Go long ol haf insaed long hem

Go long lis blong ol haf

 LAEF STORI

Mi Mi Dipen Long Jehova, Nao Hem i Blesem Mi

Mi Mi Dipen Long Jehova, Nao Hem i Blesem Mi

Plante taem, yumi no save wanem bambae i kamaot long laef blong yumi, yumi no save sipos plan blong yumi bambae i kamtru, mo samtaem i had blong winim ol trabol we oli kasem yumi. Nating se i olsem, Jehova i blesem olgeta we oli no folem prapa save blong olgeta, be oli dipen long hem nomo. Mi mo woman blong mi, mitufala i luk samting ya long laef blong mitufala. Hemia stori blong laef blong mitufala.

PAPA mo mama blong mi, tufala i mitim tufala long wan asembli blong ol Baebol Studen, long Cedar Point, Ohio, long Amerika. Tufala i mared long sem yia nomo. Mi mi bon long yia 1922, mo brata blong mi Pol, hem i bon tu yia biaen. Woman blong mi Grace, hem i bon long yia 1930. Papa mo mama blong hem, tufala i Baebol Studen, mo bubu man mo bubu woman blong hem, tufala tu i Baebol Studen. Tufala i fren gud wetem Brata Charles Taze Russell.

Mi mitim Grace long yia 1947, mo mitufala i mared long 16 Julae long 1949. Bifo we mitufala i mared, mitufala i tokbaot fiuja blong mitufala long klia fasin. Mitufala i mekem desisen se bambae mitufala i no gat pikinini, be bambae mitufala i mekem wok blong Jehova fultaem. Long namba 1 Oktoba, 1950, mitufala i stat long wok blong paenia. Long yia 1952, oli singaot mi blong mi mekem wok blong eria elda.

VISITIM OL KONGREGESEN MO SKUL BLONG GILEAD

Mitufala i harem se mitufala i no naf blong mekem niufala wok ya. Mi mi lanem plante samting long ol brata we oli stap longtaem long wok ya. Mo mi lukaot wan we i save givhan long Grace tu. Mi go luk wan brata, nem blong hem Marvin Holien. Longtaem finis hem i fren blong famle blong mi, mo hem i mekem wok blong eria elda. Mi talem long hem se: “Grace i yangfala nomo. ?Yu save wan sista we i save trenem hem?” Hem i ansa se: “Yes. Edna Winkle i mekem wok blong paenia longtaem. Hem i save givhan gud long hem.” Afta we Edna i trenem Grace, Grace i talem se: “Hem i mekem se mi no moa fraet blong prij. Hem i save olsem wanem blong ansa long man we i traem blokem storian. Mo hem i tijim mi blong mi lesin long man we mi prij long hem, nao bambae mi save stret samting blong talem. !Sista ya i givim stret trening we mi nidim!”

Stat long lefsaed: Nathan Knorr, Malcolm Allen, Fred Rusk, Lyle Reusch, Andrew Wagner

Mi mo Grace, mitufala i wok long tu eria long Iowa, wetem sam ples long Minnesota mo saot Dakota. Afta, mitufala i go long Eria 1 long bigfala taon ya New York. Tufala ples ya, Brooklyn mo Queens, tufala i stap long eria ya tu. Mitufala i harem se  mitufala i no naf blong wok long eria ya. Kongregesen blong Brooklyn i stap insaed long eria ya, mo oli stap mekem miting long Haos Kingdom long Betel. Plante brata mo sista blong Betel oli stap long kongregesen ya. Taem mi givim fas tok blong mi long kongregesen ya, Brata Nathan Knorr i kam luk mi mo i talem se: “Malcolm, yu givim sam gudfala advaes we mifala i mas wok long hem. Hem i stret nomo. Yu mas givim advaes olsem. Sipos no, yu no save mekem wan gudfala wok long ogenaesesen blong Jehova. Yu no mas fogetem samting ya. Ale, gohed long gudfala wok blong yu.” Afta long miting, mi talemaot tok blong hem long Grace. Taem mitufala i go long rum blong mitufala, wota blong ae blong mitufala i ron. Mitufala i harem se paoa i no moa gat, from we mitufala i bin wari tumas.

“Yu mas givim advaes olsem. Sipos no, yu no save mekem wan gudfala wok long ogenaesesen blong Jehova. Yu no mas fogetem samting ya. Ale, gohed long gudfala wok blong yu”

Sam manis i pas, nao mitufala i kasem wan leta blong singaot mitufala i go long namba 24 klas blong skul ya Gilead. Mitufala i finisim trening ya long manis Februari 1955. Bifo we mitufala i go long skul ya, oli talemaot long mitufala se maet mitufala i no mekem wok blong misinari. Be trening ya i save givhan long mitufala moa long wok blong visitim ol kongregesen. Skul ya i nambawan tumas. Mitufala i luk se save blong mitufala i smol nomo.

Mi mo Grace wetem Fern mo George Couch, long skul blong Gilead long 1954

Taem mitufala i finisim skul ya, wok blong mitufala i jenis. Naoia mi mekem wok blong distrik elda long Indiana, mo Michigan, mo Ohio. Long manis Disemba 1955, mitufala i sapraes blong kasem wan leta long Brata Knorr, we i talem se: “Yu mas talem stret long mi. ?Yu yu glad blong kam stap long Betel? . . . ?Yu yu glad blong go long narafala kantri afta we yu wok smoltaem long Betel? Sipos yu laekem moa blong gohed long wok blong distrik elda mo eria elda, plis yu talem long mi.” Mitufala i ansa se, mitufala i glad blong mekem enikaen wok we oli givim. !Kwiktaem nomo, oli sanem toktok i kam se mitufala i mas go long Betel!

NAMBAWAN WOK LONG BETEL

Long ol nambawan yia we mitufala i stap long Betel, mi givim plante tok long ol defren ples long Amerika, mo mi tijim plante klas. Mi givhan blong trenem plante yangfala man, we biaen oli mekem bigfala wok long ogenaesesen blong Jehova. Afta, mi wok olsem sekretari blong Brata Knorr, long ofis we i lukaot long wok blong prij long fulwol.

Mi mi stap wok long ofis we i lukaot long wok blong prij, 1956

Mi mi wok blong plante yia long Ofis We i Lukaot Long Wok Blong Prij. Mi laekem tumas wok ya. Mi gat janis blong wok wetem T.J. (Bud) Sullivan, we bifo hem i lukaot long ofis ya blong plante yia. I gat sam narafala tu we oli tijim mi long plante samting. Fred Rusk i wan long olgeta. Hem nao i trenem mi. Mi stap smael taem mi tingbaot taem ya we mi  askem long hem se: “Fred, ?from wanem yu jenisim plante samting long ol leta we mi mi raetem?” Hem i laf, nao i talem se: “Malcolm, taem yu stap toktok, yu save eksplenem gud samting we yu wantem talem. Be taem yu raetem leta, hem i mas klia mo stret gud, antap moa, taem i kamaot long ofis ya.” Hem i gohed long kaen fasin se: “Yu no wari. Yu yu stap mekem gudfala wok, mo sloslo bambae yu kam gud moa.”

Long ol yia we mitufala i wok long Betel, Grace i mekem defdefren wok. Hem i klinim ples mo i lukaot long ol rum long Betel. Hem i laekem wok ya. Naoia yet, taem hem i luk sam long ol brata we oli yangfala long Betel bifo, oli smael long hem mo oli talem se: “Yu nao yu tijim mi olsem wanem blong stretem bed blong mi. Mama blong mi i laekem trening ya we yu givim long mi.” Mo tu, Grace i harem gud blong wok long ofis blong ol magasin, ofis blong ol leta, mo ples we oli mekem ol kaset. Olgeta wok ya oli givhan long hem blong luksave se i wan bigfala blesing blong mekem enikaen wok nomo long ogenaesesen blong Jehova. Hem i gat sem tingting yet.

OL JENIS LONG LAEF BLONG MITUFALA

Samwe long yia 1975, ol olfala blong mitufala oli no moa save lukaot gud long olgeta. I had blong mitufala i mekem desisen blong aot long Betel. Mitufala i laekem tumas wok long Betel mo ol brata sista long ples ya. Nating se i olsem, hem i wok blong mitufala nao blong lukaot long ol olfala blong mitufala. Ale mitufala i aot long Betel, be mitufala i ting se sipos mitufala i gat janis, bambae mitufala i kambak bakegen.

Mi mi faenem wan wok we mi go long haos blong ol man blong salem ol samting long olgeta. Taem mi stap kasem trening, maneja i talem se: “Ol man oli stap long haos long sapa. Yu save win gud long bisnes ya sipos yu go luk olgeta long taem ya. I impoten tumas we yu wok long sapa evri dei.” Mi talem long hem se: “Yu yu gat plante save long wok ya, mo mi mi gat respek long yu. Be mi gat ol narafala wok blong mekem tu we oli joen wetem wosip blong mi. Long ful laef blong mi, mi tinghae long wosip blong mi, mo bambae mi gohed long fasin ya. Bambae mi wok sam dei long sapa, be long Tusde mo Tasde, bambae mi go long miting blong wosip.” Jehova i blesem mi from we mi go oltaem long miting, mi no letem wok i blokem mi.

Long Julae 1987, mama blong mi i ded. Long taem ya, mitufala i stap wetem hem long hospital. Nes i kam, i talem long Grace se: “Misis, yu gohom, yu spel. Mifala i luk yu yu stap oltaem wetem palika blong yu. Naoia tingting blong yu i save stap kwaet, mo yu save harem gud long wok we yu bin mekem.”

Long Disemba 1987, mitufala i fulumap pepa bakegen blong askem wok long ples we mitufala i laekem tumas, hemia Betel. Be sam dei nomo biaen, dokta i faenemaot se Grace i gat kansa long gat blong hem. Ale, hem i katem hem, mo biaen hem i  talem se sik ya i finis. Long semtaem, mitufala i kasem wan leta long Betel we i talem se i gud mitufala i stap gohed nomo blong prij wetem kongregesen. Tingting blong mitufala i strong blong gohed long wok blong Kingdom.

Wan dei, mi gat janis blong kasem wan wok long Texas. Mitufala i ting se i gud blong muv i go long ples ya from we i hot moa. Samting ya i mekem i gud long bodi blong mitufala. Naoia, mitufala i stap 25 yia finis long Texas. I gat ol nambawan brata mo sista oli stap, we mitufala i lavem olgeta tumas.

OL SAMTING WE MITUFALA I LANEM

Taem ol yia oli stap pas, Grace i sik bakegen from kansa long gat blong hem, mo long trot, mo long titi. Be hem i no stap komplen. Oltaem hem i wok gud wetem mi mo i sapotem ol desisen blong mi. Plante oli askem long hem se: “?Wanem nao i mekem se yutufala i glad oltaem long yutufala?” Grace i talem fo risen ya: “Mitufala i bes fren. Mitufala i toktok tugeta oltaem. Mitufala i laekem tumas blong joen wanples blong mekem samting. Mo evri naet, bifo we mitufala i slip, mitufala i stretem enikaen samting we mitufala i kros from.” I tru, sam samtaem, mitufala i kros long mitufala, be mitufala i fofogivim mitufala, mo mitufala i fogetem trabol ya. Samting ya i mekem pis i stap oltaem.

“Oltaem yu mas dipen long Jehova, mo yu mas stanap strong nomo blong winim ol trabol we hem i letem i kasem yu”

Long olgeta trabol we i kasem mitufala, mitufala i lanem plante gudfala samting, olsem:

  1.  Oltaem yu mas dipen long Jehova, mo yu mas stanap strong nomo blong winim ol trabol we hem i letem i kasem yu. Yu no mas trastem prapa waes blong yu.—Prov. 3:5, 6; Jer. 17:7.

  2.  Nomata wanem samting yu yu fesem, yu mas lukluk i go long Baebol blong faenem tok blong lidim yu. I impoten tumas blong obei long Jehova mo ol loa blong hem. I gat tu rod nomo, yu obei no yu no obei. I no gat sotkat.—Rom 6:16; Hib. 4:12.

  3.  Samting we i impoten moa i winim ol narafala samting, hemia blong wokem gudnem wetem Jehova. Yu mekem wok blong hem fastaem, i no wok blong hivimap mane mo olting.—Prov. 28:20; Pri. 7:1; Mat. 6:33, 34.

  4.  Yu mas prea oltaem blong yu save wok strong mo karem frut long wok blong Jehova. Yu mas strong blong mekem samting we yu yu naf blong mekem, yu no tingbaot tumas ol samting we yu yu no naf blong mekem.—Mat. 22:37; 2 Tim. 4:2.

  5.  Yu mas tingbaot oltaem se i no gat wan narafala ogenaesesen we Jehova i glad long hem mo i blesem.—Jon 6:68.

Mi mo Grace, mitufala wanwan i mekem wok blong Jehova bitim 75 yia, 65 yia olsem man mo woman we i mared. Tru ya, ol yia we mitufala i mekem wok blong Jehova tugeta, oli nambawan tumas. Mitufala i prea se olgeta brata mo sista blong mitufala, olgeta tu oli dipen long Jehova nao hem bambae i blesem olgeta.