Go long ol haf insaed long hem

Go long lis blong ol haf

?Baebol i Blong Bifo Nomo?

?Baebol i Blong Bifo Nomo?

SAMFALA OLI TALEM SE YES. Wan dokta i talem se sipos yu folem advaes blong Baebol, hemia i olsem we tija i yusum wan buk we i kamaot long 1920 blong tijim klas blong hem. Maet wan man we i no bilif long Baebol, i talem se i olsem we yu folem advaes blong wan buk blong bifo we i tokbaot kompiuta, blong fiksimap wan kompiuta tede. Yes, long tingting blong sam man, Baebol i blong bifo nomo.

?From wanem sam man oli yusum wan buk blong bifo, long wol ya we i fulap long ol niufala save? I gat ol websaet mo ol tok blong wanwan man long Intenet, we oli givim ol niufala advaes blong lidim yumi. Long TV, yumi luk ol man we oli stadi long tingting blong man, ol man we oli ting se oli savegud wanem fasin blong laef i beswan, mo ol man blong raetem buk. Mo ol stoa blong salem buk, oli fulap long ol buk blong advaes, we ol bisnes man oli winim plante bilian vatu evri yia from.

From we i gat plante niufala save olsem, ?from wanem yumi nidim Baebol, wan buk we i kamaot 2,000 yia finis? ?I tru se Baebol i olsem wan buk blong 1920 we tija i yusum blong tijim klas, o wan buk blong ol kompiuta bifo? Blong talem stret, i rong blong skelem Baebol wetem ol buk ya blong bifo. ?From wanem? From we, save blong ol saentis mo waes blong man i stap jenis oltaem, be ol samting we man i nidim oli no jenis nating. Olgeta man oli wantem yet blong mekem sam gudfala samting long laef blong olgeta, stap glad mo no fraet, joen gud long famle, mo oli wantem gat ol gudfala fren.

Nating se Baebol i wan olfala buk, be hem i tokbaot ol samting ya we olgeta man oli nidim, wetem plante moa samting bakegen. Baebol i talem tu se hem i wan buk we i kamaot long God, i givim advaes long evri samting long laef, mo i save mekem yumi naf blong winim ol trabol we yumi fesem. (2 Timoti 3:16, 17) !Antap long hemia, hem i talem se advaes blong hem i gud oltaem, i no save kam olfala! Baebol i talem se: “Tok blong God i laef.”—Hibrus 4:12.

Ol samting ya long saed blong Baebol, ?oli tru? ?Hem i blong bifo nomo, o advaes blong hem i gud yet mo i wok gud bitim ol narafala advaes? ?Hem i wan buk we i laef? Wajtaoa ya mo sam narafala we oli kam biaen, bambae oli givhan long yu blong yu faenem ansa long ol kwestin ya.