Go long ol haf insaed long hem

Go long lis blong ol haf

?Ol Rul Blong Baebol Oli Impoten Yet?

?Ol Rul Blong Baebol Oli Impoten Yet?

 Plante man tede, we sam long olgeta oli talem se oli Kristin, oli ting se ol rul blong Baebol long saed blong seks mo mared, oli no moa stret long taem blong yumi. Blong mekem ol man oli glad, sam jos oli jenisim ol tijing blong olgeta. ?Olsem wanem? ?Ol rul blong Baebol long saed blong samting we i stret mo i no stret, oli impoten yet? Yes. Ol haf we oli kam biaen, oli eksplenem from wanem i olsem.

Ol man oli nidim ol rul blong God

 God i krietem ol man blong oli lukluk i go long hem blong lidim olgeta. Baebol i talem se: “Man we i stap wokbaot, hem tu i no naf blong lidim step blong hem.” (Jeremaea 10:23) I tru se Jehova * God i krietem yumi blong yumi naf blong mekem ol desisen, be hem i no givim raet long yumi mo mekem yumi naf blong jusumaot wanem samting i stret mo wanem samting i no stret. Hem i wantem se yumi dipen long hem blong faenemaot samting ya.—Ol Proveb 3:5.

 Yumi faenem ol rul blong God long saed blong gudfala fasin, insaed long Baebol. Tingbaot tu risen from wanem ol rul ya oli impoten.

  •   God i krietem yumi. (Ol Sam 100:3) From we Jehova God i krietem yumi, hem i save stret samting we yumi nidim blong stap helti mo hapi, long bodi, tingting, mo filing. Hem i save tu ol nogud frut we bambae yumi kasem taem yumi no folem ol rul blong gudfala fasin. (Galesia 6:7) Mo tu, Jehova i wantem se yumi gat wan gudfala laef. Taswe, hem i talem long Baebol se: “Mi nao mi stap tijim yufala blong givhan long yufala, mi nao mi stap lidim yufala long rod we yufala i sud folem.”—Aesea 48:17.

  •   Hat i save lidim yumi i gorong. Plante man tede oli ting se bambae oli save samting we i stret mo i no stret, from ol filing long hat blong olgeta, hemia ol samting we oli wantem mo oli laekem. Be Baebol i talem se “hat i save giaman i bitim eni narafala samting mo i denja bitim mak.” (Jeremaea 17:9) Sipos waes blong God i no stap long hat blong yumi, hat i save lidim yumi blong mekem ol samting we biaen yumi sore from.—Ol Proveb 28:26; Prija 10:2.

?I stret we ol lida blong skul oli no wantem folem ol rul blong Baebol?

 !No, i no stret! Trutok long saed blong God mo ol fasin we hem i wantem se yumi mekem, i stap long Baebol nomo. (1 Korin 6:9-11; Galesia 5:19-23) Hem i wantem se ol man oli save trutok ya. (1 Timoti 2:3, 4) Taswe ol minista we oli talem se oli Kristin oli sud tijim ol man long samting we Tok blong God i talem.—Taetas 1:7-9.

 Plante man tede we oli no wantem save long ol rul blong Baebol, oli lukaot ol lida blong skul “we oli save talem ol tok we olgeta oli wantem harem.” (2 Timoti 4:3, futnot) Be Tok blong God i givim wan strong woning se: “!Sore tumas long olgeta we oli tokbaot samting we i gud se i nogud, mo samting we i nogud se i gud nomo!” (Aesea 5:20) I klia se God bambae i panisim ol lida blong skul we oli no tijim ol man long ol rul blong God long saed blong samting we i stret mo i no stret.

?Ol rul blong Baebol oli givim raet long yumi blong jajem narafala?

 Nogat. Olgeta we oli wantem mekem God i glad, oli folem eksampol blong Jisas Kraes mo ol tijing blong hem. Hem i tijim ol man blong hem se oli no mas jajem narafala, be oli mas soemaot lav mo respek long olgeta man.—Matiu 5:43, 44; 7:1.

 Olgeta we oli folem Jisas oli mas mekem fasin we God i glad long hem long laef blong olgeta. Be oli mas akseptem se plante narafala bambae oli jusum blong folem ol defdefren bilif. (Matiu 10:14) Jisas i no givim raet long ol man blong hem blong yusum politik o wan narafala rod, blong fosem ol narafala blong folem tingting blong God.—Jon 17:14, 16; 18:36.

?Wanem sam gudfala samting we yumi kasem taem yumi folem ol rul blong Baebol?

 Olgeta we oli traehad blong folem ol rul blong God long samting we i stret mo i no stret, bambae oli kasem gudfala frut naoia mo long fiuja. (Ol Sam 19:8, 11) Hemia sam long olgeta:

^ Jehova i nem blong God long Baebol.—Ol Sam 83:18.