Go long ol haf insaed long hem

Go long lis blong ol haf

?From Wanem God i No Ansa Long Sam Prea?

?From Wanem God i No Ansa Long Sam Prea?

Papa blong yumi long heven, Jehova God, i glad mo i rere blong harem ol prea we oli kamaot long hat blong yumi. Be i gat sam samting we oli save mekem se hem i no ansa long ol prea blong yumi. ?Wanem ol samting ya? ?Mo yumi mas tingbaot wanem taem yumi prea? Hemia sam advaes blong Baebol.

“Taem yu prea, yu no mas talem sem toktok bakegen mo bakegen.”—Matiu 6:7.

Jehova i no wantem we yumi lanem ol prea baehat mo ripitim olgeta, o yumi ridimaot long wan buk. Be hem i wantem se yumi talemaot ol samting we i stap long hat blong yumi. Sipos wan fren i talem sem toktok long yu evri dei, bambae yu harem nogud. Ol gudfala fren oli no haedem wan samting mo oli tok tru. Taem yumi yusum ol prapa toktok blong yumi long prea, yumi soemaot se yumi tingbaot Papa blong yumi long heven olsem wan gudfala fren.

“Taem yufala i askem, yufala i no kasem from we yufala i gat nogud tingting.”—Jemes 4:3.

Sipos yumi askem samting we God i no wantem, hem i no save ansa long prea blong yumi. Eksampol: Sipos wan man blong plei laki i askem long God blong i winim bigfala mane, ?yu ting se God bambae i ansa? Nogat, from we Jehova i givim woning finis se yumi no mas griri mo yumi no mas bilif long gudlak. (Aesea 65:11; Luk 12:15) !Jehova i no save ansa long ol prea olsem! Sipos yumi wantem se hem i ansa, samting we yumi askem i mas laenap wetem Baebol.

 ‘Man we i no wantem lesin long loa, ol prea blong hem tu oli rabis olgeta.’—Ol Proveb 28:9.

Baebol i tokbaot samfala we oli no obei long ol loa blong God, nao God i no ansa long ol prea blong olgeta. (Aesea 1:15, 16) Tede tingting blong hem i no jenis. (Malakae 3:6) Sipos yumi wantem se God i ansa long ol prea blong yumi, yumi mas folem ol loa blong hem. ?Be olsem wanem sipos yumi bin mekem sam samting we i no stret? ?Hemia i min se bambae Jehova i neva lesin long yumi? !No, i no minim olsem! Sipos yumi sori from ol rong we yumi mekem, mo yumi traehad blong mekem hem i glad, bambae hem i fogivim yumi.—Ol Wok 3:19.