Go long ol haf insaed long hem

Go long lis blong ol haf

 STORI 30

Rehab i Haedem Tufala Spae

Rehab i Haedem Tufala Spae

Taem tufala spae blong Isrel i go long Jeriko, tufala i go long haos blong wan woman we nem blong hem Rehab. Be king blong Jeriko i harem nius se tufala i kam, nao hem i sanem ol soldia blong hem oli go long haos blong Rehab. Be Rehab i haedem tufala spae ya long wan rum antap long ruf blong haos blong hem, mo i sanem ol soldia oli gobak long wan narafala rod. Nao hem i talem long tufala spae se: ‘Mi mi givhan long yutufala from we mi save se Jehova i stap faet long saed blong yufala, mo bae yufala i winim kantri ya. Plis, yutufala i mas promes long mi se bae yufala i sevem mi mo famle blong mi.’

Tufala spae ya i talem se: ‘Mitufala i promes se evriwan long haos blong yu bae oli stap sef.’ Mo tufala i talem se: ‘Yu mas hangem wan red rop long windo blong yu, nao yu mo famle blong yu bae yufala i sef.’

Nao tufala i aot i gotru long windo, mo tufala i hang long wan rop blong godaon. Tufala i go haed long ol hil blong tri dei, mo afta, tufala i gobak long Josua. Nao ol man Isrel oli krosem Jodan Reva, mo oli  mekem rere blong winim kantri ya. Jeriko nao i fas taon we oli winim. Jehova i talem se oli mas maj i goraon long taon ya wan taem evri dei, gogo kasem sikis dei. Long namba seven dei, oli maj i goraon long taon ya seven taem. Nao ol pris oli blu long pupu blong olgeta, mo ol soldia oli singaot bigwan, nao bigfala stonwol blong taon ya i brobrok, i foldaon. Be haos blong Rehab nomo i stanap i stap. Hem mo famle blong hem oli sef from we hem i trastem Jehova.

“Rehab i glad nomo blong tekem tufala man ya blong karem tok taem tufala i kam long haos blong hem, mo i sanemaot tufala i go long narafala rod. Nao God i talemaot se hem i wan stret man from wok ya we hem i mekem.”—Jemes 2:25