Go long ol haf insaed long hem

Go long lis blong ol haf

?Yu Yu Glad We Jehova i Stap Lukluk Yu?

?Yu Yu Glad We Jehova i Stap Lukluk Yu?

“Hae God i stap luk olgeta samting we i stap hapen long evri ples. Nating we yumi stap mekem i gud no i nogud, be oltaem, hem i stap luk yumi.”PROV. 15:3.

1, 2. ?Taem Jehova i stap wajem yumi, hemia i defren olsem wanem long ol kamera long stoa?

LONG plante ples, ol man oli putum ol kamera long stoa blong olgeta blong wajem ol man. Oli save yusum ol foto ya, blong faenemaot ol stilman. Ol kamera ya oli stap long evri ples long stoa, mekem se i hadwok blong ol stilman oli ronwe long panis blong olgeta.

2 Baebol i talem se Jehova i luk ol samting we oli stap hapen “long evri ples.” (Prov. 15:3) ?Be olsem wanem? ?Hemia i min se hem i stap wajem yumi oltaem, blong luk sipos yumi brekem loa blong hem? ?Hem i wet nomo blong panisim yumi taem yumi mekem wan mastik? !Nogat! (Jer. 16:17; Hib. 4:13) Jehova i stap wajem yumi from we hem i lavem yumi, mo hem i wantem se yumi stap glad.—1 Pita 3:12.

3. ?Wanem faef samting we Jehova i mekem blong lukaot gud long yumi?

3 ?Wanem i save givhan long yumi blong yumi kasem save moa se God i lavem yumi? Bambae yumi luk faef samting we Jehova i mekem blong lukaot gud long yumi. (1) Hem i givim woning long yumi bifo we yumi mekem samting we i no stret.  (2) Hem i stretem yumi taem yumi gorong. (3) Hem i yusum ol rul blong Baebol blong lidim yumi. (4) Hem i givhan long yumi taem yumi kasem trabol. (5) Hem i blesem yumi taem yumi mekem samting we i stret.

JEHOVA I GIVIM WONING LONG YUMI

4. ?From wanem Jehova i givim woning long Ken bifo we hem i mekem sin?

4 Jehova givim woning long yumi, bifo we yumi mekem samting we i no stret. (1 Kron. 28:9) Yu tingbaot Ken bifo. Hem i “kros tumas” taem Jehova i no glad long sakrefaes blong hem. (Ridim Jenesis 4:3-7.) Jehova i givim woning long hem se ‘fasin blong hem i no stret.’ Sin i “olsem wan wael anamol we i stap klosap long doa” nomo, i rere blong kasem hem. Jehova i talem long hem se: “Fasin nogud ya i wantem tumas blong winim yu, be yu yu mas winim hem.” Ken i mas mekem sam samting, blong Jehova i “glad” long hem bakegen. Sipos hem i lesin long woning, bambae hem i gohed blong fren wetem Jehova.

5. ?Jehova i givim woning long yumi olsem wanem?

5 Samting ya i sem mak long yumi tede. Jehova i naf blong luk ol fasin blong yumi, ol tingting blong yumi, mo ol samting we yumi wantem. Yumi no save haedem wan samting long hem. Hem i lavem yumi mo i wantem se yumi mekem samting we i stret, be hem i no fosem yumi. Taswe, sipos hem i luk se wan fasin blong yumi i nogud, bambae hem i givim woning long yumi. ?Hem i givim woning olsem wanem? Taem yumi ridim Baebol oltaem, yumi ridim ol buk mo magasin blong yumi, mo yumi joen oltaem long ol miting, hem i givim woning long yumi. ?Olsem wanem? ?I bin hapen long yu finis we yu ridim no yu harem wan tok long miting we i givhan long yu, blong yu winim wan problem we Jehova nomo i save long hem? Jehova i givim ol woning ya long stret taem we yumi nidim.

6, 7. (1) ?Wanem i soemaot se Jehova i lavem yumi evriwan? (2) ?Jehova i wantem se yu mekem wanem, mo hemia i save givhan long yu olsem wanem?

6 Olgeta woning we oli stap long Baebol, oli soemaot se Jehova i lavem yumi evriwan. I tru se Baebol, ol buk mo ol magasin blong yumi, mo ol miting oli givhan long plante milian man. Be Jehova i wantem se yu nao, yu lesin long ol woning blong hem, blong yu mekem samting we i stret. Hemia i soemaot se hem i lavem yu.

Yumi save blokem ol trabol, sipos yumi trenem tingting blong yumi folem Baebol (Yu luk haf 6, 7)

7 ?Ol woning ya oli givhan long yumi olsem wanem? Fastaem, yumi mas bilif se Jehova i lavem yumi, mo biaen, yumi folem ol tok blong hem. Taswe, sipos yumi gat sam rabis tingting, yumi mas aotem olgeta kwiktaem. (Ridim Aesea 55:6, 7.) Sipos yumi obei, bambae yumi no harem nogud biaen. ?Be sipos yumi no wantem obei, Jehova bambae i mekem wanem?

JEHOVA I STRETEM YUMI

8, 9. ?Taem wan brata i givim advaes we i kamaot long Baebol, olsem wanem samting ya i soemaot se Jehova i lavem yumi? Yu talem wan stori.

8 Taem Jehova i stretem yumi, yumi save se hem i lavem yumi. (Ridim Hibrus 12:5, 6.) I tru se yumi harem nogud taem narafala i givim advaes, i tok long yumi, no i stretem yumi. (Hib. 12:11) Be taem wan brata i givim advaes we i kamaot long Baebol, i impoten we yumi kasem save from wanem hem i mekem olsem. Hem i no givim advaes blong mekem yumi harem nogud. Be hem i luk se sipos yumi no lukaot gud, bambae yumi no moa fren wetem Jehova. Taswe hem i yusum taem mo paoa blong hem, blong  givhan long yumi blong yumi kambak long Jehova. I gud yumi respektem advaes blong hem from we i kamaot long Jehova.

9 Yumi save tingbaot stori blong wan brata. Taem hem i no save trutok yet, hem i stap lukluk ol rabis pija. Be taem hem i kam long trutok, hem i lego rabis fasin ya. Sam yia biaen, hem i pem wan mobaelfon, mo i stat bakegen blong lukluk ol rabis pija long Intenet. (Jem. 1:14, 15) I klia se rabis fasin ya i stap yet long hat blong hem, olsem sakol faea we i laet smosmol yet. Wan dei, wan elda i yusum mobaelfon blong brata ya, nao i sek long ol Websaet blong ol rabis pija we oli kamaot long mobaelfon ya. Kwiktaem nomo, elda ya i givim advaes long hem. Brata ya i lesin long advaes, mo biaen hem i sakemaot rabis fasin ya. Jehova i luk ol sin blong yumi we ol narafala oli no luk. Mo hem i save stretem yumi bifo we yumi mekem wan rabis samting, nao yumi no moa fren wetem hem. Yumi glad tumas we Jehova i lavem yumi.

OL RUL BLONG BAEBOL OLI LIDIM YUMI

10, 11. (1) ?Olsem wanem yumi stap “tingbaot oltaem” ol advaes blong God? (2) Yu talem stori blong wan famle we i folem advaes blong Jehova.

10 Man blong raetem Sam i singsing long Jehova, se: “Yu yu stap lidim mi long ol toktok blong yu.” (Sam 73:24) Taem yumi stadi long Tok blong Jehova, yumi stap “tingbaot oltaem” ol advaes blong hem. Long rod ya, yumi save faenemaot ol tingting blong hem, yumi folem olgeta, mo yumi gohed blong fren gud wetem hem. Advaes blong Jehova i givhan tu long yumi, blong yumi wok blong kasem samting we famle blong yumi i nidim.—Prov. 3:6.

11 Wan brata long Filipin mo woman blong hem, tufala i gat bigfala famle, mo olgeta oli stap long wan fam we oli rentem. Tufala i mekem wok blong fultaem paenia. Wan dei, oli sek taem ona blong fam ya i sanem leta blong talem se oli mas kamaot long fam ya. Biaen oli faenemaot se wan man i giaman se oli stap mekem sam samting we i no stret. Brata ya i wari from we hem i no save se bambae oli go stap wea. Be hem i trastem Jehova mo i talem se: “Jehova bambae i givim samting we yumi nidim. Hem i stap mekem olsem finis.” Famle ya i folem ol rul blong Baebol. Nating se ol man oli talem giaman toktok agensem olgeta, be oli  respektem olgeta yet mo oli gat pis wetem olgeta. Sam dei biaen, ona blong fam ya i talem se oli save stap long fam. Hem i laekem fasin blong famle ya, ale hem i jenisim tingting blong hem, mo hem i givim sam moa graon blong oli mekem garen long hem. (Ridim 1 Pita 2:12.) Stori ya i soemaot se sipos yumi folem ol rul blong Baebol, Jehova bambae i givhan long yumi taem yumi kasem trabol.

WAN FREN WE I GIVHAN LONG TAEM BLONG TRABOL

12, 13. ?Wetaem i no isi blong yumi bilif se God i stap lavem yumi?

12 Yumi kasem plante trabol, mo maet sam long ol trabol ya oli stap longtaem. Maet yumi gat wan sik, no ol narafala oli ronem yumi from trutok, no ol famle oli agensem yumi. Be wan trabol we i no isi blong yumi winim, hemia taem yumi gat wan problem wetem wan brata no sista.

13 Maet wan brata i talem wan samting we i mekem yu yu harem nogud tumas. Ale maet yu stap tingting se: ‘!Samting olsem i no mas hapen long ogenaesesen blong Jehova!’ Antap long hemia, ating brata ya i kasem sam spesel wok long kongregesen, mo ol narafala oli tinghae long hem. Maet yu yu askem se: ‘?Olsem wanem samting olsem i save hapen? ?Jehova i no luk samting ya? ?Bambae hem i mekem wan samting no nogat?’—Sam 13:1, 2; Hab. 1:2,3.

14. ?From wanem Jehova i letem ol brata oli stretem yumi?

14 Jehova i luk plante moa samting i bitim yumi, mo hem i gat gudfala risen blong letem sam samting oli hapen. Maet yumi ting se i no stret we wan brata i tok strong blong stretem yumi, ale yumi harem nogud. Be maet Jehova i no gat sem tingting olsem yumi. Yu traem tingbaot Brata Karl Klein. Hem i talem se wan dei, Brata Rutherford i tok strong long hem, blong stretem hem. Sam taem biaen, Brata Rutherford i talem halo long hem, be Brata Klein i ansa long smol voes nomo. Brata Rutherford i luksave se hem i harem nogud yet. Ale hem i givim woning long Brata Klein se: “Yu lukaot. Setan i stap rere blong kakae yu.” Tok ya i givhan bigwan long Brata Klein. Sam yia biaen, taem hem i kam wan memba blong Hed Kampani, hem i talem se ol brata blong yumi oli gat raet blong stretem yumi. Be sipos yumi agensem olgeta, Setan bambae i kakae yumi. *

15. ?Yu mas tingbaot wanem taem yu kasem trabol? Yu talem wan pijatok.

15 Maet trabol i stap longtaem, mo yu wantem nomo se i finis kwik. ?Wanem i save givhan long yu blong yu stanap strong? Yu traem tingbaot se yu stap draevem trak long rod nao yu fas i stap, from we i gat wan longfala laen blong trak. Yu no save se bambae yu wet kasem wetaem. Sipos yu kam kros mo yu tanemraon blong go folem wan narafala rod, maet yu save mestem rod, nao yu tekem plante taem moa blong kasem ples we yu wantem go long hem, i bitim we yu wet long longfala laen blong trak. Long sem fasin, sipos yu folem ol rul blong Baebol, Jehova bambae i givhan long yu blong yu stanap strong, gogo kasem we trabol ya i finis.

16. ?From wanem Jehova i letem trabol i kasem yumi?

16 Jehova i letem ol trabol oli stap, from we hem i wantem se oli trenem yumi. (Ridim 1 Pita 5:6-10.) Yumi neva mas ting se hem i mekem ol trabol ya oli kasem yumi. (Jem. 1:13) ‘Enemi ya Setan,’ hem nao i mekem ol man oli harem nogud. Yumi mas save se Jehova i luk yumi taem yumi harem nogud, mo hem i  lavem yumi. Bambae hem i meksua se ol trabol blong yumi oli stap “blong smoltaem” nomo. Yu mas trastem Jehova se hem i lavem yu mo bambae hem i givim paoa blong yu yu stanap strong kasem en.—2 Kor. 4:7-9.

JEHOVA I BLESEM YUMI

17. ?From wanem Jehova i jekem hat blong olgeta man?

17 Jehova i jekem hat blong olgeta man, blong luk se hu nao i lavem hem. Profet Hanani i talem long King Asa se: “Ae blong Jehova i stap lukluk i go long olgeta ples long wol, nao hem i yusum paoa blong hem blong givhan long olgeta we oli ona long hem long fulhat blong olgeta.” (2 Kron. 16:9, NW) Jehova bambae i “yusum paoa blong hem blong givhan long” yu. Hemia i min se bambae hem i lukaot gud long yu mo i blesem yu.

18. ?From wanem yumi mas trastem Jehova se bambae hem i blesem yumi sipos yumi mekem samting we i gud? (Yu luk pija long stat blong stadi.)

18 Sipos yumi wantem se Jehova i “sore” long yumi, yumi mas “traehad blong folem stret fasin,” ‘yumi mas glad long fasin we i stret,’ mo yumi “mekem ol samting nomo we i gud.” (Amos 5:14, 15; 1 Pita 3:11, 12) Jehova i blesem ol man we oli mekem samting we i stret, nating sipos i no gat man i luk wok blong olgeta. (Sam 34:15) Yumi luk samting ya long eksampol blong tufala woman Isrel, we tufala i stap givhan long ol woman we oli bonem pikinini, nem blong tufala, Sifraha mo Pua. King Fero i talem se sipos wan woman Isrel i bonem wan bebi boe, tufala i mas kilim bebi ya i ded. Tufala woman ya i no obei long Fero, be tufala i sevem laef blong ol bebi boe. Jehova i luk gudfala wok blong tufala, mo hem i blesem tufala, i mekem se tufala tu i gat ol pikinini blong tufala. (Eks. 1:15-17, 20, 21) Samtaem, yumi harem olsem se i no gat man i luk ol gudfala wok we yumi mekem. Be Jehova i luk mo bambae hem i blesem yumi from.—Mat. 6:4, 6; 1 Tim. 5:25; Hib. 6:10.

19. ?Wanem samting i hapen long wan sista?

19 Jehova i luk we yumi traehad long wok blong prij. Wan sista blong Hangari we i stap long Ostria, i kasem adres blong wan woman we i toktok lanwis blong Hangari. Kwiktaem nomo, sista ya i go long haos blong woman ya, be i no gat man long haos. Hem i gobak bakegen mo bakegen gogo wan yia haf i pas, be hem i no faenem wan man. Samtaem, hem i harem olsem se i gat man long haos, be i no gat man i kam openem doa. Sista ya i lego ol magasin, ol buk, ol leta we hem i raetem, mo namba blong telefon blong hem. Wan dei, hem i gobak long haos ya, ale hem i sek se wan woman i openem doa, i smael long hem, mo i talem se: “Plis, yu kam insaed. Mi ridim evri buk mo leta blong yu, mo mi stap wet long yu.” Woman ya i bin folem wan tritmen blong sik ya kansa, mekem se hem i no wantem toktok wetem ol man. Be naoia, hem i glad blong stadi Baebol. Sista ya i harem se Jehova i luk ol samting we hem i traehad blong mekem, mo i blesem hem.

20. ?Yu yu harem olsem wanem taem yu save se Jehova i stap lukluk yu?

20 Long stadi ya, yumi lanem se Jehova i luk evri samting we yumi mekem, mo hem i stap jekem hat blong evri man. Be yumi no harem olsem se hem i stap traem blong faenem poen long yumi. Mo yumi no harem olsem se hem i stap raetemdaon evri mastik blong yumi. Yumi wantem kam klosap moa long hem from we yumi save se hem i lavem yumi, i wantem givhan long yumi, mo i blesem ol gudfala wok blong yumi.

^ par. 14 Laef stori blong Brata Klein i stap long Wajtaoa blong 1 Oktoba 1984, long Franis mo Inglis.