Go long ol haf insaed long hem

Go long lis blong ol haf

 STORI 25

Haos Tapolen Blong Mekem Wosip

Haos Tapolen Blong Mekem Wosip

Taem Moses i stap antap long hil ya Sinae, Jehova i talem long hem blong i mekem wan spesel haos tapolen, we ol man Isrel oli save yusum blong mekem wosip. Bambae oli karem haos tapolen ya i go long olgeta ples we oli go long hem.

Jehova i talem se: ‘Yu talem long ol man, blong oli givim samting we oli naf blong givim, blong wokem haos tapolen ya.’ Ale, ol man Isrel oli givim gol, silva, bras, ol sas ston, mo iaring blong olgeta. Mo tu, oli givim wul, linen, skin blong ol anamol, mo plante narafala samting. Oli givim tumas samting, nao Moses i talem long olgeta se: ‘Yufala i no moa givim samting. Yumi gat i naf nao.’

Plante man mo woman we oli gat gudhan blong wokem ol samting, oli givhan blong wokem haos tapolen. Jehova i givim waes long olgeta blong oli save mekem ol wok ya. Sam oli wokem ol tred, sam oli wivim kaliko, mo sam oli somap ol samting blong flasem. Sam narafala oli katem ol sas ston, mo oli wokem ol samting long gol, mo oli katem ol samting long wud.

Oli wokem haos tapolen ya olsem we Jehova i talem. Oli wokem wan naes kaliko blong seraotem haos tapolen long tu rum, hemia Rum we i Tabu mo Rum we i Tabu we i Tabu. Bokis blong kontrak i stap long Rum we i Tabu we i Tabu. Oli wokem bokis ya long wud ya kasis, mo oli kavremap long gol. Long Rum we i Tabu, i gat wan ples blong putum laet i stap, wan tebol, mo wan olta blong bonem insens. Long yad blong haos tapolen, i gat wan bras besin, mo wan bigfala olta. Bokis blong  kontrak i mekem ol man Isrel oli tingbaot promes we oli mekem blong obei long Jehova. ?Yu save se wan kontrak hem i wanem? Hem i wan spesel promes.

Jehova i jusum Eron mo ol boe blong hem blong oli mekem wok blong ol pris. Oli mas lukaot gud long haos tapolen, mo mekem ol sakrefaes oli go long Jehova. Hae pris Eron nomo i save go insaed long Rum we i Tabu we i Tabu. Mo hem i mekem olsem wan taem nomo long wan yia, blong mekem sakrefaes from ol sin blong hem, famle blong hem, mo ful neson blong Isrel.

Wan yia afta we ol man Isrel oli lego Ijip, oli finisim haos tapolen ya. Naoia oli gat wan ples we oli save yusum blong mekem wosip long Jehova.

Jehova i soemaot se hem i glad long haos tapolen ya, nao i mekem wan klaod i stap antap long hem. Taem klaod ya i stap antap long haos tapolen, ol man Isrel oli no muvaot, be taem klaod i muv, oli save se oli mas muvaot. Ale, oli tektekemaot haos tapolen, oli karem wetem olgeta, mo oli wokbaot folem klaod ya.

“Mi harem wan bigfala voes . . . i talem se: ‘!Yu luk! Haos tapolen blong God i stap wetem ol man, mo hem bambae i stap wetem olgeta, mo olgeta bambae oli kam ol man blong hem. Mo God nao bambae i stap wetem olgeta.’”—Revelesen 21:3