Go long ol haf insaed long hem

Go long lis blong ol haf

 STORI 34

Gideon i Winim Ol Man Midian

Gideon i Winim Ol Man Midian

Biaen, ol man Isrel oli lego Jehova bakegen, mo oli wosipim ol giaman god. Nao ol man Midian oli stilim ol anamol blong olgeta mo oli spolem ol garen blong olgeta. Oli gohed olsem blong seven yia. Ale, ol man Isrel oli ronwe i go haed long ol hol blong ston mo antap long ol hil. Oli krae long Jehova blong i givhan long olgeta. Nao Jehova i sanem wan enjel i kam toktok long yangfala man ya Gideon, i se: ‘Jehova i jusumaot yu blong yu kam wan strong man blong faet.’ Gideon i askem se: ‘?Mi save givhan olsem wanem long ol man Isrel? Mi mi nating nomo.’

?Gideon i mekem wanem blong hem i save se Jehova i jusumaot hem? Hem i putum wan skin blong sipsip long graon, mo i talem long Jehova se: ‘Sipos long moning, skin blong sipsip ya i wetwet, be graon raonabaot long hem i drae, bae mi save se yu yu wantem we mi sevem ol man Isrel.’ !Long nekis moning, skin blong sipsip i wetwet mo graon raonabaot long hem i drae! Be Gideon i askem bakegen long Jehova se long nekis moning, skin blong sipsip bambae i drae mo graon raonabaot long hem i wetwet. Taem samting ya i hapen, Gideon i bilif strong se Jehova i jusumaot hem. Ale, hem i singaot ol soldia blong hem oli kam wanples, blong oli go faet agensem ol man Midian.

 Jehova i talem long Gideon se: ‘Mi nao bae mi mekem ol man Isrel oli win. Be maet yufala i ting se yufala nomo i winim faet ya from we yufala i plante. Taswe, yu mas talem long ol soldia we oli fraet, blong oli gobak long ples blong olgeta.’ Ale, 22,000 soldia oli gobak, mo 10,000 oli stap. Nao Jehova i talem se: ‘Ol soldia ya oli plante tumas yet ya. Yu tekem olgeta oli godaon long reva, mo yu askem long olgeta blong oli dring. Olgeta we oli stap lukaot ol enemi long semtaem we oli dring, olgeta nomo bae oli stap wetem yu.’ I gat 300 man nomo we oli stap lukaot gud taem oli dring. Jehova i promes se smol grup ya nomo bambae i winim 135,000 soldia blong Midian.

Long sem naet ya, Jehova i talem long Gideon se: ‘!Naoia i stret taem blong yufala i go faet agensem ol man Midian!’ Ale, Gideon i singaot ol soldia blong hem oli kam, nao i givim ol pupu long olgeta mo ol bigfala graonpot we laet i stap haed insaed long olgeta. Mo hem i talem se: ‘Yufala i wajem mi. Samting we mi mi mekem, yufala tu i mas mekem.’ Nao Gideon i blu pupu blong hem, i smasem graonpot, i leftemap laet i go antap, mo i singaot strong se: ‘!Yumi faet long nem blong Jehova mo Gideon!’ Ol 300 soldia ya oli mekem sem mak. Ol man Midian oli fraet we oli fraet. Oli lusum hed nao oli ronron olbaot. Oli tekem ol naef blong faet blong olgeta, mo oli kilkilim olgeta bakegen. Yes, Jehova i givhan long ol man Isrel bakegen blong oli winim ol enemi blong olgeta.

“Paoa ya we i bigwan bitim mak hem i blong God, i no blong mifala.”—2 Korin 4:7