Go long ol haf insaed long hem

Go long lis blong ol haf

 LAEF STORI

Blesing We Mi Kasem From Wok Blong Fultaem Paenia

Blesing We Mi Kasem From Wok Blong Fultaem Paenia

Taem mi tingtingbak long ol 65 yia we mi mekem wok blong fultaem paenia, mi save talem stret se mi gat gudfala taem long laef blong mi. Hemia i no min se mi neva sore no se tingting blong mi i neva foldaon, nogat. (Sam 34:12; 94:19) !Be mi gat wan gudfala laef, mo mi kasem plante blesing!

LONG 7 Septemba 1950, mi kam memba blong famle blong Betel long Brooklyn. Long taem ya, i gat 355 brata mo sista long Betel we oli kamaot long ol defdefren kantri, mo yia blong olgeta i stat long 19 i go kasem 80. Plante long olgeta, tabu spirit i makemaot olgeta.

MI STAT BLONG MEKEM WOK BLONG JEHOVA

Taem mi baptaes, mi gat 10 yia

Mama blong mi nao i tijim mi blong mi mekem wok blong ‘God ya we i stap harem gud oltaem.’ (1 Tim. 1:11) Mama i mekem wok blong Jehova taem mi mi smol boe nomo. Long namba 1 Julae 1939, taem mi gat ten yia, mi baptaes long wan son asembli (we tede hem i asembli blong tu dei) long Nebraska, Amerika. Asembli ya i stap long wan haos we ol brata oli rentem. I gat samwe long 100 man long asembli ya, mo mifala i stap lesin long wan tok we oli rikodem, nem blong hem “Fascism or Freedom” (Rul Blong Ol Fasis no Fasin Fri) we Joseph Rutherford i givim. Be long medel blong tok ya, wan bigfala hip blong man i kam hivap afsaed long haos asembli ya, oli pusum doa strong gogo oli kam insaed long ples blong asembli, mo oli ronemaot mifala i go afsaed. Mifala i go long fam blong wan brata, mo mifala i gohed long program blong asembli ya kasem en blong hem. !Taswe, yufala i kasem save from wanem mi mi neva fogetem dei mo yia we mi mi baptaes long hem!

Mama blong mi i traehad blong tijim mi long trutok. Papa blong mi i wan gudfala man, be hem i no intres nating long jos, mo i no wantem save sipos bilif blong mi i strong no nogat. Taem mi harem nogud, mama blong mi wetem ol narafala Witnes long Kongregesen blong Omaha, oli leftemap tingting blong mi.

MI STATEM WOK BLONG PAENIA

Taem klosap mi finis long hae skul, mi mas jusum se bambae mi mekem wanem long laef blong mi. Long taem blong spel, evri taem mi mekem wok blong haftaem paenia wetem ol narafala yangfala.

Tu yangfala brata we tufala i jes kamaot long namba 7 klas blong Skul blong Gilead, tufala i kam visitim ol kongregesen long eria blong mifala. Nem blong tufala, John Chimiklis mo Ted Jaracz. Mi mi sapraes taem mi harem se tufala i gat bitim 20 yia nomo. Long taem ya, mi mi gat 18 yia, mo klosap nao mi finis long hae skul. Mi tingbaot yet taem Brata Chimiklis i askem se bambae mi mekem wanem long laef blong mi. Mi ansa se mi wantem mekem wok blong fultaem paenia. Ale hem i talem se: “Yes, yu  gohed, yu mekem wok blong fultaem paenia. Yu neva save se wok ya bambae i lidim yu i go wea.” Advaes ya, wetem eksampol blong tufala brata ya, i givhan bigwan long mi. Long 1948, mi finisim skul blong mi, mo mi statem wok blong paenia.

MI GO LONG BETEL

Long Julae 1950, mi wetem papa mo mama blong mi, mitrifala i go long intenasnal asembli we i stap long Yankee Stadium, long Amerika. Long asembli ya, mi mi go long miting blong olgeta we oli intres blong wok blong Betel. Afta, mi raetem wan leta blong talem se mi wantem wok long Betel.

Mi mi stap wetem papa mo mama, mo mi mekem wok blong paenia. Papa blong mi i glad nomo, be hem i wantem se mi givim smol mane blong rum blong mi mo blong kakae. Ale, long stat blong manis Ogis, mi go lukaotem wok. Be bifo mi go, mi jekem bokis blong leta blong mifala, ale mi luk wan leta blong mi we i kam long Brooklyn. Nathan H. Knorr i raetem leta ya, mo hem i talem se: “Mifala i kasem leta blong yu. Mi kasem save se yu yu wantem stap long Betel gogo kasem we yu ded. Taswe, mi wantem se long 7 Septemba 1950, yu kam long Betel we i stap long 124 Columbia Heights, Brooklyn, Amerika.”

Long sapa, taem papa blong mi i kambak long wok, mi talem long hem se mi faenem wan wok. Hem i talem se: “!Gudwan! ?Bambae yu wok wea?” Mi ansa long hem se: “Long Betel long Brooklyn, mo bambae mi kasem 1,000 vatu long wan manis.” Hem i sek long samting ya, be hem i talem se sipos hemia nao wok we mi mi jusum, mi mas traehad blong mekem gud wok ya. !I no longtaem biaen, long 1953, Papa i baptaes long wan asembli long Yankee Stadium!

Mi mo brata we i stap paenia wetem mi, Alfred Nussrallah

Mi mi glad from we oli askem long Alfred Nussrallah we i stap paenia wetem mi, blong hem tu i go long Betel, ale mitufala tugeta i go semtaem long Betel. Sam yia biaen, hem i mared, mo hem wetem woman blong hem, Joan, tufala i go long Skul blong Gilead. Biaen tufala i go mekem wok blong misinari long Lebanon, mo biaen bakegen, tufala i mekem wok blong eria elda long Amerika.

OL WOK WE MI MEKEM LONG BETEL

Fas wok we mi mi mekem long Betel, hemia blong joenem ol pej wanples mo somap olgeta i kam wan buk. Fas buk we mi wok long hem, hemia What Has Religion Done for Mankind? Mi mekem wok ya samwe long eit manis olsem, ale oli askem mi blong go wok long Seves Dipatmen, we Brata Thomas J. Sullivan i lukaot long hem. Mi mi glad tumas blong wok wetem brata ya. Hem i wok plante yia finis long ogenaesesen blong Jehova, mo waes mo fasin luksave blong hem i givhan bigwan long mi.

Mi wok klosap tri yia long Seves Dipatmen. Ale wan dei, Brata Max Larson we i lukaot long ol wok long faktri, i kam mo i talem se Brata Knorr i wantem luk mi. Mi mi wari se maet mi mekem wan samting we i rong. Be mi glad tumas taem Brata Knorr i talem se hem i wantem save sipos mi mi gat plan blong lego Betel long ol yia we oli stap kam. Hem i wantem wan man blong wok wetem hem smoltaem long ofis, mo hem i wantem luk sipos mi mi naf blong wok wetem hem. Mi talem long hem se mi no gat plan blong lego Betel. Ale, mi mi gat bigfala janis ya blong wok long ofis blong hem blong 20 yia.

Mi mi talem plante taem se bambae mi neva save pembak trening we mi kasem taem mi wok wetem Brata Sullivan mo Brata Knorr, mo wetem ol narafala brata we oli wok long Betel, olsem Milton Henschel, Klaus Jensen, Max Larson, Hugo Riemer, mo Grant Suiter. *

Ol brata we mi mi wok wetem olgeta, oli plan gud fastaem long ol wok we oli mekem blong givhan long  ogenaesesen. Brata Knorr i wok strong oltaem, mo hem i wantem se ol wok blong Kingdom oli kasem plante moa ples long wol. Mifala we i wok wetem hem, mifala i luk se i isi blong toktok wetem hem. Nating sipos mifala i gat defren tingting long wan samting, be mifala i no fraet blong talemaot tingting blong mifala, mo hem i trastem mifala oltaem.

Wan taem, Brata Knorr i tokbaot fasin ya blong lukaot long ol smosmol samting. Blong givhan long mi blong kasem save, hem i tokbaot se taem hem i bin lukaot long faktri, Brata Rutherford i ring long hem, mo i talem se: “Brata Knorr, taem yu kamaot long faktri blong kam kakae, yu karem sam raba blong pensel i kam. Mi nidim olgeta long ofis blong mi.” Brata Knorr i talem se fas samting we hem i mekem, hem i go long stok rum, i karem ol raba ya, mo i putum olgeta long poket blong hem. Ale, long dina, hem i karem olgeta i go long ofis blong Brata Rutherford. Hemia wan smol samting nomo, be i givhan bigwan long Brata Rutherford. Ale, Brata Knorr i talem long mi se: “Mi mi wantem se oltaem i mas gat ol pensel we oli sap gud long tebol blong mi. Taswe, plis, evri moning yu lukluk long samting ya.” Blong plante yia, mi mi mekemsua se ol pensel blong hem oli sap gud.

Plante taem, Brata Knorr i tokbaot fasin ya blong lesin gud taem ol narafala oli askem yumi blong mekem wan wok. Wan taem, hem i talem long mi blong mekem wan wok, mo hem i eksplenem gud olsem wanem blong mekem wok ya, be mi mi no lesin gud. Samting we i kamaot se Brata Knorr i sem we i sem from samting we mi mekem. Mi mi harem nogud tumas, ale mi raetem wan smol leta long hem blong talem se mi mi sore tumas from samting we mi mekem, mo se i moagud mi no moa wok long ofis blong hem. Long sem moning ya, Brata Knorr i kam luk mi mo i talem se: “Robert, mi ridim leta blong yu finis. Yu bin mekem wan mastik mo mi toktok long yu finis from samting ya. Mi save se nekis taem bambae yu lukaot gud moa. Naoia, yumitu tugeta i mas wok.” Brata ya i kasem save long filing blong mi, mo mi mi glad tumas from kaen fasin blong hem.

MI WANTEM MARED

Mi mi wok eit yia finis long Betel, mo plan blong mi se bambae mi gohed nomo blong wok long ples ya. Be ol samting oli jenis. Long 1955, mi mitim wan sista, we nem blong hem Lorraine Brookes. Long taem ya, hem i stap paenia long Montreal, Kanada. Lorraine i laekem wok blong fultaem paenia, mo hem i rere blong go long eni ples we ogenaesesen blong Jehova i sanem hem i go long hem. Mi mi laekem gudfala fasin ya blong hem. Mo hem i wantem go long Skul blong Gilead. Ale long 1956, taem hem i gat 22 yia, oli askem blong hem i joen long namba 27 klas blong Skul blong Gilead. Afta long skul ya, hem i go mekem wok blong misinari long Brasil. Mo long 1958, mi mitim hem bakegen long wan intenasnal asembli long Yankee Stadium mo long Polo Grounds. Mitufala i storian blong savsave gud mitufala, ale mi askem hem blong i maredem mi, mo hem i talem ‘yes.’ Mitufala i mekem plan se bambae mitufala i mared long 1959, mo biaen, bambae mitufala i mekem wok blong misinari.

Taem mi talemaot ol plan blong mi long Brata Knorr, hem i talem se i moagud mitufala i wet 3 yia  moa, olsemia mitufala i save wok long Betel blong Brooklyn. Long taem ya, sipos wan brata mo sista tufala i wantem stap long Betel afta long mared blong tufala, wan long tufala i mas wok 10 yia finis long Betel, mo narawan 3 yia. Ale, bifo we mitufala i mared, Lorraine i wok 2 yia long Betel blong Brasil, mo biaen i kam wok wan yia long Betel blong Brooklyn.

Long tufala yia we hem i stap wok long Betel blong Brasil, mitufala i toktok long leta nomo. !Long taem ya i no gat imel, mo telefon i sas tumas! Taem mitufala i mared long 16 Septemba 1961, mitufala i glad tumas from we Brata Knorr i givim tok blong mared blong mitufala. I tru se long taem ya, mitufala i harem se trifala yia ya i longtaem tumas. Be tede, mitufala i mared bitim 50 yia finis. Taem mitufala i tingtingbak long bigfala glad we mitufala i kasem long mared blong mitufala, mitufala i agri se i no blong nating nomo we mitufala i wet long trifala yia ya.

Taem mitufala i mared. Stat long lef i go long raet: Nathan H. Knorr, Patricia Brookes (sista blong Lorraine), Lorraine mo mi, Curtis Johnson, Faye mo Roy Wallen (mama mo papa blong mi)

OL BLESING WE MI KASEM LONG WOK BLONG JEHOVA

Long 1964, mi kasem blesing ya blong mekem wok blong son elda, blong visitim ol branj ofis long ol narafala kantri. Long taem ya, ol sista oli no folem man blong olgeta taem oli mekem wok ya. Be long 1977, samting ya i jenis. Long yia ya, mitufala i joen wetem Grant mo Edith Suiter, blong visitim ol branj ofis long Jemani, Ostria, Gris, Saepras, Teki, mo Isrel. I gat samwe 70 kantri we mi mi visitim olgeta.

Long 1980, mi mekem son visit long Brasil, ale mitufala i go long Belem, wan taon we Lorraine i bin mekem wok blong misinari long hem. Mo tu, mitufala i go visitim ol brata long taon ya Manaus, mo mi givim wan tok long wan stadium. Long ples ya, mitufala i luk wan grup blong man mo woman we oli sidaon wanples, be oli no sekhan mo oli no kis long ol narafala. ?From wanem oli no mekem olsem?

Olgeta ya, oli ol brata mo sista we oli gat leprosi. Oli kam long wan kamp blong ol man we oli gat leprosi, we i stap long medel bus blong Amason. Oli no wantem pasem sik blong olgeta i go long ol narafala brata sista, taswe oli no sekhan mo kis long olgeta. !Be mifala i luksave long fes blong olgeta se oli glad we oli glad, mo samting ya i tajem hat blong mifala! Ol tok blong Aesea i tru tumas, taem i talem se: “Ol man blong wok blong mi bambae oli singaot bigwan from we oli harem gud long hat blong olgeta.”—Aes. 65:14, NW.

MI MI HAREM GUD TUMAS FROM WE JEHOVA I BLESEM MI

Mi mo Lorraine i spenem bitim 60 yia long wok blong Jehova. Plante taem, mitufala i tingtingbak long ol yia ya. Mitufala i letem Jehova i yusum ogenaesesen blong hem blong lidim mitufala, mo mitufala i glad tumas long ol blesing we mitufala i kasem. Tede, mi no moa naf blong go visitim ol brata mo sista long ol narafala kantri olsem bifo. Be nating se i olsem, mi mi naf blong mekem ol wok we mi mas mekem evri dei. Naoia, mi givhan long Hed Kampani, mi wok wetem Komiti Blong Ol Kodineta, mo Seves Komiti. Mi mi glad tumas blong mekem smol wok ya, blong sapotem kampani blong ol brata long fulwol. Mi mi stap sapraes yet blong luk plante plante yangfala man mo woman we oli mekem wok blong fultaem paenia. Olgeta ya oli gat sem tingting olsem Aesea bifo, we i talem se: “!Mi ya, mi save go! !Yu sanem mi!” (Aes. 6:8) Bigfala hip blong ol yangfala ya, oli soemaot se toktok blong eria elda ya bifo i tru tumas, taem i talem long mi se: “Yes, yu gohed, yu mekem wok blong fultaem paenia. Yu neva save se wok ya bambae i lidim yu i go wea.”

^ par. 20 Sipos yu wantem save laef stori blong sam long ol brata ya, i gud yu luk ol Wajtaoa ya (long Franis mo Inglis): Thomas J. Sullivan (15 Ogis 1965); Klaus Jensen (15 Oktoba 1969); Max Larson (1 Septemba 1989); Hugo Riemer (15 Septemba1964); mo Grant Suiter (1 Septemba 1983).