Go long ol haf insaed long hem

Go long lis blong ol haf

 STORI 53

Jehoeada i No Fraet

Jehoeada i No Fraet

Jesebel i gat wan gel, nem blong hem Atalia, we i wan rabis woman olsem mama blong hem. Atalia i mared long king blong Juda. Taem man blong hem i ded, boe blong hem i rul. Be taem boe blong hem i ded, hem i putumap hem wan blong i rul. Nao hem i traem kilim i ded evriwan long laen blong king, from we hem i no wantem se oli rul long ples blong hem. Hem i traem kilim i ded ol smol bubu blong hem tu. Evriwan oli fraet long hem.

Hae Pris Jehoeada mo woman blong hem Jehoseba, tufala i save ol rabis fasin blong Atalia. Tufala i rere blong lusum laef blong tufala blong haedem wan bubu blong Atalia, nem blong hem Joas. Hem i stap wetem tufala long haos blong God.

Taem Joas i gat seven yia, Jehoeada i singaot ol kapten blong ol soldia mo ol Livaet, mo i talem long olgeta se: ‘Yufala i gad long ol doa blong haos blong Jehova, mo yufala i no letem wan man i kam insaed.’ Nao Jehoeada i mekem Joas i kam king blong Juda, mo i putum hat blong king long hem. Ol man Juda oli singaot se: ‘!Bae yu yu king longtaem!’

Kwin Atalia i harem bigfala noes we ol man oli mekem, nao hem i hareap blong go long haos blong God. Taem hem i luk niufala king ya, hem i singaot bigwan se: “!Ei, mi mi kwin ya! !Yufala i girap agens long mi ya!” Ol kapten blong ol soldia oli holem rabis kwin ya, oli tekem hem i go afsaed, mo oli kilim hem i ded. ?Be olsem wanem long ol man we oli folem ol rabis fasin blong hem?

Jehoeada i givhan long ol man blong oli mekem wan promes wetem Jehova, se bambae oli wosipim hem nomo. Jehoeada i talem long olgeta blong oli brekemdaon haos blong Bal mo oli smasem ol aedol. Hem i putumap ol  pris mo Livaet blong oli mekem wok long haos blong God, nao ol man oli save go mekem wosip bakegen long ples ya. Hem i putum sam soldia oli gad long haos blong God, blong mekem se ol man we oli doti long fes blong God oli no save kam insaed. Nao Jehoeada mo ol kapten blong ol soldia, oli tekem Joas i kam long haos blong king, mo oli mekem hem i sidaon long bigfala jea blong king. Ol man Juda oli glad tumas. Naoia oli fri blong mekem wosip long Jehova. Rabis Kwin Atalia i ded, mo wosip blong Bal i finis. ?Yu yu luksave olsem wanem Jehoeada i givhan long plante man from we hem i no fraet?

“Yufala i no fraet long olgeta we oli save kilim bodi i ded, be oli no save tekemaot laef blong yufala. Be yufala i mas fraet long God nomo we i save mekem bodi mo laef, tufala tugeta i lus wantaem long Gehena.”—Matiu 10:28