Go long ol haf insaed long hem

Go long lis blong ol haf

2 Stretem Trabol

2 Stretem Trabol

Sam trabol oli save stap longtaem, maet plante yia. Mo oli save kam bigwan bifo we yumi luksave. ?Olsem wanem? ?Advaes blong Baebol i save stretem ol trabol olsem? Tingbaot sam long ol trabol ya.

WARI BITIM MAK

Rosi i talem se: “Mi wari long ol samting gogo oli kam bigwan bitim mak long tingting blong mi.” ?Wanem vas blong Baebol i givhan long hem? Hemia Matiu 6:34 we i talem se: “Yufala i no mas wari tumas from ol samting blong tumora. Ol wari blong tumora oli blong tumora. Trabol blong wan dei hem i naf finis blong dei ya.” Ol tok ya blong Jisas oli givhan long Rosi blong i no moa wari long samting we i save hapen tumora. Hem i talem se: “Mi gat naf trabol finis, i nogud mi wari long samting we i no hapen yet, mo maet i neva hapen.”

Yasmin tu i harem nogud from i stap wari tumas. Hem i se: “Tu dei evri wik mi stap krae nomo, mo mi no save slip long naet. Mi harem se nogud tingting i stap spolem mi.” ?Wanem vas i givhan long hem? Hemia 1 Pita 5:7 we i talem se: “Yufala i mas lego ol wari blong yufala long [God], from we hem i stap tingbaot yufala.” Yasmin i talem se: “Mi gohed nomo blong prea, nao Jehova i ansa long prea blong mi. Mi harem olsem se hem i tekemaot wan bigfala hevi samting long solda blong mi. Sam samtaem, nogud tingting i kambak, be mi save samting we mi mas mekem blong winim.”

 PULUM TAEM

Yangfala Isabela i talem se: “Ating fasin ya blong pulum taem i stap long blad blong mi, from we papa blong mi tu i gat fasin ya. Mi stap lego ol samting we oli impoten, blong westem taem nomo blong spel mo wajem TV. Fasin ya i nogud tumas, from we i mekem se mi mas hareap nomo blong mekem wan wok, mo mi no mekem gud.” Advaes we i givhan long hem i stap long 2 Timoti 2:15, we i talem se: “Yu mas traehad long evri rod blong God i glad long yu. Long fes blong hem, yu mas kam wan wokman we yu no gat sem long ol wok blong yu.” Isabela i talem se: “Mi no wantem we Jehova i sem long wok blong mi from we mi pulum taem tumas.” Ale, hem i lego fasin ya.

Kelsi i talem samting we i klosap sem mak, i se: “Sipos mi gat wan wok blong mekem, mi lego i stap kasem las minit. Mi krae, mi no slip gud, mo mi wari. I nogud we i nogud.” Kelsi i luk se advaes blong Ol Proveb 13:16 i givhan long hem. Vas ya i talem se: “Man we i gat hed, oltaem nomo hem i stap tingting gud fastaem, . . . be man we i no gat hed, oltaem nomo hem i stap soemaot i klia we i no save wan samting.” Kelsi i tingting dip long vas ya, nao i talem se: “I waes blong mekem plan fastaem mo wok gud. Naoia mi raetem wan program blong ol wok we mi mas mekem, mo mi gohed sloslo long hem, be mi no lego i stap kasem las minit.”

HAREM NOGUD BLONG STAP YU WAN

Kirsten i talem se: “Man blong mi i lego mi wetem ol fo pikinini blong mitufala.” ?Wanem tok blong Baebol we i givhan long Kirsten? Hemia Ol Proveb 17:17 we i talem se: ‘Fren blong yu, oltaem hem i stap soemaot we hem i lavem yu, mo i olsem wan brata we i givhan long yu long taem blong trabol.’ Kirsten i kasem help long ol narafala we oli wosipim Jehova. Hem i talem se: “!Ol fren ya oli mekem plante samting blong mi! Samfala oli karem kakae mo ol flaoa i kam, mo oli lego i stap long doa blong mi. Mifala i muv tri taem, mo plante oli kam givhan long mifala. Wan i givhan long mi blong mi faenem wok. Ol fren ya oli rere oltaem blong givhan.”

Delfin we yumi tokbaot finis, hem tu i harem nogud blong stap hem wan, taem hem i lusum evri samting. Hem i se: “I olsem we mi stap afsaed long wan stoa, mo mi stap lukluk tru long windo long evriwan insaed. Mi harem se mi stap mi wan nomo.” Vas we i givhan long hem, hemia Ol Sam 68:6 we i talem se: “[God] i stap fren long ol man we oli no gat fren blong olgeta, i stap givim ples long olgeta blong oli save stap gud long hem.” Delfin i talem se: “Mi save se vas ya i no minim nomo wan prapa haos, be mi kasem save se Jehova i wantem givim wan sefples long mi, we mi save joen gud mo harem gud wetem ol man we oli lavem hem. Be mi save tu se mi mas kam klosap long Jehova fastaem, nao biaen mi save kam klosap long ol narafala. Ol Sam 37:4 i givhan long mi blong mi mekem olsem. Vas ya i talem se: ‘Yu mas luk long Hae God blong i mekem yu yu glad, nao bambae hem i givim ol samting we yu yu wantem tumas.’”

Delfin i gohed se: “Mi luksave se mi mas fasgud long Jehova. Hemia Besfren blong mi. Mo tu, mi raetem wan lis blong ol samting we mi save mekem wetem ol narafala, blong mi save joen oltaem wetem olgeta we oli fren blong Jehova. Mi stat blong luk ol gudfala fasin blong ol narafala, i no ol slak fasin blong olgeta.”

I tru, ol fren blong yumi we oli wosipim Jehova oli no stret gud olgeta. Ol Witnes blong Jehova oli kasem ol trabol olsem ol narafala man. Be Baebol i tijim yumi se yumi mas traehad blong givhan long ol narafala. I waes blong jusum ol fren olsem. ?Be olsem wanem long ol trabol we yumi no save winim tede, olsem sik we i stap oltaem o harem nogud from man we i ded? ?Advaes blong Baebol i save givhan?

Advaes blong Baebol i save givhan long yu blong yu faenem ol gudfala fren