Go long ol haf insaed long hem

Go long lis blong ol haf

 STORI 33

Rut Mo Nomi

Rut Mo Nomi

Taem kakae i sot long Isrel, Nomi, man blong hem, mo tufala boe blong hem, oli go long Moab. Biaen, man blong Nomi i ded. Tufala boe ya i mared long tu woman Moab, Rut mo Opa. Be sore tumas, tufala boe ya tu i ded.

Taem i gat kakae bakegen long Isrel, Nomi i wantem gobak. Rut mo Opa i stap wokbaot wetem hem, be long hafrod, Nomi i talem se: ‘Yutufala i givhan gud long mi mo tufala boe blong mi. I moagud yutufala i mared bakegen. Yutufala i gobak long Moab.’ Rut mo Opa i talem se: ‘!Mitufala i lavem yu! Mitufala i no save lego yu.’ Nomi i gohed blong talem se tufala i mas gobak. Ale, Opa i gobak, be Rut i stap. Nao Nomi i talem long Rut se: ‘Opa i gobak long famle blong hem mo ol god blong hem. Yu folem hem.’ Be Rut i talem se: ‘Mi no save lego yu. Ol man ples blong yu bae oli man ples blong mi, mo God blong yu bae i God blong mi.’ ?Yu ting se Nomi i harem gud?

Rut mo Nomi i kasem Isrel long stret taem blong tekemaot bale long garen. Wan dei, Rut i go wok long garen blong Boas, pikinini blong Rehab, blong pikimap ol bale we ol man blong wok oli mestem. Boas i harem oli talem se Rut i blong Moab, mo i stap lukaot gud long Nomi. Nao hem i talem long ol man blong wok blong oli livim sam bale i stap, blong Rut i pikimap.

 Taem Rut i gobak long haos, Nomi i askem se: ‘?Tede yu wok long garen blong hu?’ Rut i talem se: ‘Garen blong Boas.’ Nomi i talem se: ‘Boas i wan famle blong man blong mi. I moagud yu gohed blong wok long garen blong hem. Bae yu sef long ples ya.’

Ale, Rut i mekem olsem. Boas i luk se Rut i wok had mo i wan gudfala woman. Bifo, sipos wan man i ded be i no gat pikinini boe, woman blong hem i mas mared bakegen long wan famle blong man ya. Ale, Rut i mared long Boas, mo tufala i gat wan pikinini boe, nem blong hem Obed. Biaen, Obed i gat wan boe we i kam papa blong King Deved. Ol fren blong Nomi oli glad, oli talem se: ‘Fastaem Jehova i givim Rut long yu. Mo naoia yu gat wan smol bubu. Yumi presem Jehova.’

“Samfala oli save mekem i gud moa long yu, i winim ol brata blong yu.”—Ol Proveb 18:24