Go long ol haf insaed long hem

Lightbearer i Karem Laet Blong Trutok i Go Long Saot Is Esia

Lightbearer i Karem Laet Blong Trutok i Go Long Saot Is Esia

Long ol yia 1930, gud nius blong Kingdom we ol Witnes blong Jehova oli stap talemaot i no kasem yet ol ples olsem Indonesia, Malesia, mo Papua Niu Gini. ?Olsem wanem gud nius i kasem ol kantri ya? Blong gud nius i kasem ol ples ya, branj ofis blong Ostrelia (we naoia oli singaotem se Ostrelesia branj) i pem wan seling bot we i gat tu mas blong hem, mo longfala blong hem i kasem 16-meta. Oli putum nem blong hem se Lightbearer, from we ol boskru blong hem oli ol paenia, * mo oli yusum blong mekem laet blong trutok i kasem ol narafala kantri.—Matiu 5:14-16.Oli Prij Long Papua Niu Gini

Long Februari 1935, i gat 7 paenia blong Ostrelia we oli aot long Sydney long seling bot blong go long not, go kasem Port Moresby, long PNG. Oli hukum sam fis blong kakae mo oli stop long sam wof blong karem masut, sam moa kakae, o blong fiksimap sip. Long 10 Eprel 1935, oli aot long Cooktown, Queensland. Oli yusum enjin blong bot taem oli stap pas tru long raf solwota blong Great Barrier Reef. Be enjin i stat blong mekem noes, nao oli mas stopem. ?Bambae oli gobak o oli gohed nomo blong sel i go long PNG? Kapten, Eric Ewins, i talem se “mifala i no wantem gobak.” Ale oli yusum sel blong bot nomo blong sel. Mo long 28 Eprel 1935, oli kasem Port Moresby.

Ol boskru blong Lightbearer, stat long lefsaed: William Hunter, Charles Harris, Alan Bucknell (long fored), Alfred Rowe, Frank Dewar, Eric Ewins, Richard Nutley

Taem wan mekanik i stap fiksim enjin blong seling bot ya, ol boskru oli go prij long Port Moresby, be Frank Dewar i no folem olgeta. Frank, we wan long ol man ya i singaot hem se “wan taf paenia,” i talem se: ‘Mi tekem plante buk mo mi wokbaot long bus blong 32 kilometa o moa, blong prij long ol man we oli laef long bus.’ Taem hem i stap gobak, hem i folem wan defren rod mo i mas krosem wan smol reva we i gat ol krokodael long hem. Be hem i lukaotgud, mo i gobak sef. Wok blong ol paenia ya i karem frut. Samfala we oli ridim ol buk long taem ya, oli kam ol Witnes blong Jehova.

Oli Prij Long Java

Taem enjin i gud bakegen, Lightbearer i aot long Port Moresby mo i go long aelan blong Java long Daj Is India (we naoia hem i Indonesia). Afta we oli stop plante taem blong pem masut mo kakae, long 15 Julae 1935, sip i saed long wof long Batavia (we naoia hem i Jakarta).

Long ples ya, wan paenia we nem blong hem Charles Harris i aot long Lightbearer blong gohed blong talemaot gud nius long Java. * Hem i se: “Long taem ya, mifala i stap givimaot ol buk nomo, afta, mifala i muf i go long narafala taon. Mi tekem ol buk long lanwis Arabik, Jaenis, Daj, Inglis, mo Indonesia. Ol man oli glad blong ridim ol buk blong yumi, taswe long wan yia nomo mi givimaot samwe long 17,000 buk.”

Lightbearer i stap sel

Ol haeman blong Netalan we oli rul, oli luksave bigfala wok we Charles i mekem. Wantaem, wan haeman i askem long wan Witnes we i stap prij long Java se, i gat hamas Witnes i stap prij long Is Java, ples we Charles i stap long hem. Brata ya i ansa se: “Wan man nomo.” Haeman ya i talem se: “?Yu ting se bae mi bilivim samting ya? Yufala i mas gat plante man long Is, from we namba blong ol buk we oli givimaot longwe i plante we i plante.”

Oli Prij Long Singapo Mo Malesia

Lightbearer i aot long Indonesia, mo i kasem Singapo long 7 Ogis. Long ol ples we oli stop long hem, ol brata oli yusum ol laodspika blong bot blong plei long ol tok we oli rikodem. Rod ya blong talemaot gud nius i pulum tingting blong plante man. Taswe, niuspepa ya Singapore Free Press i talem se “wan laod voes i kamaot long solwota . . . long Wenesde naet.” Hem i gohed se: “I wan spesel tok we i kamaot long wan sip we i kam long Ostrelia, nem blong hem ‘Lightbearer,’ mo i stap plei long ol rikoding blong Watch Tower long Singapo.” Niuspepa ya i talem tu se “taem weta i gud, ol man we oli laef longwe olsem 3 kasem 4 kilometa oli save harem ol tok ya i klia nomo.”

Long taem ya we Lightbearer i stap yet long Singapo, Frank Dewar i aot blong gohed blong prij. Hem i tokbaot taem ya i se: “Mifala i stap mekem wok blong prij long Singapo mo mifala i laef nomo long bot. Taem mifala i rere blong aot long Singapo, Eric Ewins i talem wan samting we i mekem mi mi sapraes bigwan. Hem i talem se: ‘!Ok, Frank, yu talem se yu jusum Siam (we naoia hem i Taelan) olsem teritori blong yu! Mifala i mas lego yu nao long ples ya. !Ale yu go!’ Mi sek nogud, mi se: ‘!Be mi no save se Siam i stap wea!’” Eric i talem long Frank se hem i save kasem tren long taon blong Kuala Lumpur long ples ya we naoia oli kolem Malesia, blong go long Siam. Frank i obei, i go long Kuala Lumpur, mo sam manis afta hem i kasem Taelan. *

Taem Lightbearer i stap sel i go long not long wes saed blong Malesia, hem i stop long ol taon ya Johore Bahru, Muar, Malacca, Klang, Port Swettenham (we naoia hem i Port Klang) mo Penang. Long wanwan ples ya, oli plei ol rikoding blong ol Baebol tok long laodspika blong sip ya. Wan sista, nem blong hem Jean Deschamp, we i stap prij long Indonesia long taem ya, i talem se: “Ol man oli intres moa long bot ya i bitim wan roket we i kamaot long skae.” Afta we oli plei long ol rikoding ya, ol brata oli go soa mo oli givim buk long olgeta we oli intres.

Oli Prij Long Sumatra

Oli aot long Penang, mo oli sel i gokros long Solwota blong Malaka blong kasem Medan, Sumatra (we naoia i kam haf blong Indonesia). Eric Ewins i tokbaot taem ya i se: “Mifala i gat wan gudfala taem long Medan, mo plante man oli glad blong lesin long gud nius.” Ol brata oli givimaot samwe long 3,000 buk long eria ya.

Taem Lightbearer i gohed blong sel i godaon long saot, ol brata ya oli prij long plante bigfala haba long Is saed blong Sumatra. Long Novemba 1936, seling bot ya i gobak long Singapo. Long ples ya, Eric Ewins i aot, mo sam wik afta, hem i maredem Irene Struys, wan Witnes we i laef long Singapo. Eric mo Irene i gohed blong mekem wok blong paenia long Sumatra. Hemia i min se i nidim wan niufala kapten blong Lightbearer.

Oli Prij Long Boneo

Norman Senior, we i wan kapten blong sip, i aot long Sydney mo i kasem Singapo long Jenuware 1937, blong kam niufala kapten blong Lightbearer. Ale oli go long Boneo mo Selebes (we naoia hem i Sulawesi). Oli prij long plante ples, go kasem ol ples we oli stap 480 kilometa longwe.

Taem Lightbearer i stop long Samarinda long Borneo, habamasta i no wantem letem olgeta oli prij long ol man. Be taem Norman i eksplenem wok blong yumi, man ya i lesin mo i tekem sam buk.

Wan taem, wan lida blong jos i askem long Norman blong i kam toktok long jos. Norman i no givim wan tok, be hem yusum fonograf blong plei 5 rikoding blong ol tok we i stanap long Baebol. Lida ya i laekem ol tok ya, mo hem i tekem sam buk blong givim long ol fren blong hem. Be ol narafala lida blong jos oli no glad long wok blong ol Witnes blong Jehova. Oli kros tumas taem oli luk se ol brata oli no fraet blong prij, mo oli pulum ol haeman blong gavman blong oli blokem Lightbearer blong i no go long ol narafala haba.

Ol ples we Lightbearer i go long hem. Hemia ol nem we oli yusum long taem bifo

Oli Gobak Long Ostrelia

Long Disemba 1937, Lightbearer i sel i gobak long Ostrelia from trabol we ol lida blong skul oli mekem. Oli angka long Sydney Haba long stret taem blong go long asembli blong ol Witnes blong Jehova long Eprel 1938. Lightbearer i bin lego Sydney tri yia bifo. Oli salem bot ya long ol yia 1940, afta we gavman i putum tabu long wok blong ol Witnes long Ostrelia. Brata Ewins i talem se: “Bot ya i mekem plante impoten wok.” Mo tu, hem i talem se ol yia we hem i spenem long Lightbearer, oli “ol beswan yia long laef blong hem.”

Gudfala Wok We Lightbearer i Mekem

Ol paenia we oli stap long Lightbearer oli planem sid blong Kingdom long wan bigfala ples mo gud nius i kasem plante man. Nating se plante man oli agens, wok blong olgeta i karem frut. (Luk 8:11, 15) Mo tu, naoia long ol ples we ol paenia ya oli prij long hem, i gat moa long 40,000 man blong talemaot Kingdom. !Wok we smol grup ya we i gat strong tingting mo sip ya Lightbearer i mekem blong tekem laet blong trutok i go long ol narafala ples, i wan gudfala wok mo i wan gudfala eksampol blong yumi folem!

^ par. 2 Ol paenia oli ol Witnes blong Jehova we oli prij fultaem.

^ par. 7 Laef stori blong Charles Harris stap long Wajtaoa blong 1 Jun 1994.

^ par. 11 Yu luk 1991 Yearbook of Jehovah’s Witnesses, pej 187.