Go long ol haf insaed long hem

Go long lis blong ol haf

Parabol Blong Talen Mane i Tijim Yumi

Parabol Blong Talen Mane i Tijim Yumi

“Long wan, hem i givim faef milian vatu [“faef talen mane,” NW] mo long narawan i givim tu milian vatu [tu talen], mo long narawan bakegen i givim wan milian vatu [wan talen].”MATIU 25:15.

1, 2. ?Jisas i talem parabol blong talen mane blong soemaot wanem?

JISAS i talem parabol blong talen mane blong soemaot long ol tabu man blong hem wanem wok we oli mas mekem. Be parabol ya i stret long olgeta disaepol blong Jisas evriwan. Taswe, nating se yumi wantem laef long heven no long wol, be yumi mas kasem save long mining blong parabol ya.

2 ?Wetaem Jisas i talem parabol ya? Hemia taem hem i talemaot saen we bambae i soemaot se hem i King finis mo se en i klosap. (Matiu 24:3) Parabol blong talen mane i joen wetem saen ya mo i stap kamtru long taem blong yumi.

3. Ol parabol long Matiu japta 24 mo 25, ?oli tijim yumi long wanem?

3 Taem Jisas i talem parabol ya, hem i talem tri narafala parabol bakegen we trifala i joen wetem saen we i soemaot se en i klosap. Olgeta parabol ya evriwan oli tokbaot sam fasin we ol man blong hem oli mas gat. Ol parabol ya oli stap long Matiu 24:45 go kasem Matiu 25:46. Fas parabol i  tokbaot slef we i stret mo waes, hemia smol grup blong ol tabu Kristin we oli gat wok blong tijim ol man blong Jehova. Olgeta ya oli mas stret mo waes. * Nekis parabol i tokbaot ten yang gel. Long parabol ya, Jisas i givim woning long ol tabu Kristin se oli mas rere mo oli mas lukaot gud from we oli no save stret taem we hem bambae i kamtru. * Nekis parabol i tokbaot talen mane. Jisas i wantem tijim ol tabu Kristin se oli mas wok strong long Kristin wok blong olgeta. Long nekis parabol blong sipsip mo nani, Jisas i tokbaot olgeta we bambae oli laef long niufala wol. Hem i soemaot se olgeta oli mas sapotem gud ol brata blong Kraes mo oli mas givhan long olgeta. * Long stadi ya, bambae yumi tokbaot parabol blong talen mane.

MASTA I GIVIM BIGFALA MANE LONG OL SLEF BLONG HEM

4, 5. Long parabol ya, ?masta i minim hu? ?Wan talen i olsem wanem?

4 Ridim Matiu 25:14-30. Long parabol blong talen mane, Jisas i tokbaot wan masta we i wokbaot i go long narafala kantri. Long wan narafala parabol we klosap i sem mak, Jisas i tokbaot wan man we i go long narafala kantri blong oli putumap hem i kam king. * (Luk 19:12) Plante yia finis, ol buk blong yumi oli talem se masta ya i minim Jisas, we i go long heven long yia 33. Be Jisas i no kam king wantaem. Hem i wet kasem yia 1914. Long taem ya, God i “mekem ol enemi blong hem oli stap aninit long paoa blong hem.”—Hibrus 10:12, 13.

5 Jisas i talem se masta ya i gat eit talen. Hemia i wan bigfala mane. * Bifo we hem i gowe, hem i putum mane ya long han blong trifala slef blong hem. Hem i wantem se trifala i mekem bisnes blong kasem moa mane. Olsem masta ya, Jisas i gat wan samting we i sas we i sas. ?Wanem samting ya? Hemia wok we hem i mekem taem i stap long wol.

‘Yufala i traem luk ol kakae long garen. Naoia lif blong olgeta i drae finis, i taem blong go tekem’

6, 7. ?Talen mane i minim wanem?

6 Jisas i tinghae long wok blong prij. Frut blong wok ya, hemia se plante man oli kam disaepol blong hem. (Ridim Luk 4:43.) Be Jisas i save se i gat plante moa wok i stap yet, mo plante moa man bambae oli bilif long gud nius. Hem i talem long ol disaepol blong hem se: “Yufala i traem lukluk long ol kakae long garen. Naoia lif blong olgeta i drae finis, i taem blong go tekem kakae.” (Jon 4: 35-38) Wan gudfala man blong wokem garen bambae i no ronwe long garen blong hem long taem blong tekem kakae. Jisas i no save mekem samting ya tu. Taswe, taem hem i rere blong gobak long heven, hem i givim wok long ol man blong hem mo i talem se: “Yufala i mas go long ol man long olgeta ples long wol, blong pulum olgeta oli kam man blong mi.” (Matiu 28:18-20) Long taem ya, Jisas i givim samting we i sas we i sas long olgeta, hemia impoten wok ya blong prij.—2 Korin 4:7.

7 Olsem masta we i givim mane long trifala slef blong hem, Jisas i givim wok long ol man blong hem se oli mas pulum ol narafala man oli kam disaepol. (Matiu 25:14) Taswe, talen mane i minim wok blong prij mo wok blong tijim ol man blong oli kam disaepol.

8. Nating se masta i no givim sem mane long evri slef, ?be hem i wantem se oli mekem wanem?

8 Jisas i talem se masta i givim faef talen mane long fas slef, tu talen long seken slef, mo wan talen long namba tri slef. (Matiu 25:15) Nating se masta i no givim sem mane long evri slef, be hem i wantem se evriwan oli mas mekem bes blong olgeta blong kasem moa mane. Long sem fasin, Jisas i wantem se ol tabu man blong hem oli mekem bes blong olgeta long wok blong prij. (Matiu 22:37; Kolosi 3:23) Long Pentekos long yia 33, ol man blong Jisas oli statem  wok ya blong pulum ol man blong olgeta kantri oli kam disaepol. Taem yumi ridim buk blong Ol Wok, yumi luksave se oli mekem bigfala wok. *Ol Wok 6:7; 12:24; 19:20.

OL SLEF OLI YUSUM TALEN MANE LONG TAEM BLONG EN

9. (1) ?Fas mo seken slef, tufala i mekem wanem long mane blong masta? ?Yumi lanem wanem? (2) Olgeta we oli wantem laef olwe long wol ya, ?oli mas mekem wanem?

9 Fas mo seken slef, tufala i yusum gud mane blong masta blong olgeta. Tufala ya i minim ol tabu Kristin long taem blong en, we oli mekem bes blong olgeta long wok blong prij, antap moa, afta long yia 1919. Long parabol ya, mane we masta i givim long tufala slef i no sem mak. Be hemia i no min se i gat tu grup blong ol tabu Kristin. Tufala slef ya tugeta i wok had, mo tufala i dabolem mane we masta i givim. ?Olsem wanem? ?Ol tabu Kristin nomo oli mas wok had blong prij mo tijim ol man? Nogat. Parabol blong sipsip mo nani i soemaot se olgeta we oli wantem laef olwe long wol ya oli mas givhan long ol tabu Kristin blong prij, mo oli mas sapotem gud olgeta. Oli harem se i wan bigfala ona blong givhan long ol tabu Kristin. Yes, ol man blong Jehova oli “wan kampani nomo.” Olgeta evriwan oli wok had blong prij mo blong tijim ol man blong oli kam disaepol.—Jon 10:16.

10. ?Wanem haf blong saen we i soemaot se en i klosap?

10 Jisas i wantem se olgeta man blong hem oli wok had blong pulum ol man oli kam disaepol. Hemia nao samting we ol man blong Jisas bifo oli mekem. Long taem ya blong en, we parabol blong talen mane i stap kamtru, ?ol man blong Jisas oli stap mekem wok ya? Yes. !Tede, bitim olgeta taem bifo, ol  man oli stap harem gud nius mo oli stap kam disaepol! Ol man blong Jisas oli wok had, mekem se plante taosen man oli baptaes evri yia, mo oli joen long wok blong prij. Wok blong prij mo gudfala samting we i kamaot from, i pruvum se wok ya i wan impoten haf blong saen we i soemaot se en i klosap. !Tru ya, Jisas i glad long ol man blong wok blong hem!

Jisas i givim wan sas samting long ol man blong hem, hemia wok blong prij (Yu luk haf 10)

?MASTA BAMBAE I KAM WETAEM?

11. ?Yumi save olsem wanem se Jisas bambae i kam long taem blong bigfala trabol?

11 Jisas i talem se: ‘Nao plante yia i pas, masta blong ol man ya i kambak, mo hem i wantem jekemap mane ya we i bin givim long olgeta.’ (Matiu 25:19) Masta Jisas bambae i mekem samting ya klosap long en blong bigfala trabol. ?Yumi save samting ya olsem wanem? Long profet tok blong Matiu japta 24 mo 25, Jisas i talem plante taem se bambae hem i kam. Taem hem i talem se ol man bambae “oli luk mi, mi Pikinini blong Man, mi kam long klaod long skae,” hem i stap tokbaot taem blong bigfala trabol, taem ya we bambae hem i kam blong jajem ol man. Mo tu, hem i givim woning long ol man blong hem we oli laef long taem blong en, se oli mas lukaot gud, i se: “Yufala i no save wanem dei we mi Masta blong yufala, bambae mi kam.” Hem i talem bakegen se: “Mi Pikinini blong man, bambae mi kam long taem we yufala i no tingbaot.” (Matiu 24:30, 42, 44, NW) Taswe, taem Jisas i talem se bambae hem i kam blong jekemap bisnes blong hem, hem i stap tokbaot taem ya we bambae hem i kam blong jajem olgeta man mo blong spolem wol blong Setan. *

12, 13. (1) ?Masta i talem wanem long tufala slef blong hem, mo from wanem? (2) ?Wetaem God bambae i putum las mak long ol tabu Kristin? (Yu luk bokis ya “ Taem Oli Ded Oli Kasem Pei.”) (3) Olgeta we oli givhan long ol tabu Kristin, ?bambae oli kasem wanem blesing?

12 Taem masta i kambak, hem i luk se slef we i kasem faef talen mane i winim faef moa bakegen. Mo slef we i kasem tu talen mane i winim tu moa bakegen. Masta i talem long wanwan long tufala, se: ‘!Yu yu mekem wan  gudfala wok! From we yu bin lukaot gud long smol bisnes ya we mi putum long han blong yu, bambae mi putumap yu blong lukaot long plante bisnes.’ (Matiu 25:21, 23) Taem Masta Jisas i kam long fiuja, ?bambae hem i mekem wanem?

13 Bifo long bigfala trabol, God bambae i putum las mak long ol tabu Kristin we oli stap gohed blong wok had long wol ya. (Revelesen 7:1-3) Mo bifo we Amagedon i stat, Jisas bambae i tekem olgeta oli go antap long heven. ?Olsem wanem long olgeta we oli wantem laef long wol, mo oli bin givhan long ol tabu Kristin long wok blong prij? Bambae Jisas i luk olgeta olsem ol sipsip. Mo bambae hem i givim laef long olgeta long wol, aninit long rul blong Kingdom blong God.—Matiu 25:34.

RABIS SLEF WE I LES TUMAS

14, 15. ?Jisas i min se plante tabu Kristin bambae oli kam rabis mo oli les tumas? Plis yu eksplenem.

14 Long parabol ya, namba tri slef i kasem wan talen mane. Slef ya i no yusum mane ya blong mekem bisnes, mo hem i no putum long bang blong winim smol intres. Be hem i girap i go berem. Masta i talem se slef ya i rabis mo i les tumas. Nao hem i tekemaot talen mane long hem mo i givim long fas slef. Afta, hem i talem long ol man blong hem blong oli holem slef ya, oli ‘sakem hem i go afsaed long tudak.’ Long ples ya, bambae hem i harem nogud, i kakae tut blong hem.—Matiu 25:24-30; Luk 19:22, 23.

15 Taem Jisas i talem se wan long ol  trifala slef ya i rabis mo i les tumas, hem i no min se wan long tri tabu Kristin bambae i kam nogud olsem slef ya. Yumi save samting ya taem yumi skelem parabol ya wetem tu narawan. Long parabol blong slef we i stret mo waes, Jisas i tokbaot wan rabis slef we i stap kilim ol narafala slef. Jisas i no min se olgeta long grup ya blong slef we i stret mo waes bambae oli kam nogud. Be hem i stap givim woning long ol tabu Kristin se oli no mas kam olsem rabis slef ya. Long parabol blong ten yang gel, Jisas i talem se faef long olgeta oli no waes. Hem i no min se haf blong ol tabu Kristin bambae oli no waes. Be Jisas i stap givim woning se samting ya i save hapen sipos oli no rere mo oli no lukaot gud. * Long sem fasin, long parabol blong talen mane, Jisas i no min se plante tabu Kristin long ol las dei bambae oli kam nogud mo oli les. Hem i givim woning long ol tabu Kristin se oli no mas kam olsem rabis slef ya, be oli mas gohed blong wok strong long wok blong prij.—Matiu 25:16.

Jisas bambae i givim praes long ol disaepol we oli wok strong blong prij

16. (1) ?Yumi lanem wanem tufala samting long parabol blong talen mane? (2) ?Long stadi ya, yumi kasem wanem niufala save long parabol ya? (Yu luk bokis ya “ ?Parabol Blong Talen Mane i Minim Wanem?”)

16 ?Yumi lanem wanem tufala samting long parabol blong talen mane? Faswan se, Jisas i givim wan sas presen long ol tabu man blong hem, hemia wok blong prij mo blong tijim ol man blong oli kam disaepol. Sekenwan se, Jisas i wantem se yumi evriwan yumi wok strong long wok blong prij. Sipos yumi stanap strong blong mekem wok ya, mo yumi gohed blong obei gud long Jisas, yumi save gat strong tingting se bambae yumi kasem praes.—Matiu 25:21, 23, 34.

^ par. 3 Wajtaoa blong 15 Julae 2013, pej 21-22, haf 8-10, i tokbaot slef we i stret mo waes.

^ par. 3 Long stadi las wik, yumi tokbaot parabol blong ten yang gel.

^ par. 3 Wajtaoa blong 15 Oktoba 1995, pej 23-28, i tokbaot parabol blong sipsip mo nani, mo stadi blong nekis wik bambae i tokbaot bakegen.

^ par. 5 Long taem blong Jisas, wan talen hem i pei blong wan wokman we i wok 20 yia.

^ par. 8 Smoltaem afta we ol aposol oli ded, plante man long ol kongregesen oli lego trutok mo oli agens. Blong plante handred yia, i gat smol man nomo oli stap prij. Be long “taem blong tekemaot kakae long garen,” hemia long taem blong en, wok blong prij i stat bakegen. (Matiu 13:24-30, 36-43) Yu luk Wajtaoa blong 15 Julae 2013, pej 9-14.

^ par. 11 Yu luk Wajtaoa blong 15 Julae 2013, pej 7-8 haf 14-18.

^ par. 15 Yu luk stadi blong las wik, “?Yu Yu Stap ‘Lukaot Gud’?” long haf 13.