Go long ol haf insaed long hem

Go long lis blong ol haf

 STORI 22

Merikel Long Red Si

Merikel Long Red Si

Taem Fero i harem se ol man Isrel oli lego Ijip, hem i jenisim tingting blong hem bakegen. Nao hem i talem long ol soldia blong hem se: ‘!Yufala i mekemrere ol kat blong faet, bae yumi biaen long olgeta! Yumi no sud letem olgeta oli go.’ Nao hem wetem ol ami blong hem oli biaen long ol man Isrel.

Jehova i lidim ol man blong hem. Long dei, hem i yusum wan klaod, mo long naet, bigfala faea i go fastaem long olgeta. Hem i lidim olgeta oli go kasem Red Si, mo oli mekem kamp blong olgeta long ples ya.

Nao ol man Isrel oli luk we Fero mo ol ami blong hem oli biaen long olgeta. I olsem se oli stap long wan trap, from we Red Si i stap long fored blong olgeta mo ol ami blong Ijip oli stap biaen. Nao oli krae long Moses se: ‘!Bae yumi ded! ?From wanem yu tekemaot mifala long Ijip?’ Be Moses i talem se: ‘!Yufala i no fraet! !Yufala i stanap strong! Bae yumi luk we Jehova i sevem yumi.’ ?Yu ting se Moses i trastem Jehova?

Nao Jehova i talem long ol man Isrel blong oli muvaot. Long naet ya, Jehova i muvum klaod ya i go stap long medel blong ol man Ijip mo ol man Isrel. Long saed blong ol man Ijip, ples i tudak olgeta, be Jehova i givim laet long ol man Isrel.

Nao Jehova i talem long Moses blong i leftemap han blong hem  antap long Red Si. Ale Jehova i mekem we win i blu strong long fulnaet. Nao solwota i seraot long tu haf, mo ples long medel blong tufala solwota ya i kam drae. Plante milian man Isrel i wokbaot long drae graon long medel blong tufala solwota ya, go kasem narasaed.

Fero mo ol ami blong hem oli biaen long ol man Isrel ya. Nao Jehova i mekem olgeta oli lusum hed, mo ol wil blong ol kat blong faet oli kamkamaot. Ol soldia oli singaot strong se: ‘!Yumi kamaot! !Jehova i stap faet long saed blong olgeta!’

Jehova i talem long Moses se: ‘Yu leftemap han blong yu bakegen.’ Nao wantaem nomo, bigfala solwota i kavremap ol ami blong Ijip. Fero mo ol soldia blong hem oli ded. I no gat wan long olgeta we i laef.

Long narasaed blong Red Si, bigfala hip blong ol man blong God oli singsing blong presem hem, se: “Bambae mi mi sing blong presem [Jehova], from we hem i win gud long faet ya, nao nem blong hem i go antap. Ol hos wetem ol man blong olgeta, hem i sakem olgeta finis oli go draon long solwota.” Taem oli singsing, ol woman oli plei long ol tamborin, mo oli danis. Evriwan oli glad tumas from we oli fri.

“Tingting blong yumi i save strong, mo yumi save talem se: ‘Jehova nao i stap halpem mi. Bambae mi no fraet. ?Man i save mekem wanem long mi?’” —Hibrus 13:6