23:4.

^ par. 4 Blong save sipos i stret blong fogif o nogat, yu luk Wekap! blong Eprel 1999, “Taem Wan i Mekem i Krangke Long Narafala.