Go long ol haf insaed long hem

Go long lis blong ol haf

Ol Elda—?Yufala i Leftemap Tingting Blong Olgeta We “Oli Harem Nogud”?

Ol Elda—?Yufala i Leftemap Tingting Blong Olgeta We “Oli Harem Nogud”?

Anjela * i wan sista we i gat bitim 30 yia blong hem mo hem i no mared. Hem i wari lelebet from we ol elda oli talem se bambae oli kam luk hem. Hem i stap tingting se: ‘?Bambae oli talem wanem long mi? ?Ating oli wantem luk mi from we mi stap mestem sam miting? Be mi no minim blong mestem ol miting. Evri dei, taem mi finis long wok blong lukaot long ol olfala, mi taed tumas. Antap long hemia, mama blong mi i sik mo samting ya i mekem we mi wari tumas.’

Sipos yu yu mas go visitim Anjela, ?bambae yu talem wanem long hem blong hem i “harem gud bakegen”? (Jer. 31:25) Bifo we yu go luk wan brata no sista, i gud blong tingbaot se: ‘?Wanem sam samting we mi mas mekem blong leftemap tingting blong hem?’

YU TINGBAOT OL TRABOL WE OL BRATA OLI KASEM

Plante taem yu kam taed from wok blong yu, no ol wok blong kongregesen. Yu traem tingbaot Profet Daniel. Taem hem i luk wan vison we hem i no kasem save long hem nating, hem i ‘harem nogud we tingting blong hem i trabol tumas’ from. (Dan. 8:27) Be taem enjel Gabriel i kam, hem i givhan long hem blong i kasem save long vison ya. Hem i talemaot long Daniel se Jehova i harem ol prea blong hem, mo se ‘i lavem Daniel tumas.’ (Dan. 9:21-23) Biaen, wan narafala enjel i kam mo i talem ol gudfala toktok blong mekem Daniel i harem gud bakegen.—Dan. 10:19.

Bifo we yu visitim ol brata, i gud blong tingbaot ol samting we oli stap hapen long laef blong olgeta

Long sem fasin, bifo we yu visitim wan brata no sista we i taed mo tingting blong hem i foldaon, i gud yu tingbaot se: ‘?Wanem ol trabol we brata no sista ya i kasem? ?Ol trabol ya oli  mekem hem i harem olsem wanem? ?Wanem ol gudfala fasin we hem i stap soemaot?’ Richard we i mekem wok blong elda bitim 20 yia finis, i talem se: “Mi traehad blong tingbaot ol gudfala fasin blong ol brata mo sista blong mi. Mo bifo we mi go visitim wan brata no sista, mi tingting gud fastaem long ol samting we i stap hapen long laef blong hem. Samting ya i givhan long mi blong save wanem toktok we i stret blong talem, blong leftemap tingting blong hem.” Sipos wan narafala elda i folem yu blong mekem visit, fastaem i gud we yutufala i storian tugeta long saed blong ol trabol we brata ya i stap fesem.

YU NO MEKEM OLGETA OLI FRAET

Maet wan brata i fraet blong talemaot ol tingting blong hem long wan elda we i kam visitim hem. ?Olsem wanem blong no mekem brata i fraet blong talemaot tingting blong hem? Taem yu smael mo talem ol gudfala toktok, hemia i save givhan long hem blong i no moa fraet. Maekel we i mekem wok blong elda bitim 40 yia finis, i talem se plante taem, taem hem i go visitim wan brata no sista, hem i talem long olgeta se: “Long olgeta wok we ol elda oli stap mekem, ?yu save weswan we mi laekem moa? Mi mi laekem go long haos blong ol brata mo sista blong storian mo save gud olgeta. Taswe mi wantem tumas blong kam luk yu tede.”

Taem yu visitim ol brata mo sista, i gud blong prea wetem olgeta. Long ol prea blong aposol Pol, hem i tingbaot fasin blong bilif blong ol brata blong hem, lav we oli soemaot, mo fasin blong olgeta blong stanap strong longtaem. (1 Tes. 1:2, 3) Taem yu tokbaot ol gudfala fasin blong brata blong yu long prea, hemia i save givhan long yutufala blong gat wan gudfala storian. Ol tok we yu talem i save mekem brata i harem gud. Ray we i mekem wok blong elda blong plante yia finis, i talem se: “Plante taem, yumi fogetem ol gudfala wok we yumi mekem, be taem wan narafala i talem long yumi bakegen, hemia i mekem yumi harem gud.”

YU YUSUM BAEBOL BLONG LEFTEMAP TINGTING BLONG OLGETA

Olsem Pol, yu save ‘givhan long brata blong yu, blong i kasem paoa’ taem yu soem wan vas blong Baebol long hem. (Rom 1:11) Yu traem tingbaot sipos wan brata i ting se hem i nating  nomo. Yu save ridim tok blong man blong raetem Sam, we i talem se hem i olsem wan “olfala skin blong nani, we i no moa gud blong putum waen long hem bakegen.” Nao yu save talem long brata ya se nating se man blong raetem Sam i gat tingting ya, be biaen hem i talem se: “Mi mi no tanem baksaed long ol tok we yu yu putum.” (Sam 119:83, 176) Afta we yutufala i storian long saed ya, yu save soemaot long hem se yu trastem hem ‘from we hem i no tanem baksaed long ol tok’ blong Jehova.

?Yu save talem wanem long wan sista we i no moa joen long kongregesen, no we i no moa gat strong tingting blong prij? Maet yu save tokbaot pijatok blong wan long ol ten silva mane ya we i lus. (Luk 15:8-10) Maet ol silva mane ya oli wan jen we i sas tumas. Taem yu tokbaot pijatok ya, yu save talem long sista ya se hem i wan haf blong kongregesen we i sas tumas long ae blong Jehova. Afta we yu tokbaot pijatok ya, yu save givhan long hem blong i luksave se hem i olsem wan smol sipsip blong Jehova, mo Jehova i tingbaot hem plante.

Ol brata mo sista blong yumi oli glad blong tokbaot ol vas we oli ridim long Baebol. !Taswe yu no nid blong talem evri samting! Afta we yu ridim wan vas we i laenap wetem laef blong olgeta, yu save makemaot wan tok we i impoten long vas ya mo yu askem long olgeta blong talem tingting blong olgeta. Maet afta we yu ridim 2 Korin 4:16, yu save askem se: “?I gat samtaem long laef blong yu we Jehova i mekem tingting blong yu i kam niuwan bakegen?” Taem yu mekem olsem bambae ‘bilif blong hem i save givhan long yu, olsem we bilif blong yu tu i save givhan long hem.’—Rom 1:12.

Ol brata blong yumi oli glad moa blong talemaot tingting blong olgeta taem yumi yusum Baebol

Yu save mekem wan brata no sista i harem gud tu, taem yu tokbaot wan man long Baebol we laef blong hem i sem mak long laef blong brata no sista ya. Long wan we tingting blong hem i foldaon, yu save yusum stori blong Hana no Epafrodaetas. Tingting blong tufala i foldaon be Jehova i tinghae long tufala. (1 Saml. 1:9-11, 20; Fil. 2:25-30) I gat plante narafala gudfala stori blong Baebol we yu save tokbaot wetem olgeta.

YU GOHED BLONG TINGBAOT OLGETA

I gud yu gohed blong tingbaot ol brata mo sista afta we yu visitim olgeta. (Wok 15:36) Long en blong visit, yu save askem long brata no sista blong yutufala i prij tugeta. Bernard i mekem wok blong elda plante yia finis. Afta we hem i visitim wan brata no sista, maet hem i mitim brata no sista ya bakegen samples, ale hem i traem faenemaot sipos advaes we hem i bin givim, i givhan long olgeta. Hem i no mekem wan bigfala storian bakegen, be i askem nomo se: “?Olsem wanem? ?Ol samting oli oraet?” Taem yu soemaot se yu intres long ol brata mo sista olsemia, bambae yu faenemaot sipos oli nidim yet blong yu givhan long olgeta.

Tede, ol brata mo sista blong yumi oli nidim yet we yumi soemaot se yumi kea long olgeta mo yumi lavem olgeta. (1 Tes. 5:11) Taswe bifo we yu go visitim wan brata, i gud yu tekem taem blong yu tingting gud long samting we oli stap hapen long laef blong hem. I gud yu tingbaot hem long ol prea blong yu. Mo yu jusum ol vas we oli stret. Hemia bambae i givhan long yu blong yu talem ol tok we i stret blong mekem hem i “harem gud.”

^ par. 2 Mifala i jenisim ol nem.