Go long ol haf insaed long hem

Go long lis blong ol haf

Oli Glad Nomo Blong Mekem Wok Long Nowei

Oli Glad Nomo Blong Mekem Wok Long Nowei

ROALD mo woman blong hem, Elsebeth, tufala i gat klosap 50 yia. Tufala i gat wan gudfala laef long Bergen, we hem i namba tu bigfala taon blong kantri ya Nowei. Tufala i gat tu pikinini, Isabel mo Fabian. Fofala ya i stap mekem gudfala wok long kongregesen. Roald i wan elda, mo Elsebeth i wan paenia, mo Isabel wetem Fabian tufala i pablisa.

Be long Septemba 2009, Roald mo famle blong hem oli mekem plan blong go stap wan wik long wan ples we i nidim man blong prij. Roald mo Elsebeth, wetem Fabian, we long taem ya i gat 18 yia, trifala i go long provins blong Finnmark, long not blong Nowei. Ples ya hem i stap antap long Arctic Circle, mo i ples we i kolkol tumas. Long provins ya, oli joen wetem sam narafala brata mo sista blong prij long wan vilej we nem blong hem Kjøllefjord. Roald i glad tumas blong kam prij long ples ya. Be taem ol dei oli stap pas, hem i harem olsem se wan wik i no naf. ?Wanem i hapen?

WAN KWESTIN WE I MEKEM HEM I SEK

Roald i stori se: “Brata Mario, we i paenia long provins blong Finnmark, i askem long mi sipos mifala i glad blong muf i go stap long taon ya Lakselv. Long taon ya, i gat wan kongregesen blong 23 pablisa.” Taem Mario i askem samting ya, Roald i sek. Hem i talem se: “Mi mo Elsebeth, mitufala i bin  tokbaot finis se maet wan dei bambae mitufala i muf i go stap long wan narafala ples blong givhan long ol brata long wok blong prij. Be mitufala i tingting se, bambae mitufala i mekem samting ya nomo taem tufala pikinini i bigwan mo tufala i aot long haos.” Roald i prij smoltaem nomo long eria ya, be hem i luksave se ol man oli wantem tumas blong save Jehova. Oli nidim we man i givhan long olgeta naoia. Hem i tingtingbak long taem ya i se: “Kwestin blong Mario i mekem tingting blong mi i wok tumas. Mi tingting gogo, mi no save slip long naet.” Mario i tekem Roald mo famle blong hem oli go long Lakselv. Oli aot long Kjøllefjord, oli ron 240 kilometa long trak i go saot, kasem Lakselv. Mario i wantem we Roald mo famle blong hem oli mas luk smol kongregesen we i stap long taon ya.

Taem oli kasem Lakselv, wan brata we nem blong hem Andreas, i tekem olgeta oli goraon blong lukluk ples mo Haos Kingdom. I gat tu elda long ples ya, mo Andreas i wan long tufala. Ol brata mo sista oli welkamem gud famle ya, mo oli talem se oli wantem tumas we famle ya i muf i kam stap long ples ya blong givhan long wok blong Kingdom. !Andreas i smael mo i talem se, hem i faenem wan wok finis blong Roald mo Fabian! ?Famle ya bambae i mekem wanem?

?BAMBAE OLI MEKEM WANEM DESISEN?

Taem Fabian i luk ples ya, hem i tingting se: “Mi no wantem nating blong kam stap long ples ya.” Hem i harem nogud from we hem i mas lego ol gudfala fren blong hem long Bergen, mo hem i tingting se i had long hem blong kam stap long wan smol taon olsem. Mo tu, hem i tingbaot se hem i no finis skul yet. Hem i stap skul blong kam wan man blong fiksimap lektrik. Isabel (we long taem ya i gat 21 yia) hem i gat defren tingting. Taem oli askem long hem sipos hem i glad blong muf i go stap long ples ya, hem i talem se: “!Hemia nao samting we mi mi wantem mekem longtaem finis!” Be biaen hem i talem se: “Taem mi tingting plante long samting ya, mi stap tingbaot se, ‘?I gud mi go no mi stap? ?Olsem wanem long ol fren blong mi? Maet bambae mi sore long olgeta. Maet i moagud mi stap nomo long kongregesen blong mi, i bitim we mi go long wan ples we i had, mo we mi no save wanem samting bambae i hapen.’” ?Olsem wanem long Elsebeth? Hem i talem se: “Mi harem olsem se Jehova nao i stap askem long mifala blong mekem wok ya. Be long semtaem, mi stap tingbaot haos blong mifala we mifala i jes mekem i kam niu bakegen. Mifala i stap long haos ya 25 yia finis, mo mi tingbaot olgeta samting we mifala i pem.”

Elsebeth mo Isabel

Roald mo famle blong hem, oli prij wan wik long ples ya finis, nao oli gobak long Bergen. Be oli stap tingbaot yet ol brata mo sista long Lakselv, nating se oli stap 2,100 kilometa longwe. Elsebeth i talem se: “Mi prea plante long Jehova, mo mi toktok oltaem wetem ol fren we mifala i mitim olgeta long Lakslev. Mifala i sanem ol foto long mifala mo mifala i tokbaot ol stori blong prij.” Roald i talem se: “I had long mi blong muf i go stap long narafala ples. Mi nidim taem blong tingbaot samting ya. Mo tu, mi mas tingting gud se sipos mifala i muf, ?bambae mi lukaot long ol nid blong famle olsem wanem? ?Bambae mifala i mekem olsem wanem blong kasem mane we mifala i nidim blong laef? Mi prea plante long Jehova mo mi storian wetem famle blong mi mo ol narafala brata we oli bigman long trutok.” Fabian i tingtingbak long taem ya i se: “Mi tingting plante long samting ya gogo, mi luksave se mi no gat wan gudfala risen nating blong talem se mi no save go. Mi prea plante long Jehova, ale sloslo tingting blong mi i kam strong moa se mi wantem go.” ?Olsem wanem long Isabel? Hem i wantem rere bifo we hem i go, taswe hem i stat paenia long Bergen. Hem i paenia sikis manis, mo i stadi plante long Baebol, ale hem i harem se hem i rere nao blong muf i go long narafala ples.

OLI MEKEM PLAN BLONG GO

Afta we Roald mo famle blong hem oli tingting long ol samting ya finis, oli mekem plan blong go. Roald i gat wan wok we hem i laekem, mo pei blong hem i gud. Be hem i askem long bos blong hem blong i spel long wok blong wan yia. Bos blong hem i no wantem we hem i aot longtaem olsem. Ale tufala i agri se bambae Roald i wok tu wik, i spel sikis manis, ale i wok tu wik bakegen, mo i spel sikis manis bakegen. Roald i talem se: “Pei blong mi i godaon bigwan, be i naf yet blong mifala i pem ol samting we mifala i nidim.”

Elsebeth i stori se: “Man blong mi i talem se mifala i mas traem faenem wan haos long Lakselv, olsem nao bambae mifala i letem man i rentem haos blong mifala long Bergen. Ol samting ya oli tekem taem mo oli no isi blong mekem, be mifala i winim. Afta we smol taem i pas, tufala pikinini i faenem smol wok, mo tufala i givhan long mitufala blong pem ol kakae mo transpot.”

Isabel i talem se: “Taon ya i smol tumas, taswe i no isi long mi blong faenem wan wok we i save givhan long mi blong mekem wok blong paenia. Samtaem mi harem olsem se bambae mi neva faenem wan wok.” Isabel i glad nomo blong mekem enikaen wok we hem i faenem. Long wan yia nomo hem i wok long naen defren wok. Be samting ya i givhan long hem blong pem ol samting we hem i nidim. ?Olsem wanem long Fabian? Hem i talem se: “Blong finisim skul blong mi, mi mas faenem wan kampani  we i glad blong trenem mi long wok blong fiksimap lektrik. Mi glad we mi gat janis blong mekem samting ya long Lakselv. Biaen, mi pasem eksam blong mi mo mi faenem wan haftaem wok.”

SAM NARAFALA WE OLI LUKAOT ROD BLONG PRIJ MOA

Marelius mo Kesia i stap prij long wan woman Sami long Nowei

Marelius mo woman blong hem, Kesia, tufala tu i wantem go long wan ples we i nidim moa man blong prij. Marelius, we naoia i gat 29 yia, i talem se: “Ol tok long ol asembli wetem stori blong olgeta we oli paenia, oli pulum mi blong mi wantem mekem moa wok.” Be woman blong hem, Kesia, we naoia i gat 26 yia, hem i harem se i had blong lego ol famle blong hem. Hem i talem se: “Mi laekem famle blong mi tumas, mo mi harem nogud blong stap longwe long olgeta.” Mo tu, Marelius i stap wok fultaem blong pembak lon we oli bin mekem blong pem haos blong olgeta. Hem i talem se: “Mitufala i prea plante. Mitufala i askem long Jehova blong i givhan long mitufala blong mitufala i naf blong jenisim tingting blong mitufala. Ale Jehova i givhan, mo mitufala i harem se mitufala i naf blong muf i go stap long narafala ples.” Tufala i stadi plante long Baebol, samting ya i givhan long tufala. Biaen, tufala i salem haos blong tufala, mo tufala i lego ol wok blong tufala. Nao long Ogis 2011, tufala i muf i go stap long Alta, wan taon long not blong Nowei. Taem tufala i kasem ples ya, tufala i faenem smol wok we bambae i givhan long tufala blong mekem wok blong paenia. Marelius i lukaot long mane blong wan kampani, mo Kesia i wok long wan stoa.

Knut mo Lisbeth, tufala i bitim 30 yia finis. Tufala i ridim plante stori long Yearbook we i tokbaot ol brata mo sista we oli go stap long ol ples we i nidim moa man blong talemaot Kingdom. Lisbeth i talem se: “Ol stori ya oli mekem we mi tu mi wantem go wok long wan narafala kantri. Be mi fraet lelebet from we mi no gat wan spesel save, mo mi ting se mi no naf blong mekem samting ya.” Nating se i olsem, tufala i traem tingbaot sam rod blong mekem tingting ya blong tufala i kamtru. Knut i talem se: “Mitufala i salem smol haos blong mitufala, ale mitufala i go stap wetem mama blong mi. Samting ya i givhan long mitufala blong sevem mane. Biaen, mitufala i muf i go long Bergen, blong stap wetem mama blong Lisbeth. Long ples ya, mitufala i joen long wan Inglis kongregesen. Mitufala i stap wan yia wetem kongregesen ya. Samting ya i givhan long mitufala blong luk olsem wanem mitufala i save stap long wan kongregesen we oli toktok narafala lanwis.” Smoltaem biaen, Knut mo Lisbeth tufala i harem se tufala i rere nao blong muf i go stap long wan narafala kantri. Mo tufala i muf i go long wan ples we i longwe long Nowei. Tufala i go stap long Uganda long Afrika. Evri yia, tufala i stap kambak long Nowei blong wok tu manis, ale tufala i gobak. Long rod ya, taem tufala i gobak long Uganda, tufala i gat mane we tufala i nidim blong prij evri dei.

‘YU TRAEM TRASTEM JEHOVA, BAMBAE YU LUK SE HEM I GUD’

“Famle blong mifala i joen gud moa.”—Roald

Ol brata mo ol sista ya we oli glad blong go wok long narafala ples, ?oli kasem wanem gudfala samting? Roald i talem se: ‘Taem mi mo famle blong mi, mifala i kam long smol taon ya, mifala i luk se mifala i mekem plante samting wanples i bitim taem we mifala i bin stap long Bergen. Famle blong mifala i joen gud moa. Mo mitufala i glad tumas blong luk we ol pikinini blong mitufala oli fren gud moa wetem Jehova. Mo tu, mifala i luksave se  tingting we mifala i gat long mane mo ol samting blong bodi, i jenis. Mifala i no moa tingting tumas long ol samting ya. Oli no moa impoten tumas olsem fastaem.’

Taem oli stap long kongregesen blong Lakselv, oli go prij long wan vilej we nem blong hem Karasjok. Ol man long vilej ya oli kolem olgeta ol Sami. Ol man ya oli kamaot long not blong ol kantri ya Nowei, Swiden, Finlan, mo Rasia, mo oli toktok prapa lanwis blong olgeta. From we Elsebeth i wantem prij long ol man ya, hem i tekem wan kos blong lanem lanwis blong olgeta. Naoia Elsebeth i save toktok lanwis ya smol. ?Wanem tingting blong hem long wok blong prij long ples ya? Hem i glad tumas long wok ya, i se: “Mi gat sikis Baebol stadi. !Mi glad we mi glad tumas blong stap long ples ya!”

Naoia, Fabian i wan paenia mo i mekem wok blong man blong givhan tu. Hem i talem se hem mo Isabel, tufala i givhan long tri yangfala long kongregesen we tufala i go stap long hem. Oli pulum trifala blong oli joen moa long ol wok blong kongregesen. Naoia trifala i wok strong long wok blong prij. Long trifala ya, i gat tu we tufala i baptaes finis mo tufala i mekem wok blong haftaem paenia long manis Maj 2012. Wan long trifala ya, klosap i bin lego trutok. Hem i talem tangkiu long Fabian mo Isabel, se tufala i givhan long hem blong i strong bakegen. Fabian i talem se: “Toktok blong yangfala ya i tajem hat blong mi. !Taem yu gat janis blong givhan long wan man olsem, yu harem i gud tumas!” Isabel i talem se: “Taem mifala i kam stap long ples ya, mi luk se tok ya i tru tumas se ‘yu traem trastem Jehova, bambae yu luk se hem i gud.’” (Sam 34:8, NW) Isabel i talem tu se: “!Mo, blong talem stret, laef long ples ya i no hadwok tumas, mifala i gat gudtaem!”

Laef blong Marelius mo Kesia i gud moa, nating se tufala i no gat plante samting. Kongregesen we tufala i go stap long hem, naoia i gat 41 pablisa blong hem. Marelius i talem se: “Taem mi tingtingbak long ol samting we mitufala i jenisim long laef blong mitufala, samting ya i leftemap tingting blong mi. Mifala i talem tangkiu long Jehova, se mitufala i gat janis blong kam mekem wok blong paenia long ples ya. I no gat wan narafala samting we i save mekem mi mi glad moa.” Kesia i talem se: “Mi lanem fasin ya blong trastem Jehova fulwan. Mo Jehova i lukaot gud long mitufala. I tru se mi stap longwe long ol famle blong mi, be mi luk se samting ya i gud. Naoia, taem mi luk olgeta bakegen, mi glad moa long olgeta. Mi no sore nating long desisen blong mitufala.”

Knut mo Lisbeth i stap mekem stadi wetem wan famle long Uganda

?Olsem wanem long Knut mo Lisbeth we tufala i stap long Uganda? Knut i stori se: “Mifala i mas lan long wan niufala ples mo wan kalja we i defren. Problem blong wota, problem blong lektrik, ol sik, be i oraet nomo, mitufala i gohed. !Mitufala i glad tumas from we mitufala i gat plante Baebol stadi!” Lisbeth i talem se: “Mifala i ron long trak haf aoa nomo blong go kasem ol ples ya we ol man oli neva harem gud nius. Taem mifala i kasem ol ples ya, mifala i luk we ol man oli stap ridim Baebol, mo oli stap askem mifala blong mifala i tijim olgeta. !Taem yu tijim Baebol long ol man we tingting blong olgeta i stap daon, samting ya i save mekem we yu harem gud tumas!”

!Yu traem tingbaot Jisas Kraes, we hem i Lida blong yumi! !Taem hem i luk se wok blong prij i stap go kasem plante moa ples long wol, i sua se hem i glad tumas! Tru ya, ol man blong God oli glad nomo blong mekem wok ya we Jisas i talem se: “Yufala i mas go long ol man long olgeta ples long wol, blong pulum olgeta oli kam man blong mi.”—Mat. 28:19, 20.