Go long ol haf insaed long hem

Go long lis blong ol haf

 STORI 36

Promes We Jeftaha i Mekem

Promes We Jeftaha i Mekem

Ol man Isrel oli lego Jehova mo oli wosipim ol giaman god. Be ol giaman god ya oli no givhan long olgeta nating, taem ol man Amon oli kam faet agens long olgeta. Ol man Isrel oli harem nogud blong plante yia, nao oli talem long Jehova se: ‘Mifala i mekem samting we i nogud long fes blong yu. Plis, yu sevem mifala long ol enemi blong mifala.’ Nao oli spolem ol aedol blong olgeta, mo oli wosipim Jehova bakegen. Jehova i no wantem se oli harem nogud.

Ale, hem i singaot wan strong man blong faet we nem blong hem Jeftaha, blong i lidim ol ami oli go faet agens long ol man Amon. Jeftaha i talem long Jehova se: ‘Sipos yu mekem we mifala i win, mi mi promes se taem mi kambak, fas man we i kamaot long  haos blong mi, bae mi givim i go long yu.’ Jehova i lesin long prea blong Jeftaha, mo i givhan long hem blong i winim faet ya.

Taem Jeftaha i kambak, fas man we i kamaot long haos blong hem, hemia gel blong hem, wan pikinini nomo we hem i gat. Gel ya i stap plei tamborin mo i danis. ?Jeftaha i mekem wanem? Hem i tingbaot promes we hem i mekem, nao i talem se: ‘!O, pikinini blong mi, yu mekem mi mi harem nogud tumas! Mi mekem wan promes finis long Jehova. Blong holem promes ya, mi mas sanem yu yu go wok long haos tapolen blong God long Silo.’ Gel blong hem i talem se: ‘Papa, sipos yu mekem promes finis long Jehova, yu mas holem. Be fastaem, mi wantem go stap tu manis antap long ol hil wetem ol gel we oli fren blong mi. Afta, bae mi go long Silo.’ Gel blong Jeftaha i wok ful laef blong hem, long haos tapolen blong God. Evri yia, ol fren blong hem oli kam luk hem.

“Man we i lavem boe no gel blong hem moa i winim we hem i lavem mi, hem i no stret blong kam man blong mi.” —Matiu 10:37