Go long ol haf insaed long hem

Go long lis blong ol haf

 STORI 17

Moses i Wantem Wosipim Jehova

Moses i Wantem Wosipim Jehova

Long Ijip, ol man oli singaot famle blong Jekob se ol man Isrel. Afta we Jekob mo Josef i ded, wan narafala Fero i rul. Hem i fraet se ol man Isrel bambae oli kam plante tumas, nao oli gat moa paoa i bitim ol man Ijip. Ale hem i mekem ol man Isrel oli kam slef. Hem i fosem olgeta blong oli wokem ol brikis, mo blong oli wok had long ol plantesen. Be ol man Isrel oli kam plante moa, nating se ol man Ijip oli fosem olgeta blong oli wok strong. Fero i no glad, ale hem i talem long ol man blong hem se, oli mas kilim i ded ol pikinini boe we ol woman Isrel oli bonem. Yu traem tingbaot olsem wanem ol man Isrel oli fraet.

Wan woman Isrel, nem blong hem Jokebed, i bonem wan naes smol boe. Hem i no wantem se pikinini ya i ded, ale hem i putum hem long wan basket, mo i haedem hem long ol longlongfala gras long saed blong Nael Reva. Sista blong smol boe ya, Meriam, i stanap klosap blong luk wanem bambae i hapen long hem.

 Taem gel blong Fero i kam swim, hem i luk basket ya. Taem hem i openem, hem i luk smol boe ya we i stap krae, mo i sore long hem. Meriam i askem long hem se: ‘?Yu wantem mi go askem long wan woman blong i lukaot long pikinini ya?’ Gel blong Fero i talem yes, ale Meriam i go tekem mama blong hem Jokebed, i kam. Gel blong Fero i talem long Jokebed se: ‘Yu tekem pikinini ya, yu lukaot long hem, mo bae mi pem yu.’

Taem pikinini ya i kam bigwan, Jokebed i tekem hem i go long gel blong Fero. Gel ya i putum nem blong hem se Moses, mo i lukaot long hem olsem stret pikinini blong hem. Moses i gruap olsem wan boe blong king. Hem i save gat evri samting we hem i wantem. Be hem i no fogetem Jehova. Hem i save se hem i no man Ijip, be hem i man Isrel. Mo hem i wantem wosipim Jehova.

Taem Moses i gat 40 yia, hem i wantem givhan long ol man Isrel. Wan dei, hem i luk we wan man Ijip i stap wipim wan man Isrel, nao hem i kilim man Ijip ya i ded, mo i berem hem long sanbij. Taem Fero i faenemaot samting ya, hem i traem blong kilim Moses i ded. Be Moses i girap, i ronwe i go long kantri ya Midian. Jehova i lukaot gud long hem long ples ya.

“Moses i bilif, taswe . . . hem i no wantem we oli singaot hem se boe blong gel blong Fero, hem i jusum blong safa wetem ol man blong God.”—Hibrus 11:24, 25