Go long ol haf insaed long hem

Go long lis blong ol haf

 STORI 46

Jehova i Winim Bal Long Hil Ya Kamel

Jehova i Winim Bal Long Hil Ya Kamel

Plante nogud king oli rul long ten laen blong Isrel, be Ehab nao i nogud olgeta. Hem i mared long wan rabis woman we nem blong hem Jesebel. Woman ya i wosipim Bal, ale hem mo Ehab, tufala i mekem se ol man long ful kantri oli wosipim giaman god ya. Mo tu, tufala i kilim plante profet blong Jehova oli ded. ?Jehova i mekem wanem? Hem i sanem profet Elaeja i go luk Ehab.

Elaeja i talem long King Ehab se, from we hem i mekem ol nogud fasin, bambae i no moa gat ren long Isrel. Ale, i no moa gat kakae long garen blong tri yia, mo ol man oli hanggri. Nao biaen, Jehova i sanem Elaeja i go luk Ehab bakegen. Ehab i talem se: ‘!Aaa! !Yu ya nao! !Yu yu stamba blong olgeta trabol ya!’ Elaeja i talem se: ‘!Nogat! Mi mi no man blong mekem trabol. !Yu yes! !Yu stap mekem wosip long god ya Bal! Yu singaot ol man mo ol profet blong Bal oli kam antap long hil ya Kamel, mo bae yumi luk hu nao i tru God.’

Ol man oli kam antap long hil ya, nao Elaeja i talem se: ‘Yufala i mekemap tingting blong yufala. Sipos Jehova i tru God, yufala i mekem wosip long hem. Be sipos Bal i tru God, yufala i mekem wosip long hem. I gud ol 450 profet blong Bal oli rerem wan sakrefaes mo singaot long god blong olgeta, mo mi tu bae mi rerem wan sakrefaes mo mi singaot long Jehova. God we i ansa, mo i sanem faea i kam blong bonem sakrefaes ya, hem nao i tru God.’ Ale, ol man oli agri.

Ol profet blong Bal oli rerem wan sakrefaes. Oli gohed fuldei blong singaot long god blong olgeta se: ‘!Bal! !Plis yu harem prea blong mifala!’ Taem Bal i no ansa, Elaeja i jikim olgeta, i se: ‘!Ei! !Yufala i singaot bigwan! Ating hem i stap slip ya. Yufala i wekemap hem.’ Ol profet ya oli gohed gogo san i godaon, be i no gat wan ansa.

Nao Elaeja i putum sakrefaes blong hem long olta, mo i kafsaedem wota olbaot long hem. Nao hem i prea se: ‘Jehova, plis yu mekem ol man ya oli save se yu nomo yu tru God.’ Wantaem nomo, faea i kamaot long heven mo i bonem sakrefaes ya. Ol man oli singaot se: ‘!Jehova nomo  i tru God!’ Elaeja i talem se: ‘!Yufala i holem ol profet blong Bal, yufala i no letem wan i ronwe!’ Long dei ya, oli kilim i ded ol 450 profet ya blong Bal.

Wan smol klaod i kamaot long skae long saed blong solwota, nao Elaeja i talem long Ehab se: ‘Bigfala ren i stap kam. Yu mekemrere kat blong yu, yu gohom kwiktaem.’ Ol blak klaod oli kam kavremap skae, win i blu, mo bigfala ren i foldaon. Draetaem i finis. Ehab i ron spid long kat blong hem. !Be Jehova i givhan long Elaeja blong i resis kwik moa, i bitim kat blong king! ?Be yu ting se ol problem blong Elaeja oli finis? Bambae yumi luk.

“Ol man oli mas save se yu, we nem blong yu Jehova, yu nomo yu Hae God blong olgeta ples long wol.”—Ol Sam 83:18, NW