Go long ol haf insaed long hem

Go long lis blong ol haf

Kwestin

Kwestin

Taem kongregesen i putumaot wan pikinini, ?hem i save sidaon klosap long papa mo mama blong hem long miting?

Blong talem stret, wan man we kongregesen i putumaot, hem i save sidaon long eni jea long Haos Kingdom. Stat bifo finis i kam, ol buk mo ol magasin blong yumi oli pulum ol papa mo mama blong oli givhan long pikinini blong olgeta we kongregesen i putumaot, sipos i stret blong mekem olsem. Olsem nao, wan haf blong Wajtaoa blong 15 Novemba 1988, pej 19 mo 20 (Franis mo Inglis), i talem se papa mo mama tufala i save gohed blong mekem Baebol stadi blong pikinini blong tufala we kongregesen i putumaot mo we i stap yet wetem tufala long haos. Hemia i save givhan long pikinini blong i kambak long stret rod.

I no rong sipos wan smol pikinini we kongregesen i putumaot, i sidaon kwaet wetem papa mama blong hem long Haos Kingdom. I tru se i no gat rul we i talem se wan man we kongregesen i putumaot, i mas sidaon biaen long Haos Kingdom. Be hemia i no blokem hem blong i sidaon wetem papa mama blong hem long eniples we tufala i sidaon long hem. From we tufala i stap traehad blong givhan long pikinini blong i fren gud bakegen wetem Jehova, tufala i wantem tu se hem i lesin gud long taem blong ol miting. Taswe i stret nomo we pikinini ya i sidaon wetem tufala i bitim we hem i go sidaon hem wan, ale i no lesin long miting.

?Be olsem wanem sipos wan pikinini we kongregesen i putumaot, i no moa stap long haos blong papa mo mama blong hem? ?Bambae hem i save sidaon wetem tufala long miting? Bifo finis i kam, ol buk mo magasin blong yumi oli talemaot klia wanem fasin we wan Kristin i mas traehad blong gat taem hem i stap wetem wan famle we kongregesen i putumaot, mo we i no moa stap wetem olgeta long haos. * Be sipos wan we kongregesen i putumaot, i go sidaon wetem famle blong hem long miting, hemia i no min se famle ya i wantem joen wetem hem. Ol Kristin famle oli mas gat stret tingting long hemia we kongregesen i putumaot, mo oli traehad blong folem advaes we Baebol i talem long saed blong fasin joen wetem man olsem. Sipos oli mekem, bambae yumi no nid blong wari.—1 Kor. 5:11, 13; 2 Jon 11.

Yumi no nid blong wari sipos wan man we kongregesen i putumaot hem, i sidaon kwaet klosap long famle blong hem no klosap long wan narafala man. Sipos yumi putum wan rul long saed ya, bambae samting ya i save mekem sam narafala trabol i kamaot. Olgeta we kongregesen i putumaot olgeta, wetem ol famle blong olgeta we oli holemstrong, oli mas traehad blong respektem rul blong Baebol long saed blong olgeta we kongregesen i putumaot. Sipos ol Kristin oli no harem nogud from ples we man we kongregesen i putumaot, i sidaon long hem, ale i no nid blong wari long samting. *

^ par. 6 Save ya i jenisim olfala save we i stap long Wajtaoa blong 1 Eprel 1953, pej 223 (Franis mo Inglis).