Go long ol haf insaed long hem

Go long lis blong ol haf

 STORI 31

Josua Mo Ol Man Gibeon

Josua Mo Ol Man Gibeon

Nius ya se ol man Isrel oli winim Jeriko, i kasem ol narafala ples long Kenan. Nao ol king blong Kenan oli mekem plan blong faet agensem ol man Isrel. Be ol man Gibeon oli no joenem olgeta. Oli mekem wan defren plan. Oli werem ol klos we oli brobrok, nao oli kam luk Josua, mo oli talem se: ‘Mifala ya, mifala i aot long wan kantri longwe. Mifala i harem nius blong ol samting we Jehova i mekem blong givhan long yufala long Ijip mo Moab. Sipos yufala i promes se bae yufala i no mekem faet long mifala, bae mifala i kam man blong wok blong yufala.’

Josua i bilivim ol tok blong olgeta, mo i mekem promes se bambae oli no faet agensem olgeta. Be tri dei biaen, hem i faenemaot se olgeta ya oli blong Kenan nomo, oli no kam long wan narafala kantri. Ale Josua i askem long olgeta se: ‘?From wanem yufala i giaman?’ Oli ansa se: ‘!Mifala i fraet! Mifala i save se God blong yufala Jehova i stap faet long saed blong yufala. Plis, yu no kilim mifala i ded.’ Josua i holem promes blong hem, mo i letem olgeta oli stap laef.

Smoltaem biaen, faef king blong Kenan wetem ol soldia blong  olgeta, oli kam mekem faet long ol man Gibeon. Josua mo ol soldia blong hem oli wokbaot fulnaet blong go givhan long olgeta. Long nekis moning, oli faet agensem ol king blong Kenan, mo ol king ya wetem ol ami blong olgeta oli fraet, nao oli ronronwe. Mo Jehova i mekem ol bigbigfala ston blong aes oli folfoldaon long olgeta olsem ren. Nao Josua i askem long Jehova blong i mekem se san i no muv, be i stap wan ples nomo. ?From wanem Josua i askem long Jehova blong i mekem samting ya we i neva hapen bifo? From we Josua i trastem Jehova. Ale, san i no muv blong wan fuldei, go kasem we ol man Isrel oli winim ol king blong Kenan mo ol ami blong olgeta.

“‘Yes’ we yufala i talem i mas minim ‘yes’ nomo, mo ‘No’ we yufala i talem i mas minim ‘no’ nomo. Ol narafala tok we yufala i ademap, oli kamaot long Man ya we i rabis.”—Matiu 5:37