Wan Spesel Taem—?Bambae Yu Yu Stap Long Taem Ya?

BITIM 3,500 yia bifo finis ol man Isrel oli mas tingbaot wan taem we i spesel. Jeova i talem long wanwan famle blong ol man Isrel, we oli stap slef long Ijip, blong oli kilim wan sipsip no wan nani mo putum blad blong hem long pos blong doa blong ol haos blong olgeta. Long semfala naet ya nomo, wan enjel blong God i pas ova long ol haos we oli makem long spesel fasin ya, be i kilim i ded ol fasbon pikinini boe long haos blong ol man Ijip. Biaen ol man Isrel oli kam fri. Evri yia ol man Jiu oli mekem lafet blong Pasova blong tingbaot taem ya.

Jes afta we Jisas i mekem lafet blong Pasova ya wetem ol disaepol blong hem, hem i stanemap wan narafala impoten lafet we bambae oli mas mekem blong tingbaot ded blong hem bakegen. Hem i givim bred ya we i no gat is, long ol disaepol blong hem, mo i talem se: “Yufala i tekem, yufala i kakae. Hemia bodi blong mi.” Biaen hem i givim wan kap waen long olgeta mo hem i se: “Yufala evriwan, yufala i dring long hem, from we hemia blad blong mi, we i blong mekem promes blong God i stanap. Blad blong mi bambae i ron blong tekemaot sin blong plante man.” Mo tu Jisas i talem se: “Oltaem yufala i mas mekem samting ya blong tingbaot mi bakegen.” (Matiu 26:26-28; Luk 22:19, 20) Taswe Jisas i givim oda long ol man blong hem blong mekem lafet ya blong tingbaot ded blong hem.

Long yia ya lafet blong tingbaot ded blong Jisas bambae i stap long Wenesde, Epril 19, afta we san i godaon. Ol Witnes blong Jeova raon long wol bambae oli kam wanples long spesel naet ya blong mekem lafet ya blong Memoriol, long fasin we Jisas i askem olgeta blong mekem. Mifala i singaot yu blong kam luk mo joen wetem mifala. Plis jekem wetem ol Witnes blong Jeova long ples blong yu blong save stret taem mo ples we bambae oli holem miting ya long hem.