Go long ol haf insaed long hem

Go long lis blong ol haf

?Ol Man Oli Talem Wanem Long Saed Blong Prea?

?Ol Man Oli Talem Wanem Long Saed Blong Prea?

“Taem mi mi lusum rod, mi prea, nao mi harem se God i stap long saed blong mi, i stap holem han blong mi mo i lidim mi.”—MARIA.

“Waef blong mi i gat kansa blong 13 yia mo biaen hem i ded. Mi tingbaot we mi bin prea long God evridei mo mi harem se hem i stap lesin long krae blong mi. Mi gat pis long tingting blong mi.”—RAUL.

“Prea i wan nambawan presen we God i givim long ol man.”—ARNE.

Maria, Raul, Arne, mo plante narafala oli tingbaot prea olsem wan spesel presen. Oli bilif se oli save toktok long God long prea, talem tangkiu long hem, mo askem help blong hem. Mo wetem fulhat blong olgeta oli bilif long promes blong Baebol se: “Yumi save trastem [God], se nomata wanem samting yumi askem long hem, mo sipos i laenap wetem wil blong hem, hem i harem yumi.”—1 Jon 5:14.

Be plante man oli no bilif long samting we Baebol i talem long saed blong prea. Stiv i tokbaot filing blong hem, se: “Taem mi gat 17 yia, tri fren blong mi i ded long tu defren aksiden. Wan i ded long aksiden long trak, mo tu narawan oli draon long solwota.” ?Stiv i mekem wanem? Hem i se: “Mi prea long God  blong traem faenemaot from wanem ol samting ya oli hapen, be mi no kasem ansa. So mi stap tingting se: ‘?From wanem mi prea?’” Samfala we oli ting se God i no ansa long prea blong olgeta, oli harem se oli westem taem nomo blong prea.

I gat sam narafala risen from wanem ol man oli harem se prea i no givhan long olgeta. Samfala oli talem se sipos God i save evri samting, hem i save finis ol samting we yumi nidim mo ol problem blong yumi, taswe i no nid blong talemaot long hem.

Sam narafala oli bilif se God i no wantem lesin long prea blong olgeta, from we oli bin mekem tumas mastik long laef blong olgeta. Jeni i talem se: “Mi gat problem ya we mi harem se mi gud blong nating nomo. Mi mekem plante nogud samting long laef blong mi, taswe mi harem se i no stret we God i lesin long prea blong mi.”

?Wanem tingting blong yu long prea? Sipos yu gat tingting olsem olgeta we yumi tokbaot finis o yu no save sipos God i harem prea blong yu, i sua se bambae yu glad blong save ol gudfala ansa blong Baebol. Yu save trastem ol tok blong Baebol long saed blong prea. * Bambae hem i givhan long yu blong faenem ansa blong ol kwestin ya:

  • ?God i harem ol prea blong yumi?

  • ?From wanem God i no ansa long sam prea?

  • ?Olsem wanem blong mekem se God i harem prea blong yu?

  • ?Prea i save givhan long yu olsem wanem?

^ par. 9 Long Baebol, yumi save ridim prea blong plante man blong God, wetem sam prea blong Jisas Kraes tu. I gat bitim 150 prea long fashaf blong Baebol we plante man oli kolem Oltesteman.