Go long ol haf insaed long hem

Go long lis blong ol haf

 STORI 41

Deved Mo Sol

Deved Mo Sol

Afta we Deved i kilim Golaeat i ded, King Sol i putumap hem i kam komanda blong ol ami blong hem. Deved i winim plante faet, mo ol man oli glad long hem. Taem hem i kamhom, ol woman oli kam afsaed, oli danis, mo oli singsing se: ‘!Sol i kilim plante taosen man, be Deved i kilim plante taosen moa!’ Ale, Sol i jalus, nao i traem kilim Deved i ded.

Deved i save plei gud long hap. Wan dei, hem i stap plei blong mekem Sol i harem gud. Nao Sol i girap i sakem spia i go long Deved, be hem i muv, nao spia i go fas long wol. Plante taem, Sol i traem kilim Deved i ded, gogo, wan dei, Deved i girap, i ronwe i go haed long draeples.

Sol i tekem 3,000 soldia blong hem oli go blong lukaotem Deved. Sol i go insaed long wan hol blong ston we Deved mo ol man blong hem oli stap haed long hem. Ol man blong Deved oli toktok smol long  hem se: ‘!E, janis ya! !Yu kilim hem i ded!’ Deved i wokbaot sloslo i go klosap long Sol mo i katemaot wan pis klos blong hem, be Sol i no save. Afta, Deved i harem nogud, from we hem i no bin soemaot respek long king ya we Jehova i putumap. Nao hem i no letem ol man blong hem oli go kilim Sol. Biaen, hem i singaot Sol, mo i talem long hem se hem i gat janis blong kilim Sol i ded, be hem i no mekem. ?Yu ting se naoia Sol i laekem Deved?

!Nogat! Sol i ronem Deved yet. Wan naet, Deved mo Abisae we i boe blong sista blong Deved, tufala i wokbaot sloslo i go long kamp blong Sol. Evriwan oli stap slip, wetem Abnere tu, we i bodigad blong Sol. Abisae i talem se: ‘!Janis ya! !Yu letem mi mi kilim Sol i ded!’ Be Deved i talem se: ‘Jehova nomo bae i kilim Sol i ded. Yumitu karem spia blong hem nomo wetem botel wota.’

Deved i klaem i go antap long wan bigfala hil, i lukluk i godaon long kamp blong Sol, mo i singaot se: ‘?Abnere, from wanem yu no stap lukaot gud long king? ?Wehem spia mo botel wota blong hem?’ Sol i haremsave voes blong Deved, mo i talem se: ‘!Man! Yu gat janis blong kilim mi mi ded, be yu no mekem. Mi save se yu bae yu kam king blong Isrel.’ Ale Sol i girap i gohom, be hem i gohed blong agensem Deved. Be i gat wan long famle blong Sol we i no agensem Deved.

“Sipos i gat rod, yufala i mas mekem bes blong yufala blong yufala i gat pis wetem olgeta man . . . yufala i no mas givimbak.”—Rom 12:18, 19