Go long ol haf insaed long hem

Go long lis blong ol haf

 STORI 55

Enjel i Lukaot Gud Long Hesekia

Enjel i Lukaot Gud Long Hesekia

Asiria i winim ten laen blong Isrel finis. Nao king blong Asiria, Senakerib, i wantem winim tufala laen blong Juda tu. Sloslo hem i stap winim ol taon blong Juda. Be taon ya we hem i wantem moa, hemia Jerusalem. Senakerib i no save se Jehova i stap protektem Jerusalem.

King blong Juda, we nem blong hem Hesekia, i givim plante mane long Senakerib blong i no kam faet agensem Jerusalem. Senakerib i tekem mane ya, be hem i no lesin long Hesekia. Hem mo ol strong soldia blong hem oli wantem yet blong faet agensem Jerusalem. Ol man Jerusalem oli fraet we oli fraet, from we ol ami blong Asiria oli stap kam klosap. Be Hesekia i talem long olgeta se: ‘Yufala i no fraet. Nating se ol ami blong Asiria oli strong, be Jehova bae i mekem yumi strong moa.’

Senakerib i sanem wan haeman blong hem i go long Jerusalem. Man ya i stanap afsaed long stonwol blong taon ya, mo i singaot bigwan se: ‘Jehova i no save sevem yufala. Yufala i no lesin long Hesekia, hem i stap giaman long yufala. I no gat wan god we i save protektem yufala.’

Hesekia i askem long Jehova blong i soemaot rod long hem. Jehova i ansa se: ‘Yu no fraet long ol tok blong haeman ya. Bae mi no letem Senakerib i winim Jerusalem.’ Biaen, Senakerib i raetem sam leta long Hesekia. Hem i talem se: ‘Jehova i no save sevem yufala. Yufala i letem yufala nomo i kam long han blong mifala.’ Hesekia i prea se: ‘Jehova, plis yu blokem ol man Asiria ya, yu sevem mifala, blong ol man long olgeta ples long wol bae oli save we yu nomo yu tru God.’ Jehova i talem long hem se: ‘King blong Asiria bae i no kam insaed long Jerusalem. Bae mi lukaot gud long taon blong mi.’

Senakerib i gat strong tingting se bambae hem i winim Jerusalem. Be Jehova i sanem wan enjel i go long kamp blong ol soldia blong Asiria afsaed long  Jerusalem, mo long wan naet, enjel ya i kilim 185,000 soldia i ded. From we King Senakerib i lusum ol nambawan soldia blong hem, hem i no moa save faet, ale hem i tanemraon mo i gohom. Jehova i lukaot gud long Hesekia mo Jerusalem, olsem hem i promes finis. Sipos yu yu bin stap long Jerusalem, ?yu ting se yu tu bambae yu trastem Jehova?

“Oltaem enjel blong hem i stap lukaot gud long olgeta we oli ona long hem, mo i stap tekemaot olgeta long trabol.”—Ol Sam 34:7