Go long ol haf insaed long hem

Go long lis blong ol haf

 KWESTIN 9

?I Stret We Mi Bilif Long Evolusen?

?I Stret We Mi Bilif Long Evolusen?

I IMPOTEN BLONG SAVE

Sipos evolusen i tru, hemia i min se i no gat risen from wanem man i laef. Sipos i tru se God i wokem yumi, hemia i min se yumi save ansa blong ol kwestin long saed blong laef mo fiuja.

?BAMBAE YU YU MEKEM WANEM?

Yu traem tingbaot stori ya: Tingting blong Aleks i fasfas. Hem i bilif long God mo i bilif se God nao i wokem olgeta samting. Be tede long skul, saens tija blong hem i talem se evolusen i wan samting we i tru, mo i gat ol strong pruf we oli soemaot samting ya. Aleks i no wantem mekem olsem se hem i no kasem save. Hem i stap tingting se, ‘sipos ol saentis oli talem se i gat pruf blong samting ya, i no nid blong mi askem kwestin long olgeta.’

Sipos yu yu Aleks, ?bambae yu agri long tijing blong evolusen, from we i gat wan buk long skul we i tokbaot samting ya?

!STOP MO TINGTING!

Plante taem ol man long tugeta saed, oli kwik blong talemaot samting we oli bilif long hem, be oli no rili savegud from wanem oli bilif olsem.

  • Sam man oli bilif se God i wokem olgeta samting, from we oli lanem samting ya long jos blong olgeta.

  • Sam man oli bilif long evolusen from we oli lanem samting ya long skul.

 SIKIS KWESTIN BLONG TINGBAOT

Baebol i talem se: “Yes i tru, evri haos i gat man we i wokem, be God i wokem olgeta samting we i stap.” (Hibrus 3:4) ?Yu ting se hemia i tru?

Sipos yu talem se laef i kamaot olsem nomo, i olsem se yu talem se haos ya i kamaot hem wan nomo

OL MAN OLI TALEM SE: Evri samting long yunives oli kamaot from wan samting we i bin bosta long spes.

1 ?Hu i mekem samting ya i bosta?

2 ?Yu ting se evri samting oli kamaot olsem nomo, no yu ting se i gat wan man i wokem olgeta? ?Weswan long ol tingting ya i stret?

OL MAN OLI TALEM SE: Ol man oli kamaot long ol anamol.

3 Sipos i tru se ol man oli kamaot long ol anamol—olsem mangki—?from wanem fasin mo tingting blong man i defren long fasin mo tingting blong ol anamol, olsem mangki?

4 ?From wanem i had blong kasem save “stamba” blong laef?

OL MAN OLI TALEM SE: Evolusen i wan tru samting.

5 Man we i talem tok ya, ?hem i faenemaot finis ol pruf long saed blong laen blong hem?

6 ?Hamas man oli bilif long evolusen, jes from save we oli kasem long ol man blong saens?

“Sipos yu stap wokbaot long medel bus mo yu faenem wan naesfala haos, ?wanem tingting blong yu? ?Haos ya i stanap from ol bigbigfala tri we oli bangbangem olgeta, nao oli wokem haos ya? !Nogat! I no save hapen olsem. Taswe, i no stret blong bilif se evri samting long yunives, oli jes kamaot olsem nomo.” —Julia.

“Yu traem tingbaot sipos wan man i talem long yu se, wan samting i bosta long haos we oli stap printim ol buk long hem, mo ol ing oli go olbaot long siling mo long wol blong haos, nao oli fomem ol toktok blong wan diksonari we i stret gud?Olsem wanem? ?Bambae yu bilivim tok ya?”—Kwen.

 ?FROM WANEM YU BILIF LONG GOD?

Baebol i leftemap tingting blong yumi blong “blokem samting we yumi nomo i wantem.” (2 Timoti 1:7) Hemia i min se bilif blong yu long God, i no mas stanap long ol samting ya:

  • FILING BLONG YU (Mi harem olsem se i mas gat wan spesel paoa samples)

  • FASIN BLONG OL NARAFALA (Mi laef long wan komuniti we plante man oli go long jos)

  • NARAFALA I FOSEM YU (Papa mo mama oli tijim mi blong bilif long God—mi mas folem nomo)

Be i gat ol gudfala risen from wanem yu mas bilif.

“Long skul, taem tija i stap eksplenem olsem wanem bodi blong yumi i stap wok, mi luksave se i gat wan God we i laef i stap. From we evri haf blong bodi blong yumi, oli gat prapa wok blong olgeta, stat long ol bigbigfala haf i go kasem ol smosmol haf, nating se yumi no luksave olgeta. I rili had blong kasem save olsem wanem bodi blong yumi i wok.”—Teresa.

“Taem mi luk wan tolfala tawa, wan turis bot, wan trak, mi stap tingting se, ?hu i wokem ol samting ya? Eksampol, ol man we oli wokem ol trak, oli mas waes ya, from we i gat plante smosmol waea mo aean we oli mas joenem olgeta blong mekem se trak i save ron. Nao, sipos i gat wan man we i save wokem trak, i min se i mas gat wan man we i wokem yumi ol man.”—Rijad.

“Taem mi stadi moa long saens, mi luk se tijing blong evolusen i no tru. . . . I mas gat moa pruf we oli save pulum mi blong bilif long evolusen, sipos no mi mi bilif se i gat Wan Man we i Wokem olgeta samting.”—Antoni.

TINGBAOT

Ol saentis oli mekem risej long evolusen blong plante yia finis, be oli no agri yet long wan stret tingting, blong eksplenem evolusen. Sipos ol saentis, we oli gat hae save oli no agri long evolusen, ?i stret blong askem kwestin long saed blong evolusen?