Go long ol haf insaed long hem

Go long lis blong ol haf

Tijim Yangfala Blong i Mekem Wok Blong Jehova

Tijim Yangfala Blong i Mekem Wok Blong Jehova

“Jisas i stap gruap moa long bodi blong hem mo long waes blong hem tu. Mo oltaem God i glad tumas long hem, mo ol man tu oli glad tumas long hem.”LUK 2:52.

SINGSING: 41, 89

1, 2. (1) ?Sam papa mo mama oli wari long wanem? (2) ?Wanem ol gudfala samting we pikinini i save mekem taem hem i kam yangfala?

OL PAPA mo mama oli glad tumas taem pikinini blong olgeta i baptaes. Berenis i gat fo pikinini, mo olgeta evriwan oli baptaes bifo we oli gat 14 yia. Hem i talem se: “Samting ya i tajem hat blong mitufala bigwan. Mitufala i glad se ol pikinini oli wantem mekem wok blong Jehova. Be mitufala i save tu se bambae i gat plante samting we i traem ol yangfala blong mitufala.” Maet yu tu yu stap wari long samting ya taem pikinini blong yu i kam yangfala.

2 Wan man we i stadi long tingting blong ol pikinini i talem se, taem pikinini i kam yangfala, hemia wan taem we i had long papa mo mama mo pikinini tu. Be ol papa mo mama oli no mas ting se ol yangfala blong olgeta oli krangke, no oli gat fasin blong pikinini nomo. Hem i talem se, ol yangfala oli glad blong traem ol niufala samting. Mo tu, oli gat strong filing, mo oli mas spenem taem wetem ol fren. Taswe, taem oli yangfala yet, oli save fren moa wetem Jehova, olsem Jisas i mekem. (Ridim Luk 2:52.) Mo tu, oli  save kam gud moa long wok blong prij, mo oli save wokem strong tingting blong wantem mekem moa long wok blong God. Mo oli save mekem ol prapa desisen blong olgeta, olsem desisen ya blong baptaes mo obei long Jehova. ?Be yu save mekem wanem blong tijim yangfala blong yu blong i mekem wok blong Jehova? Yu save folem fasin blong Jisas, taem hem i tijim ol disaepol blong hem. Hem i lavem olgeta, hem i gat tingting daon, mo hem i kasem save gud olgeta.

LAVEM YANGFALA BLONG YU

3. ?Ol aposol oli save olsem wanem se Jisas i fren blong olgeta?

3 Jisas i no Masta nomo blong ol aposol blong hem, be hem i fren blong olgeta tu. (Ridim Jon 15:15.) Long taem blong Baebol, wan masta i no stap talemaot ol tingting mo filing blong hem long ol man blong wok blong hem. Be Jisas i no mekem olsem we ol aposol oli man blong wok blong hem. Hem i lavem olgeta mo hem i spenem taem wetem olgeta. Hem i glad blong talemaot tingting mo filing blong hem long olgeta. Mo hem i lesin gud taem oli talemaot tingting mo filing blong olgeta. (Mak 6:30-32) Gudfala fasin ya blong storian i mekem se Jisas mo ol aposol oli fren gud, mo samting ya i rerem olgeta from wok we bambae oli mekem.

4. Papa mo mama, ?yutufala i save mekem wanem blong kam fren blong pikinini blong yutufala? (Yu luk pija long stat blong stadi.)

4 Nating se yu gat paoa antap long pikinini blong yu, be yu save kam fren blong hem tu. Ol fren oli stap joen wanples. Maet yu save katem ol aoa blong wok blong yu no sam narafala samting we yu mekem, blong yu spenem moa taem wetem pikinini blong yu. Hemia wan samting we yu mas tokbaot wetem Jehova long prea, mo tingting gud long hem. Ol fren oli laekem ol semfala samting. Taswe yu mas faenemaot wanem miusik, mo muvi, mo spot we yangfala blong yu i laekem, nao yu tu yu traem laekem ol samting ya. Ilaria, we i stap long Itali, i talem se: “Papa mo mama blong mi, tufala i laekem miusik we mi mi lesin long hem. Papa blong mi i kam besfren blong mi. Mi harem se mi save tokbaot evri samting long hem, nating se i wan samting we i no isi blong talemaot long narafala.” Taem yu kam fren blong pikinini blong yu mo yu givhan long hem blong i kam fren blong Jehova, yu no lusum paoa blong yu, olsem papa no mama blong hem. (Ol Sam 25:14) Pikinini blong yu bambae i luk se yu lavem hem mo yu respektem hem, nao bambae i isi blong hem i tokbaot evri samting wetem yu.

5. ?Olsem wanem ol disaepol blong Jisas oli save harem gud tumas?

5 Jisas i save se sipos ol disaepol blong hem oli glad blong mekem wok blong Jehova mo oli bisi long wok blong talemaot gud nius, bambae oli harem gud tumas. Taswe hem i pulum olgeta blong oli wok had long wok blong prij, mo i promes se bambae hem i givhan long olgeta.—Matiu 28:19, 20.

6, 7. ?Olsem wanem yu soemaot se yu lavem pikinini blong yu, taem yu tijim hem blong folem wan gudfala program?

6 Yu wantem se pikinini blong yu i stap klosap long Jehova. Mo Jehova i wantem se yu tijim pikinini mo yu stretem hem. Hem i givim raet long yu blong yu mekem olsem. (Efesas 6:4) Taswe yu mas mekem samting ya oltaem. Yu traem tingbaot: Oltaem yu meksua se pikinini blong yu i go long skul, from we yu save se samting ya i impoten mo yu wantem se hem i lanem ol niufala samting. Long sem fasin, yu meksua se hem i go long ol miting, mo ol asembli, mo hem i joen long famle wosip. Tijing ya  we hem i kasem long Jehova i save sevem laef blong hem. Taswe yu givhan long hem blong i harem gud long ol tijing ya we Jehova i givim, mo blong i kasem save se tijing ya i save mekem hem i waes. (Ol Proveb 24:14) Mo tu, yu tijim pikinini blong i prij oltaem. Taem yu givhan long hem blong i harem gud blong tijim narafala long Tok blong God, yu stap folem fasin blong Jisas.

7 ?Wan gudfala program blong stadi, go long miting, mo prij, i save givhan olsem wanem long ol yangfala? Erin, we i stap long Saot Afrika, i talem se: “Plante taem, mifala ol pikinini i komplen from we mifala i no wantem mekem Baebol stadi, go long miting mo long wok blong prij. Samtaem mifala i mekem sam samting blong traem spolem famle stadi, be papa mo mama blong mifala i no stop.” Erin i glad se papa mo mama blong hem i givhan long hem blong i luksave se ol samting ya oli impoten. Naoia, sipos hem i mestem wan miting no i no save go prij, hem i wantem tumas se kwiktaem nomo bambae hem i folem program blong hem bakegen.

YU MAS GAT TINGTING DAON

8. (1) ?Jisas i soemaot olsem wanem se hem i gat tingting daon? (2) ?Tingting daon blong Jisas i givhan olsem wanem long ol disaepol blong hem?

8 Nating se Jisas i stret gud olgeta, be hem i gat tingting daon. Hem i talem long ol disaepol blong hem se hem i nidim help blong Jehova. (Ridim Jon 5:19.) ?Olsem wanem? ?Taem ol disaepol oli harem samting ya, oli no moa respektem hem? Si. Taem oli luk we hem i dipen long Jehova, oli trastem hem moa. Biaen, oli folem eksampol blong hem blong gat tingting daon.—Ol Wok 3:12, 13, 16.

Taem yu talemaot mastik blong yu, pikinini i save respektem yu

9. Taem yumi talemaot ol mastik mo yumi talem sore, ?olsem wanem yumi givhan long yangfala blong yumi?

9 Yumi no stret gud olgeta olsem Jisas. Yumi save mestem samtaem. Taswe yumi mas gat tingting daon. Yumi mas luksave se i gat plante samting we yumi no naf blong mekem, mo yumi talemaot ol mastik blong yumi. (1 Jon 1:8) Nao yangfala blong yumi bambae i lanem blong talemaot ol mastik blong hem, mo bambae hem i respektem yumi moa. ?Olsem wanem? ?Yu yu respektem moa wan bos we i talemaot mastik blong hem, no wan bos we i neva talem se hem i sore? Rosmeri, we i gat tri pikinini, i talem se hem mo man blong hem tufala i talemaot ol mastik blong tufala. Samting ya i mekem se taem ol pikinini oli gat wan problem, oli talemaot long tufala. Hem i talem tu se: “Mitufala i tijim ol pikinini weples blong faenem ansa long ol problem blong olgeta. Taem oli nidim help, mitufala i soemaot ol save blong Baebol long ol buk blong yumi, mo mitufala i prea wetem olgeta.”

10. ?Taem Jisas i talem long ol disaepol samting we oli mas mekem, ?olsem wanem hem i soemaot tingting daon?

10 Jisas i gat raet blong talem long ol disaepol blong hem samting we oli mas mekem. Be from we hem i gat tingting daon, plante taem hem i eksplenem from wanem oli mas mekem. Yu traem tingbaot. Hem i no talem nomo se oli mas lukaot Kingdom mo stret fasin blong God fastaem. Be hem i talem tu se: “Biaen hem i save givim olgeta [narafala] samting ya tu long yufala.” Mo tu, taem Jisas i talem long olgeta se bambae oli no jajem narafala, hem i eksplenem se: “I nogud God i jajem yufala. Fasin we  yufala i folem blong jajem man, hemia sem fasin nomo we God bambae i folem blong jajem yufala.”—Matiu 6:31 kasem 7:2.

11. Taem yu eksplenem risen blong wan rul no wan desisen, ?yu givhan olsem wanem long yangfala blong yu?

11 Yu jusum wan stret taem blong eksplenem long yangfala blong yu from wanem yu putum wan rul no yu mekem wan desisen. Taem hem i save from wanem yu mekem, ating bambae hem i wantem obei long yu. Bari, we i lukaot long ol fo pikinini blong hem, i talem se: “Taem yu talem long ol yangfala from wanem yu mekem samting, oli trastem yu.” Bambae oli luksave se yu no putum rul ya no mekem desisen ya from we yu gat paoa antap long olgeta nomo, be from we yu gat gudfala risen. Mo tu, yu mas tingbaot se ol yangfala oli no moa ol smol pikinini. Oli stap lanem blong yusum tingting blong olgeta, mo oli wantem mekem prapa desisen blong olgeta. Bari i talem se: “Ol yangfala oli mas lanem blong yusum tingting blong olgeta blong mekem ol gudfala desisen, i bitim we oli folem filing blong olgeta.” (Ol Sam 119:34) Taswe yu mas gat tingting daon mo eksplenem long yangfala blong yu from wanem yu mekem wan desisen. Long rod ya, bambae hem i lanem blong mekem prapa desisen blong hem. Mo bambae hem i save se yu respektem hem, mo yu luksave se hem i no moa wan pikinini.

YU KASEM SAVE GUD YANGFALA

12. From we Jisas i kasem save gud Pita, ?hem i givhan long hem olsem wanem?

12 Jisas i kasem save gud ol disaepol blong hem, mo hem i save samting we bambae i givhan long olgeta. Yu traem tingbaot taem ya we Jisas i talem long ol disaepol se bambae hem i ded. Pita i talem long Jisas se samting ya i no save hapen, God i mas blokem. Jisas i save se Pita i lavem hem, be hem i save tu se tingting blong Pita i no stret. ?Jisas i givhan olsem wanem long Pita mo ol narafala disaepol? Fastaem, hem i stretem Pita. Biaen, hem i tokbaot man we i no wantem obei long Jehova taem i had blong mekem olsem, mo i eksplenem samting we i save kamaot from. Jisas i talem tu se Jehova bambae i givim pei long olgeta we oli no tingbaot olgeta nomo. (Matiu 16:21-27) Pita i kasem save long samting we Jisas i talem.—1 Pita 2:20, 21.

13, 14. (1) ?Wanem samting i save soemaot se yangfala blong yu i mas mekem bilif blong hem i strong? (2) ?Olsem wanem blong faenemaot samting we yu mas mekem blong givhan long yangfala?

13 I gud yu prea long Jehova blong i givhan long yu blong yu kasem save long yangfala blong yu, nao bambae yu save samting we yu mas mekem blong givhan long hem. (Ol Sam 32:8) Maet yu luk se hem i no glad olsem bifo, no maet hem i tok daonem ol brata mo sista. Maet yu harem se hem i stap haedem wan samting. Be yu no mas kwik blong ting se hem i stap mekem wan nogud samting long fasin haed. * Mo tu, yu no mas satem ae blong yu long problem ya mo ting se bambae i lus hem wan. Maet yu mas givhan long hem blong i mekem bilif blong hem i strong.

Yu givhan long yangfala blong yu, blong i faenem ol gudfala fren long kongregesen (Yu luk haf 14)

14 Blong faenemaot olsem wanem blong givhan long yangfala blong yu, yu askem kwestin long hem long kaen fasin mo wetem respek. Hemia i olsem we yu stap pulum wota long wel. Sipos yu pulum kwik tumas, bambae yu no kasem plante wota olsem yu wantem. Long sem fasin, sipos yu traem fosem yangfala blong yu blong i toktok taem yu askem kwestin, bambae yu no faenemaot evri samting we i stap long  tingting blong hem. (Ridim Ol Proveb 20:5.) Ilaria i tingbaot taem we hem i yangfala mo i wantem spenem plante taem wetem ol fren blong hem long skul. Be hem i save se samting ya i no stret. Papa mo mama blong hem, tufala i luksave se hem i stap wari. Ilaria i talem se: “Wan naet, tufala i talem se tufala i luk we mi harem nogud smol, mo tufala i askem long mi sipos wan samting i rong. Wantaem nomo mi krae, mi eksplenem from wanem mi harem nogud, mo mi askem tufala blong givhan long mi. Tufala i putum han blong tufala i goraon long mi mo talem long mi se tufala i kasem save, nao tufala i promes blong givhan long mi.” Kwiktaem nomo, papa mo mama blong Ilaria i givhan long hem blong i faenem ol gudfala fren long kongregesen.

Taem yu luk ol gudfala samting we yangfala i mekem, yu talem ol gudfala toktok from

15. ?Wanem narafala samting i soemaot se Jisas i kasem save gud ol disaepol blong hem?

15 Jisas i soemaot se hem i kasem save gud ol disaepol blong hem taem hem i luksave ol gudfala fasin blong olgeta. Wan eksampol, hemia taem Nataniel i harem se Jisas i blong Nasaret. Hem i talem se: “?Wanem? ?Yu ting se wan gudfala samting i save kamaot long Nasaret?” (Jon 1:46) Sipos yu yu stap long taem ya, ?bambae yu ting se Nataniel i stap tok agensem Jisas, no i no gat bilif? Jisas i no tingting olsem. Hem i kasem save se Nataniel i wan man we i no save haedem wan samting, nao hem i talem se: “!Olgeta! !Man ya i wan prapa laen blong Isrel ya! !Hem i no save giaman!” (Jon 1:47) Jisas i save samting we i stap long hat blong man. Taem hem i luk long hat blong man, hem i lukaot ol gudfala fasin blong hem.

16. ?Yu save givhan olsem wanem long yangfala blong yu, blong i kam gud moa?

16 I tru se yu yu no olsem Jisas we i save luk ol samting long hat blong man. Nating se i olsem, yu save kasem save gud yangfala blong yu. Jehova i save givhan long yu blong yu luksave ol gudfala fasin blong hem. Nating se samtaem hem i save mekem yu yu harem nogud, be yu no mas talem mo yu no mas tingting tu, se hem i wan rabis man no wan man blong mekem trabol nomo. Be yu talem long hem se yu luksave ol gudfala fasin blong hem, mo yu  sua se hem i wantem mekem samting we i stret. Taem yu luk ol samting we hem i mekem blong kam gud moa, yu talem ol gudfala toktok from. Maet yu save givim moa wok long hem. Hemia bambae i givhan long hem blong i traehad blong kam gud moa long ol gudfala fasin. Jisas i mekem olsem long ol disaepol blong hem. Wan yia haf afta we hem i mitim Nataniel (we narafala nem blong hem Batolomiu), hem i givim wan impoten wok long hem. Hem i jusumaot Nataniel blong i kam wan aposol, mo Nataniel i mekem gud wok ya. (Luk 6:13, 14; Ol Wok 1:13, 14) Taswe i nogud yu mekem yangfala blong yu i harem se hem i no save mekem wan gudfala samting. I moa gud yu talem ol gudfala toktok long hem, mo yu leftemap tingting blong hem. Yu mekem hem i harem se hem i naf blong mekem yu mo Jehova i glad, mo hem i save yusum ol gudfala fasin blong hem long wok blong Jehova.

BAMBAE YU GLAD TUMAS SIPOS YU TIJIM GUD PIKININI BLONG YU

17, 18. Sipos yu gohed blong tijim yangfala blong yu long wok blong Jehova, ?wanem i save kamaot?

17 Maet yu harem olsem aposol Pol. Hem i wari plante long olgeta we oli olsem ol pikinini blong hem, hemia olgeta we hem i givhan long olgeta blong oli save Jehova. Hem i lavem olgeta tumas, taswe hem i harem nogud taem hem i tingbaot se maet sam long olgeta oli no gohed blong mekem wok blong Jehova. (1 Korin 4:15; 2 Korin 2:4) Vikta, we i lukaot long tri pikinini blong hem, i talem se: “Taem pikinini i yangfala, i no isi. I tru se i gat sam taem blong trabol, be i gat plante gudfala taem tu. Jehova i givhan long mitufala blong mitufala i fren gud wetem ol pikinini blong mitufala.”

18 Ol papa mo mama, yufala i wok had blong tijim ol pikinini blong yufala, from we yufala i lavem olgeta tumas. Yufala i no mas lego. Yufala i traem tingbaot olsem wanem bambae yufala i glad, taem pikinini i mekem desisen blong mekem wok blong Jehova, mo i gohed gud.—3 Jon 4.

^ par. 13 I gud ol papa mo mama oli ridim Questions Young People Ask—Answers That Work, Buk 1, pej 317, (Franis mo Inglis) mo Wekap! blong Jenuware-Maj 1994, pej 20.