Go long ol haf insaed long hem

Go long lis blong ol haf

‘Putum Tingting Blong Yu Long Ol Samting Blong Heven’

‘Putum Tingting Blong Yu Long Ol Samting Blong Heven’

“Yufala i mas putum tingting blong yufala long ol samting blong heven, yufala i no moa tingbaot ol samting blong wol.KOLOSI 3:2.

1, 2. (1) ?Wanem trabol i kasem kongregesen blong Kolosi bifo? (2) ?Wanem advaes i givhan long ol brata ya blong oli stap fren gud wetem God?

!LONG taem blong ol fas Kristin, i gat wan trabol long kongregesen blong Kolosi we i save mekem ol brata oli seraot! Sam brata oli stap talem se evriwan oli mas obei long Loa we God i givim long Moses. Sam narafala oli stap talem se i rong blong harem gud long ol gudfala samting long laef. Pol i givim woning long olgeta se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long ol devel we oli stap olbaot long wol ya fastaem, i no kamaot long Kraes.”—Kol. 2:8.

2 Sipos ol tabu Kristin ya oli folem tingting blong ol man, oli sakemaot janis blong stap olsem ol pikinini blong God. (Kol. 2:20-23) Pol i soemaot samting we oli mas mekem blong oli stap fren gud wetem God, i se: “Yufala i mas putum tingting blong yufala long ol samting blong heven, yufala i no moa tingbaot ol samting blong wol.” (Kol. 3:2) Yes, oltaem ol Kristin ya oli mas  putum tingting blong olgeta long gudfala laef we bambae oli kasem long heven.—Kol. 1:4, 5.

3. (1) ?Ol tabu Kristin oli gat wanem janis? (2) ?Wanem ol kwestin we bambae yumi tokbaot long stadi ya?

3 Tede tu, ol tabu Kristin oli putum tingting blong olgeta long Kingdom blong God, mo long janis we oli gat blong go long heven blong “joen long Kraes.” (Rom 8:14-17) ?Be olsem wanem long ol Kristin we bambae oli laef long wol? ?Ol tok blong Pol i stret long olgeta tu? ?Oli mas mekem wanem blong putum tingting blong olgeta long “ol samting blong heven”? (Jon 10:16) Oltaem Ebraham mo Moses tufala i putum tingting blong tufala long ol samting blong heven, mo tufala i mekem olsem long taem blong trabol tu. ?Yumi mas mekem wanem blong folem eksampol blong tufala?

?PUTUM TINGTING LONG OL SAMTING BLONG HEVEN, I MINIM WANEM?

4. ?Ol Kristin we oli wantem laef olwe long wol, oli mas mekem wanem blong putum tingting blong olgeta long ol samting blong heven?

4 Ol Kristin we oli gat janis blong laef long wol ya, olgeta tu oli mas putum tingting blong olgeta long ol samting blong heven. Oli mekem olsem taem oli putum Jehova mo Kingdom blong hem i stap fastaem long ol narafala samting long laef blong olgeta. (Luk 10:25-27) Hemia nao samting we Kraes i mekem, mo yumi tu yumi mas mekem. (1 Pita 2:21) Long taem blong ol fas Kristin, i gat plante giaman tingting i stap goraon, i gat plante waes blong wol, mo ol man oli stap ronem ol sas samting. Tede i sem mak nomo. (Ridim 2 Korin 10:5.) Yumi mas mekem olsem Jisas, yumi mas blokem enikaen samting we i mekem se yumi no moa fren gud wetem Jehova.

?Yu yu gat tingting olsem ol man blong wol, we oli laekem mane tumas mo oli ronem ol sas samting?

5. ?Wanem ol kwestin we yumi wanwan i mas askem?

5 ?Olsem wanem? ?Yu yu gat tingting olsem ol man blong wol, we oli laekem mane tumas mo oli ronem ol sas samting? Wanem we yumi tingbaot mo wanem we yumi mekem, i soemaot samting we yumi laekem tumas. Jisas i talem se: “Long weples we ol gudgudfala samting blong yufala i stap long hem, be oltaem tingting blong yufala tu i stap long ples ya.” (Mat. 6:21) Yumi wanwan i mas faenemaot wanem samting nao i moa impoten long yumi. I gud yumi askem se: ‘?Mi mi stap tingting tumas long mane? ?Mi mi stap wantem kasem wan wok we i moa gud? ?Mi mi stap traehad blong kasem plante samting we mi ting se bambae oli mekem laef blong mi i isi moa? ?No mi stap traem blong mekem laef blong mi i no moa fasfas, blong mi save fren moa wetem Jehova?’ (Mat. 6:22) Jisas i talem se sipos yumi putum tingting blong yumi long ‘ol gudgudfala samting blong wol ya,’ bambae yumi no moa fren gud wetem Jehova.—Mat. 6:19, 20, 24.

Wan rod nomo blong winim ol slak fasin blong yumi, hemia blong putum tingting blong yumi long ol samting blong heven

6. ?Wanem rod blong winim ol slak fasin blong yumi?

6 Yumi evriwan i sinman, taswe i isi nomo blong mekem samting we i no stret. (Ridim Rom 7:21-25.) Sipos yumi no letem tabu spirit i lidim yumi, maet bambae yumi brekem loa blong God. Yumi save foldaon long ol samting olsem “ol rabis lafet,” ‘dring bitim mak,’ slip olbaot, mo “ol krangke fasin.” (Rom 13:12, 13) Oltaem yumi stap faet agensem ol slak fasin blong yumi. Wan rod nomo blong winim faet ya, hemia blong putum tingting blong yumi long ol samting  blong heven. Taswe, yumi mas traehad. Pol i talem se hem i stap fosem bodi blong hem blong i mekem samting we i stret, olsem wan masta we i fosem slef blong hem. (1 Kor. 9:27) Yes, yumi wanwan i mas mekem i strong long yumi bakegen. Bambae yumi tokbaot 2 gudfala man blong God bifo, we tufala i traehad oltaem blong mekem God i glad.—Hib. 11:6.

EBRAHAM I ‘BILIF STRONG LONG JEHOVA’

7, 8. (1) ?Wanem ol trabol we Ebraham mo Sera i kasem? (2) ?Oltaem Ebraham i tingbaot wanem?

7 Taem Jehova i askem long Ebraham blong i tekem famle blong hem i go long kantri blong Kenan, Ebraham i glad blong obei. From we Ebraham i trastem God mo i obei, Jehova i mekem wan kontrak wetem hem, i se: “Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we plante. Bambae oli kam wan strongfala laen. Mi bambae mi blesem yu.” (Jen. 12:2) Plante yia i pas, be Ebraham mo Sera tufala i no gat pikinini. ?Olsem wanem? ?Ebraham i gat tingting se Jehova i fogetem promes blong hem? Laef blong Ebraham i no isi. Hem i lego ol sas samting long rij taon ya Uru, mo i wokbaot bitim 1,600 kilometa blong kasem kantri ya Kenan. Hem mo famle blong hem oli laef long haos tapolen nomo. Plante taem hem i no gat naf kakae, mo ol man blong stil oli stap stilim olting blong hem. (Jen. 12:5, 10; 13:18; 14:10-16) Nating se i olsem, Ebraham mo famle blong hem oli no wantem gobak long rij taon ya Uru.—Ridim Hibrus 11:8-12, 15.

8 Ebraham ‘i bilif strong long Jehova,’ mo i no putum tingting blong hem long “ol samting blong wol.” (Jen. 15:6) Oltaem hem i tingbaot promes blong God. Jehova i luk strong bilif blong Ebraham, nao i talem long hem se: “Yu lukluk i go antap long skae, yu traem kaontem ol sta. Ol pikinini we bambae oli kamaot biaen long yu, bambae oli plante olsem ol sta ya.” (Jen. 15:5) Taem Ebraham i harem tok ya, hem i save se Jehova i no fogetem hem. Evri taem we hem i lukluk ol sta, hem i tingbaot promes blong Jehova se ol pikinini we oli kamaot biaen long hem bambae oli plante. Long stret taem, Ebraham i gat wan pikinini boe, olsem Jehova i talem.—Jen. 21:1, 2.

9. ?Wanem i save hapen sipos yumi no putum tingting blong yumi long ol samting blong heven?

9 Yumi olsem Ebraham, yumi stap wet blong ol promes blong Jehova oli kamtru. (2 Pita 3:13) Sipos yumi no putum tingting blong yumi long ol samting blong heven, yumi save ting se Jehova i stap tektaem tumas blong mekem ol promes ya oli kamtru. Nao yumi no moa strong blong mekem wok blong Jehova olsem fastaem. Maet fastaem yu yu lego plante samting blong mekem wok blong paenia no wan narafala spesel wok. ?Be olsem wanem naoia? ?Yu yu olsem Ebraham we i mekem evri samting we hem i naf blong mekem blong obei long Jehova, mo i tingbaot ol blesing we bambae hem i kasem? (Hib. 11:10) Ebraham i “bilif long God,” mo from samting ya, Jehova i luk hem olsem fren blong hem.—Rom 4:3.

MOSES I “LUK GOD YA WE MAN I NO SAVE LUK”

10. ?Moses i gruap long weples, mo i kasem wanem tijing?

10 Wan narafala man we i putum tingting  blong hem long ol samting blong heven, hemia Moses. Hem i gruap long haos blong king blong Ijip. Long taem ya, Ijip i gat moa paoa i bitim ol narafala kantri long wol. Baebol i talem se, ‘oli tijim Moses long waes blong ol man Ijip.’ Tijing ya i mekem se Moses “i kam wan strong man blong toktok mo blong wok.” (Wok 7:22) Taswe, Moses i gat janis blong kam wan impoten man long Ijip. Be long tingting blong hem, i gat wan narafala tijing we i gud moa.

11, 12. ?Wanem save we i moa impoten long Moses? ?Yumi save samting ya olsem wanem?

11 Taem Moses i smol, mama blong hem Jokebed, i tijim hem blong i save Jehova, God ya blong ol Hibru. Save ya i moa impoten long Moses i bitim ol narafala samting. Hem i rere blong lego janis blong kasem ol sas samting mo paoa, blong i save mekem samting we God i wantem. (Ridim Hibrus 11:24-27.) Tijing we Moses i kasem taem hem i pikinini, mo bilif we hem i gat long Jehova, i givhan long hem blong i putum tingting blong hem long ol samting blong heven.

Moses i lego janis blong kasem ol sas samting mo paoa, blong i save mekem samting we God i wantem

12 Nating se oli tijim Moses long olgeta waes blong ol man Ijip, be hem i no yusum waes ya blong kam wan rijman we i gat paoa mo haenem. Baebol i talem se: “Hem i no wantem we olgeta oli talem se hem i pikinini blong gel blong Fero. Hem i no wantem blong i stap hapi long fasin blong sin we i blong smoltaem nomo, hem i glad moa blong go joen long ol man blong God blong harem nogud wetem olgeta.” Plante yia afta, ol save blong Jehova we Moses i kasem, i givhan long hem blong lidim ol man Isrel.

13, 14. (1) ?Wanem ol fasin we Moses i mas lanem? (2) ?Wanem ol fasin we yumi tu yumi mas lanem?

13 Moses i lavem Jehova mo ol man blong hem, we long taem ya, oli stap wok slef long Ijip. Taem Moses i gat 40 yia, hem i ting se hem i naf blong mekem ol manples blong hem oli gofri. (Wok 7:23-25) Be Jehova i save se Moses i no naf yet. Hem i mas lanem blong mekem tingting blong hem i stap daon, mo mekem tingting i longfala, mo kam kwaet man, mo bos long tingting blong hem. (Prov. 15:33) Moses i nidim trening blong rerem hem from ol bigfala trabol we bambae hem i kasem. Moses i lanem ol fasin ya long ol 40 yia we hem i mekem wok blong lukaot long ol sipsip.

14 ?Trening ya i givhan olsem wanem long Moses? Baebol i talem se, ‘i no gat wan  narafala man long wol we tingting blong hem i stap daon olsem Moses.’ (Nam. 12:3) From we hem i mekem tingting blong hem i stap daon, hem i rere blong lesin long ol man we oli talemaot ol trabol blong olgeta long hem. (Eks. 18:26) Yumi tu, yumi mas lanem ol fasin we bambae oli givhan long yumi blong yumi stap laef long taem blong “bigfala trabol,” mo blong yumi go insaed long niufala wol. (Rev. 7:14) ?Olsem wanem? ?Yu yu gat fasin we i mekem se ol narafala oli glad blong joen wetem yu? ?Mo yu yu save joen gud tu wetem ol man we i no isi blong joen gud wetem olgeta, olsem olgeta we oli save kros kwik? I gud yumi evriwan i folem advaes ya blong aposol Pita se: “Yufala i mas ona long olgeta man, mo yufala i mas lavem olgeta Kristin man, mo yufala i mas ona gud long God, mo yufala i mas ona long hed gavman blong yufala.”—1 Pita 2:17.

 PUTUM TINGTING OLTAEM LONG OL SAMTING BLONG HEVEN

15, 16. (1) ?From wanem yumi mas putum tingting blong yumi long ol samting blong heven? (2) ?From wanem ol Kristin oli mas gat gudfala fasin?

15 ‘Laef long wol ya i strong tumas,’ mo i had blong winim ol trabol. (2 Tim. 3:1) Taswe, yumi mas putum tingting blong yumi long ol samting blong heven, nao yumi save stap klosap long God. (1 Tes. 5:6-9) Bambae yumi tokbaot 3 rod blong mekem olsem.

16 Gudfala fasin: Pita i soemaot se gudfala fasin i impoten tumas, i se: ‘Yufala i mas mekem fasin blong yufala i stret gud long fes blong ol man.’ Hem i talem tu se ol man we oli no save Jehova, bambae oli luk gudfala fasin blong yumi, nao maet oli “leftemap nem blong God.” (1 Pita 2:12) Yumi mas mekem ol fasin we oli leftemap nem blong Jehova, taem yumi stap long haos, long wok, long skul, taem yumi spel mo pleplei, mo taem yumi prij. I tru, yumi no stret gud olgeta, taswe yumi save mestem samtaem. (Rom 3:23) Long taem olsem, yumi no mas letem tingting blong yumi i foldaon. Jehova i save givhan long yumi, blong yumi ‘gohed gud long Kristin laef blong yumi, olsem ol man we oli traehad long resis blong oli win.’—1 Tim. 6:12.

Sipos yumi gat tingting olsem Jisas, bambae tingting blong yumi i stap daon, mo bambae yumi wok strong blong talemaot Kingdom

17. ?Yumi mas gat wanem tingting we i sem mak long Jisas? (Yu luk pija long stat blong stadi.)

17 Gudfala tingting: Blong mekem gudfala fasin, yumi mas gat gudfala tingting. Aposol Pol i talem se: “Tingting blong yufala i mas kam stret gud wetem tingting blong Jisas Kraes.” (Fil. 2:5) ?Jisas i gat wanem tingting? Tingting blong hem i stap daon, mo from samting ya, hem i wantem mekem bes blong hem long wok blong Jehova. Oltaem tingting blong hem i stap long wok ya blong talemaot gud nius blong Kingdom. (Mak 1:38; 13:10) Long tingting blong Jisas, Tok blong God i gud moa blong lidim hem, i winim ol narafala samting. (Jon 7:16; 8:28) Hem i stadi gud long Tok blong God, blong hem i save talemaot mo eksplenem ol tok ya long ol narafala, mo blong hem i save ansa long ol man we oli agensem. Sipos yumi gat tingting olsem Jisas, bambae tingting blong yumi tu i stap daon, bambae yumi wok strong blong talemaot Kingdom, mo bambae yumi stadi oltaem long Baebol.

Long laef blong Jisas, wok blong prij i impoten moa i bitim ol narafala samting (Yu luk haf 17)

18. ?Yumi wok strong long wanem tufala wok?

18 Wok Strong: God i wantem se “olgeta long heven, mo long wol” oli obei long Jisas. (Fil. 2:9-11) Nating se Jisas i gat wan posisen we i hae we i hae, be tingting blong hem i stap daon mo hem i obei oltaem long Papa blong hem. Yumi tu yumi mas mekem olsem. (1 Kor. 15:28) ?Yumi mekem samting ya olsem wanem? Yumi wok strong taem yumi ‘go long ol man long olgeta ples long wol, blong pulum olgeta oli kam man blong Kraes.’ (Mat. 28:19) Mo tu, yumi “mekem i gud long olgeta man,” taem yumi givhan long ol brata blong yumi mo ol narafala man.—Gal. 6:10.

19. ?Yumi mas gat strong tingting blong mekem wanem?

19 !Yumi glad tumas we Jehova i stap talem long yumi blong yumi putum tingting blong yumi long ol samting blong heven! Yumi “mekem tingting blong yumi i strong, blong yumi resis long rod ya we i stap long fes blong yumi.” Mo yumi putum tingting blong yumi long ol samting we oli stret nomo. (Hib. 12:1) Yumi mas gat strong tingting blong mekem wok ‘long gladhat blong yumi, olsem we yumi stap wok blong Masta blong yumi, yumi no stap wok blong ol man nomo.’ Yumi save se Papa blong yumi long heven bambae i blesem yumi bigwan.—Kol. 3:23, 24.