Go long ol haf insaed long hem

Go long lis blong ol haf

 BAEBOL I TALEM WANEM

Flas From Kala Blong Skin

Flas From Kala Blong Skin

?Olgeta man long wol oli kamaot long hu fastaem?

“Adam i putum nem blong woman blong hem se Iv, from we i mama blong olgeta man we i laef.” —Jenesis 3:20.

?OL MAN BLONG HAE SAVE OLI TALEM WANEM?

The United Nations Educational, Scientific and Cultural Organization (UNESCO) i talem se: “Olgeta man long wol oli man nomo, oli no anamol no wan narafala samting, mo evriwan oli kamaot long wan bubu nomo.”—Declaration on Race and Racial Prejudice, 1978.

?BAEBOL I TALEM WANEM?

Fastaem God i mekem tu man nomo hemia Adam mo Iv, mo i talem long tufala se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.” (Jenesis 1:28) Taswe, Adam mo Iv tufala i kam papa mo mama blong olgeta man long wol. Biaen, taem bigfala ren long taem blong Noa i draonem ol man, i gat eit man nomo oli laef. I gat Noa mo woman blong hem, mo trifala boe blong tufala mo ol woman blong trifala. Baebol i talem se yumi evriwan i kamaot biaen long trifala pikinini blong Noa.—Jenesis 9:18, 19.

 ?Yu ting se kala blong skin blong samfala i gud moa long ol narafala?

“God i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol.” —Ol Wok 17:26.

?SAM MAN OLI TALEM WANEM?

Long ol yia 1900, i gat sam grup blong man oli stat bakegen blong no laekem narafala from we kala blong skin blong olgeta i defren. Yu traem tingbaot ol Nasi. Olgeta oli bilif se taem oli bon, i gat wan spesel jin * we i mekem se kala blong skin blong olgeta i gud moa i winim ol narafala. Be UNESCO i luksave se “stamba samting we i mekem se ol man we kala blong skin blong olgeta i defren oli joen wanples mo oli sem mak, hemia from we olgeta evriwan oli kamaot long wan man nomo.”

?BAEBOL I TALEM WANEM?

Ol Wok 10:34, 35 i talem se: ‘God i stap mekem i sem mak nomo long olgeta man. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.’ From samting ya, i no gat wan man i save talem se kala blong skin blong hem i gud moa long ol narafala.

Jisas i talem klia wan tok we yumi evriwan i mas tingbaot i se: “Yufala evriwan i brata.” (Matiu 23:8) Hem i prea blong ol man blong hem oli joen gud mo blong “olgeta oli save kam wan nomo,” oli no seseraot.—Jon 17:20-23; 1 Korin 1:10.

?Fasin blong no laekem narafala from kala blong skin, bambae i finis wan dei?

“I gat taem i stap kam, we hil ya we haos blong mi i stap long hem, bambae i kam hae moa. . . . Mo ol man blong ol narafala kantri bambae oli save wokbaot blong kam long hem.”—Aesea 2:2.

?WANEM TINGTING BLONG SAM MAN?

Fasin ya blong no laekem man from kala blong skin blong hem, i pulum ol man blong plante ples blong wantem save sipos ol ogenaesesen oli mekem sam samting blong traem winim fasin ya, no nogat. Sam man oli talem se ol man blong defdefren kala, neva bambae oli joen gud.

?BAEBOL I TALEM WANEM?

God i no save letem fasin ya i gohed blong olwe. Defren olgeta hem i talem se taem Kingdom blong hem i rul, ol man mo ol woman we “oli kamaot long olgeta kala, mo long olgeta kantri, mo long olgeta laen, mo long olgeta lanwis,” bambae oli joen gud blong mekem wok blong hem, mo bambae oli soemaot se oli lavlavem olgeta. (Revelesen 7:9) Kingdom blong God i no wan samting we i stap long hat blong man. Be hem i wan gavman we bambae i mekem wol blong yumi i kam wan gudfala ples. God i wantem se ol man we bambae oli stap long ples ya oli no seraot from kala blong skin blong olgeta. *

^ par. 9 Ol smosmol samting insaed long sel, we oli mekem se bodi blong yumi i olsem wanem

^ par. 15 Blong save moa, yu save ridim japta 3 blong buk ya we ol Witnes blong Jehova oli wokem, ?Wanem Samting We Baebol i Rili Tijim? Hem i stap tu long Websaet ya www.jw.org/bi.