Go long ol haf insaed long hem

Go long lis blong ol haf

 STORI 24

Oli Brekem Promes Blong Olgeta

Oli Brekem Promes Blong Olgeta

Jehova i talem long Moses se: ‘Yu kam antap long hil ya, yu kam luk mi. Bae mi givim tu flat ston long yu we mi raetem ol loa long tufala.’ Ale Moses i go antap long hil ya bakegen, mo i stap 40 dei mo 40 naet long ples ya. Jehova i raetem Tenkomanmen long tu flat ston ya mo i givim long Moses.

Afta we plante dei i pas, ol man Isrel oli ting se Moses i fogetem olgeta. Nao oli talem long Eron se: ‘!Yu wokem wan god blong yumi, blong i lidim yumi!’ Eron i talem se: ‘Yufala i givim ol gol blong yufala long mi.’ Nao hem i bonem gol ya gogo i ronaot, mo hem i wokem wan bul long gol ya. Nao ol man oli talem se: ‘!Hemia nao God blong yumi, we i tekemaot yumi long Ijip!’ Nao oli wosipim bul ya mo oli mekem lafet. ?I stret we oli mekem olsem? Nogat. Oli promes finis blong mekem wosip long Jehova nomo. Be naoia oli brekem promes ya.

 Jehova i luk samting we oli stap mekem, mo i talem long Moses se: ‘Yu go luk ol man ya. Oli no obei long mi, oli stap mekem wosip long wan giaman god.’ Ale, Moses i karem tufala flat ston ya, mo i godaon long hil ya.

Taem Moses i kam klosap long ol man ya, hem i harem we oli stap singsing, mo i luk we oli stap danis, mo oli stap bodaon long bul ya. Hem i kros we i kros, nao i sakem tufala ston ya i godaon long graon, mo tufala i brobrok. Kwiktaem nomo hem i spolem bul ya, mo i askem long Eron se: ‘?Oli mekem wanem blong pulum yu, nao yu mekem nogud samting ya?’ Eron i talem se: ‘Yu no kros long mi. Yu save olgeta finis. !Oli wantem wan god, ale mi sakem ol gol blong olgeta i go long faea, nao bul ya i kamaot!’ Eron i mekem samting we i no stret. Moses i gobak antap long hil, mo i plis long Jehova blong i fogivim ol man ya.

Jehova i fogivim olgeta we oli wantem obei long hem. ?Yu luksave from wanem i impoten we oli folem Moses olsem lida blong olgeta?

“Sipos yu mekem wan promes long God, bambae yu mas mekem samting ya . . . kwiktaem, from we hem i no glad long krangke man we i save mekem promes be i no save holem.”—Prija 5:4