Go long ol haf insaed long hem

Go long lis blong ol haf

 STORI 27

Oli Agensem Jehova

Oli Agensem Jehova

Taem ol man Isrel oli stap long draeples, Kora, Datan, mo Abiram, mo 250 narafala man oli agensem Moses. Oli talem long hem se: ‘!Yu go tumas ya! ?From wanem yu putumap yu, blong yu kam lida blong mifala mo Eron i kam hae pris? Jehova i stap wetem yumi evriwan, i no wetem yutufala nomo.’ Jehova i no glad long ol tok blong olgeta. !I olsem we ol man ya oli agensem hem stret!

Moses i talem long Kora mo ol man blong hem se: ‘Tumora, long moning, yu wetem ol 250 man ya, bambae yufala i tekem ol sensa we yufala i bonem insens long olgeta, mo yufala i karem i kam long haos tapolen blong God. Jehova bae i soemaot man we hem i jusum.’

Long nekis dei, Kora wetem ol 250 man ya oli kam mitim Moses long haos tapolen blong God. Long ples ya, oli girap oli bonem insens olsem se oli ol pris. Nao Jehova i talem long Moses mo Eron se: ‘Yutufala i muv i gowe long ol man ya.’

Datan mo Abiram mo ol famle blong olgeta oli no wantem go mitim Moses long haos tapolen blong God. Ale, Jehova i talem long ol man Isrel blong oli muv i go longwe long ol haos tapolen blong Kora, Datan, mo Abiram. Kwiktaem nomo, ol man Isrel oli gowe.  Datan mo Abiram wetem ol famle blong tufala, oli stanap afsaed long haos tapolen blong olgeta. !Wantaem nomo, graon i brok, mo i open bigwan stret aninit long olgeta, nao oli foldaon i go long hol ya! Mo tu, Jehova i sanem faea i kamdaon blong bonem Kora wetem ol 250 man ya we oli stap long haos tapolen blong God.

Nao Jehova i talem long Moses se: ‘Yu tekem wokingstik blong lida blong evri laen, mo yu raetem nem blong hem long wokingstik ya. Long wokingstik blong laen blong Livae, yu raetem nem blong Eron. Nao yu putum ol wokingstik ya insaed long haos tapolen blong mi. Man we mi mi jusumaot, bae flaoa i gru long wokingstik blong hem.’

Long nekis dei, Moses i karem ol wokingstik ya oli kam afsaed blong soem long ol lida blong Isrel. Wokingstik blong Eron i gat ol flaoa i gru long hem, mo i gat frut ya amon tu. Long fasin ya, Jehova i mekem ol man oli luksave se hem i jusumaot Eron olsem hae pris.

“Yufala i mas obei long olgeta we oli stap lidim yufala, mo yufala i mas stap aninit long olgeta.”—Hibrus 13:17